मरकुसो 15 - लाहौली बाइबिल

पिलातुसो तुईज़ी यीशु

¹ मुंजे सरके युरनाह यहुदी मोह्ड़े पुरोहित, सेंहणा, दंङ यहुदी शास्त्रीज़ि दंङ भत्ते यहुदी सभाओ भत्ते मीहच़ी यीशु पाहठी सलाह लेहरिर, दंङ दोऊ न्याय लहज़िमी थल्जी दोबि पिलातुस ओ चुंङ (रोम देशो मोह्ड़े राज्यपाल) लेन्ज़ा इलिरे।

² पिलातुसे दुह रुहक्ती, “छि केई यहुदी तु रज्ज़ा शुनाह?” दोई दोबि जुबाब रेंहई, “वेई! केई केनेह कुट्रातन।”

³ यहुदी मोह्ड़े पुरोहिता ज़ि दोऊ टोईच़ी महस गप्पो पाहठी दोष लगाएच़ी लेहकी तोईरे।

⁴ पिलातुसे दुह यहचा रुहक्ती, “केई छरी छिला जुबाब माह रंड्रातन? खंणु दिहरे कनु टोईच़ी महसे गप्पो दोष लगाएच़ी लेहकी तोईरे?”

⁵ यीशुज़ि यहचा छि ला जुबाब मा रेंहई; देहर तचेक कि पिलातुस महस हेरान शुहचे इलि।

सच़िमी आज्ञा

⁶ हर साल पिलातुस दुह यहुदी त्याहरो रिंङ इच्च़ा केदी बि अतु मांग मीहज़ी लहज़ातेर, दोतु थल्जी रिहा लहज़ातेर।

⁷ दुह टेमारिंङ बरअब्बा मिन्दु इच्च़ा मीह अरी कैदीरंङ साते कैद तोहई, अंऊ दोई रोमी सरकारो खिलाप विरोह लहज़ा दोपहल इच्च़ा मीहबी सच़ी च़रते।

⁸ दंङ भीड़ पिलातुसो कछंङ इलजे दोहरंङ साते बिनती लहज़ी लेहकी तोहई, कि छना केई हेंदु थल्जी हर साल लहज़ातन, ध्वांए लोहू।

⁹ पिलातुसे दोतिंङ जुबाब रेंहई, “छि केहच़ी पेट्रातंई कि गेह केहतु थल्जी यहुदी तु राजा बि केचे केओ?”

¹⁰ छना कुंई साते ता दुह ञेंहच़ाते कि यहुदी मोह्ड़े पुरोहिता ज़ि यीशुबि जेगदंन लहसे चुम्ज़ी शुह।

¹¹ यहुदी मोह्ड़े पुरोहितरे मीहतिंङ दी कुट्रिमी थल्जी जोर रें कि पिलातुस ओ दोहरची यीशुबि रिहा लहच़िमी बे ता बरअब्बाबि रिहा लहच़िमी मांग लोहई।

¹² दी रेड्रा पिलातुसे दुरेह यहचा रुहक्ती, “अंऊ दिबी केहच़ी यहुदी तु राजा कुट्रातंई, दोऊ गेह छी लोहग?”

¹³ भीड़ो मीहच़ी यहचा हाऊष रेंहई, “दोबि क्रूसो टोईच़ी केहच़ी सच़ी च़रतिन।”

¹⁴ पिलातुसे दोतंङ साते कुतोह, “छिले, दी छी मांजी कम लहसी शुह?” दंङ दोच़ी महसे हाऊष रें कुतोह, “दोबि क्रूसो टोईच़ी केहच़ी सच़ी च़रतिन।”

¹⁵ दंङ पिलातुसे भीड़ाबि खुश लहज़िमी थल्जी बरअब्बाबि दोतु थल्जी रिहा लेह केहतो, दंङ यीशुज़ि रोमी सेनिकातु गुहड़िंङ कोड़े चढ़ाएच़िमी ए क्रूसो टोईच़ी केचिमी ए सच़िमी थल्जी दोतु हखा रें च़रति।

सैनिका तु दोरच़ी यीशु अपमान

¹⁶ रोमी सेनिकज़ि यीशुबि पिलातुसो महल ओ अंद्रेग लेन्ज़ा शिलिर। दंङ दोहर दोच़ी भत्ते सैनिकरे ठ्रोहका लहरिर

¹⁷ दंङ यीशु ऊ मज़ाक उड़ाठ्रिमी थल्जी दोबि बेंगनी रंगो चोगा पहनाति छना रज्ज़ा ज़ि लेहच़ी तोहई। दंङ छ्वाक्तु ताज लचे दोऊ पुंज़ो टोईच़ी केरिरे,

¹⁸ दंङ दी कुट्रा मज़ाक लहच़ी लेहतिर, “हे यहुदी तु राजा नमस्कार।”

¹⁹ दोरे दोऊ पुन्ज़ंङ घड़ी-घड़ी द्रोतो लठी रंङ घाह केट्राते, दंङ दोऊ बेइज्ज़ती लहच़िमी थल्जी दोऊ टोईच़ी थू लहज़ाते, पुष्टू भारे बंङज़ा दोबि प्रणाम लहज़ी लेहकी तोहई।

²⁰ अंऊ मुका दोरे दोऊ ठटा लेह योहसते, ता दोऊ टोईच़ी ज़ि दुह पोरलो खमज़े युप्सा दोबि दोऊ खमज़े लगाएती, दंङ दोबि क्रूसो टोईच़ी चड़ाची मी थल्जी शहरो धह्कते लेन्ज़ा शीलिरेह।

यीशु बि क्रूसो टोईच़ी केट्री

²¹ अपेहल दोरे शहरो दोहरची धखतेका इपि लेहकी तोईरे ता शमौन मिन्दु इच्च़ा मीह नगरओ दोहरची यरूशलेम शहरो हखा अपि लेहकी तोहई दुह कुरेनी शहरो तोहई दंङ सिकंदर ए रुफुस ओ बाह तोहई। दंङ सेनिकज़ि दोबि ज़बरदस्ती यीशु क्रूस दोऊ दोरच़ी कुरच़े लहरिर दंङ दोहर तचेक लेन्ज़ा शिलिर अंऊर यीशुबि क्रूसो टोईच़ी चढ़ाएसिमी तोहई।

²² सैनिकज़ि यीशुबि गुलगुता मिन्दु ठहरिंङ हति अतु मतलब, “आरमी भाषारिंङ खोपड़ीऊ अकारो ठ्रोह ठहरि।”

²³ क्रूसो टोईच़ी चढ़ाएच़िमी तुई सेनिकज़ि यीशुबि गन्धरस मिन्दु इच्च़ा औषद दाखो रसो बिचंङ चव्चे दोबि रंड्री लेहतिर ताकि दोबि टेहषीऊ एहसास माह शोतो। पर यीशुज़ि दुह मा लेहप्ती।

²⁴ दंङ दोच़ी दुह क्रूसो टोईच़ी केरिरे दंङ दोऊ खमज़े तु टोईच़ी चिट्ठी केट्रे, कि अतिंङ छी खोकसोतो, दुरेह फरिरेह।

²⁵ दंङ मुंजेकी लगभग नो बजेकि टेमारिंङ, अपेहल दोच़ी दुह क्रूसो टोईच़ी केरिरे।

²⁶ दंङ सैनिकज़ि क्रूसो तोरिंङ बक्शे तकती लगाएती अतु टोईच़ी यीशु ऊ थल्जी दिह च़ेहसी तोहई कि, “यहुदी मीहतु रज्ज़ा।”

²⁷ दोच़ी दोहरंङ साते झुह्ट डाकू रेह इच्च़ा सुचंङ हासी इच्च़ा फुचंङ हासी क्रूसो टोईच़ी केरिरे।

²⁸ (झांह लेह पवित्रशास्त्रो दुह वचन पुरे शुई अंऊर मसीहू पाहठी च़ेहसी तोह, “कि दुह अपराधी तु साते चुवासा योतो।”)

²⁹ दंङ अमरिंङ जोज़ा मीहज़ी पुंज़ा त्रुलज़ा-त्रुलज़ा दोऊ बेज़ती लहज़ी लेहतिर, “वाह! मंदिर ठ्वालवा दुह दंङ षुमु ध्याड़ा रिंङ बणेकठ्रा दुह!

³⁰ क्रूसो टोईच़ी ज़ि तकसाते एनाबि बचाके च़रतु।”

³¹ ध्वांए ठ्रोह यहुदी मोह्ड़े पुरोहितरे ए यहुदी शास्त्री रे एनातु बिचंङ यीशु ऊ मज़ाक लेह ते कुट्री लेहकी तोईरे, “दी उईरे बचाति दंङ ऐनाह बचाची मरति।

³² दिह मीह अच़ि एनाबि इस्राएलो मसीह ए रज्ज़ा शुहबिमी दावा लाह। अगर दिह हेंतेग क्रूसो टोईच़ी ज़ि तकसा अपतो ता ञेंहच़ी खमोंई दंङ विशवास लोहुनी। दंङ अंऊ दोहरंङ साते क्रूसो टोईच़ी तोईरे, दोरे ला दोऊ बुराई लहज़ी लेहकी तोईरे।”

यीशु एनोह प्राण रंड्री

³³ नीरा शुहतर भत्ते देशंङ हंयार शुहचे इलि, दंङ दुह षुमु पहरङ (लगभग 3 बजे) तचेक तोहई।

³⁴ षुमु पहरङ यीशु ज़ि मोह्ड़े सगा रंङ साते हाऊष रें कुतोह, “इलोई, इलोई मा शब्क्तनी?” अतु मतलब दी शुह, “हे परमेश्वर, हे गिऊ परमेश्वर, केई गेह छिले केचे केहरिर?”

³⁵ अंऊ कछंङ खड़े तोहई, दोतु बिचंङ ज़ि रेहह ज़ि दी रेड्रा कुट्री लेहकी तोईरे, “रेड्रुंई, दुह एलियाह भविष्यवक्ताबि सर्गंङज़ि एनोह मदतो थल्जी बुलाएच़ी लेहकी तो।”

³⁶ दंङ इच्चे मीह ए ज़रका रें सपंज़ दाखो सुर्ज़ि रसो अंद्रेग ठुमज़े, दंङ डंड़ा रिंङ दोहर केट्रे दोबि रेंई दंङ कुंई, “रूहम्ज़ु, खमोंई कि एलियाह भविष्यवक्ता दोबि क्रूसो दोहरची आज़ाद लेहई अपा मापा।”

³⁷ दंङ यीशु ज़ि मोह्ड़े हाऊष रें एनोह प्राण रें च़रति।

³⁸ दंङ दुहए टेमारिंङ मंदिरो दुह पर्दा अंऊ भत्ते मीहतिंङ परमेश्वरो तुईज़ी इबिमी रंङ साते रोकेक्चते, तोरिंङ ज़ि योंङ तचेक ट्रलशा झुह्ट खन्नी शुहचे इलि।

³⁹ अंऊ सुबेदारे दोऊ सामटे खड़े तोहई, अपेहल दोबि झांह हाऊष रें प्राण छोड़के खंणी, दंङ दोई कुतोह, “हेले दी मीह, परमेश्वरो योह तोहई।”

⁴⁰ रेह मेच़मी रेह ऊईतारे ज़ि खंड्री लेहकी तोहई; दोतु बिचंङ मगदल शहरो मरियम, कवचि याकूब दंङ योसेस ओ याह मरियम, दंङ सलोमी तोहई।

⁴¹ अंऊ मुका यीशु गलीलंङ तोहई ता दिहरे भत्ते दोऊ थले शुहचे यवातेर दंङ दोऊ सेवा लहज़ातेर; दंङ ऊई महस ला मेच़मी रेह तोहई, अंऊ दोहरंङ साते यरूशलेम शहरंङ अन्जी तोहई। दुरेह ला ऊईतारे ज़ि खंड्री लेहकी तोहई।

यीशु बि पथेक्च़ी

⁴² अपेहल यीशुबि क्रूसंङ चढ़ाएतेर दुह तेयारी ध्याड़ा तोहई, अंऊ मतलब तोहई अरामो ध्याड़ाओ इच्च़ा ध्याड़ा तुई, दंङ यहुदी रिवाज़ो हिसाबे दुह ञोंकोल कि शुहरुवातंङ शुहबी रंङ साते दोच़ी अंऊला कम लेह मरच़ातेर।

⁴³ झांह लेह अपेहल लगभग एके अच़ा इले दोहपल अरीमतिया शहरंङ बंङज़ा यूसुफ अति, अंऊ यहुदी महासभाओ नेता तोहई अंऊ ऐनाह ला परमेश्वरो राज्य इंतज़ार लहज़ाते। दोई याहू लेह पिलातुसो कछंङ इलि दंङ यीशु लाश क्रूसो दोहरची योंखा तक्चिमी ए पथेक्च़िमी थल्जी अनुमति पेट्री लेहती।

⁴⁴ पिलातुस हेरान शुहचे इलि कि यीशु धोंण सरके सीए इलि; दंङ दोई सुबेदारे बुलाके रुहक्ती, “छि यीशु हेले सीए इलज़ा आ?”

⁴⁵ अपेहल दोई सुबेदारो दोरच़ी भत्ते हाल ञेंह केहरी, ता यूसुफ बि लाश शिल्ज़िमी अनुमति रें च़रति।

⁴⁶ दंङ दोई यीशु थल्जी मलमलो इच्च़ा चादर चुम्हरी, दंङ यीशु ऊ फुक क्रूसो दोहरची योंखा तकशे च़रति, दंङ दोबि (यहुदी रिवाज़ो हिसाबे) दुह मलमलो चादरो बिचंङ ज़िल्ज़ी लहरी, दंङ यीशु ऊ फुक कब्रङ अंऊ गोह कोरेकि बणाएठ्री दोहर केहरी, दंङ कब्रों पेतंङ रिंङ इच्च़ा मोह्ड़े रहग धका रें केचे केहरी।

⁴⁷ मगदल शहरो मरियम ए योसेस ओ याह मरियम खंड्री लेहकी तोहई कि दुह अंऊर केह्षी तोत।