प्रकाशित वाक्य 12 - लाहौली बाइबिल

मेच़िमी ए मोह्ड़े ओमड्रा

¹ अपेहल दुह योह्सा इलि, दंङ दोर्तिंङ इच्च़ा अद्धभुत चिन्ह तोह अंऊ सर्गंङ तंङफाते। छना कुचे लचंङ ओ टोईच़ी खड़े मेच़िमी प्रगट शुई अच़ि झांह ठ्रोह खमज़ेर लेहसी तहरे अंऊ ऐके ओ ठ्रोह चमकेक्पाते। दोई एनोह पुंज़ंङ इच्च़ा मुकुट लेहसी तहरे अंऊर सनी कर तोहई;

² दुह मेच़िमी खोकटुंङ तोहई, दंङ दोऊ लिहक्पिमी टेम पिचे इलजी तोहई। दंङ दोबि लिहक्पिमी टेहषी तोहई।

³ दंङ अई इच्च़ा चिन्ह सर्गारिंङ तंङफाते, इच्च़ा मोह्ड़े ओमड्रा तोहई, अंऊ शेतान तोहई। दिऊ निह्ज पुन्ज़ा तोहई दंङ हर इच्च़ा पुन्ज़ो टोईच़ी निह्ज राजमुकुट तोईरे दंङ दोऊ सा डे तोईरे।

⁴ दंङ दोऊ मेकुटू च़ि सर्ग ओ इच्च़ा तिहाई कर षोह्के धरती रिंङ छङें च़रति, दंङ अजगर दुह मेच़िमी ऊ तुईज़ी खड़े शुहचे इलि ताकि दोऊ कटुबि जन्म रंड्रा ए ज़ेई तरपोतो।

⁵ दंङ दोहथर दोई इच्च़ा योह बि जन्म रांई पर दोबि अजगर ए ज़ेई मरति छना कुचे दोबि ध्वांए खुल्जे च़रति दंङ परमेश्वर ए दोऊ सिंहासनो कछंङ रैंज़ा हति। दुह गंङकटु इच्च़ा नीह्लामो डंडा रंङ साते मतलब भत्ते अधिकारंङ साते भत्ते जाति मीहतु टोईच़ी राज लोहतो।

⁶ दंङ दुह मेच़िमी दुह सुनसान ठहरि ओ हखा पोकषे इलि, अंऊर परमेश्वरो तरफे दोऊ थल्जी तेयार लहसी तोहई कि दोर्तिंङ इच्च़ा हज़ार झुह्ट राह षुमु निह्जा ध्याड़ा तचेक टूड्री जूंस।

मोह्ड़े ओमड्रा (अजगर) स्वर्गो धकतेखा छंङी च़रति

⁷ दंङ स्वर्गारिंङ लड़ाई शुई, परमेश्वरो खास दूतो बिचंङ इच्च़ा खास दूत अतु मिन मिकाइल तोह, एनोह अधीन बंङज़ा ऊई स्वर्गदूता रंङ साते अजगरो टोईच़ी हमला लहरी। दंङ अजगर ए दोऊ साथी ज़ि मीकाइलो खिलाप लड़ाई लड़ेतिर।

⁸ अजगर लड़ाई रिंङ यहरच़ा इलि। अजगर ए दोऊ साथी स्वर्गा रिंङ बंङज़ी मरति।

⁹ दिऊ थल्जी दोबि ए दोऊ साथी तिंङ धरती रिंङ छंङी च़रति। दि मोह्ड़े अजगर दुह ए तोह अंऊ महसे टेम तुहई ओमड्रो रूपारिंङ तंङातेंई, अतिंङ शेतान ए दोष लगाएच़ा ला कुट्रातोर। दि दुह ए तोह अंऊ दि संसारो मीहतिंङ धोखा रंड्रा।

¹⁰ दंङ गेह स्वर्गंङ ज़ि दि मोह्ड़े सग रेहशी, “हेंतेग हेंदु परमेश्वर हेंदु मीहतिंङ बचाएपोतो! हेंतेग दोई एनोह सामर्थो इस्तेमाल लोहतो दंङ रज्ज़ा ओ रूपारिंङ राज लोहतो! हेंतेग दोऊ मसीह संसारो टोईच़ी एनोह अधिकारो दावा लोहतो! छना कुचे हेंतेग शेतान परमेश्वरो हाज़िर रिंङ खड़े शुहचे हेंदु साथी सेवका तिंङ रात-दिन दोष माह लगाएती। दोबि स्वर्गो धकतेखा छंङी च़रति।”

¹¹ “हेंदु विशवासी ज़ि शेतान यहरच़े चरच़तो। दोच़ी दोबि कुरच़ो शुहई दोरच़ी यहरच़े चरच़तो, अंऊ दोतिंङ दोतु पापो दोरच़ी छुड़ाएच़िमी थल्जी सिए इलि। दोच़ी दोबि यहरच़े च़रतिर छना कुचे दोच़ी दि अंगीकार लेह जारी तहरिर कि दोतु कुरच़ा परमेश्वर तोहई। हालांकि दोतिंङ सताच़ी ला शुह देर तचेक कि सच़ी ला च़रतिर, पर दोरे एनोह दुह अंगीकारो दोरच़ी थलका माह शुईरे।”

¹² “झांह लेह केतिंङ भत्ते तिंङ खुश शुहबी जूंस अंऊर देर स्वर्गा रिंङ बंङज़ातंई। पर अंऊ केरे धरतीऊ टोईच़ी तोतोंई दंङ अंऊ समुंद्रारिंङ तोतोर केहतु टोईच़ी तरस लेह जूंशी तोह, छना कुचे मांजी आत्माओ अगुवा शेतान योंखा केहतु कछंङ अच़ा अति। दुह हेले रिंङ महस रोषेक्च़ा तोह छना कुचे दोई चेहच़ा कि युरनाह दोऊ अंत शुहचे योतो।”

मेच़िमी बि सताच़ी

¹³ अपेहल अजगर समझेगी इलि, कि गेह धरतीऊ टोईच़ी दह्च़ी इलिगा, दंङ दोई दोऊ थले ज़रका रें च़रति, अंऊ दुह मेच़िमी दुह योह बि जन्म रांहषी तोहई,

¹⁴ पर परमेश्वरे दि मेच़िमी बि उकाबो झुह्ट पाख रांई ताकि दुह ठाहरीरिंङ पिचे योतो अंऊ सुनसान ठाहरीरिंङ दोऊ थल्जी तेयार लहसी तोह। दंङ दोर्तिंङ साढ़े षुमु साल तचेक दोऊ देखभाल लहरी ताकि अजगर दोऊ कछंङ तचेक पिपि माह जूंस।

¹⁵ दंङ, यह्च़ा दुह मेच़िमी बि ढड़ारिंङ बहाएक्च़िमी थल्जी, दुह अजगरे ढड़ो हिसाबे इच्च़ा बेंडी एनोह आहच़ि बहाएगी च़रति।

¹⁶ पर दुह मेच़िमी बि धरती ओ दोरच़ी मदत खोकसिरी। ज़मीन गव्शे इलि दंङ अलसा इलि दंङ अजगरो आहच़ि हुंच़ी ती ज़मीनो अंदरेग अच़ा इलि।

¹⁷ दोहथर अजगर महसे रोषेक्च़ा इलि। झांह लेह दोई मेच़िमी ओ खानदानो थल्जी लड़ाई ओ घोषणा लहरी। मतलब दुह मीहतु खिलाप अंऊ परमेश्वरो हुकुमो भाषे लहज़ातोर दंङ यीशु दोरच़ी सिखाएसी शिक्षारे हिद लहज़िमी थल्जी पक्‍का शुहचे बंङज़ातोर।

¹⁸ दोहथर दुह अजगर अच़ा इलि दंङ समुंद्रो मुखंङ खड़े शुहचे इलि।