फिलिपियों 3 - लाहौली बाइबिल

सच्चे धर्मिकता

¹ झांह लेह गिऊ प्यारे साथी विशवासी रे, प्रभुरिंङ खुश बंङज़ोंई। दुह ए गप्पारे केतिंङ घड़ी-घड़ी च़ेहच़ी गिह्बी ता छिल्ला कष्ट माह शवाह, पर दि गप्पा केतिंङ हप्सी शिक्षा ओ दोरच़ी ला बचाएपोतो।

² दुह मीहतंङ साते खबरदार बंङज़ेंई, अंऊ खुह्ई तु ठ्रोह तोतोर, दंङ मांजी कम लहज़ा तोर, अंऊ दोच़ी कुट्रातोर कि केतिंङ उद्धार लहज़िमी थल्जी खतना लेह ज़रूरी तोह।

³ छना कुचे परमेश्वरो सच्चा मीह ता हेनर शुई, अंऊ परमेश्वरो अराधना दोऊ आत्माओ दोरच़ी लहज़ातोर दंङ एनोह जीवनारिंङ मसीह यीशु एकता रिंङ खुश शवाहतोर दंङ एनोह कोशिशो टोहकठे भरोसा माह लहज़ातोर।

⁴ गिऊ कछंङ घेंङौ कोशिशा रिंङ बंङज़िमी थल्जी रूठे वहज़ा तोह, अगर अच़िया दि सोचेक्सा कि दोऊ कछंङ झांह ठ्रोह कोशिशो टोहकठे बंङज़िमी ऊई ला रूठे वहज़ा तोह, दंङ गिऊ कछंङ दोतु ला मोह्ड़े वहज़ा तोह।

⁵ गिऊ जेह्कपिमी थल रेह ध्याड़ो थल गिऊ खतना शुई, छना परमेश्वरो हुकुम तोहई, दंङ गेह जेह्कपिमी मुक्का बे इस्राएली शुगाह, दंङ बिन्यामीनो गोत्रो शुगाह; दंङ गेह पक्‍का यहुदी शुगाह; गिऊ बाह-मेमेर ला यहुदी तोईरे। अगर मूसा ओ कानून मनेक्च़िमी गप्पा तोह ता गेह फरीसी शुगाह।

⁶ खुशीऊ पाहठी गेह कोग ता कलीसियाबि सताएच़ा दुह; दंङ यहुदी कानून मनेक्च़ा तु, इच्च़ा धर्मी मीह तोहई, छना कुचे गेह दोऊ भत्ते पालन लाहतेर।

⁷ पर अंऊ गप्पारे गेह सोचेक्च़ातेग गिऊ थल्जी फायदा ओ तोहई, दोतिंङ ए गेह मसीह बि ञेंहच़िमी रंङ साते नुकसान समझेगी च़रतिगा।

⁸ छना कुचे गेह मसीह यीशु घेंङौ प्रभु ञेंहच़ी रंङ साते ऊई भत्ते धिर बे मोह्ड़े तोह, गेह भत्ते चीज़ा तिंङ बेकार चेहच़ातग। अतु वहज़ा ज़ि गेह भत्ते चीज़ारे छोड़ेके केहतग, दंङ दोतिंङ कूड़ा समझेक्च़ातग, ताकि गेह मसीह बि ञेंए तरपोग।

⁹ ताकि गेह मसीह रंङ साते एकता रिंङ बणेंके बंङज़ोग, माह कि घेंङौ दुह धर्मिकता रंङ साते, अंऊ मूसा ओ कानूनरंङ साते तोह, पर मसीहू टोहकठे विशवास लहच़िमी रंङ साते अंऊ परमेश्वरो दोरच़ी विशवास लहच़िमी रंङ साते खोकसा।

¹⁰ गेह दि जुंज़ातग कि मसीह बि ञेंए च़रपोग दोऊ सिमी दोरच़ी श्रींङे इबिमी सामर्थ महसूस लेह तरपोग दंङ लगातार दुख सहन लोहग छना दोई लाहतो, दंङ सिमी मुक्का दोऊ ठ्रोह बणेंके योग।

¹¹ ताकि गेह ला यह्च़ा सिमी दोरच़ी श्रींङमी लोहर।

निशानो हखा ज़रका रंड्री

¹² गेह दि दावा माह लहज़ातग कि गेह दि चीज़रे तुहई बे खोकच़ी चरच़ातग, या सिद्ध शुहचे इलोग; पर गेह दुह सिद्धता बि खोकच़िमी थल्जी महस मेहनत लहज़ी लेहकी तोतोग। अतु थल्जी मसीह यीशुई गेह अंङषी ततो।

¹³ हे गिऊ प्यारे साथी विशवासी रे, गेह दि दावा माह लहग कि गेह दुह निशाना (लक्षय) खोक्शे चरच़ातग; पर इच्च़ा दि कम लहज़ातग, कि अंऊ तुहई शुहचे इलजी तोह गेह दोबि पेह्षा, निशानो (लक्ष्यो) थल्जी महस मेहनत लेह जारी तोहग।

¹⁴ दंङ मसीह यीशु रिंङ परमेश्वरो स्वर्गीय बुलाहट ओ ईनाम खोक्च़िमी थल्जी गेह घेंङौ निशानो ह्खा तुंखा शुहबी लेहकी तोतोग।

¹⁵ हेनर भत्तेर अंऊ पक्‍का रंङ मसीह रिंङ विशवास लहज़ातंई झांह सोचेक्सी जूंस दंङ अगर अंऊ आ गप्पारिंङ केहतु ऊई ए विचार शुई ता परमेश्वर दोबि ला केहतु टोईच़ी प्रगट लेह च़रपोतो।

¹⁶ झांह लेह हेंदिंङ दुह सच्चाई ऊ हिसाबे श्रींङमी लेह्पोतो अंऊ परमेश्वरे तुहई बे हेंदु टोहकठे प्रगट लेह चरच़तो।

¹⁷ हे गिऊ प्यारे साथी विशवासी रे, केरे भत्ते ठ्रोहका शुहचे गिऊ ठ्रोह जीवन श्रींङी, दंङ दोतिंङ सेहषी च़रतेंई, अंऊ दि रीतिऊ टोईच़ी ज़ोवातोर अतु उदाहरण केहच़ी हेंदि व्यवहार लहज़ी तंङातेंई। अपेहल केरे ञेंतंङ साते तोहनी।

¹⁸ छना कुचे महसे मीहरे मांजी चाल ज़ोवातोर, अतु चर्चा गेह केतंङ साते घड़ी-घड़ी लहसी तरेग, दंङ हेंतेग ला क्रप्चे ते कुट्रा तोग कि केनातु व्यवहारो दोरच़ी मसीहू बलिदानो बैरी तोईनी।

¹⁹ दोतु अनंत विनाशो तोह, दोतु फुको हिटी ए दोतु भगवान शुह, दोरे षेह्पिमी कम लहज़ा घमण्ड लहज़ातोरे, दंङ दोरे हमेशा धरतीऊ चीज़ो पाहठी सोचेक्च़ातोर।

²⁰ पर हेंदु देश स्वर्ग शुह, दंङ हेनर हेंदु उद्धार लहज़ा प्रभु यीशु मसीहू स्वर्गंङ ज़ि वापिस अपिमी थल्जी रुमज़ा तोतोंई।

²¹ दुह एनोह शक्तिऊ दुह प्रभावो हिसाबे अतु दोरच़ी दोरे भत्ते चीज़ा तु एनोह काबूरिंङ लेह तरच़ा, हेंदु संसारो फुको ओ रूप लेहक्सा, एनोह महिमाऊ फुको ठ्रोह बणाके च़रपोतो।