प्रकाशित वाक्य 3 - लाहौली बाइबिल

सरदीस शहरो सिए कलीसिया

¹ “दोई गिऊ हखा दि ला कुई कि” सरदीस शहरो कलीसिया ओ स्वर्गदूता बि दि चेऊ, “कि अतु दोर परमेश्वरो निह्ज़ी आत्मा ए निह्ज़ी कर तोह, दोई कुट्रा, कि गेह कनु कम ञेंच़ातग, कि काह श्रींङे ता तोतोन”, पर सिए इलजी तोतोन।

² दिऊ थल्जी अच़ा इलांई! गिऊ टोईच़ी केहतु अंयों ला विशवास ऊई बचेकी तोह, दोबि पक्‍का लंहि, ताकि दि बिल्कुल ए योह्सा इबि मेस। गेह ञेंच़ातग कि कांह कमी महस तोह छना कुचे केई छि लहज़ातन परमेश्वर दोरंङ साते खुश माह।

³ दुह शिक्षा बि हिद लोह अंऊ केई महस तुहई रेड्री तातन दंङ विशवास लाहतेन। छि कनिंङ सिखासी तोह दोऊ हिद लोह, केनोह बेपरवाही दोरच़ी पश्चाताप लोह। अगर काह बेपरवाही लहज़ी जारी तहज़ातन दंङ गेह अचानक अपोग, छना इच्च़ा चोर अपा, दंङ केई दुह टेम ला माह ञेंहच़ातन अपेहल गेह कनिंङ सज़ा रंड्रीमी थल्जी अपोग।

⁴ पर हाँ, सरदीस शहरो केहतु बिचंङ रे मीहरे तोतोर, अंऊ दोच़ी विशवासी तु ठ्रोह रूठे जीवन श्रींङमातोर। दोरे रूठे खमज़ेर लेहकी ते गेरंङ साते ज़ोजातेर छना कुचे दोरे दिऊ जोगे तोतोर।

⁵ अंऊ मीहरे द्रक्शे यवातोर, दोरे ला दितु ठ्रोह छंङसी खमज़ेर लेह्पोतो। गेह दुह मीहू मिन दुह कताबो दोरच़ी माह ट्रिकपोग अंऊ दोर दुह मीहतु मिन च़ेहसी तोह अतु दोर अनंत जीवन तोह। अपेहल ला गेह घेंङौ बाह ए स्वर्गदूता तु तुईज़ी खड़े शोहग अंऊ दोऊ सेवा लहज़ातोर, दंङ गेह घोषणा लोहग कि गेह दि मीहबी ञेंहगा।

⁶ हर इच्च़ा अंऊ गिऊ खबर बि समझेक्सी जुंज़ा, दोबि दुह गप्पा ध्याना रंङ साते रेड्री जूंशी तोह अंऊ परमेश्वरो आत्मा कलीसिया रंङ कुट्रा।

फिलेदिलफिया शहरो विशवासो जोगे कलीसिया

⁷ फिलेदिलफिया शहरो कलीसियाओ स्वर्ग दूताबि दि डाक च़ेऊ, कि दि खबर दोऊ दोरच़ी शुह अंऊ पवित्र ए सत्य तोह, दुह अतु कछंङ दाऊदो राजो अधिकार तोह। अगर दोई पेतंङ अलज़ा, दंङ अच़िला दुह बंद लेह मरच़ि। दंङ अगर दोई दुह बंद लेह केई, दंङ अच़िला दुह अल्ज़े मरपोतो। दोई दिए कुट्रा कि,

⁸ गेह ञेंच़ातग कि केई छि लहज़ातन, केई छना ठ्रोह मेहनत लहज़ातन दंङ अपेहल ला हार माह मनेक्च़ातंई, रेड्रुं गेह दि ला ञेंच़ातग कि कनिंङ थोड़े अरे हिम्मत तोह, पर तांला केई गिऊ कुहषी गप्पो टोईच़ी विशवास लहज़ातन दंङ केई दि गप्पो दोरच़ी इंकार माह लहन कि केई गिऊ टोईच़ी विशवास लहज़ातन। दिऊ थल्जी गेह केहतु तुईज़ी इच्च़ा तोंखा इबिमी पेतंङ अल्ज़े केहतग, अपि अच़िला बंद लेह मारपोतो।

⁹ रेड्रु, दोरे मीहरे अंऊ झांह ठ्रोह झुंडो मीहरे तोतोर अंऊ शेतानो तोह, दावा लहज़ातंई कि दोरे यहुदी तोतोर, पर दोरे सच्चा यहुदी माह तोतोर दंङ दोच़ी हप्सी कुट्रातोर। रेड्रु गेह झांह लोहग, कि दोच़ी अंज़े कांह कोंज़ा रिंङ फ्यग लोहर, दंङ दि ञेंई च़रपोर कि गेह करंङ साते दाह तहसी तातग।

¹⁰ केई गिऊ खबरो भाषे लहज़ातन ताकि अपेहल केई दुख उठाएपोन दंङ दुह धीरज़ा रंङ साते सहन लेह तरपोन। झांह लेह, गेह मोह्ड़े परीक्षा ओ मुक्का कांह रक्षा लेह तरपोग। परीक्षा ओ दि मुक्का दि संसारो भत्ते मीहतु टोईच़ी अपतो।

¹¹ गेह युरनाह अपिमी तोतोग, झांह लेह, कनिंङ गिऊ टोईच़ी पक्‍का विशवास लेह जारी तहच़ि जूंशी तोह, ताकि अरिला कनिंङ कांह जीतो ईनाम अंऊ इच्च़ा मुकुटो ठ्रोह तोह खोकच़िमी रूकावट लेह माह जूंस।

¹² अंऊ दोई जय खोकपोतो दुह मंदिरो थम्मो ठ्रोह शोतो, अतु गेह अराधना लहज़ातग, दंङ दोतिंङ दोबि अपेहल ला छोड़ेक्सी माह पढ़ेक्पोतो। गेह दोऊ फुका रिंङ गिऊ परमेश्वरे ए परमेश्वरो शहरो मिन च़ेओग, दि दुह ए शुह अपि खरकोई यरूशलेम ला कुट्री। दि दुह ए शहर शुह अंऊ स्वर्गंङ ज़ि, मतलब गिऊ परमेश्वरो दोरच़ी योंखा अपतो। गेह दोऊ फुकारिंङ इच्च़ा खरकोई मिन च़ेओग।

¹³ हर इच्च़ा अंऊ गिऊ खबर समझेक्सी जुंज़ा, दोबि दुह गप्पा ध्याना रंङ साते रेड्री जूंशी तोह अंऊ परमेश्वरो आत्माज़ि कलीसिया ओ हखा कुट्रा।

लौदीकिया शहरो गुनगुनी कलीसिया

¹⁴ लौदीकिया शहरो कलीसिया ओ स्वर्गदूता बि दि चेऊ: “कि दि खबर दोऊ तरफे तोह अंऊ अमीन तोह। दुह विशवासो जोगे ए परमेश्वरो पाहठी सच्चाई बि प्रगट लहज़ा, दंङ गेह दुह तोतोग अतु दोरच़ी परमेश्वरे भत्ते चीज़ा तु रचना लहरी।”

¹⁵ गेह कनु कम रूठे रंङ ञेंच़ातग कि गेह ञेंच़ातग गिह्बी पता तोह कि काह माह ता गिऊ टोईच़ी केनोह विशवासो दोरच़ी इंकार लहज़ातन दंङ माह ए गिह्बी भत्ते सेहमे दाह लहज़ातन। गेह जुंज़ातग कि या ता केई गिऊ इंकार लोह या गेरंङ साते भत्ते सेहमे दाह लोह।

¹⁶ गिह्बी पता तोह कि केई माह ता गिऊ टोईच़ी माह ए केनोह विशवासो दोरच़ी इंकार लहज़ातन दंङ माह ए गिह्बी भत्ते सेहमे दाह लहज़ातन, पर काह गिऊ थल्जी केनोह विशवास रिंङ अधा-अधूरा तोतोन, दिऊ थल्जी गेह कनिंङ छोड़ेक्च़िमी तोतोग।

¹⁷ केई चेहच़ातन कि काह साहुकार तोतोन दंङ कांह कछंङ दुह भत्ते तोह अतु कनिंङ ज़रूरत तोह, पर हेले दि तोह कि काह कांणे तु ठ्रोह तोतोन, केई माह ञेंच़ातन कि काह हेले रिंङ छना ठ्रोह तोतोन। कनु टोईच़ी तरस अपि जूंस छना कुचे काह गरीब तोतोन, दिऊ मतलब दि तोह कि कनु अंदरेग विशवासो कमी तोह। काह दुह मीहतु ठ्रोह तोतोन अतु दोर खमज़ेर माह तोतोर।

¹⁸ झांह लेह गेह कनिंङ खबरदार लहज़ातग कि कनिंङ गिऊ दोरच़ी रूठे ज़ंङ च़ुमसी लेह्पोतो ताकि काह हेले रिंङ साहुकार बणेंके तरपोन। कनिंङ गिऊ दोरच़ी लेहच़िमी थल्जी छंङसी खमज़ेर ला च़ुमज़ि जूंशी तोह ताकि कनु फुक कपषा बंङज़तो दंङ काह शर्मिन्दा शुहबी मेस। दंङ कनिंङ केनोह टिरो इलाज लहज़िमी थल्जी गिऊ दोरच़ी अव्षत ला च़ुमज़ि जूंशी तोह ताकि केई खंड्री तरपोन।

¹⁹ गेह दुह मीहतिंङ रैहच़तो दंङ दोतिंङ अनुशासित लहज़ातग, अतंङ साते गेह दाह लहज़ातग। झांह लेह सही कम लहज़िमी थल्जी जोशिला शुहचे बंङज़ेंई, दंङ गुनगुना शुहबी रंङ पश्चाताप लंहि।

²⁰ रेड्रुंई, केहतु सेहमरिंङ अपिमी थल्जी, गेह दुह मीहू ठ्रोह तोतोग अंऊ चुंङो धकते खड़े तोह दंङ पेतंङ ठुकठुक लहच़ी लेहकी तोह दंङ केरे गिऊ सग रेड्रातंई दंङ गिऊ थल्जी केनातु सेहम अलज़ातंई दंङ गेह तोंखा अपोग दंङ हेनर इदि-अई दिरंङ साते संगति लोहनि।

²¹ अंऊ दोई जय खोकपोतो, गेह दोबि घेंङारंङ साते सिंहासनो टोईच़ी बंङज़ी लोहग, छना गेह ला जय खोकशी ते घेंङौ बाह रंङ साते दोऊ सिंहासनो टोईच़ी बंङज़ा इलिगा।

²² हर इच्च़ा अंऊ गिऊ खबर समझेक्सी जुंज़ा, दोबि दुह गप्पा ध्याना रंङ साते रेड्री जूंशी तोह अंऊ परमेश्वरो आत्मा कलीसिया रंङ साते कुट्रा।