प्रकाशित वाक्य 5 - लाहौली बाइबिल

मुहरबंद कताब अच़ि अल्ज़े तरपोतो

¹ दंङ अंऊ सिंहासनो टोईच़ी बंङज़ा तोहई, गेह दोऊ गुहड़रिंङ इच्च़ा कताब तंङरिगा, अंऊ तोंङ ए धकते च़ेहसी तोहई, दंङ दुह निह्ज़ी मुहर लगाइगी बंद लेह केहषी तोहई।

² दंङ गेह इच्च़ा बलवन्त स्वर्गदूता बि तंङरिगा अंऊ जोरे सग लहच़ी दि प्रचार लहज़ी लेहकी तोहई, “दि कताबो मुहर अलज़िमी ए कताब युप्च़िमी जोगे अरि तोह?”

³ पर माह स्वर्गारिंङ, माह धरती रिंङ, माह धरतीऊ योंहने ज़ि, अरिया दुह कताब अलज़िमी या दोऊ टोईच़ी नज़र केट्रिमी जोगे हुंच़िरी।

⁴ दोहथर गेह महस क्रपि लेहतिग, छना कुचे दुह कताब अलज़िमी, ए दोऊ टोईच़ी छि च़ेहसी तोह दोबि खंड्रिमी जोगे अरिला माह हुंच़िरी।

⁵ दिऊ टोहकठे दुह सेंहणा तु बिचंङ ज़ि इच्च़ा गेरंङ साते कुई, “था क्रप्तु; खंणु, यहूदा ओ गोत्रो दुह ब्राघ, अंऊ रज्ज़ा दाऊदो मोह्ड़े वंश तोह, दुह शेतानो टोईच़ी जयवंत शुहचे तोह कि दोई ए दि निह्ज़ी मुहर थक्पोतो। दुह ए दि कताब युप्च़िमी जोगे सामर्थी तोह।”

⁶ दोहथर गेह इच्च़ा कुरच़ा तंङरिगा अंऊ सिंहासन ए पिला श्रींङे प्राणी ए निह्जो पि सेंहणा तु बिचंङ खड़े तोहई। कुरच़ो टोहकठे बलिदानो निशान तोहई; दोऊ निह्ज डे ए निह्ज़ी टिरा तोहई; दि परमेश्वरो निह्ज आत्मा ए शुरे अंऊ भत्ते धरतीऊ टोईच़ी चरच़ि तोहई।

⁷ कुरच़े तुखा अंज़े दोऊ सुचंङ गुह्ट्रो दोरच़ी अंऊ सिंहासनो टोईच़ी बंङज़ा तोहई, दुह कताब रैंज़ा शिली।

⁸ अंऊ मुक्का दोई कताब रैंज़ा शिली ता दुह पि ला प्राणी ए निह्जो पि सेंहणार दुह कुरच़ो तुईज़ी द्चिह इलिरे; दंङ हर इच्च़ा सेंहणा ज़ि इच्च़ा बेंज़ ए ज़ङों बणेषी कोली च़ुमसी ताहरेर। कोली धूपे पिंङषी तोहई अंऊ परमेश्वरो पवित्र मीहतु प्रार्थना बि कंड्रा।

⁹ दंङ दोरे दि खरकोई गीत कुट्री लेहतिर, “कांह दि कताब मुहर थक्च़िमी ए दिबी युप्च़िमी जोगे तोतोन; छना कुचे कनिंङ बलिदान लहसी शुह। कनु शुहई अंऊ बहाएक्सी तोहई, मीहतिंङ छुड़ाके च़रति ताकि दोरे परमेश्वरो मीहरे बणेंके योर। दिरे मीहरे भत्ते गोत्र, भत्ते भाषा, भत्ते ठहरि ए भत्ते राज्यो दोरच़ी तोतोर।”

¹⁰ “दंङ दोतिंङ हेंदु परमेश्वरो थल्जी केई झांह ठ्रोह मीह बणाके चरच़ातन अंऊ दोतु टोईच़ी हेंदु परमेश्वरे राज लहज़ा, दंङ झांह ठ्रोह पुरोहित बणाएक्ते अंऊ दोऊ सेवा लहज़ातोर, दंङ दोरे धरतीऊ टोईच़ी राज लोहरे।”

¹¹ अपेहल गेह यह्च़ा खंईगा, दंङ अचानक ए गेह लाखो लाख स्वर्गदूता तु सग रेड्रीगा, दोतु गिनती शुहबिमी माह तोहई। दोरे सिहासनो, ए दुह पिला श्रींङे प्राणी तु ए दुह निह्जो पि सेंहणा तु पि ला हासी तोईरे।

¹² दंङ दोरे जोरे-जोरे कुट्रातेर, “दुह कुरच़ा अतिंङ बलिदान लेह चरच़ातेर, दुह महिमा ओ जोगे तोह। दोऊ अधिकार महस मोह्ड़े तोह। दोऊ ज्ञान महस डुह्गे तोह। दुह महस शाक्तिशाली तोह दंङ दुह महस साहुकार तोह। अतंई हेनर दोऊ आदर लोहनि। अतंई हेंज़ी दोऊ स्तुति लोहनि।”

¹³ दोहथल गेह स्वर्गंङ, दंङ धरतीऊ टोईच़ी, दंङ धरतीऊ योंहने ज़ि, दंङ समुन्द्रङ भत्ते रचना लहसी चीज़, दंङ भत्ते धिर अंऊ दोऊ अन्द्रेग तोह, दि कुट्री रेड्रीगा, “अतंई हेंज़ी सिंहासनो टोईच़ी बंङज़ा कुरच़ो स्तुति, आदर ए महिमा लोहनि। हमेशा-हमेशा ओ थल्जी लोहनि, छना कुचे दुह भत्ते बे शक्तिशाली तोह।”

¹⁴ दंङ पि ला प्राणी ज़ि “अमीन” कुईर! दंङ दोरे सेंहणार कोंङा शुहचे दोऊ अराधना लहज़ी लेहतिर।