प्रकाशित वाक्य 13 - लाहौली बाइबिल

समुंद्रो बिचंङ ज़ि हुंज़ी झुह्ट घ्वंण

¹ गेह अई इच्च़ा घ्वंण बि समुंद्रो दोरच़ी हुंज़ी खंईगा, अतु साह डे ए निह्ज पुन्ज़ा तोईरे। दंङ दोऊ हर डे रिंङ परमेश्वरो मिन च़ेहसी तोहई अतु इस्तेमाल लहज़िमी दोबि छल्ले अधिकार माह तोहई।

² अंऊ घ्वंण गेह खंईगा, दुह ब्राघो ठ्रोह तोहई; दंङ दोऊ कोंज़ा भालू ठ्रोह दंङ मोह्द ब्राघो ठ्रोह तोहई। दुह अजगरे दि ब्राघा बि एनोह शाक्ति रें च़रति दंङ दोबि धरतीऊ टोईच़ी राज लहज़िमी अधिकार रें च़रति।

³ दोऊ पुन्ज़ो बिचंङ इच्च़ा पुंज़ा रिंङ महस ज़ख्मो निशान तोहई, अंऊ दोऊ मौतो वहज़ा बणेंके योतो, पर दि ठीक शुहचे इलजी तोहई। झांह लेह धरतीऊ मीहरे हेरान तोईरे दंङ दोरे दुह घ्वांण साथी बणेंके इलिर।

⁴ भत्ते मीहच़ी अजगरो पूजा लहरिर, छना कुचे दोई दुह घ्वंणा बि एनोह अधिकार रें च़रति। दोच़ी दुह घ्वंणो ला पूजा लहरिर। दोच़ी कुईर, “अरिला दुह घ्वंणो बराबर शक्तिशाली माह। अरिला दोऊ टोईच़ी हमला लेह मरच़ा।”

⁵ परमेश्वरे घ्वंणा बि एनोह अधिकारो पाहठी घमण्ड लहज़िमी अधिकार रें च़रति कि झांह ठ्रोह दोई परमेश्वरो अपमान लोहतो। परमेश्वरे दोबि निह्जो झुह्ट लाह तचेक दि अधिकार तहज़िमी हुकुम रांई।

⁶ दंङ घ्वंणे परमेश्वरा बि शाप रंड्री शुरू लेह च़रति, कि दुह दोऊ मिन्दु खिलाप, दंङ दू, दुह ठहरि ओ खिलाप कुट्री लेहती अंऊर परमेश्वर बंङज़ाते मतलब स्वर्गो, दंङ दुह भत्ते मीहतु खिलाप अंऊ स्वर्गा रिंङ बंङज़ातोर।

⁷ परमेश्वरे दोबि दि अधिकार रें च़रति, कि दुह परमेश्वरो खिलाप लड़ेपोतो, दंङ दोतिंङ यहरच़े च़रपोतो, दंङ दोबि हर इच्च़ा खानदान, मीहरे, भाषा ए जाति टोईच़ी अधिकार रें च़रति।

⁸ धरतीऊ टोईच़ी बंङज़ा भत्ते मीहरे दोऊ पूजा लहज़ी लेहतिर। सिर्फ दुह ए मीहच़ी दोऊ पूजा माह लहरिर अतु मिन संसारो रचना लहज़ी बे तुहई जीवनो कताबारिंङ च़ेहसी तोह। दि जीवनो कताब दुह कुरच़ो कताब शुह अंऊ दोबि बलिदानो रूपारिंङ सच़ी च़रतिर।

⁹ हर इच्च़ा अंऊ गिऊ खबर समझेक्सी जुंज़ा, दोबि दुह गप्पा ध्याना रंङ साते रेड्री जूंशी तोह।

¹⁰ अंऊ मीहतिंङ कैद लहज़ी जूंशी तोह, दोरे पक्‍का रूपारिंङ कैद शोर, दंङ अतु थल्जी पक्‍का तोह कि अतु थल्जी ज़रूरी तोह कि दोरे ऊई मीहतु दोरच़ी तलवारे रें सच़ी च़रपोर, दंङ दोरे पक्‍का रूपा रिंङ तलवारे रें सच़ी च़रपोर। दिऊ थल्जी जूंशी तोह कि परमेश्वरो मीहरे दुह खरे तिंङ सहन लंहि अंऊ दोऊ दोच़ी अनुभव लहज़ातोर दंङ विशवास लहज़िमी थल्जी पक्‍का शुहचे बंङज़ेंई।

धरतीऊ दोरच़ी हुंच़ी घ्वंण

¹¹ दंङ गेह यह्च़ा अई इच्च़ा घ्वंण बि धरतीऊ दोरच़ी हुंज़ी खंईगा, दोऊ झुह्ट डे तोईरे छना कुरच़ो शवाहतोर। पर अपेहल दोई कुट्री लेहती दंङ दि अजगरो ठ्रोह कुट्री लेहती।

¹² दि अई घ्वंण मुण्डो दुह घ्वंणो भत्ते अधिकार धरती ए दोऊ टोईच़ी बंङज़ा दोतंङ साते दुह मुण्डो घ्वंणो पूजा लहज़ा, अतु प्राण घातक ज़ख्म ठीक शुहचे इलजी तोहई।

¹³ दि अई घ्वंण अद्धभुत चिन्ह कंड्राते, देर तचेक कि मीहतु तुईज़ी सर्गो दोरच़ी मेह योंखा रैंज़ा हापते कि धरतीऊ टोईच़ी दपोतो, अपेहल कि मीहरे खंड्री लेहकी तोतोर।

¹⁴ महस मीहरे अई घ्वंणो दुह अद्धभुत कमो दोरच़ी महस खुश शुहचे धोखा खोकसिरी अंऊ दुह तुहई घ्वंणो शाक्ति ओ दोरच़ी तंङफाते। अई घ्वंणो दोरच़ी मीहतु हखा कुई कि दुह मुण्डो घ्वंणो पूजा लहज़िमी थल्जी इच्च़ा मुर्ति बणाएतुंई, अंऊ हथियार रें घायल शुहचे इलजी तोहई, दंङ यह्च़ा ठीक शुहचे इलजी तोह।

¹⁵ दुह अई घ्वंणा बि मुण्डो घ्वंणो मुर्ति बणाके दोबि श्रींङमी शाक्ति ला रें च़रति, झांह लेह दोई कुट्री ला तरच़ाते; दंङ दुह मुर्ति दुह भत्ते मीहतिंङ सच़िमी हुकुम रें च़रति अंऊ दोऊ पूजा माह लहज़ातेर।

¹⁶ अई घ्वंणे खास ए खास मेह, साहुकार ए गरीब, परगर या अंऊ दोरे परगर माह तोईरे मतलब भत्ते मीहतिंङ मज़बूर लहरी कि दुह मुण्डो घ्वंणो मिन एनोह सुचंङ गुहट्ररिंङ या एनोह फ्याह ओ टोईच़ी छाप लगाएपोतो।

¹⁷ दोच़ी झांह दिऊ थल्जी लहरिर ताकि अरिला मीह छिल्ला च़ुमज़ि या लङज़ि मरपोतो अगर दोऊ टोईच़ी मुण्डो घ्वंणो मिन्दु छाप या दोऊ मिन कंड्रा ठ्रोह अक्षरो छाप माह शोतो।

¹⁸ दि चिन्ह समझेक्सिमी थल्जी ज्ञानो ज़रूरत तोह। पर अपि ज्ञान तोह, दंङ दि पता लगाके च़रपोतो कि दि घ्वंणो अक्षरो मतलब छि शुह। छना कुचे दि इच्च़ा मीहू मिन शुह। दि गिनतीऊ मिन त्रुई राह टोहकठे षुमु निज़ो त्रुई तोह।