प्रकाशित वाक्य 16 - लाहौली बाइबिल

पहला कोली

¹ दोऊ थल गेह मंदिरो दोरच़ी इच्च़ा तेज सग बि निह्ज स्वर्गदूता तंङ साते दि कुट्री रेड्रीगा, “इलांई धरतीऊ मीहतु टोईच़ी परमेश्वरो तरफे दि सज़ा रें च़रतुंई अंऊ दि निह्ज कोली रिंङ तोह।”

² दिऊ थल्जी पहला स्वर्गदूते अंऊ कोलीरिंङ तोहई दोबि धरतीऊ टोईच़ी फुचंङ लेह च़रति। अंऊ दोऊ कोलीरिंङ तोहई। दंङ दुह मीहतिंङ अंऊ दोतु टोईच़ी घ्वंणो छाप तोहई या अंऊ दोच़ी दोऊ मुर्ति ऊ पूजा लहज़ातेर, दुह मीहतु टोईच़ी टेहषी ए बेह्द अंज़े फोह्ल हुंच़िरी।

दूसरा कोली

³ दूसरा स्वर्गदूते अंऊ दोऊ कोली रिंङ तोहई दोबि समुंद्रो टोईच़ी थोहरच़े च़रति। ध्वांए समुंद्र इच्च़ा सिए मीहू शुहई ठ्रोह शुहचे इलि, झांह लेह समुंद्रो अंदरेग बंङज़ा भत्ते जीवार सिए इलिर।

तीसरा कोली

⁴ तीसरा स्वर्गदूते अंऊ कोली रिंङ तोहई दोबि बेंडी ए तिऊ सोतो टोईच़ी थोरच़ी केहरी दंङ दोरे शुहई बणेंके इलिर।

⁵ दंङ गेह दुह स्वर्गदूता बि अतिंङ भत्ते तिऊ टोईच़ी अधिकार तोह, परमेश्वरो हखा दि कुट्री रेड्रीगा, “हे पवित्र परमेश्वर, अंऊ तोह, दंङ अंऊ तोहई, कनिंङ झांह ठ्रोह न्याय लहज़िमी अधिकार तोह।

⁶ छना कुचे दोच़ी अतिंङ केई हेंतेग सज़ा रंड्रातन, परमेश्वरो मीहतिंङ ए भविष्यवक्ता बि सच़ी चरच़ातन अंऊ कांह दोरच़ी कुहषी तोह। झांह लेह हेंतेग केई दोतिंङ शुहई रूपा रिंङ लेहक्सी ती रंड्रा दोतु भुगतान लहज़ातन।”

⁷ दंङ गेह यह्च़ा अतिंङ आ वेदी ओ दोरच़ी कुट्री रेड्रीगा, “वोई, हे सर्वशक्तिमान प्रभु परमेश्वर, हेले, मीहू जाति टोईच़ी कांह सज़ा सच्चा ए ठीक तोह।”

चौथा कोली

⁸ चौथा स्वर्गदूते अंऊ दोऊ कोली रिंङ तोहई दोबि ऐके ओ टोईच़ी थोहरच़े च़रति। दंङ ऐके बि ऊई ला महस ट्रोत शुहबिमी हुकुम रेंई झांह लेह मीहरे दोऊ महस ए भयानक ट्रोते रोह्षा इलिर।

⁹ मीहरे दि महस ट्रोते रोह्षा इलिर, दंङ दोच़ी परमेश्वरो मिन्दु निन्दा लहरिर, छना कुचे दुह ए तोहई, अतु टोईच़ी दुह सज़ा ओ अधिकार तोहई। दोच़ी हेंतेग ला एनोह पापो दोरच़ी पश्चाताप माह लहरिर, दोच़ी हेंतेग ला परमेश्वरो महानता बि ग्रहण माह लहरिर।

पांचवां कोली

¹⁰ पांचवां स्वर्गदूते अंऊ दोऊ कोली रिंङ तोहई दुह घ्वंणो सिंहासनो टोईच़ी थोरच़ी च़रति। दंङ दुह राज अंऊ दोऊ टोईच़ी घ्वंणे राज लहज़ाते हंयार शुहचे इलि। मीहरे एनोह लेह ट्रिक्शी लेहतिर छना कुचे दोरे दुह टेहषी बि ए फोह्ल ज़ख्मा तिंङ सहन लेह मरच़ातेर अंऊ दोच़ी महसूस लहज़ातेर।

¹¹ दंङ एनातु टेहषी ए फोल्हो वहज़ा ज़ि स्वर्गो परमेश्वरो बुराई लहरिर; पर दि हालातरिंङ ला दोच़ी पक्‍का रूपारिंङ पश्चाताप माह लहरिर दंङ माह ए दुह मदम कम ब्याड़ा लहरिर अंऊ दोच़ी लहज़ातेर।

छठवीं कोली

¹² छठवें स्वर्गदूते अंऊ दोऊ कोलीरिंङ तोहई दोबि महानदी फरातो टोईच़ी थोरच़ी केहरी। बेंड़ीऊ ती कारची इलि दंङ झांह लेह पूर्व दिशा ओ रज्ज़ा एनोह सेना रैंज़ा दुह बेंडी ओ नुरेच़ि इबि तरिर।

¹³ दिऊ थल गेह षुमु मांजी आत्माबि तंङरिगा अंऊ दोरे खंड्रिमी मडुको ठ्रोह तोईरे। इच्च़ा अजगरो आहच़ि धकतेखा अति, इच्च़ा मुण्डो घ्वंणो आहच़ि, दंङ अई, अई घ्वंणो आहच़ि धकतेखा अति मतलब दोरे अंऊ दोच़ी हप्सी खबर रांहषी तरेर।

¹⁴ दि मांजी आत्मा तु दोर्तिंङ चमत्कार लहज़िमी शाक्ति तोहई दंङ दोच़ी इलजे दि मीहतिंङ ठ्रोहका लहरिर अंऊ दि संसारो भत्ते देशारिंङ राज लहज़ातेर ताकि दोरे सर्वशक्तिमान प्रभु परमेश्वरो मोह्ड़े ध्याड़ा रिंङ दोऊ खिलाप लड़ाई लड़ेक्पिमी थल्जी इबि तरपोंई।

^15-16 मांजी आत्माज़ि अधिकारी तिंङ ए दोतु सेना बि दुह ठहरि ठ्रोहका लहरिर अतिंङ इब्रानी भाषारिंङ हर मगिदोन ला कुट्री। दिऊ थल्जी प्रभु यीशु ज़ि कुहषी ततो, “दि गप्पा रेड्रुंई। गिऊ अपि चोर अपिमी ठ्रोह अचानक शोतो। धन्य तोह दुह मीह अंऊ गिऊ अपिमी मुक्का चेहके बंङज़तो, दंङ एनोह खमज़ेर तेयार तोहतो। दोहथर दोरे नंङटे माह शोर दंङ छिल्ला दोतिंङ शर्मिन्दा माह लोहतो चाहे दोरे धकते महस मीहतु बिचंङ ला योर।”

¹⁷ सातवें स्वर्गदूते अंऊ दोऊ कोली रिंङ तोहई दोबि लन्न दि थोरच़ी च़रति, दंङ गेह स्वर्गो मंदिरो अंदरेग च़ि परमेश्वरो सिंहासनो दोरच़ी अतिंङ आ जोरे कुट्री रेड्रीगा, “पूरा शुहचे इलि!”

¹⁸ दंङ बिजली, ए सग, दंङ गर्जन शुई, दंङ इच्च़ा झांह ठ्रोह मोह्ड़े भुयंल शुई, दिबे तुहई मीहच़ी अपेहल ला झांह ठ्रोह मोह्ड़े भुयंल महसूस लहसी माह तरेर।

¹⁹ बेबीलोनो मोह्ड़े शहरो षुमु खंणी शुहचे इलि, दंङ भत्ते संसारो शहर नष्ट शुहचे इलिर। छना कुचे परमेश्वरे दुह पूरा लहरी अतु दोई बाबेलो मीहतंङ सज़ा ओ वाईदा लहसी तहरे। दिबी परमेश्वरो तरफे कठोर सज़ा रंड्रीमी तहरे। दि झांह ए ठ्रोह शोतो छना दोच़ी ती मेह सरा तुंङसी शोतो, अतिंङ परमेश्वरे एनाबि दुह बट्रडा रिंङ थोरच़ी ततो अंऊ दोऊ रोहष बि कंड्रा।

²⁰ दुह मुक्का, समुंद्रो भत्ते टापू अचानक योंहंषा इलि, दंङ हेंतेग छिल्ला गोह माह तोहई।

²¹ दंङ सर्गो दोरच़ी मीहतु टोईच़ी मोह्ड़े-मोह्ड़े ओले दहरिर, अंऊर हर इच्च़ा ओला ओ वजन लगभग निंजो सा (50) किलोग्राम तोहई। दोच़ी परमेश्वरो निन्दा लहरिर छना कुचे दोतिंङ परमेश्वरो दोरच़ी चरच़ि मुसीबतो दोरच़ी महस दुख सहन लहज़ी लेहती।