प्रकाशित वाक्य 10 - लाहौली बाइबिल

स्वर्गदूत ए कवचि कताब

¹ दंङ गेह इच्च़ा ऊई शक्तिशाली स्वर्गदूताबि इच्च़ा डुह चोकसा ते सर्गंङ ज़ि तक्सी खंईगा; दंङ दोऊ पुंज़ो पिला हासी इच्च़ा मुघतु धनुष तोह, दोऊ मोद ऐकेऊ ठ्रोह चमकेक्पाते दंङ दोऊ कोंज़ा मेहू थम्मो बराबर तोईरे;

² दोऊ सुचंङ कोंज़ा समुंद्रंङ केहच़ी केई, दंङ दोऊ फुचंङ कोंज़ा धरतीऊ टोईच़ी केहरिर। दोऊ गुह्ट्र रिंङ इच्च़ा कवचि कताब तोहई अंऊ अलसी तोहई।

³ दुह स्वर्गदूते जोरे हाऊष रें कुई दंङ दोऊ सग ब्राघो सगो बराबर तोहई। अपेहल दोई हाऊष रेंई, दंङ निह्ज़ी षुमु सगे दोबि जबाब रेंईर, अंऊ गड़गड़ो सगो ठ्रोह तोहई।

⁴ अपेहल निह्ज़ी सग थक्शतो, दंङ गेह चेहच़िमी थल्जी तेयार तोईगा, पर गेह स्वर्गो दोरच़ी दि सग रेड्रीगा, “अंऊ गप्पारे गर्जनो सगे कुहतो दोबि प्याके तोह दंङ था चेऊ।”

⁵ अंऊ स्वर्गदूता बि गेह समुंद्र ए धरतीऊ टोईच़ी खड़े तंङरिगा; दोई एनोह सुचंङ गुह्ट्र सर्गो हखा उठाईति कसम लहज़िमी थल्जी,

⁶ दंङ अंऊ हमेशा ओ थल्जी श्रींङे तोह, दंङ अच़ि स्वर्ग, धरती ए समुंद्र दंङ दोतु बिचंङ भत्ते धिर बणाषी ततो। दोऊ कसम लहज़ी कुई कि “हेंतेग छिल्ला गप्पो थल्जी ऊई रुमज़ी माह शोतो। हेंतेग दुह भत्ते पूरे शुहचे योतो।”

⁷ दुह मुक्का, अपेहल सातवें स्वर्गदूतो सग रंड्रीमी ध्याड़ा रिंङ, अपेहल दुह तुरही रिंङ फुह लहज़िमी शोतो, दंङ परमेश्वरो दुह रूठे खबरो योजना बि पूरा लोहतो अंऊ दोई दुह भविष्यवक्ता तिंङ कंङाते अंऊ दोऊ सेवा लहज़ातेर पर ऊई मीहतिंङ माह कंड्रीर।

⁸ दंङ गेह यह्च़ा दुह सग रेड्रीगा अच़ि स्वर्गंङ ज़ि गेरंङ साते गप्पा लाहते। सगे गेरंङ साते कुई, “ईला, दुह कताब रैंज़ा शिला अंऊ स्वर्गदूतो गुहट्ररिंङ अलसी तोह, अंऊ समुंद्र ए धरतीऊ टोईच़ी खड़े तोह।”

⁹ दंङ गेह स्वर्गदूतो कछंङ इलजी ते कुड़िगा, “दि कवचि कताब गिह्बी रोंऊ।” दंङ दोई गेरंङ साते कुई, “लेहप्तु, दिबी ज़ै च़रतु; दिऊ स्वाद याहमोऊ ठ्रोह मीठे तोह, पर थले दिऊ कड़के रे कांह खोकटुंङ टेहषी शोतो।”

¹⁰ झांह लेह गेह दुह कवचि कताब लेहपच़ी च़रतिगा अंऊ स्वर्गदूते च़ुमसी तहरे दंङ दोबि ज़े च़रतिगा। दंङ हेले रिंङ दिऊ स्वाद याहमाह ठ्रोह मीठे तोहई, पर अपेहल गेह दिबी चङें च़रतिगा, दंङ गिऊ खोकटुंङ टेहषी शुहबी लेहती।

¹¹ दोहथल गेरंङ साते दि कुई, “शतह-शतह झुण्डो ए देशो मीहतिंङ, शतह-शतह भाषा कुट्रा मीहतिंङ ए रज्ज़ा तिंङ अई इच्च़ा फेरा यह्च़ा कंड्रु, अंऊ परमेश्वरे कनिंङ कंड्रीमी थल्जी कुहषी तोह।”