प्रकाशित वाक्य 14 - लाहौली बाइबिल

कुरच़ा ए इच्चा लाख निंज़ो पी हजार मीहरे 144,000

¹ दिऊ थल्जी गेह ऊई छा तंङरिगा, गेह सिय्योन गोह टोईच़ी कुरच़ा बि खड़े शुहबी तंङरिगा। दोरंङ साते इच्च़ा लाख निंज़ो पि हज़ार मीहरे तोईरे, दोतु फ्याहरिंङ कुरच़ो मिन ए दोऊ बाह ओ मिन च़ेहसी तोहई।

² दंङ गेह स्वर्गंङ अतुआ सग रेड्रीगा अंऊ कि तिऊ ठ्रोह मोह्ड़े गर्जन ठ्रोह सग तोहई, या गड़गड़ाहटो सगो ठ्रोह महस जोरे तोहई। दि बेंज़ कुलड्रा दोऊ बेंज़ो दोरच़ी हुंच़ी सगो ठ्रोह चेहसाते।

³ इच्चा लाख निंज़ो पी हजार मीहरे 144,000 सिंहासनो तुईज़ी, दंङ पि श्रींङे प्राणीर ए सेंहणा तु तुईज़ी तोईरे; दोच़ी इच्च़ा खरकोई गीत कुट्रातेर, अतिंङ सिर्फ दोच़ी ए सिखेच़ी तरच़ातेर। सिर्फ दोरे अतिंङ परमेश्वरे धरतीऊ टोईच़ी बंङज़ा मीहतु बिचंङ ज़ि छुड़ाके चरच़ाते।

⁴ दिरे दोरे शुरे अंऊ दोच़ी पवित्र जीवन श्रींङमोंई, दिरे दुह मीहतु ठ्रोह तोतोर अच़ि इच्च़ा फेरा ला अंऊ मेच़िमी तंङ साते अशुद्ध कम माह लहरिर, दंङ माह ए दोच़ी अपेहला छा चीज़ो पूजा लहरिर, दिरे सिर्फ कुरच़ो ए अराधना लहज़ातोर, अंऊर ला कुरच़ा यवात। दिरे मीहरे दोरे शुरे अंऊ दोतिंङ धरतीऊ भत्ते मीहतु दोरच़ी शत्‌ह लहसी शुह। छना मीहच़ी एनोह रिहू भत्ते बे रूठे हिस्सा परमेश्वराबि रंड्री ध्वांए दिरे मीहरे ला एनोह जीवना बि भत्ते पवित्रता रंङ साते परमेश्वर ए कुरच़ा बि रंड्रातोर।

⁵ दोच़ी अपेहल ला हप्सी माह कुईर। दोतु अंदरेग छल्ले गलती माह।

षुम लाह स्वर्गदूतो घोषणा

⁶ दंङ गेह अई इच्च़ा स्वर्गदूता बि सर्गो टोईच़ी फन्ज़ि तंङरिगा। दुह स्वर्गदूते दुह रूठे खबर कुरच़ा तोहई अंऊ अपेहल ला माह लेहक्सा, दोई संसारा रिंङ बंङज़ा मीहतु, हर इच्च़ा देश, हर इच्च़ा गोत्र दंङ भत्ते पाहठी भाषा रिंङ दिऊ घोषणा लहरिर।

⁷ दोई मोह्ड़े सग रंङ साते कुई, “परमेश्वरा रंङ साते बैईन, दंङ दोऊ हिसाबे दोऊ महिमा लंहि, छना कुचे हेंतेग दोऊ मीहतु फेंसला लहज़िमी टेम पिचे इलजी तोह। दोऊ अराधना लंहि छना कुचे दुह ए तोह, अच़ि स्वर्ग ए धरती, समुंद्र ए तिऊ झरना ओ रचना लहसी शुह।”

⁸ दंङ दिऊ थल अई इच्च़ा स्वर्गदूत दि कुट्रा अति, “हेंतेग दि नाश शुहचे इलि। बेबीलोन शहर बुरी तरह नाश शुहचे इलि। दोई भत्ते मीहतु जाति बि एनोह सरो नशा रिंङ धुत लेह च़रति, अंऊ दि कुट्रीमी थल्जी कि दोऊ महसे मदम व्यवहार दि तोह कि दोई भत्ते मीहतु जाति बि दि सिखाएक्तो छना कुचे दोई दोतिंङ मुर्ति तु पूजा लहज़ी सिखाएक्तो।”

⁹ दंङ दितु थल अई इच्च़ा तीसरा स्वर्गदूत मोह्ड़े सग रंङ साते दि कुट्रा ते अति, “अंऊ अरिला दुह घ्वंणो ए दोऊ मुर्तिऊ पूजा लोहतो, दंङ एनोह फ्याहरिंङ या एनोह गुह्ट्रो टोईच़ी दोऊ छाप लेहप्चा”,

¹⁰ दंङ दुह परमेश्वरो रोहषो बट्रडा केहच़ी अंऊ मिलावट रंङ, दोऊ रोहषो कोली रिंङ केहच़ी च़रति, तुंङमोतो दंङ पवित्र स्वर्गदूतो तुईज़ी कुरच़ो तुईज़ी मेह ए गन्धको टेहषीरिंङ पढ़ेक्पोतो।

¹¹ मेहू दोरच़ी हुंच़ा टूह अंऊ दोतिंङ तंग लहज़ा दुह हमेशा हुंच़ा। रात-दिन दोतु तंग लहज़ी बंद माह शवाह, छना कुचे दोच़ी घ्वंण ए दोऊ मुर्तिऊ पूजा लहज़ातेर, दोच़ी दुह घ्वंणो मिनतु छाप लेहप्तिर।

¹² दिऊ थल्जी ज़रूरी तोह कि परमेश्वर ओ मीहरे दुह भत्ते दुख सहन लोहर अंऊ दुख दोच़ी सहन लहज़ातोर। दोच़ी दुह ए लहज़ातोर अंऊ परमेश्वरे हुकुम रंड्रा अंऊ दोतिंङ यीशु टोईच़ी विशवास लहज़ी बंद लेह माह जूंस।

¹³ दोऊ थल गेह यह्च़ा स्वर्गो दोरच़ी अतिंङ कुट्री रेड्रीगा दंङ दोई गिऊ हखा कुई: “दि गप्पारे देर्तिंङ च़ेऊ। हेंतेग बे, दुह मीहरे धन्य तोतोर अंऊ परमेश्वरो टोईच़ी विशवास लहज़ा सिए इलिर।” दोहपल पवित्र आत्मा दिऊ थल्जी सहमत शुहचे इलि, दोई कुई, “दि हेले तोह दोरे धन्य शुरे छना कुचे दोरे एनोह खरे मेहनतो दोरच़ी आराम खोकपोरे दंङ अंऊ कम दोच़ी लहज़ातोर दोऊ थल्जी दोतिंङ ईनाम खोकसोतो।”

धरतीऊ फसलो वलज़िमी ध्याड़ा

¹⁴ दंङ गेह इच्च़ा छंङसी डुह तंङरिगा, दंङ गेह ऊईतिंङ तंङरिगा अंऊ इच्च़ा मीहू ठ्रोह तोहई, दंङ डुह टोईच़ी बंङज़ा तोहई। दोऊ पुंज़ंङ ज़ङों मुकुट तोहई दंङ गुह्ट्ररिंङ इच्च़ा चंज़े जड़मो तोई।

¹⁵ दोहपल अई इच्च़ा स्वर्गदूत अंऊ कि चौथा स्वर्गदूत तोह परमेश्वरो खबर रैंज़ा स्वर्गो मंदिरो धकतेखा अति। दोई डुह टोईच़ी बंङज़ा मीहू हखा जोर रें कुई, “धरतीऊ फसल मिन्ज़ी इलजी तोह। फसलो ट्रिकट्रिमी टेम पिचे इलजी तोह। झांह लेह केनोह जड़मो चलाएतु दंङ फसल वलदु।”

¹⁶ झांह लेह, दोई दुह जड़मो किरच़े च़रति, अतिंङ दोई च़ुमसी तहरे, दंङ संसारो भत्ते फसल दोऊ दोरच़ी ट्रिके च़रति।

¹⁷ दोहथल अई इच्च़ा स्वर्गदूत दुह मंदिरो दोरच़ी हुंच़िरी, अंऊ स्वर्गारिंङ तोह, दंङ दोऊ कछंङ ला चंज़े जड़मो तोह।

¹⁸ दोहथल अई इच्च़ा स्वर्गदूत अंऊ कि छठवां स्वर्गदूत तोह। दंङ अंऊ वेदी ओ टोईच़ी मेहू दोरच़ी धूप जलाच़िमी ज़िम्मेवारी निभाएच़ा। दोई हाऊष रें दुह स्वर्गदूतो हखा अतु दोर तेज जड़मो तोह, “धरतीऊ टोईच़ी दाखो गुच्छा मिन्ज़े इलजी तोह! दोतिंङ केनोह जड़मो रें ट्रिके च़रतु।”

¹⁹ दोहथर दुह स्वर्गदूते दुह अंगूर ट्रिके च़रति अंऊ धरतीऊ टोईच़ी तोह दंङ दोतिंङ ठ्रोका लहरी। दोई दाखा बि इच्च़ा मोह्ड़े नंदे ऊ अंदरेग केहच़ी च़रति। दिऊ मतलब दि तोह कि परमेश्वर महस भयंकर सज़ा रमोतो।

²⁰ दङ दुह शहरो धकते रसकुण्डो अन्दरेग, अंऊर दाखो रस हुंच़ातेर, दङ रसकुण्डो दोरच़ी शुहई हुंच़ते, दुह इच्च़ा धारी ओ ठ्रोह बहाएति कि रहंङों लगामो कछंङ पिचे इलि, दंङ षुमु राह किलो मीटर तचेक बहाएक्च़ा अच़ा इलि।