प्रकाशित वाक्य 11 - लाहौली बाइबिल

झुह्ट गवाह

¹ दंङ यह्च़ा गिह्बी पक्च़िमी थल्जी इच्च़ा डंडा रें च़रति दंङ परमेश्वरे गिह्बी हुकुम रेंई, “ईला गिऊ ए वेदी ओ नाप लेहप्तु, दंङ दुह मीहतु गिनती लोह अंऊ दोर्तिंङ गिऊ अराधना लहज़ातोर।”

² पर धकतेखी ल्वाड़ी था पक्तु छना कुचे दुह ऊई जाति दोतिंङ रांहषी तोह, अंऊ दोरे परमेश्वरा बि माह ञेंच़ातोर, दोरे निंज़ो झुह्ट लाह तचेक गिऊ पवित्र शहर यरूशलेमारिंङ राज लोहर।

³ “दंङ गेह घेंङौ झुह्ट गवाह तिंङ दिह अधिकार रमोग कि टाट चोक्सा ते इच्च़ा हज़ार झुह्ट राह षुमु निह्ज ध्याड़ा तचेक भविष्यवाणी लंहि।”

⁴ दुह झुह्ट गवाहो तुलना जैतूनो झुह्ट बुट ए झुह्ट दिवट ए लहसी ततो दि झुह्ट मीह प्रभु अंऊ भत्ते संसारो परमेश्वर शुह, दोऊ तुईज़ी खड़े बंङज़ातोर।

⁵ दंङ अरिया दोतिंङ नुकसान पिट्री जुंज़ा, दंङ दोतु आहच़ि मेह हुंच़ा दोतु बैरी भस्म लेह केट्रा, दंङ अगर अरिया दोतिंङ नुकसान पिट्री जुंज़ा, दंङ हेले ए झांह ठ्रोह सच़ी च़रपोर।

⁶ परमेश्वरे दोतिंङ खबर रंड्रीमी मुक्का सर्गंङ ज़ि संदाण माह अपिमी अधिकार रांहषी ततो। दोच़ी ती बि शुहई ठ्रोह षेह्ई रंगा रिंङ लेक्सा ए धरतीऊ टोईच़ी भत्ते पाहठी मुसीबतो टोईच़ी चोट रंड्रीमी अधिकार खोकसा तोह। दोरे अंयों फेरा जुंज़ातोर धोंण फेरा झांह लेह तरपोर।

⁷ अपेहल झुह्ट गवाह परमेश्वरो खबरो प्रचार लेह केओर, दंङ दुह मदम घ्वंण अंऊ अधोलोकंङ ज़ि हुंचोतो, दू, दुह झुल्ला मीहतंङ साते तेंङपोतो, दोतिंङ याहरषे च़रपोतो दंङ सच़ी च़रपोतो।

⁸ दंङ दोतु लाश दुह मोह्ड़े नगरो बिचंङ केहच़ी केहऊरे, अंऊ आत्मिक पाहठी सदोम ए मिस्त्र कहलाच़ा, अंऊर दोतु प्रभु ला क्रूसो टोईच़ी चढ़ाएसी शुह।

⁹ दंङ भत्ते मीहरे, खानदानो, भाषाओ, दंङ जातितु बिचंङ दुह झुह्ट गवाह तु लाश तिंङ साढ़े षुमु ध्याड़ा तचेक खंड्रा बंङज़ोर, पर दोरे अतिंङ ला दुह लाश पथेक्च़िमी हुकुम रमोर।

¹⁰ दोतु सिमी तुहई, दोकु झुह्ट गवाह ज़ि मुसीबतो दोरच़ी मीहतिंङ धोंण परेशान लहरिर अपेहल मीहच़ी रेड्रीर कि दोरे सिए इलोर, दंङ दोरे महसे खुश शुहचे इलिर। धोंण कि दोरे खुशी रंङ धाम मनेक्च़ी लेहतिर, दंङ इदि-अईदि बि तग रंड्री लेहतिर।

¹¹ पर साढ़े षुमु ध्याड़ो थल परमेश्वरे दोतु अंदरेग एनोह सग केहच़ी च़रति दंङ दोरे श्रींङे इलिर; दंङ दोरे एनोह कोंज़ो भारे खड़े शुहचे इलिर, दुह भत्ते ज़ि अंऊ दोच़ी खंणीर कि दोरे हेंतेग यह्च़ा श्रींङे तोईरे, महस बेबा इलिर।

¹² दोऊ थल, दुह झुह्ट मीहच़ी सर्गो दोरच़ी इच्च़ा सग रेड्रीर, अच़ि दोकु तिंङ जोरे हाऊष रेंई दंङ कुई, “देर खेका अतंई!” अपेहल दोतु बैरी खंड्रा तोईरे, दोहथर दोरे इच्च़ा डुह चोक्सा खेका स्वर्गो हखा अच़ा इलिर।

¹³ दंङ दुह ए मुक्का यरूशलेम शहरा रिंङ इच्च़ा मोह्ड़े भुयंल इलि, दंङ शहरो इमारतो दसवां हिस्सा द्चिह इलि; दंङ दुह भुयंलरिङ निह्ज हज़ार मीहरे सिए इलिर, दंङ अंऊ मीहरे बचेकी इलिर, दोरे वेवा ते क्रपि लेहतिर दंङ दुह मोह्ड़े परमेश्वरो महिमा लहज़ी लेहतिर अंऊ सर्गंङ तोहई।

¹⁴ दि दूसरी मुसीबतो अंत तोहई; पर तीसरा मुसीबत युरनाह अपिमी तोह।

सातवीं तुरही

¹⁵ अपेहल सातवें स्वर्गदूते तुरहीरिङ फुह लहरी, दंङ गेह स्वर्गंङ तेज सग रें हाऊष रंड्री रेड्रीगा: “संसारारिङ हेंतेग अरिला माह अच़ि राज लोहतो। सिर्फ हेंदु प्रभु परमेश्वर ए दोऊ अंङषी मसीह, दंङ दोई हमेशा-हमेशा ओ थल्जी राज लोहतो।”

¹⁶ दंङ निंज़ो पि सेंहणार अंऊ परमेश्वरो तुईज़ी ऐनातु-एनातु सिंहासनो टोईच़ी बंङज़ा तोईरे मोह्तु भारे कोंङा शुहचे परमेश्वरो अराधना लहज़ा,

¹⁷ दि कुट्री लेहतिर, “हे सर्वशक्तिमान प्रभु परमेश्वर, अंऊ तोह, दंङ अंऊ तोहई, ञेंहच़ी हेले कनु धन्यवाद लहज़ातंई छना कुचे केई हेंतेग केनोह मोह्ड़े सामर्थ कंड्रातन दंङ हेंतेग केई धरतीऊ टोईच़ी केनोह राज शुरू लेह चरच़ातन।

¹⁸ ऊई जाति ज़ि रोहष लहरिर, छना कुचे हेंतेग दुह ध्याड़ा पिचे इलजे तोहई कि कनु रोहष दोतु टोईच़ी अपतो, दंङ दुह ध्याड़ा कि काह सिए दोतु फेंसला लोहन हेंतेग दुह टेम ला तोह अपेहल काह दुह भविष्यवक्ता तिंङ ईनाम रमोंन अंऊ कनु सेवा लहज़ातोर दंङ दुह भत्ते मीहतिंङ अंऊ कनु आदर लहज़ातोर, दंङ दोतिंङ अंऊ दोरे खास तोतोर दंङ अंऊ दोरे खास माह तोहर, अपेहल कि काह दोतिंङ दुह ए मुक्का नाश लेह च़रपोन अच़ि धरतीऊ टोईच़ी नाश लहज़ातोर।”

¹⁹ दंङ परमेश्वरो अंऊ मंदिर स्वर्गारिंङ तोह, दुह अलसा इलि, दंङ दोऊ मंदिरंङ दोऊ वाईदा ओ बक्सा तंङसा इलि, बिजली, सग, गर्जन ए भुयंल शुई, दंङ सर्गंङ ज़ि ओलो मोह्ड़े संदाण शुई।