प्रकाशित वाक्य 17 - लाहौली बाइबिल

मेच़िमी ए षेह्ई रंगो घ्वंण

¹ अंऊ निह्ज स्वर्गदूता तु कछंङ दुह निह्ज कोली तोहई, दोतु बिचंङ इच्चे अंज़े कुई, “देर अता, गेह कनिंङ कमोग कि परमेश्वर छना दुह मोह्ड़े कुकम लहज़ा मेच़िमी बि सज़ा रमतो, अंऊ इच्च़ा झांह ठ्रोह ठाहरीरिंङ बंङज़ा, अंऊर महस बेंडी तोतोर।”

² “अंऊ दोरंङ साते धरतीऊ रज्ज़ा ज़ि कुकम लहसी तरेर, दंङ धरती रंङ बंङज़ा दोरे दोऊ कुकमो सरो नशा रिंङ धुत शुचि इलजी तोईरे।”

³ आत्माओ मदते, स्वर्गदूत गिह्बी सुनसान ठहरि रैंज़ा शिली, दंङ गेह दोर्तिंङ इच्च़ा मेच़िमी बि तंङरिगा अंऊ इच्च़ा घ्वंणो टोईच़ी सवार तोहई अंऊ षेह्ई रंगो तोहई। दोऊ निह्ज पुंज़ा ए साह डे तोईरे। दोऊ फुक दुह मिन रें कपषा इलजी तोहई अंऊ दोच़ी परमेश्वरो निन्दा लहज़ातेर।

⁴ दि मेच़िमी बैंगनी ए शेह्ई खमज़ेर लहज़ा तोहई। दोई एनोह फुक ज़ङों गहना, ए किमती रह्घ ए मुतिका रंङ साते सज़ासी तते। एनोह सुचंङ गुह्ट्र दोई सरा रंङ साते पिंङषी इच्च़ा ज़ङों बट्रडा च़ुमसी तहरे, अंऊ दोऊ नफरत कम ए झखंजी कुकमो पाहठी कंड्राते।

⁵ दोऊ फ्याह ओ टोईच़ी इच्च़ा शीर्षक च़ेहसी तोहई अंऊ गुप्त तोहई। दोर्तिंङ दि च़ेहसी तोहई: मोह्ड़े शहर बेबीलोन, कुकम लहज़ाड़ो तु तरफे संसारो भत्ते मदम चीज़ा तु याह शुह।

⁶ दंङ गेह खंईगा कि दुह मेच़िमी परमेश्वरो मीहतु शुहई ओ नशा रिंङ तोहई, मतलब दुह मीहतु अंऊ दोतिंङ मीहच़ी सच़ी च़रतिर छना कुचे दोरे यीशु पाहठी विशवासो जोगे तोईरे। दोबि खंड्रा गिह्बी महस हेरानी शुई।

मेच़िमी ए घ्वंणो मतलब

⁷ दुह स्वर्गदूते गिऊ हखा कुई, “कनिंङ हेरानी छारिंङ शुई? गेह दि मेच़िमी, दंङ दुह घ्वंण, अंऊ दोऊ टोईच़ी दुह सवार तोह, दंङ अतु निह्ज पुंज़ा ए सा डे तोतोर, कनिंङ भेद कंड्रातग।”

⁸ दुह घ्वंण अपि केई हेंतेग खंदेग, इच्च़ा टेम श्रींङे तोहई, पर हेंतेग श्रींङे माह; दुह महस डुह्गे गड्डो दोरच़ी धकतेखा अपिमी तोह दंङ परमेश्वर दोबि पूरे तरह ठ्रोह नाश लेह च़रपोतो। धरतीऊ टोईच़ी बंङज़ा मीहरे अतु मिन परमेश्वर संसारो रचना लहज़िमी बे तुहई जीवनो कताबा रिंङ च़ेहसी माह, दोरे भत्तेर हेरान शुहचे योर अपेहल दोरे दि घ्वंणा बि खमोर। इच्च़ा टेम दुह श्रींङे तोहई; हेंतेग दुह श्रींङे माह; पर दुह यह्च़ा वापिस अच़ा अपतो।

⁹ दि चिन्ह समझेक्सिमी थल्जी ज्ञानो ज़रूरत तोह। घ्वंणो निह्ज पुंज़ा दुह शहरो निह्ज गोह बि कंड्रातोर अंऊर दि मेच़िमी राज लहज़ा। दोच़ी निह्ज रज्ज़ा ला दर्शाएच़ा।

¹⁰ दोतु बिचंङ ङा ता तुहई ए सिए इलजी तोतोर। दितु बिचंङ इच्च़ा हेंतेग रज्ज़ा तोह; दंङ थल मुखंङ दुह हेंतेग तचेक अंज़े माह। पर अपेहल दुह अपतो, दंङ दुह सिर्फ थोड़े टेमो थल्जी राज लोहतो।

¹¹ अंऊ घ्वंणो तुहई तोहई, दंङ एंतेग माह, दुह एनाह ए आठवां रज्ज़ा शुह; पर दुह आठवां रज्ज़ा तुहई कि निह्ज रज्ज़ा तु बिचंङ इच्च़ा तोह। दंङ थल मुखंङ दुह रज्ज़ा बि पक्‍का रूपारिंङ हमेशा ओ थल्जी सज़ा खोकसोतो।

¹² दुह सा डे अंऊ केई तुहई खांहषी तरेर, दुह सा रज्ज़ा तिंङ दर्शाएच़ा अंऊ दोच़ी हेंतेग राज लहज़ी शुरू लहसी माह। दुह सा रज्ज़ा तिंङ दुह घ्वंणा रंङ साते ठ्रोका शुहचे राज लहज़िमी हुकुम तोह, पर दोतु राज सिर्फ थोड़े टेमो थल्जी शोतो।

¹³ दि भत्ते सा रज्ज़ा तु इच्च़ा ए मकसद तोह, ऐनातु-ऐनातु सामर्थ ए अधिकार दुह घ्वंणबि रें च़रपोर।

¹⁴ दोरे कुरच़ो खिलाप लड़ेपोर, पर कुरच़ा दोतिंङ यहरच़े च़रपोतो, छना कुचे दुह प्रभु तु प्रभु ए रज्ज़ा तु रज्ज़ा शुह। कुरच़े एनोह बुलासी दोरे, अंङषी दोरे दंङ विशवासो जोगे साथी तंङ दोतु टोईच़ी द्रक्शे योतो।

¹⁵ स्वर्गदूते गिऊ हखा दि ला कुई: “अंऊ महस बेंडी केई तुहई तंङसी तातन, अंऊ दोऊ टोईच़ी दुह कुकम लहज़ा मेच़िमी बंङज़ा तोहई, दुह भत्ते संसारो मीहतिंङ, रे देशो मीहतिंङ ए महस पाहठी भाषा बि कंड्रा।”

¹⁶ दुह टेम अपतो अपेहल घ्वंण दुह सा रज्ज़ा तंङ साते अंऊ दोरंङ साते तोतोर, दुह कुकम लहज़ा रंङ साते नफरत लोहतो अंऊ दोऊ टोईच़ी बंङज़ा तोह। दोरे दोऊ टोईच़ी हमला लोहर, दोबि नंङटे लोहर, दोरे दोऊ षाह ज़े च़रपोर, दंङ ऊई दोबि रोचिह केहऊरे।

^17-18 “दुह मेच़िमी अपि केई खांहषी तरेर, दुह दि मोह्ड़े शहर शुह अंऊ धरतीऊ टोईच़ी भत्ते रज्ज़ा तु टोईच़ी राज लहज़ा। दि चीज़ारे दोरंङ साते शुई, छना कुचे परमेश्वरे एनोह मकसद पूरा लहज़िमी थल्जी दोतु सेहमो निर्देशन लहरी। दिए वहज़ा तोह कि दोच़ी एनोह अधिकार घ्वंणा बि रें च़रतिर कि दोई राज लोहतो, अपेहल तचेक कि दुह भत्ते पूरा माह शोतो अंऊ परमेश्वरे कुहषी ततो।”