फिलिपियों 1 - लाहौली बाइबिल

अभिवादन

¹ गेह पोलुस ए तीमुथियुस अंऊ यीशु मसीहू सेवक शुई, ञेंहतु तरफे केरे परमेश्वरो मीहतिंङ दंङ मुख्या तिंङ ए सेवका तिंङ दि डाक चेहच़ातग। अंऊ यीशु मसीह रिंङ शुहचे फिलिप्पी शहरारिंङ बंङज़ातोर।

² गेह प्रार्थना लहज़ातग कि हेंदु बाह परमेश्वर ए प्रभु यीशु मसीहऊ दोरच़ी केतिंङ मोह्ड़े दाह ए शांति खोकसा लोहतो।

पोलुसो प्रार्थना ए धन्यवाद

³ गेह अपेहल-अपेहल केतिंङ हिद लहज़ातग दोथर घेंङौ परमेश्वरो धन्यवाद लहज़ातग,

⁴ दंङ अपेहल केहतु भत्ते तु थल्जी प्रार्थना लहज़ातग, दंङ हमेशा खुशी रंङ साते मदतो थल्जी बिनती लहज़ातग।

⁵ झांह लेह कि केरे मुण्डो ध्याड़ारिंङ च़ि अपेहल बे केहच़ी दि रूठे खबरो टोहकठे विशवास लहज़ातंई दोथर बे तोग तचेक यीशु मसीहू पाहठी दि रूठे खबर फेलाच़िमी गिऊ सहभागी शुहचे शुई।

⁶ गिह्बी दि गप्पा ओ विशवास तोह कि परमेश्वरे केहतु बिचंङ छा रूठे लहच़ी शुरूआत लहतो, दोई ए दोबि यीशु मसीहू वापिस अपिमी ध्याड़ा तचेक पूरा लोहतो।

⁷ चाहे गेह जेलारिंङ तोतोग या गेह दि साबित लहज़ातग कि रूठे खबर हेले शुह। ठीक तोह कि गेह केहतु थल्जी झांह ठ्रोह विचार लोहग, छना कुचे गेह केतंङ साते महस दाह लहज़ातग चाहे गेह जेलारिंङ तोतोग या गेह रूठे खबरो बचाब लहज़ी लेहकी तोतोग दि साबित लहज़िमी थल्जी कि रूठे खबर हेले शुह, झांह लेह केरे भत्तेर गेरंङ साते परमेश्वरो मोह्ड़े दाह रिंङ सहभागी शोंई।

⁸ दिरिंङ परमेश्वर गिऊ गवाह तोह कि गेह यीशु मसीहू ठ्रोह दाह लहच़ी ते केतंङ भत्तेतंङ साते दोईमी लालच लहज़ातग।

⁹ दंङ गेह दि प्रार्थना लहज़ातग, कि इदि-अई दिऊ थल्जी केहतु दाह, सच्चाई ओ ज्ञान ए दंङ भत्ते पाहठी विचार ऊई ला बेहसा लोहतो,

¹⁰ झांह लेह केरे चुनाव लहज़िमी जोगे शोंई कि छि कम लहज़ी ठीक तोह, ताकि यीशु मसीहू दोबारा वापिस अपिमी ध्याड़ा तचेक ताकि केरे पवित्र ए निर्दोष शुहचे बंङज़ुंई।

¹¹ छना इच्च़ा बुट फल पैदा लहज़ा ध्वांए केहच़ी धर्मिकताऊ कम लोहवा लंहि अंऊ प्रभु यीशु मसीहू दोरच़ी शवाह दोरंङ साते भरपूर शुचे इलेंई अतु दोरच़ी यीशु मसीहू महिमा ए षटणा शुहबी जूंस।

कैदी ऊ रूपारिंङ सेवा

¹² हे विशवासी न्वारे, गेह जुंज़ातग कि केहच़ी दिह ञेंई च़रतेंई कि गिऊ टोईच़ी छि बितेक्पि लेहकी तोह, दोऊ वहज़ाज़ि महस मीहच़ी रूठे खबरो टोहकठे विशवास लहरिर।

¹³ देर तचेक कि महाराजा राजभवनो भत्ते सेना ए महलो भत्ते मीहतु बिचंङ दि प्रगट शुचे इलि कि गेह मसीहू सेवाओ थल्जी कैदरिंङ तोतोग।

¹⁴ दंङ प्रभुरिंङ अंऊ विशवासी न्वारे तोतोर, दोतु बिचंङ महस गिऊ कैदरिंङ शुहबी वहज़ा ज़ि, खुशी रंङ साते परमेश्वरो वचन बेधड़क शुचे सुनाएच़िमी थल्जी ऊई ला याहब लहज़ातोर।

¹⁵ दिह हेले शुह कि रेह मीहरे जलन ए लड़ाई झगड़ा ऊ वहज़ा ज़ि मसीहू प्रचार लहज़ा तोरे पर रेह मीहरे दि रूठे हिटीरंङ साते प्रचार लहज़ातोर।

¹⁶ दिरे मीहरे अंऊ रूठे सेहमारंङ साते प्रचार लहज़ातोर, गेरंङ साते दाह लहज़िमी रंङ साते रूठे खबर सुनाएच़ातोर, छना कुचे दोच़ी ञेंहच़ातोर कि, गेह रूठे खबरो बचाबो थल्जी कैदरिंङ तोतोग।

¹⁷ अंऊ मीहरे जलन ए लड़ाई-झगड़ा ओ थल्जी मसीहू पाहठी प्रचार लहज़ा तोर, दोरे एनोह फायदा ओ थल्जी मसीहू रूठे खबर ईमानदारी रंङ साते माह सुनाएच़ा तोर, दंङ देहर कैदरिंङ गिऊ मुसीबत बढ़ाएच़ातंई।

¹⁸ दंङ छि शुई? सिर्फ दिह, कि भत्ते पाहठी रंङ चाहे मांजी इरादारंङ साते चाहे सच्चाई रंङ साते, मसीहू पाहठी रूठे खबर सुनाएच़ा तोर, दंङ गेह दिरंङ खुश तोतोग, दंङ खुश बंङज़ोग लाह।

श्रींङी बंङज़ी मसीह शुह

¹⁹ छना कुचे गेह ञेंच़ातग कि केहतु प्रार्थना ओ दोरच़ी, दंङ यीशु मसीह च़रसी, पवित्र आत्मो मदतो दोरच़ी, गिऊ कैदो दोरच़ी बचाके च़रपोतो

²⁰ गिऊ सेहमो हिटी ए उम्मीद दि तोह, कि गेह अंऊ लाह गप्पा रिंङ शर्मिन्दा माह शुगाह, पर गिह्बी मसीहू पाहठी कुट्री हिम्मत शवाह छना कि गेह बितेगी टेमारिंङ कुहतेग। चाहे गेह श्रींङी बंङज़ोग या सिए योग, गेह घेंङौ भत्ते ज़िंदगी ऊ दोरच़ी मसीह बि आदर रम्मा लोहग।

²¹ छना कुचे अगर गेह षिङे बंङज़ोग, दंङ अगर गेह सिए योग दंङ दिह गिऊ थल्जी रूठे शोतो छना कुचे दुह मुक्का गेह मसीह रंङ साते बंङज़ोग।

²² पर अगर गेह फुकारिंङ श्रींङी बंङज़िमी रंङ साते, गेह मसीहू थल्जी महस रूठे लेह तरपोग दंङ गेह माहञेंच़ातग कि अपि जुंज़ातन।

²³ छना कुचे गेह झुल्लाकुतिङ बिचा उलझेकि तोतोग, हिटी ता अपत कि गेह सिए योग दंङ मसीहू कछंङ अच़ा योग, दि महसे रूठे तोह।

²⁴ पर गिऊ श्रींङी बंङज़ी ऊई ला ज़रूरी तोह, छना कुचे केतिंङ गिऊ मदतो ज़रूरत तोह।

²⁵ गिह्बी दिरिंङ छल्ले शक माह, झांह लेह गिह्बी पता तोह कि एंतेग गेह माह सिओग। दंङ झांह लेह गिह्बी विशवास तोह कि गेह श्रींङी बंङज़ोग।

²⁶ ताकि अपेहल गेह केतंङ साते बंङज़ोग दंङ केरे गिऊ वहज़ा ज़ि मसीह यीशु पाहठी ऊई लाह घमण्ड लेह तरपोंई।

²⁷ सिर्फ धोंण ए लंहि कि केहतु चाल-चलन मसीहू रूठे खबरो जोगे शोतो। कि चाहे गेह अंज़े ते केतिंङ खमोग, चाहे गेह अपोग ए माह, केहतु पाहठी दि रेड्रोग कि केरे इच्च़ा इरादारिंङ पक्‍का तोहईं दंङ इच्च़ा सेहम शुहचे रूठे खबरो विशवासो थल्जी मेहनत लोहवा तंही।

²⁸ दंङ अंऊ ला गप्पारिंङ विरोधीतंङ साते माह बेवातंई। केहतु हिम्मत दोतु थल्जी विनाशो साफ निशानी शुह, पर केहतु थल्जी उद्धारो दंङ दि परमेश्वरो दोरच़ी शुह।

²⁹ छना कुचे मसीह वहज़ा ज़ि केहतु टोईच़ी दि मोह्ड़े दाह शुई, कि माह सिर्फ दोऊ टोईच़ी विशवास लंहि पर दोऊ थल्जी दुख लाह उठाकतेंई।

³⁰ दंङ केतिंङ ला ध्वांए दुख उठाएच़ी जूंशी तोह, छना केहच़ी गिह्बी दुख उठाएच़ी तंङसी शुई, अपेहल गेह केतंङ साते फिलिप्पी शहरंङ तोईग, दंङ अंऊ दुखो पाहठी केहच़ी रेड्रातंई अंऊ गिह्बी जेलंङ हेंतेग ला तोह।