प्रकाशित वाक्य 19 - लाहौली बाइबिल

¹ अपेहल शक्तिशाली स्वर्गदूते कुट्री बंद लहरी, दिऊ थल गेह छि रेड्रीगा दुह झांह ठ्रोह तोहई छना स्वर्गारिंङ महसे मीहरे कुट्री लेहकी तोतोर, “हालेलूय्याह! उद्धार ए महिमा, दंङ सामर्थ हेंदु परमेश्वरो ए तोह।

² दोऊ स्तुति लंहि, छना कुचे दोऊ भत्ते फेंसला ठीक ए सच्चा तोह। दोई दुह कुकम लहज़ार मेच़िमी ऊ फेंसला लहरी छना कुचे दोई संसारो मीहतिंङ पाप लहज़िमी थल्जी उकसाएसी तहरे। परमेश्वरे दोऊ भुगतान लहरी परमेश्वरो दास कुकम लहज़ा ओ दोरच़ी सिए इलिर।”

³ दंङ अई फेरा दोच़ी कुईर, “हालेलूय्याह! बाबेल शहरा बि नष्ट लहज़ा मेहू दोरच़ी हुंज़ा टूह अपेहल ला कम माह शोतो।”

⁴ दंङ निंज़ो पि सेंहणार ए पि प्राणी ज़ि द्चिह ते परमेश्वरा बि फ्यग लहरिर; अंऊ सिंहासनो टोईच़ी बंङज़ा तोहई, दंङ कुई, “अमीन! परमेश्वरो स्तुति शुहबी जूंस!”

कुरच़ो ब्याह

⁵ दंङ गेह अपि आ कुट्री रेड्रीगा, दंङ झांह चेहसिरी छना दि सग परमेश्वरो सिंहासनो दोरच़ी अंज़े शुह। दोई कुई, “हे ञेंहतु परमेश्वरो सेवकारे दंङ केरे अंऊ दोऊ बेह्द चेहच़ातंई, चाहे मोह्ड़े तोतोंई या कवचि परमेश्वरो स्तुति लंहि!”

⁶ दिऊ थल, गेह दि ला रेड्रीगा अंऊ महसे मीहतु हाऊष रंड्रीमी सगो ठ्रोह तोहई। दोतु हाऊष रंड्री मोह्ड़े तिऊ सगो ठ्रोह तोहई, दंङ डुह मोह्ड़े सगो ठ्रोह तोहई। गेह दोतिंङ दि कुट्री रेड्रीगा: “हालेलूय्याह! अतंई हेनर हेंदु प्रभु परमेश्वरो स्तुति लोहनि।” छना कुचे हेंदु सर्वशक्तिमान परमेश्वरे ए रज्ज़ा शुह।

⁷ अतंई, हेनर खुश ए मगन शोंई, दंङ दोऊ स्तुति लोहनि, छना कुचे अंऊ कुरच़ा तोह दोऊ ब्याह शुहबिमी तोह दंङ ब्याहुत्री मतलब दोऊ विशवासी तु झुण्ड, एनोह श्रंगार लहज़िमी थल्जी तेयार तोह।

⁸ “परमेश्वरे दोबि साफ चमकदार मलमलो खमज़ेर लेहच़िमी थल्जी रें च़रति। मलमल दुह रूठे कमा बि दर्शाएच़ा अंऊ परमेश्वरो मीहच़ी लहज़ातोर।”

⁹ स्वर्गदूते गिऊ हखा कुई, “दि चेऊ, कि धन्य तोतोर दोरे, अंऊ कुरच़ो ब्याहू बगतारिंङ बुलासी तोतोर।” दंङ दोई गिऊ हखा कुई, “दि बचन परमेश्वरो तरफे तोह, दि भत्ते पक्‍का रूपारिंङ हेले तोह।”

¹⁰ अपेहल गेह रेड्रीगा ता गेह दुह मीहू तुईज़ी कोंङा शुहचे इलिगा अंऊ गेरंङ साते गप्पा लहज़ी लेहकी तोहई, छना कुचे गेह दोऊ अराधना लहज़ातेग। दोई गिऊ हखा कुई, “गिऊ अराधना थालोहू। परमेश्वरे ए तोह अतु कनिंङ अराधना लेह जूंशी तोह। छना कुचे गेह ला ध्वांए इच्च़ा परमेश्वरो सेवक शुगाह, छना काह तोतोन दंङ ध्वांए छना इच्च़ा ए अंगीकार लहसी कनु भत्ते साथी विशवासी तोतोर, अंऊ दोच़ी ञेंहच़ातोर कि यीशु ए दोतु प्रभु शुह। दिए सच्चाई अंऊ यीशु ज़ि प्रगट लहसी ततो, दोबि घोषणा लहज़िमी थल्जी पवित्र आत्मा मीहतिंङ दोऊ जोगे बणाएच़ा।”

छंङसी रंङों सवारी

¹¹ दंङ गेह स्वर्गा बि अलसी तंङरिगा, दोर्तिंङ गिऊ तुईज़ी छंङसी रहंङ तोह; दंङ दोऊ टोईच़ी इच्च़ा सवार तोह, अंऊ परमेश्वरो विशवासो जोगे ए सच्चा सेवक शुह; दंङ धर्मिक हिसाबे दोई दोऊ बैरीतु फेंसला लहज़ा दंङ दोतु खिलाप लड़ाई लड़ेक्पा।

¹² दोऊ टिरा मेहू ठ्रोह चमकेक्पतोर, दंङ दुह महस मुकुट लहज़ा तोह दंङ दोऊ इच्च़ा मिन दोर्तिंङ च़ेहसी तोह, पर सिर्फ दोई ए दुह मिन ओ मतलब ञेंहच़ा।

¹³ दुह शुहई रिंङ ठुह्मशी खमज़ेर लहज़ा, दंङ दोऊ मिन “परमेश्वरो बचन” तोह।

¹⁴ स्वर्गंङ ज़ि मोह्ड़े सैनिका तु भीड़ दोऊ थलेच़ि जोज़ी लेहती। दिरे सेनिक छंङसी रहंङों टोईच़ी सवार तोईरे दंङ दोच़ी शुद्ध छंङसी खमज़ेर लेहसी तातोर।

¹⁵ दोऊ आहच़ि इच्च़ा तेज तलवार हुंच़िरी अंऊ दोरच़ी दोई देश यहरच़े च़रपोतो। अरिला दोऊ अधिकारा बि स्वीकार माह लहज़ा दुह दोतिंङ भत्ते रिति रंङ सज़ा रमतो। दुह सर्वशक्तिमान परमेश्वरो भयंकर प्रकोपा बि ध्वांए केहच़ी च़रपोतो, छना इच्च़ा रसकुण्डो दोरच़ी दाखो रस बहाएक्च़ा।

¹⁶ दंङ दोऊ चोगा ए पुष्टू टोईच़ी दि मिन च़ेहसी तोह: “रज्ज़ा तु रज्ज़ा ए प्रभु तु प्रभु।”

¹⁷ दंङ गेह इच्च़ा स्वर्गदूता बि ऐको टोईच़ी खड़े शुहचे खंई, दोई षाह ज़ाज़ाड़ भत्ते प्यारे सर्गंङ खेका फन्ज़ि लेहकी तोतोर, जोरे हाऊष रें कुई, “अतंई, दुह मोह्ड़े धामो थल्जी ठ्रोहका शुहचे इलांई अंऊ परमेश्वरे केहतु थल्जी तेयार लहसी ततो”,

¹⁸ “अतंई ए रज्ज़ा रे, सैनिका तु अगुवारे, शक्तिशाली सैनिकारे, रहंङ ए दोतु सवारी तु सिए फुको षाह ज़ैंई। केरे भत्ते पाहठी सिए मीहतु षाह ज़ेई तरपोंई, मतलब, दास ए आज़ाद, मोह्ड़े ए कवचि झुल्लो।”

¹⁹ दंङ गेह दुह घ्वंणा बि खंईगा अंऊ समुंद्रो दोरच़ी धकतेखा अति, दंङ धरतीऊ रज्ज़ा तु ए दोतु सेना बि खंईगा। दोरे रहंङों टोईच़ी बंङज़ा दंङ दोऊ सेना ओ खिलाप लड़ाई ओ थल्जी इच्च़ा साते अतिर।

²⁰ दंङ दुह मुण्डो घ्वांण ए दोहरंङ साते दुह हप्सी भविष्यवक्ता च़ुमसा इलि, हप्सी भविष्यवक्ता ए मुण्डो घ्वांणो तरफे चमत्कारी चिन्ह कंङे च़रति दंङ दुह भत्ते मीहतिंङ भरमाके च़रति, अच़ि मुण्डो घ्वंणो छाप एनोह फ्याह रिंङ लेहपसी ताहरेर दंङ अंऊ दोऊ मुर्ति ओ पूजा लहज़ातेर। दोकु झुल्ला श्रींङे रिंङ ए दुह मेहू झीलारिंङ केहच़ी च़रतिर, अंऊ गन्धको दोरच़ी तेयार शवाह।

²¹ दोहथर, छंङसी रहंङों सवारी ज़ि दुह घ्वांण भत्ते सेनिकर सच़ी च़रति, दोई दोतिंङ दुह तलवारे ट्रिके च़रति अंऊ दोऊ आहरिंङ प्रगट शुई। प्यारे सिए इलिर मीहतु षाह ज़ेइमी थल्जी अच़ा अतिर अपेहल तचेक कि दोतु खोकटुंङ पिंङषा मेहलि।