प्रकाशित वाक्य 2 - लाहौली बाइबिल

इफिसुस दाह मेह कलीसिया

¹ दोई गिऊ हखा दि ला कुई, “इफिसुस शहरो कलीसिया ओ स्वर्गदूता बि दि ला खबर चेहई च़रतु: गेह दुह ए शुगाह अंऊ एनोह सुचंङ गुहड़रिंङ निह्ज कर लेहपसी ततो, दंङ अंऊ ज़ङों निह्जो दिवटो बिचंङ ज़ोजा।” गेह केतंङ साते दि कुट्रातग,

² गेह ञेंहच़ातग कि केई छि लहज़ातन, केई छना मेहनत लहज़ातन दंङ अपेहल ला हार माह मनेक्च़ातंई, दंङ काह मदम मीहतु हप्सी शिक्षा सहन माह लहज़ातन। केई दुह मीहतिंङ परखेकतन अंऊ दोच़ी कुट्रातोर कि दोरे प्रेरित शुरे पर हेलेरिङ तोतोर माह, दंङ केई दोतिंङ हप्साड़ खोकषातन।

³ केई धीरज़ रंङ दुख सहन लहज़ातन, छना कुचे काह गिऊ टोईच़ी विशवास लहज़ातन, दंङ केई अपेहल ला सेवा लहज़ी बंद माह लहज़ातन।

⁴ पर गिह्बी कनु हखा दि शिकायत तोह: पर काह गेरंङ साते ध्वांए ठ्रोह दाह माह लहज़ातन छना ठ्रोह दाह केई गेरंङ साते दुह मुक्का लहज़ातेन अपेहल केई मुण्डा गिऊ टोईच़ी विशवास लाहतेन।

⁵ झांह लेह हिद लोह कि द्हपिमी बे तुहई काह अंऊर तोईन। कनिंङ पाप लेह बंद लहज़ी जूंशी तोह दंङ केनोह जीवन ध्वांए ठ्रोह श्रींङमी जूंशी तोह छना काह गिऊ टोईच़ी विशवास लहज़िमी तुहईबे श्रींङमातेंई। दंङ अगर काह सेहम माह किर्ज़ोंन दंङ गेह कनु कछंङ अपोग दंङ अंऊर कांह दिवट केहषी तोह दोबि दोरच़ी ऐखा लहज़ी ते कनिंङ सज़ा रमोग।

⁶ पर इच्च़ा रूठे गप्पा तोह अंऊ केई लहज़ातन। दुह दि तोह कि केई नीकुलई तु दोरच़ी कांहषी मदम कमो दोरच़ी नफरत लहज़ातन, ठीक ध्वांए छना गेह नफरत लहज़ातग।

⁷ हर इच्च़ा अंऊ गिऊ खबर समझेक्सी ततो, दोबि दुह गप्पा ध्याना रंङ साते रेड्री जूंशी तोह अंऊ पवित्र आत्मा कलीसिया रंङ साते कुट्रा। अंऊ मीहच़ी जीत खोक्शातोर, दोतिंङ गेह जीवनो बुटो दोरच़ी फल ज़ेइमी अधिकार रमोग, अंऊ परमेश्वरो बगीच़ा स्वर्गारिंङ तोह।

स्मुरना शहरो तंग लहसी कलीसिया

⁸ स्मुरना शहरो विशवासी तु मंडली ओ स्वर्ग दूताबि दि चेऊ: “बेऊ था; गेह मुण्डो ए थल मुखंङ तचेक शुगाह, दंङ गेह दुह शुगाह अंऊ जहानो जुंशी शुगाह।” गेह इच्च़ा फेरा सिए इलजी तोईगा पर एंतेग गेह श्रींङे तोतोग दंङ हमेशा श्रींङे बंङज़ोग, अंऊ गेह कुट्रातग दुह रेड्रुंई।

⁹ गेह ञेंहच़ातग कि कनिंङ तंगी तोह दंङ काह गरीब तोतोन। पर आत्मिक रूपारिंङ काह महस साहुकार तोतोन। गेह दुह यहुदी मीहतु पाहठी ञेंच़ातग अंऊ दोच़ी दावा लहज़ातोर कि दोरे परमेश्वरो अंङषी मीहरे शुरे, पर तोतोर माह। दोरे कनु पाहठी मदम गप्पा कुट्रातोर, पर हेले रिंङ दोरे दुह झुंडो मीहरे शुरे अंऊ शेतानो तोह।

¹⁰ दुह दुखा रंङ साते थाबेईनि अंऊ कनिंङ खोकसोतो। शेतान केहतु बिचंङ रेहतिंङ गिरफ्तार लोहतो दंङ केतिंङ कैदारिंङ केहच़ी च़रपोतो ताकि दोई केहतु परीक्षा लोहतो। केरे साह ध्याड़ा तचेक महस मुसीबतो अनुभव लोहनि। पर गिऊ टोईच़ी विशवास लहज़ी अपेहल ला था छोडे़क्तेंई, चाहे केतिंङ सिए पढ़ेक्पोतो, छना कुचे गेह केतिंङ जीतो थल्जी ईनामो रूपारिंङ अनंत जीवन रमोग।

¹¹ हर इच्च़ा अंऊ गिऊ खबर समझेक्सी जुंज़ा, दोबि दुह गप्पा ध्याना रंङ साते रेड्री जूंशी तोह अंऊ पवित्र आत्मा कलीसिया रंङ साते कुट्रा। अंऊ दोई जीत खोकपोतो दोबि अगर फुको हिसाबे सच़ी च़रपोंई। पर दोरे अपेहल ला माह सिओर।

पिरगमुन शहरो-समझोता लहसी कलीसिया

¹² पिरगमुन शहरो कलीसिया ओ स्वर्गदूता तिंङ दि चेहओ: “अतु कछंङ तेज झुह्ट धारी तलवार तोह”, दोई दि कुट्रा:

¹³ गेह दि ञेंहच़ातग कि काह दुह शहरारिंङ बंङज़ातन अंऊर शेताने राज लहज़ा। काह गिऊ थल्जी विशवासो जोगे बणेंके बंङज़िन दंङ गिऊ टोईच़ी विशवास लहज़ी ब्याड़ा माह लहरिन। केई दुह मुक्का ला विशवास लहरिन अपेहल दोच़ी अन्तिपासा बि दोर्तिंङ सच़ी च़रतिर अंऊर शेताने राज लहज़ाते। अन्तिपास मीहच़ी गिऊ पाहठी विशवासा रंङ साते कंङातोर।

¹⁴ पर गिह्बी कनु पाहठी छा शिकायत तोह: छना कुचे केई दुह मीहतु विरोध माह लहज़ातन अंऊ कांह कलीसिया रिंङ हप्सी शिक्षा रंड्रातोर, छना ठ्रोह भविष्यवक्ता बिलामे तुहई कि टेमा रिंङ रंदे। बिलामे रज्ज़ा बालाका बि सिखाएक्तो कि इस्राएलो मीहतिंङ पाप लहज़िमी थल्जी उकसाएच़िमी थल्जी छि लहज़ी जूंशी तोह। दोई दोतिंङ मुर्ति बि चढ़ाएसी बलि ज़ेई ए बुराई रंङ साते श्रींङमी कंङातो।

¹⁵ ध्वांए ठ्रोह केहतु बिचंङ रे मीहरे तोतोर अंऊ नीकुलई तु झुंडो शिक्षा मनेक्च़ातोर।

¹⁶ झांह लेह सेहम किरज़ु, अगर काह मदम कम लहज़ी बंद माह लोहन ता दंङ गेह युरनाह अपोग दंङ दुह मीहतु खिलाप दुह तलवार रंङ साते तेङसोग, अंऊ गिऊ आहच़ि हुंच़ा।

¹⁷ हर इच्च़ा अंऊ गिऊ खबर समझेक्सी जुंज़ा, दोबि दुह गप्पा ध्याना रंङ साते रेड्री जूंशी तोह अंऊ परमेश्वरो आत्मा कलीसिया रंङ साते कुट्रा। दोरे मीहरे अंऊ जीत हासिल लहज़ातोर, गेह दोतिंङ दुह मन्ना ओ दोरच़ी छा रमोग अंऊ ब्याके तोह, गेह दोतु बिचंङ भत्ते तिंङ इच्च़ा छंङसी रह्घ ला रमोग, अंऊ दोऊ टोईच़ी इच्च़ा खरकोई मिन च़ेहसी शोतो। अंऊ मीह दोबि खोकपोतो, दोबि छोड़ेके ऊई अरिला दुह मिन ञेंई मरपोतो।

थुआतीरा शहरो भ्रष्ट कलीसिया

¹⁸ “थुआतीरो शहरो कलीसिया ओ स्वर्गदूताबि चेऊ” “परमेश्वरो योह अतु टिरा मेहू ठ्रोह तोह, दंङ अतु कोंज़ा रूठे रिओह ठ्रोह चमकदार तोह, दोई दि कुट्रा।”

¹⁹ गेह ञेंच़ातग कि केई छि लहज़ातन केहच़ी इदि-अई दिरंङ साते दाह लहज़ातंई दंङ केरे गिऊ टोईच़ी पक्‍का विशवास लहज़ातंई। गेह ञेंहच़ातग कि केहच़ी छना इदि-अई दिऊ मदत लहज़ातंई। दंङ केहतु सहन शीलता ला ञेंहगा कि केरे हेंतेग दि रूठे कम दुह टेम बे महस लहज़ी लेहकी तोतोंई अपेहल केहच़ी गिऊ टोईच़ी मुण्डो विशवास लाहतंई।

²⁰ पर गिह्बी कांह हखा दि शिकायत तोह। कि काह दुह मेच़िमी इज़ेबेल बि हप्सी शिक्षा फैलाच़ि रंड्रातन। दोई कुट्रा कि दुह इच्च़ा भविष्यवक्तिन शुह, पर एनोह शिक्षा ओ दोरच़ी दोई गिऊ मीहतिंङ कुकम रिंङ शामिल शुहबिमी थल्जी ए दंङ मुर्ति बि चढ़ाएसी बलि ज़ेइमी थल्जी भरमाएच़ा।

²¹ गेह दोबि दोऊ पापो दोरच़ी पश्चाताप लहज़िमी मौका रेंईगा, पर दोई दुह कुकम ब्याड़ा लहज़िमी रंङ साते इंकार लहज़ा।

²² झांह लेह, गेह दोबि टेहची लेह च़रपोग। दंङ अंऊ दोच़ी दोरंङ साते कुकम लहज़ातोर, गेह दोतु महस दुख सहन लहज़िमी वहज़ा बणेक्पोग, अपेहल तचेक कि दोरे दोरंङ साते अंऊ मदम कम लहज़ातोर, दोरंङ पश्चाताप लहज़िमी थल्जी तेयार माह शोर।

²³ दंङ गेह दुह मीहतिंङ सच़ी च़रपोग अंऊ दोऊ शिक्षा भाषे लहज़ातोर, दंङ भत्ते कलीसिया ञेंई च़रपोतो कि गेह ए तोतोग अंऊ हर इच्च़ा मीहू विचार ए मकसदो परख लहज़ातग। गेह केहतु बिचंङ हर इच्च़ा बि दोऊ कमो हिसाबे ईनाम रमोग।

^24-25 पर थुआतीरा शहरा रिंङ केरे ऊई मीहच़ी दुह हप्सी शिक्षा ओ भाषे माह लोहनि, केहच़ी दोरिंङ हिस्सा माह लेहपच़ातंई अंऊ दोऊ चेला “शेतानो डुह्गे गप्पा कुट्रातोर।” गेह करंङ साते कुट्रातग कि गेह केहतु टोईच़ी ऊई छल्ले खास हुकुम माह रमोग, सिवाय दिऊ कि अपेहल तचेक गेह अपोग माह धोंण तचेक गिऊ टोईच़ी पक्‍का रंङ साते विशवास लहज़ी जारी तंही।

²⁶ अंऊ मीहच़ी जीत खोक्शातोर, दंङ अंऊ मीहरे संसारो अंत तचेक गिऊ हुकुमो भाषे लहज़ी जारी तहच़ातेर, गेह दोतिंङ देशो टोईच़ी राज लहज़िमी अधिकार रमोग।

²⁷ गेह दोतिंङ राज लहज़िमी दुह अधिकार रमोग छना गिऊ बाह च़ि गिह्बी रांहषी ततो। दोतु राज निह्लामो ठ्रोह पक्‍का शोतो अंऊ थक्च़िमी माह, दंङ दोतु बैरीर रेहशी ठ्रोह नन्देतु ठ्रोह शोर।

²⁸ गेह दोबि घेंङौ जीत कंड्रिमी थल्जी मुंजे सरके ओ कर कमोग।

²⁹ हर इच्च़ा अंऊ गिऊ खबर समझेक्सी जुंज़ा, दोबि दिह गप्पा ध्याना रंङ रेड्री जूंशी तोह अंऊ परमेश्वरो आत्मा कलीसिया रंङ साते कुट्रा।