प्रकाशित वाक्य 18 - लाहौली बाइबिल

बाबेलो नाश

¹ दिऊ थल गेह स्वर्गंङ ज़ि इच्च़ा स्वर्गदूता बि योंखा तक्सी तंङरिगा। दोऊ कछंङ मोह्ड़े अधिकार तोहई दंङ दोऊ मोह्ड़े तेज रंङ भत्ते धरती चमेक्की इलि।

^2-3 दोई जोरे सग रंङ साते कुई, “बेबीलोनो दुह खास शहर एंतेग यहरच़ा इलज़ा।” छना कुचे दि बाबेल शहरो भत्ते राज्य तु मीहतिंङ दुह सरा तुंङमी रांहषी ततो अंऊ दोऊ मुर्ति ओ पूजा शुह। भत्ते धरतीऊ रज्ज़ा दोरंङ साते दोऊ मदम कमारिंङ शामिल शुहचे इलजी तोतोर। दुह मेच़िमी ओ किमती-किमती चीज़ा तु हिटी ओ वहज़ा ज़ि धरतीऊ व्यापारी साहुकार शुहचे इलजी तोतोर। पर परमेश्वर दि अशुद्ध ए कुकम लहज़ा मेच़िमी बि सच़ी च़रपोतो। तोग भत्ते पाहठी मांजी आत्मा दोर बंङज़िमी थल्जी अच़ा योर दंङ दि मदम ए झखंजी प्यारेतु घोंसला बणाएच़िमी ठहरि बणेंके योतो।

⁴ दंङ गेह स्वर्गंङ ज़ि अई इच्च़ा सग रेड्रीगा, “हे गिऊ मीहरे, दुह शहरो धकते हुंच़ा ईलांई। दुह मीहतु पाप हिद थालंही, ताकि अंऊ सज़ा दोतिंङ खोकसोतो, दुह केतिंङ खोकसी माह जूंस।”

⁵ छना कुचे दोतु पाप महस मोह्ड़े तोह, अतु ढेर सर्ग तचेक पिचे तोह। दंङ हेंतेग परमेश्वर दोतु भत्ते पापो थल्जी भुगतानो मांग लोहतो।

⁶ दिऊ थल्जी गेह कुट्रातग, दुह शहरा रंङ साते ला ध्वांए लोहू, छना दोई ऊईतिंङ साते लहसी ततो। दोऊ भत्ते मदम कमो थल्जी दोबि दोगुना पलटा रोंऊ। दुह शहरो थल्जी दोगुना शक्तिशाली मुसीबतो तेयारी लोह छना मुसीबते दोई ऊई मीहतंङ साते अत्याचार लहसी ततो।

⁷ दोई अंयों बढाई लहरी ए भोगविलास लहरी, दोबि धोंण दुख ए धोंण शोक रांई। दोई एनोह सेहमरिंङ दि कुट्रा, “गेह रानी ओ ठ्रोह सिंहासनो टोईच़ी विराजमान तोतोग।” गेह रंणी माहशुहगा दंङ अपेहल ला शोक माह लोहग।

⁸ दोऊ घमण्डो वहज़ा ज़ि दोऊ टोईच़ी मुसीबत अच़ा अपतो, मौत, शोक ए अकाल। दुह मेह रिंङ भस्म शुहचे योतो; छना कुचे प्रभु परमेश्वर शक्तिशाली तोह दंङ दोई दोबि दोषी ठहरासी ततो।

⁹ “दंङ भत्ते धरतीऊ रज्ज़ा अंऊ दोच़ी दोरंङ साते कुकम लहरिर, अपेहल दोरे शहरो रोहषीरंङ टूह बि खमोर, दंङ दोरे दोऊ थल्जी क्रपोर दंङ शोक लोहर।”

¹⁰ दंङ दोऊ टेहषी ओ बेह्द रंङ साते शुहचे ते ऊईतार खड़े शुहचे कोहर, हे मोह्ड़े नगर, बेबीलोन! हे पक्‍का नगर, केहतु टोईच़ी हाय! हाय! “थोड़े अरे टेमारिंङ परमेश्वरे कनिंङ नाश लेह च़रति।”

¹¹ दंङ धरतीऊ भत्ते व्यापारी दोऊ थल्जी क्रपोरे शोक लोहर, छना कुचे हेंतेग अरिला माह केहषीरि अंऊ दुह समाना बि चुमतो अंऊ दोच़ी लंङज़ातोर।

¹² दोतु समान महस पाहठी तोहई। दोरिंङ ज़ंङ, मुल, रत्न ए मुतिक तोहई। दोरिंङ बेहतरीन खमज़ेर तोईरे अंऊ मंङे छुह्द, च़मकेकी षेह्ई ए बेंगनी रंगो खमज़ेर बणाषी तोहई। दोरिंङ रूठे वास ज़डे सिङ बणाषी चीज़ारे, हाथीऊ छवा रें बणाषी चीज़ारे ला तोहई, दंङ ऊई ला समान तोहई अंऊ मंङे सिङ या रिओह या नीलमो, या संगमरमरो बणेषी तोहई,

¹³ दंङ दालचीनी, मसाले, धूप, लोबान, सरा, तेल, मैदा, छ्वाह, रद्, बंङ, त्रैंई-घ्वंणरे, रहंङरे, रथ, दंङ अंऊ मीहरे समान लंङज़ातोर ए चुमज़ातोर, दोरे हेंतेग मीहतिंङ गुलामो रूपारिंङ लङज़ि मरपोरे।

¹⁴ व्यापारी ज़ि दोरंङ साते कोहर, “दुह भत्ते चीज़ारे अंऊ केई जुंज़ातन दुह हेंतेग माह। दुह भत्ते रूठे वासो चीज़ अंऊ कनिंङ रूठे चेहसाते, दुह भत्ते चीज़ अंऊ दोतिंङ केई केनोह फुक सलटे लहज़िमी थल्जी इस्तेमाल लहज़ातेन, दुह भत्ते योंहंषा इलज़ा, दुह हेंतेग माह खोकसा।”

¹⁵ दि चीज़ा तु व्यापारी अंऊ दोऊ दोरच़ी साहुकार शुहचे इलजी तोईरे, दोऊ टेहषी ओ बेह्द ज़ि ऊईतार खड़े शोरे, दंङ क्रापच़ा ए हाऊष रंड्रा कोहर,

¹⁶ “हाय! हाय! दि मोह्ड़े नगर अंऊ मलमल, बेंगनी, षेह्ई रंगो खमज़ेर लहज़ा तोहई, दंङ ज़ंङ, रत्न ए मुतिक रंङ साते सजेगी तोहई”

¹⁷ थोड़े ए टेमारिंङ परमेश्वरे दोऊ भत्ते टंगा-ढबाह नाश लेह च़रति। तिऊ जहाज़ो भत्ते कप्तान, दंङ भत्ते यात्री, दंङ जहाज़ा रिंङ कम लहज़ा, दंङ दोरे भत्तेर अंऊ समुंद्रो दोरच़ी एनोह कमाई लहज़ातोर, बाबेल शहरो महस ऊईतार खड़े बंङज़ा खंड्री लेहतिर।

¹⁸ अपेहल दोरे दुह मेहू दोरच़ी हुंच़ा टूह बि खमोर अंऊ शहरा बि रोह्चे केट्रा, दोहथर दोच़ी हाऊष रमोर, “दि मोह्ड़े शहरो ठ्रोह ऊई अरिला शहर माह।”

¹⁹ दोच़ी एनोह दुख कंड्रिमी थल्जी एनोह पुंज़ारिंङ धुह्‌ड़ केईर। दंङ क्रापच़ा ते दंङ हऊषेक्च़ा ते कोहर, “हाय! हाय! दि मोह्ड़े नगर अतु सम्पति दोरच़ी समुंद्रो भत्ते जहाज़ो दोरे साहुकार शुहचे इलिर, थोड़े अरे टेमारिंङ दोई एनोह भत्ते टंगा-ढबाह योह्च़े च़रति।”

²⁰ “हेंतेग अंऊ केरे स्वर्गारिंङ बंङज़ातंई! परमेश्वरो मीहरे! प्रेरित ए नवी रे! दि पाहठी खुशी मनेक्तुंई, छना कुचे परमेश्वरे दुह शहरो टोईच़ी एनोह न्याय चरच़तो, दुह बुराईयो थल्जी अंऊ दोई केतंङ साते लहसी ततो।”

²¹ दंङ इच्च़ा शक्तिशाली स्वर्गदूते मोह्ड़े चक्कीऊ पटोह ठ्रोह इच्च़ा रह्घ उठाईति, दंङ कुह्चे ते समुंद्रा छंङी च़रति, “छना ठ्रोह दि रह्घ समुंद्रंङ छङें चरच़ि, दंङ दुह यह्च़ा माह खोकसा, ध्वांए ठ्रोह मोह्ड़े शहर बेबीलोन ला इच्च़ा ए फेरा नष्ट शुहचे योतो, दि यह्च़ा दोबारा माह बणेषतो।”

²² हे बाबेल शहर, कनिंङ यह्च़ा अपेहल ला बेंज़ बचाएच़िमी ए गीत कुट्रीमी सग माह थाक्पोतो। दोर्तिंङ बेंज़ ए तुरही बज़ाच़ी माह थक्शतो। झांह ठ्रोह अरिला रूठे कारीगर माह शोतो, दंङ चक्की किरच़िमी सग यह्च़ा अपेहला माह शोतो।

²³ दोऊ रात हंयार शोतो, देर तचेक कि इच्च़ा संजवो छंङी ला माह शोतो। दोर्तिंङ ब्याहू ए ब्याहुत्री खुशी ओ सग माह शोतो। दि झांह शोतो छना कुचे दोऊ व्यापारी ज़ि, अंऊ धरतीऊ टोईच़ी भत्ते बे मोह्ड़े तोईरे, एनोह जादू रें भत्ते देशा बि धोखा रेंईर।

²⁴ परमेश्वरे बाबेल शहरा बि दिऊ थल्जी सज़ा रेंई छना कुचे दि शहर भविष्यवक्ता तिंङ, दंङ ऊई भत्ते मीहतिंङ अंऊ परमेश्वरो तोतोर दंङ भत्ते संसारो मीहतिंङ सच़िमी दोषी तोहई।