मरकुसो 8 - लाहौली बाइबिल

पि हज़ार मीह तिंङ खिलाच़ी

¹ दुह ध्याड़ारिंङ अपेहल यह्च़ा मोह्ड़े भीड़ ठ्रोहका शुई, दोतु कछंङ ज़ेइमी छिल्ला मा तोहई, यीशुज़ि एनोह चेला तिंङ बुलाके दोतंङ साते कुतोह,

² “गिह्बी दी भीड़ो टोईच़ी दया अपि लेहकी तोह, छना कुचे ता दिहरे षुहमरक पुरे गेरंङ साते तोहई, दंङ दोतु कछंङ ज़ेइमी लाह छले मद।

³ अगर गेह दोतिंङ योंई चुंखा च़रपोग, ता दुरेह अमरिंङ छ्चे केह्षा योरेह; छना कुचे ता दोतु बिचंङज़ि रेह ओई तारेह ज़ि अन्जी शुहरे।”

⁴ दोऊ चेलाज़ि दोबि रुहक्ती, “दी सुनसान ठाहरीरिंङ धोंण रोटी रेह अंऊर च़ि हापोंई कि दिहरे कांहषी जूंस?”

⁵ यीशुज़ि दोतिंङ रुहक्ती, “केहतु दोहर अंयों रोटी तोह?” दोच़ी कुतोह, “निहज़ी।”

⁶ दंङ यीशुज़ि मीहतिंङ षोड़िंङ बंङज़िमी आज्ञा रेंहई, दंङ दुह निहज़ी रोटी लेहप्ती, दंङ परमेश्वरा बि धन्यवाद लेह खन्नी लहरी, दंङ एनोह चेला तु हखा रमाह लहरी कि दोतु तुईज़ी कुंई, दंङ दोच़ी दुह रोटी मीह तु तुईज़ी फाए केहरिर।

⁷ दोतु कछंङ फोह कवचि मछली रेह तोहई। मछलीऊ थल्जी यीशुज़ि परमेश्वरो धन्यवाद लेह दुह ला एहनो चेला तु हखा रेह ते मीहतु तुईज़ी केट्रिमी आज्ञा रेंहई।

⁸ दोरे भत्ते मीहरे ज़ेह ते कहशी इलि दोहथल ला चेलाज़ि नुअशी रोटी रंङ ज़ि निहज़ी टोकरीरे बिंङे उठाएतिर।

⁹ दंङ दोरे मीहरे पी हज़ार ओ लगभग तोहई; दोहथल यीशुज़ि दोतिंङ एनोह-एनोह चुंखा बिदा लहरी।

¹⁰ दंङ दोहपल ए यीशु दोरच़ी एनोह चेला रंङ साते किशतीऊ टोईच़ी हुंच़ा दल्मनूता प्रदेशो हखा इलि।

फरिसी तु दोरच़ी स्वर्गीय चिन्हों मांग

¹¹ दोहर थोड़े अरे फरीसी मीहरे यीशु कछंङ अंज़े दोहरंङ साते बेहस लहज़ी लेहतिरे, दंङ दोबि परखेक्च़िमी थल्जी दोऊ दोरच़ी स्वर्गीय निशानी पेट्री लेहतिर।

¹² दोई दोतु अबिश्वास ओ बहज़ा ज़ि एनोह आत्मारिंङ ऊषकार रेह कुंई, “दी मुक्को मीहज़ी छिले निशानी पेट्रातोर? गेह करंङ साते हेले कुट्रातग कि केरे दी मुक्को मीहतिंङ गेह छले स्वर्गो निशानी माह कमोग।”

¹³ दंङ दोहथल यीशुज़ि फरीसीतिंङ छोड़ेके एनोह चेला तंङ साते किशतीऊ टोईच़ी इलि, दंङ गलील झीलो नुरेह अच़ा इलि।

फरिसी ए हेरोदेसो खमीर

¹⁴ चेलारेह रोटी शिल्ज़ी पेशा इल्देर दंङ किशतीरिंङ दोतु दोहर सिर्फ इच्च़ा रोटी तोहई।

¹⁵ यीशुज़ि दोतिंङ खबरदार लेहरी, “रेड्रुंई, फरीसीतु ए रज्ज़ा हेरोदेसो खमीरो दोरच़ी बचेके तोहई।”

¹⁶ पर चेला तिंङ यीशु गप्पा समझ माह अति, दुरेह एनातु बिचंङ सोचेके कुट्री लेहकी तोहई, “हेंदु दोहर महसे रोटी मा।”

¹⁷ दोतु विचार ञेंह यीशु ज़ि दोतंङ साते कुतोह, “केहच़ी छिले केनातु बिचंङ दी विचार लहज़ातंई ञेंहतु दोहर रोटी मा? छि केहच़ी एनदा तचेक माह ञेंच़ातंई आ? छी केहतु सेहम डग-डग शुहचे इलजी तोआ?

¹⁸ छि केहच़ी टीरा शुहचे ला केहच़ी माह खंड्रातंई, छि केहच़ी रेहट्रा शुहचे ला माह रेड्रातंई आ? छि केतिंङ हिद मद आ?

¹⁹ अपेहल गेह ङा हज़ार मीहतिंङ सिर्फ ङा रोटी ओ दोरच़ी ज़ेइमी थल्जी रंड्री तरच़ातग, दंङ रोटी रंङ पिंङे अंयों टोकरी बचाके तोईर, अंऊ केहच़ी ठ्रोहका लाहतेन?” चेलाज़ि जवाब रें कि, “सनी टोकरी।”

²⁰ यीशुज़ि यह्च़ा कुहतो, “अपेहल गेह निहज़ी रोटी ऊ दोरच़ी पी हज़ार मीहतिंङ बगत रंड्रातग, दंङ दुह मुका रोटी ऊ अंयों टोकरी बचेके तोईरे?” चेलाज़ि कुट्री लेहती, “निहज़ी टोकरी।”

²¹ यीशुज़ि दोतंङ साते कुतोह, “छि केहच़ी हेंतेग तचेक माह समझेकतानि आ कि गेह अरी शुगाह? गेह रोटी ऊ पाहठी गप्पा माह लहग बल्कि दिह कुट्रातग कि फरिसी मीहतिंङ ए रज्ज़ा हेरोदेसो मदम विचार ए शिक्षा रें बचेके तोनि।”

बैतसैदा रिंङ इच्च़ा काणे मीह ठीक लहज़ी

²² यीशु एनोह चेला तंङ साते बैतसैदा नगरंङ अच़ा अतिर। दोहर इच्च़ा काणे मीहबी यीशु कछंङ हतिर दंङ दोऊ हखा विनती लेहरिर, “कि केई दिह काणे दोबि केनोह गुहट पहछ रें दिबी ठीक लेह च़रतु।”

²³ यीशुज़ि दुह काणे दोऊ गुहड़ चुमेह नगरो धह्कते लेन्ज़ा इलि, दंङ दोऊ टीरंङ थू लहजे दोहर गुहड़ केहरिर, दंङ दुह रुहक्ती, “छि केई छा खंड्रातना?”

²⁴ दोई टीरा खेका लेह खंणी, “गेह मीहरे खंड्रातग, पर दुरेह गिह्बी संङा माह तंङफातोर।”

²⁵ यीशुज़ि यह्च़ा दोऊ टिरो टोईच़ी गुहड़ केई, दंङ काणे दोई रुठे रंङ खंणी। दुह ठीक शुहचे इलि, दंङ भत्ते धिर संङा खंड्री लेहती।

²⁶ यीशुज़ि दुह मीहबी दिह कुचे चुंखा च़रति, “कि काह नगरंङ थेलु।” दंङ केई अति ला था कंड्रु कि छिला करंङ साते शुहचा।

पतरसो यीशु बि स्वीकार लहज़ी

²⁷ दंङ दुह मुका यीशु ए दोऊ चेलारे बैतसैदा नगर केट्रा फिलिप्पी नगरो कछंङ नगरंङरी अच़ा इलिरे। अमरिंङ यीशुज़ि एनोह चेला तु हखा रुहक्ती कि, “मीहच़ी गिह्बी छि कुट्रातोर? ‘कि गेह अरी शुगाह?’”

²⁸ चेलाज़ि जुबाब रेंहई, “मीहच़ी कनिंङ यूहन्ना बपतिस्मा, एलियाह भविष्यवक्ता दंङ रेह मीहच़ी क्वातर कि काह तुहई कि भविष्यवक्तातु बिचंङज़ि इच्च़ा शुनाह। अंऊ सिमी दोरच़ी श्रींङे इलज़ा।”

²⁹ यीशुज़ि दोतिंङ रुहक्ती, “दंङ केहच़ी गिह्बी छी कुट्रातंई कि गेह अरी शुगाह?” पतरसे दोबि जुबाब रेंहई, “का मसीह शुनाह अंऊ परमेश्वरो तरफे चरच़ि शुनाह।”

³⁰ यीशुज़ि दोतिंङ खबरदार लेह च़रति, दिह ठीक कुट्रा पर दिह पाहठी केहच़ी अतंङ साते लाह था कुंहई।

एनोह सिमी बारे यीशु भविष्यबाणी

³¹ दंङ यीशु एनोह चेला तिंङ कंड्री लेहती, “दंङ दिह लाह ज़रूरी तोह कि यहुदी सेंहणा, यहुदी मोह्ड़े पुरोहित ए यहुदी शास्त्रीज़ि गेह मीहू योह बि अस्वीकार लोहर। दंङ दोच़ी गेह पक्‍का सच़ी च़रपोर दंङ दोऊ थल गेह षुमु ध्याड़ो थल षिङे योग।”

³² दि गप्पा यीशुज़ि एनोह चेला तु हखा साफ-साफ कुट्री च़रति। दंङ पतरसे यीशुबि शत्‌ह लेह दोबि रैहच़ी कुट्री लेहती, “कनिंङ झांह ठ्रोह माकुट्री जूंस।”

³³ दंङ दोई यहचा एनोह चेला तु हखा खंणी, “दोई पतरसबि रैहच़ी कुतोह, केई गिह्बी शेतानो ठ्रोह परखेकच़ी बंद लोह, गिऊ दोरच़ी ऊईतार शुहचे इल; छना कुचे कनु विचार मीहू दोरच़ी तोतोर परमेश्वरो दोरच़ी माह।”

यीशु थ्लेसी जोईमी मतलब

³⁴ यीशुज़ि एनोह चेला तिंङ ए ऊई मीहतिंङ एनोह कछंङ बुलाके कुट्री लेहती, “अरीला गिऊ चेला बणेकपी तातंई दोच़ी एनोह हिटी छोड़ेके एनोह क्रूस उठाके गिऊ थलेच़ि अच़ा अतंई। मतलब कि निंदा ए दुख सहन लांई, दंङ एनोह जहानो रंड्रीमी थल्जी ला तेयार बंङज़ोतो।” दंङ दुह गिऊ चेला बणेके तरपोतो।

³⁵ छना कुचे अच़ि एनोह जहानो दिह धरतीऊ टोईच़ी बचाएपोतो दोई परमेश्वरारंङ साते अनंत जीवन खोकसिमी मोका योह्च़े च़रपोतो। दंङ अंऊ मीह गिऊ टोहकठे विशवास लहच़ी ए दंङ गिऊ रूठे खबर सुनाएच़िमी बज़ाहसि सिओतो दुह मीह परमेश्वरारंङ साते अनंत जीवन खोकपोतो।

³⁶ अगर मीह भत्ते संसाराबि प्राप्त लोहतो दंङ एनोह जहानो नुकसान लोहतो, ता दोबि छी फायदा शोतो?

³⁷ परमेश्वरारंङ साते अनंत जीवन खोकसिमी थल्जी ञेंहज़ि परमेश्वरा बि छल्ले मारंड्री।

³⁸ अंऊ दि कुकम लच़ाहढ ए पापी मीहतु बिचंङ गेह मीहू योह बि ए गिऊ शिक्षा ग्रहण माह लोहतो, दंङ अपेहल गेह ला घेंङौ पवित्र स्वर्गदूतारंङ साते घेंङौ बाहो महिमा रंङ साते अपोग, दंङ गेह ला दोतिंङ ग्रहण माह लोहग।