प्रकाशित वाक्य 21 - लाहौली बाइबिल

खरकोई धरती

¹ दोहथर गेह खरकोई स्वर्ग ए खरकोई धरती खंईगा, छना कुचे युई सर्ग ए धरती समुंद्रंङ साते योंहंषा इलजी तोहई।

² गेह पवित्र शहरा बि ला खंईगा, अंऊ कि खरकोई यरूशलेम तोह, दंङ स्वर्गो दोरच़ी धरतीऊ हखा योंखा अपि लेहकी तोह। दुह शहरा बि इच्च़ा ब्याहुत्री ठ्रोह तेयार लहसी तोहई, अपि खमज़ेर लेहसी तोहई दंङ श्रंगार लहसी तोहई दंङ अंऊ ब्याहू रंङ साते ब्याह लहज़िमी थल्जी तेयार तोह।

³ दंङ गेह इच्च़ा सग रेड्रीगा अंऊ परमेश्वरो सिंहासनो दोरच़ी कुट्री, “खंणु! एंतेग परमेश्वर मीहतु बिचंङ वास लोहतो दंङ एंतेग बेहच़ी परमेश्वर दोतंङ साते बंङज़ोतो, दंङ दोरे दोऊ मीहरे शोरे। दुह एनाह, दोतिंङ एनोह मीहतु रूपारिंङ स्वीकार लोहतो दंङ दुह दोतंङ साते बंङज़ोतो, दंङ दोरे ला दोबि एनोह परमेश्वरो रूपा रिंङ स्वीकार लोहर।

⁴ दुह दोतु टिरो दोरच़ी भत्ते मिक्ति भ्रूच़िह च़रपोतो; दंङ अरिला मीह अपेहला दुखी माह शोतो, क्रपोतो माह, टेहषी महसूस माह लोहतो, दंङ माह ए मौत शोतो, छना कुचे पुराना संसारो भत्ते चीज़ योंहंषा शुहचे योतो।”

⁵ दंङ अंऊ सिंहासनो टोईच़ी बंङज़ा तोहई, दोई कुई, “गेह भत्तेधिर खरकोई लेह केहऊगा।” दंङ यह्च़ा दोई कुई, “चेहई च़रतु, छना कुचे छि गेह कुट्रातग केई दोऊ टोईच़ी विशवास लेह तरपोन, दि गप्पारे ज़रूर पूरा शोर।”

⁶ दंङ दोई गिऊ हखा कुई, “दि भत्ते गप्पा पूरे शुहचे इलज़ा। गेह अल्फा ए ओमेगा, आदि ए अनंत शुगाह। अरिला तिस्करे तोह, गेह दोबि दुह तिऊ सोता ओ दोरच़ी मुफ्ता रिंङ तुंङमिमी थल्जी रमोग अंऊ दोई अनंत जीवन रंड्रा।”

⁷ अंऊ जय खोकपोरे, दोरे गिऊ दोरच़ी दि भत्ते आशीष खोकपोरे; दंङ गेह दोतु परमेश्वर शोहग, दंङ दुह गिऊ योह शोतो।

⁸ पर अंऊ दोरे मुसीबतो बेहच़ी गिह्बी छोड़ेके चरच़ातोर दंङ अरि गिऊ टोईच़ी विशवास लहज़ी छोड़ेके चरच़ातोर, दोतिंङ मेहू गन्धका रिंङ छङें चरच़ातोर। झांह ठ्रोह दोतिंङ ला अंऊ दोच़ी मदम कम लहज़ातोर, दंङ हत्या लहज़ातोर, दंङ कुकम लहज़ातोर, दंङ एनोह साथी तु खिलाप जादू-टोना लहज़ातोर, दंङ मुर्ति तु पूजा लहज़ातोर, दंङ भत्ते हप्सी कुट्रा, दोतिंङ ला गन्धको मेहू बिचंङ केहच़ी च़रपोर। दिबी अई मौत ला कुट्री।

कुरच़ो ब्याहुत्री

⁹ दोहथर दुह निह्ज स्वर्गदूता ज़ि, अंऊ दोच़ी मीहतु जातिऊ बिचंङ निह्ज थल मुक्को मुसीबता रंङ साते पिंङषी निह्ज कोली थोहरच़ते, दोतु बिचंङ ज़ि इदि गिऊ कछंङ अंज़े कुई, गिऊ हखा गप्पा लहरी, दोई कुई, “देर अता, गेह कनिंङ ब्याहुत्री मतलब कुरच़ो मेच़ा कमोग।”

¹⁰ दोहथर परमेश्वरो आत्माज़ि गिह्बी एनोह वशारिंङ लेह च़रति, दंङ स्वर्गदूत गिह्बी इच्च़ा मोह्ड़े ए खेका गोह टोईच़ी रैंज़ा शिली, दंङ पवित्र नगर यरूशलेम बि स्वर्गो दोरच़ी परमेश्वर कछंङ तक्सी कंड्रिरी।

¹¹ शहर परमेश्वरो दोरच़ी खोकसा दुह छंङी रें चमक्केपी लेहकी तोहई, दंङ दोऊ छंङी महस ए मंङे रह्घ मतलब यशब मिन्दु महस बेशकीमती रह्घो ठ्रोह चमकेपी लेहकी तोहई, दंङ अरशीहू ठ्रोह साफ तोहई।

¹² शहरो पिला हासी इच्च़ा मोह्ड़े भीति तोहई, दोर्तिंङ सपि पेतंङ तोईरे दंङ दोर्तिंङ हर इच्च़ा पेतंङ रिंङ इच्च़ा स्वर्गदूतो पहरा तोहई। दंङ दुह पेतंङो टोईच़ी इस्राएली तु सनी गोत्रो मिन च़ेहसी तोईरे।

¹³ पूर्वो दिशा ओ हखा षुमु पेतंङ, उत्तर दिशा ओ हखा षुमु पेतंङ, दक्षिण दिशा ओ हखा षुमु पेतंङ, दंङ पश्चिम दिशा ओ हखा षुमु पेतंङ तोईरे।

¹⁴ शहरो भिती मोह्ड़े-मोह्ड़े रह्घ तु टोईच़ी बणाएषी तोहई हर इच्च़ा रह्घ तु टोईच़ी कुरच़ो सनी प्रेरिता तु बिचंङ इच्च़ा मिन च़ेहसी तोहई।

¹⁵ अंऊ स्वर्गदूत गेरंङ साते गप्पा लहज़ी लेहकी तोहई, दोऊ कछंङ नगर ए दोऊ पेतंङ ए दंङ दोऊ मोह्ड़े भिती ओ नाप लहज़िमी थल्जी इच्च़ा ज़ङों गज तोहई।

¹⁶ दुह शहरो पि कुंणी तोहई दंङ पिला कुंणी इच्च़ा बराबर तोहई। स्वर्गदूते एनोह पक्च़िमी लठी रें शहरा बि पके च़रति: दोऊ लम्बाई झुह्ट हज़ार पि राह किलो मीटर तोहई। दोऊ चौड़ाई ए ऊंचाई दिऊ लम्बाई यो बराबर ए तोहई।

¹⁷ दोई शहरो भिती ओ ला नाप लेहपति: दिऊ ऊंचाई लगभग षुमु निज़ो त्रुई (66) मीटर तोहई। अंऊ पक्च़िमी स्वर्गदूते इस्तेमाल लहरि, दुह मीहतु दोरच़ी इस्तेमाल लहसी पक्च़िमी ठ्रोह ए तोह।

¹⁸ शहर मंङे रह्घ ए बणाषी तोहई, अपि यशब ला कुट्री तोहई, शहर शुद्ध ज़ङों दोरच़ी बणाषी तोहई, अंऊ साफ अरशीहू ठ्रोह चमकेक्पाते।

¹⁹ दुह शहरो मुयांद भत्ते पाहठी कीमती ए मोह्ड़े-मोह्ड़े रह्घो दोरच़ी सजेगी तोहई, मुण्डो मुयांद यशबो, दूसरी नीलमणि ओ, तीसरी लालड़ी ओ, चौथी मरकतो,

²⁰ पांचवीं गोमेद्को, छठवीं माणिक्य, सातवीं पितमणि ओ, आठवीं पेरोजो, नवीं पुखराजो, दसवीं लहसनिए ओ, ग्यारहवीं धूम्रकान्तो दंङ बारहवीं याकुतो तोहई।

²¹ सनी पेतंङ ला, इच्च़ा-इच्च़ा मुतिको बणाएषी तोहई, दंङ शहरो सड़का, रूठे ज़ंङ रें बणाषी तोहई अंऊ साफ अरशीहू ठ्रोह चमकेक्पाते।

²² गेह दोर्तिंङ छिल्ला मंदिर माह तंङरिगा, छना कुचे सर्वशक्तिमान परमेश्वर ए कुरच़ा दुह शहरा रिंङ तोतोर। दिऊ थल्जी दोर्तिंङ मंदिरो छल्ले ज़रूरत माह।

²³ दुह शहरा बि छंङी ओ थल्जी ऐके या लच़ंङो ज़रूरत माह। छना कुचे परमेश्वरो महिमा दुह शहरारिंङ चमक्केपा, दंङ कुरच़ा ला तोह अंऊ दिबी छंङी लहज़ा।

²⁴ दुह शहरो छंङी संसारा रिंङ बंङज़ा भत्ते मीहतिंङ छंङी रंड्रा दंङ धरतीऊ भत्ते रज्ज़ा एनोह-एनोह टंगा-ढबाह दुह शहरा रिंङ हपोरे।

²⁵ शहरो तोंखा अपिमी पेतंङ हमेशा अलसा बंङज़ातोर, छना कुचे देर अपेहल ला रात माह शवाह।

²⁶ संसारो मीहरे संसारो भत्ते सलटे चीज़ारे ए संसारो मीहतु भत्ते टंगा-ढबाह बि दुह शहरा रिंङ रैंज़ा हपोरे।

²⁷ पर छिल्ला धिर अपवित्र तोहई या दोरे मीहरे अंऊ दोच़ी मदम कम लहज़ातोर या हप्सी कुट्रातोर, दोतिंङ पक्‍का रूपारिंङ देर्तिंङ अपिमी इजाज़त माह तोहई। अंऊ मीहरे देर्तिंङ अपि तरपोर, दोरे, दुह मीहरे शुरे अतु मिन कुरच़ो जीवनो कताबा रिंङ च़ेहसी तोहई।