प्रकाशित वाक्य 15 - लाहौली बाइबिल

मुसीबत पिंङषा निह्ज ज़ङों कोली

¹ अपेहल दुह योह्सा इलि, दंङ गेह सर्गारिंङ इच्च़ा अई इच्च़ा मोह्ड़े चिन्ह तंङरिगा अंऊ कि महस अद्धभुत ए बेह्द अपिमी जोगे तोहई। दोर्तिंङ निह्ज स्वर्गदूत तोईरे अंऊ निह्ज शत्‌ह-शत्‌ह ठ्रोह बीमारी कुरच़ा तोईरे दुह मुसीबत थल मुखो तोह छना कुचे अपेहल दुह योह्सा योतो दोहपल परमेश्वरो रोहष योह्सा योतो।

² दंङ गेह छा तंङरिगा अतु चौड़ाई समुंद्रो ठ्रोह तोहई, दि मेह च्वासी अरशीहू ठ्रोह तंङफाते। दंङ दुह समुंद्रो मुखंङ अंऊ अरशीहू ठ्रोह तोहई, गेह महस मीहतिंङ खड़े शुहबी तंङरिगा। दोरे, दुह मीहरे तोईरे अच़ि दुह घ्वंणा बि याहरच़ा तेर, छना कुचे दोच़ी दोऊ अराधना लहज़िमी रंङ साते इंकार लेह च़रतिर, दोच़ी दोऊ मुर्ति ऊ अराधना लहज़िमी रंङ साते दंङ दुह गिनती ओ चिन्ह खोकच़िमी दोरच़ी इंकार लेह च़रति अतु मतलब दोऊ मिन शुह। दोरे यहरच़ा दुह समुंद्रो मुखंङ खड़े तोईरे अंऊ अरशीहू ठ्रोह तोहई, दोच़ी दुह तारो ठ्रोह कुलड्रिमी यंत्र च़ुमसी तरेर अंऊ दोतिंङ परमेश्वरो तरफे रांहषी तोहई।

³ दोरे इच्च़ा झांह ठ्रोह गीत कुट्री लेहकी तोईरे छना परमेश्वरो दास मूसा ज़ि महस तुहई कुहषी तहरे। दोच़ी यीशु महिमा लहज़िमी थल्जी, अंऊ कि इच्च़ा कुरच़ो ठ्रोह तोह, झांह ठ्रोह कुई: सर्वशक्तिमान प्रभु परमेश्वर, छिल्ला केई लहसी तातन दुह मोह्ड़े ए अद्धभुत तोह। काह भत्ते देशो रज्ज़ा शुनाह, केई छिल्ला लहज़ातन दुह सच्चा ए धर्मी तोह।

⁴ “हे प्रभु, भत्ते मीहतु दोरच़ी कनु आदर शवाह, दंङ दोरे भत्तेर कनु मिन्दु आदर लहज़ातोर, छना कुचे सिर्फ काह ए पवित्र परमेश्वर शुनाह। हर इच्च़ा ठहरि ओ भत्ते मीहरे कनु कछंङ अपतोर, दंङ दोरे कनु अराधना लहज़ातोर छना कुचे कनु धर्मो कम भत्ते तिंङ रूठे रंङ हिद तोतोर।”

⁵ अपेहल दि मीहच़ी गीत कुट्री बंद लेह च़रतिर, दोहथर गेह खंईगा कि स्वर्गा रिंङ मन्दिर अलसा तोहई। अंऊ कि मिलापो तम्बू ठ्रोह तोह,

^6-7 दंङ निह्ज स्वर्गदूत अंऊ दोतिंङ थल मुखो निह्ज मुसीबत शिलज़ी तोहई, दुह मंदिरो धकतेखा हुंच़िर। दोरे चमकदार छंङसे खमज़ेर लहज़ा तोईरे दंङ दोतु काह ओ पिला हासी ज़ङों पट्टी ला तोहई। दंङ पि श्रींङी प्राणी तु बिचंङ इच्चे हर इच्च़ा स्वर्गदूता बि अंऊ परमेश्वरो तरफे हमेशा श्रींङे तोह, भयानक सज़ा ओ दोरच़ी पिंङषा इच्च़ा-इच्च़ा ज़ङों कोली रांई।

⁸ दोहपल मंदिर परमेश्वरो महिमा ए सामर्थो दोरच़ी अंजा टूह रें पिंङषा इलि। दोहपल तचेक अरिला मन्दिरंङ इबि मरति अपेहल तचेक कि दुह निह्ज मुसीबत योह्सा मेहलि अंऊ दोबि निह्ज स्वर्गदूते हासी तरेर।