प्रकाशित वाक्य 22 - लाहौली बाइबिल

¹ दोहथर स्वर्गदूते गिह्बी इच्च़ा बेंडी कंड्रिरी अंऊ दोरिंङ जीवनो ती तोहई। ती साफ अरशीहू ठ्रोह चमकेक्पाते। दि बेंडी परमेश्वर ए कुरच़ो सिंहासनो दोरच़ी हुंच़ाते।

² दंङ दुह शहरो बह्चे सड़को बिचंङ ज़ि यवाते। बेंडी ओ हर इच्च़ा कुंणी रिंङ जीवन रंड्रा फल लेहकी तोहई अंऊ कि हर साल सनी फेरा फल रंड्रातेर, मतलब हर लाह रिंङ इच्च़ा फेरा फल रंड्रातेर। संसारो मीहरे दोतु लपतु इस्तेमाल एनोह बीमारी ओ टेहषी ओ थल्जी लहज़ातेर।

³ दुह शहरा रिंङ झांह ठ्रोह छल्ले माह तोहई अंऊ परमेश्वरो श्रापो अधीन तोह। दोर्तिंङ परमेश्वर ए कुरच़ो सिंहासन शोतो, दंङ परमेश्वरो सेवक दोऊ अराधना लोहर।

⁴ दोरे परमेश्वरा बि एनोह सामटे खमोर, दंङ परमेश्वरो मिन दोतु फ्याह ओ टोईच़ी च़ेहसी शोतो।

⁵ दोर्तिंङ यह्च़ा अपेहला रात माह शोतो, अंऊ मीहरे दोर्तिंङ बंङज़ातोर, दोतिंङ एनोह अमरिंङ छंङी ओ थल्जी छंङीऊ ज़रूरत माह शोतो। माह ए दोतिंङ छंङी रंड्रीमी थल्जी ऐकेऊ ज़रूरत तोह। छना कुचे परमेश्वर ए तोह अंऊ मीहतु थल्जी छंङी रंड्रा। दंङ दिरे मीहरे अंऊ दोर्तिंङ बंङज़ातोर दोरे हमेशा ओ थल्जी राज लोहरे।

यीशु मसीहू यह्च़ा अपि

⁶ दोहथल स्वर्गदूते गिऊ हखा कुई, “दि भत्ते गप्पा अंऊ कनिंङ कांहषी तोह, हेले शुह दंङ भत्ते पाहठी विशवासो जोगे तोह। छना कुचे प्रभु परमेश्वर अच़ि भविष्यवक्ता तु निर्देशनो थल्जी एनोह आत्मा दोतिंङ रें च़रति, दुह ए तोह अच़ि गिह्बी, अंऊ कि दोऊ स्वर्गदूत शुगाह, कनिंङ दि कंड्रिमी थल्जी चरच़तो अंऊ युरनाह पूरे शोतो।”

⁷ “दंङ खंणु, गेह युरनाह अपिमी तोतोग; धन्य तोह दुह, अंऊ दि कताबंङ च़ेहसी भविष्यवाणी ओ गप्पा मनेक्च़ा।”

⁸ गिऊ मिन यूहन्ना शुह, दंङ गेह दुह ए शुगाह अच़ि दि चीज़ रेड्रिर दंङ खंई च़रति। दंङ अपेहल गेह रेड्रीगा ए खंईगा, दंङ अंऊ स्वर्गदूत गिह्बी दि गप्पा कंड्राते, गेह दुह स्वर्गदूतो अराधना लहज़िमी थल्जी दोऊ कोंज़ा रिंङ दह्चे इलिगा।

⁹ पर दोई गेरंङ साते कुई, “खंणु, झांह ठ्रोह थालोहू; छना कुचे गेह कांह ए कनु न्वा ओ भविष्यवक्तातु ए दि कताबो गप्पारे मनेक्च़िमी दोतु संगी दास शुगाह। परमेश्वरो ए अराधना लोह।”

¹⁰ दंङ दोई गेरंङ साते कुई, “दि कताबो भविष्यवाणी गप्पारे ञेंहच़िमी थल्जी मीहतिंङ रोकेक्तु था; छना कुचे दि चीज़ा तु पूरा शुहबिमी टेम पिचे अंजा।”

¹¹ दंङ दिऊ थल्जी भत्ते मीहरे अंऊ मदम लहज़ातोर दोतिंङ ज़रूरी ए दोरे कम लेह रांई। दंङ अंऊ मीहरे मदम कम लहज़ातोर, दोतिंङ मदम कम लेह जूंशी तोह। झांह ठ्रोह अगर अरिया रूठे ए पवित्र कम लहज़ा, दोतिंङ दोतु रूठे ए पवित्र कम लेह रांई।

¹² दोहथल प्रभु यीशु ज़ि कुई: “गेह युरनाह अपिमी तोतोग! दंङ छिल्ला मीहच़ी लहसी ततो, गेह दोतिंङ दोतु कम खंई ईनाम ए सज़ा रमोग।”

¹³ “गेह अल्फा ए ओमेगा, पहला ए अन्तिम, शुरूआत ए अनंत शुगाह।”

¹⁴ “धन्य तोतोर दोरे, अंऊ एनोह खमज़ेर कुरच़ो शुई रें शुहल्ज़े केट्रातोर, छना कुचे दोतिंङ दुह शहरो पेतंङो दोरच़ी अपिमी अधिकार रमोर। दंङ दोतिंङ दुह बुटो फल ज़ेइमी अधिकार ला रमोर अंऊ दोई जीवन रंड्रा।”

¹⁵ पर मदम मीहरे, दंङ एनातु साथी तु थल्जी जादू-टोना लहज़ा, कुकम, ए हत्या लहज़ा, दंङ मुर्ति तु अराधना लहज़ा, दंङ भत्ते हप्सी कुट्रा अपेहला शहरा रिंङ इबि मरपोर।

¹⁶ “गेह यीशु ज़ि घेंङौ स्वर्गदूता बि केहतु कछंङ कलीसिया तु पाहठी दि गप्पा तिंङ प्रगट लहज़िमी थल्जी चरच़ातग। गेह रज्ज़ा दाऊद ओ खानदानो शुगाह; गेह ए शुगाह, अंऊ दुह कर तु ठ्रोह तोतोग अंऊ एके हुंच़िमी मुक्का चमकेपी।”

¹⁷ परमेश्वरो आत्मा ए ब्याहुत्री जबाब रेंई, “अता!” अरिला दि सग रेड्रा, दोबि ला कुट्री जूंशी तोह, “अता!” अरिला तिस्करे तोह, दुह देर अपतो। दुह ती तुंङरेंई अंऊ दोई जीवन रंड्रा, अंऊ कि दुह भत्ते तिंङ मुफ्ता रिंङ खोकसा अंऊ दिबी तुंङमी तातोर।

चेतावनी

¹⁸ गेह यूहन्ना हर दुह मीहबी चेतावनी रंड्रातग अंऊ दि कताबो भविष्यवाणी ओ गप्पा रेड्रा अंऊ हेंतेग शुहबी लेहकी तोह दंङ तुखा ला शोतो, अंऊ गेह दि कताबा रिंङ च़ेहसी तातग: अगर अच़िला दि खबरा रिंङ छिल्ला बणाएपोतो, दंङ परमेश्वर केहतु सज़ा बणाएपोतो। दुह केतिंङ दुह मुसीबते सच़ी च़रपोतो अतु गप्पा गेह दि कताबा रिंङ लहसी तातग।

¹⁹ दंङ अगर केरे दि कताबो भविष्यवाणी ओ खबरो बिचंङ ज़ि छिल्ला हुंपातंई दंङ परमेश्वर केहतु दोरच़ी दुह आशीषर रैंज़ा शोतो अतु गप्पा दि कताबा रिंङ लहसी तोह। परमेश्वर जीवनो बुटो फला बि ज़ेइमी ए पवित्र शहरा रिंङ बंङज़िमी केहतु अधिकार ला रैंज़ा शोतो।

²⁰ यीशु ज़ि दि भत्ते गप्पो पाहठी गवाही रंड्रा, दंङ दोई कुट्रा, “वोई, गेह युरनाह अपिमी तोतोग।” गेह यूहन्ना ज़ि जबाब रेंईगा, अमीन! हे प्रभु यीशु अता!

²¹ गेह प्रार्थना लहज़ातग कि प्रभु यीशु, परमेश्वरो भत्ते मीहतु टोईच़ी मोह्ड़े दाह लोहतो। अमीन!