मरकुसो 14 - लाहौली बाइबिल

यीशु बारे योजना

¹ झुह्ट ध्याड़ो थल फसह त्यार ए सुम मेह रोटीऊ त्यार तोहई। यहुदी शास्त्री ए यहुदी मोह्ड़े पुरोहित यीशुबि च़ुमज़िमी तोईरे दंङ सच़िमी तातेर।

² दंङ कुट्री लेहकी तोईरे, “पर्वो ध्याड़ारिंङ झांह शुबी माह जूंस कि मीहतु विचंङ शासी तेंङसी शोतो।”

बैत्नियाह रिंङ यीशु स्वागत

³ अपेहल यीशु बैतनिय्याह नगरंङ शमौन कोढ़ी ऊ चुंङ बगत ज़े लेहकी तोहई, दंङ इच्च़ा मेच़मी मंङे संगमरमरो कवचि बोतलो अंद्रेग जटामसिऊ महस शुद्ध रुठे मंङे इत्र रेंज़ा हति; दंङ लब थक्शे दुह इत्र दोऊ पूज़ंङ केहरिर।

⁴ दंङ अंऊर दोहर बंङज़ा तोईरे, दोरे एनातु बिचंङ रोषेक्सा कुट्री लेहतिरे “दि मंङे इत्र छारिंङ बर्बाद लेह च़रति?

⁵ छना कुचे ता दी इत्र ता इच्च़ा सालो ध्याड़ी बराबर तोह बे महस लसा रंङ लंङज़ा गरीबातिंङ रें च़रतिगा।” दंङ दुरेह दोबि रैहति लेहतिर।

⁶ यीशुज़ि दोतंङ साते कुतोह, “दोबि रैहच़ी बंद लांई, दोबि परेशान थालंई दोई छि कम लहसी ततो दुह रुठे शुह।

⁷ कंगाल ता केतंङ साते हमेशा शवातेर, दंङ केहच़ी अपेहल जुन्ज़ातंई दुह मुका दोतंङ साते भलाई लोहुनी; दंङ गेह केतंङ साते हमेशा मा बंङज़ोग।

⁸ दि मेच़िमी छि भलाई लहज़िमी तोहई दुह लहच़ी च़रति। दोई गिऊ फुकारिंङ इत्र केहच़ी टाईम बे तुहई पथेक्च़िमी थल्जी तेयारी लेह चरच़तो दिबे तुई कि गेह सिए योग।

⁹ गेह केतंङ साते हेले कुट्रातग कि भत्ते संसारा रंङ अंऊ ला गिऊ रूठे खबर शोतो, दोहर दिऊ दी कमो च़रच़ा ला दोऊ हिदरिंङ शोतो।”

यहुदाओ यीशुरंङ साते विशवासघात

¹⁰ दंङ करियोत नगरो यहूदा, अंऊ यीशु सनी अंङषी दोतु बिचंङज़ि इच्च़ा तोहई दुह यहुदी मोह्ड़े पुरोहितो कछंङ इलि दंङ कुट्री लेहती, “गेह यीशु बि च़ुमज़ि लोहग।”

¹¹ दि रेड्रा दोरे महस खुश शुहचे इलिर दंङ यहूदा बि ढबाह रंड्रीमी वाईदा लेह च़रतिर। दंङ यहूदा यीशुबि च़ुमज़िमी मौका खंड्री लेहकी तोहई।

चेला तङ साते फसहो अंतिम भोज़

¹² दंङ सुम मेह रोटी त्याहरो मुंडो ध्याड़ा तोहई, अपेहल यहुदी मीहतु भत्ते टबर फसह ओ कुरच़ो बलि चढ़ाएक्च़ातेर। दंङ चेलाज़ि यीशु हखा रुहक्च़ी लेहतिरे, “गुरु ज़ि, केई अंऊर जुंज़ातन कि ञेंहच़ी कांह थल्जी फसह ओ बगतो तेयारी लोहनि।”

¹³ दोई एनोह चेला तु बिचंङज़ि झुह्ट दोतिंङ दी कुचे च़रति, “केरे यरूशलेम शहरंङ अच़ा ईलांई, दंङ इच्च़ा मीह केतिंङ तिऊ राग्ज़ंन उठाके खोकसोतो, दोऊ थले शुहचे ईलांई;

¹⁴ दंङ दुह अंऊ घरबारंङ योतो, दुह घरबारो मालिक रंङ साते कुहिनि, गुरु कुट्री लेहकी तोह, गिऊ थल्जी तेयार लहसी कमरा अंऊ शुह, अंऊर गेह घेंङौ चेला तंङ साते बंङज़ा फसह ओ बगत ज़ोओग?”

¹⁵ दोई केतिंङ तोरिखी तेयार लहसी कमरा कम्बोतो दोहर ज़ेइमी इंतज़ाम लेह च़रतुंई।

¹⁶ चेले हुंच़ा नगरंङ इलि दंङ दोहर दोच़ी दोर्तिंङ फसह त्याहोरो रोटीऊ इंतज़ाम लेह च़रतिर।

¹⁷ अपेहल योंकल शुई दंङ यीशु एनोह सनी चेला तंङ साते दुह चुंङ अति अंऊर फसह ओ बगतो इंतज़ाम लहसी तोहई।

¹⁸ अपेहल दोरे बंङज़ा बगत ज़ेह लेखी तोहई, ता यीशुज़ि दोतंङ साते कुतोह, “गेह केतंङ साते हेले-हेले कुट्रतग कि केहतु बिचंङ ज़ि इच्च़ा अंऊ गेरंङ साते बंङज़ा बगत ज़ै लेहकी तोह गिह्बी चुम्ज़ी लोहतो।”

¹⁹ दि रेड्रा दुरेह भत्तेर निराश शुहचे इलिर दंङ इच्च़ा-इच्च़ा लहच़ी, “छि गेह ता माशुहगा?”

²⁰ यीशुज़ि दोतंङ साते कुतोह, “दुह केहतु सनी तु बिचंङज़ि इच्च़ा तोह अंऊ, गेरंङ साते बंङज़ा गिऊ पेतंङ रोटी ठुमज़े ज़े लेहकी तोह।

²¹ गेह मीहू योह सिए योग छना कुचे दि पवित्र शास्त्ररंङ च़ेहसी तोह। दंङ परमेश्वर दुह मीहबी भयानक सज़ा रमतो अच़ि गेह धोखारंङ साते च़ुमज़ि लोहतो। दुह मीह ऊ थल्जी रुठे तोहई कि दोऊ जन्म ए माह शुहचा आ।”

प्रभु-भोज

²² अपेहल दोच़ी ज़ै लेहकी तोईरे दंङ यीशुज़ि रोटी लेहप्ती दंङ परमेश्वरो धन्यवाद लहच़ी रोटी खंणी लहरी दंङ एनोह चेला तिंङ रें कुट्री लेहती, “हाँ ज़ि, दि रोटी गिऊ फुक चेहके ज़ै च़रतुंई।”

²³ दंङ यीशुज़ि दाखो रसो बट्रढा गुहड़िंङ लहरी दंङ परमेश्वरो धन्यवाद लहच़ी एनोह चेला तु हखा रेंई दंङ चेलारे दुह बट्रढो दोहरची बारी-बारी तुंङमी लेहतिर।

²⁴ दंङ यीशुज़ि कुतोह, “दि दाखो रस बि केहच़ी वाईदो गिऊ शुहई ञेंए च़रतुंई अंऊ महसे मीहतिंङ दोतु पापो सज़ाओ दोहरची बचाएकसिमी थल्जी बहाएकचिमी तोत। दिह दुह वाईदा बि पूरा लोहतो अंऊ परमेश्वरे एनोह मीहरंङ साते बणाएठ्रा।

²⁵ गेह केतंङ साते हेले कुट्रातग कि दाखो रस दुह ध्याड़ा तचेक मा तुंङमोग, अपेहल तचेक परमेश्वरो राज्य रिंङ खरकोई मा तुंङमोग”

²⁶ दंङ यीशु ए दोऊ चेलारे परमेश्वरो भजन कुचे जैतून मिन्दु गोहू टोईच़ी इलि। अंऊ कछंङ ए तोहई।

पतरसो इन्कार लहज़िमी भाविश्य्बानी

²⁷ दंङ अमरिंङ इलज़ा यीशुज़ि दोतंङ साते कुंई, “केहरे भत्ते गिह्बी छोड़ेके अच़ा योंहन। छना पवित्रशास्त्रा रिंङ च़ेहसी तोह कि, ‘गेह घेंङौ मीहतु रखवालाबि सच़ी च़रपोग, दंङ केहरे भत्ते त्रैंईतु ठ्रोह देखा नोखा शुहचे योहर।’

²⁸ दंङ गेह गिऊ श्रींङमी थल केहतु तुई गलीलो हखा योग दंङ गेह केतिंङ दोहर।”

²⁹ पतरसे दोहरंङ साते कुतोह, “अगर भत्ते ज़ि कनिंङ छोड़के अच़ा योर, पर गेह अपेहल ला माह छोड़ेकपोग।”

³⁰ दि रेड्रा यीशुज़ि पतरसो हखा कुतोह, “गेह करंङ साते हेले-हेले कुट्रातग कि तोग ए रातारिंङ कुकड़ो झुह्ट फेरा बांग रंड्री बे तुई केई श्रुम फेरा केनोह आहच़ि दिह कोहन कि, केई गिह्बी माह ञेंन।”

³¹ दंङ दोई ऊई ला जोर रें कुतोह, “अगर गिह्बी करंङ साते सीए इबि ला शुई ता, गेह तांला कांह इन्कार माह लोहग” ध्वांए भत्ते चेलाज़ि कुतेर।

गतसमनी रिंङ प्रार्थना

³² दंङ यीशु ए दोऊ चेलाए गतसमनी मिन्दु इच्च़ा बगीचंङ अतिरे, दंङ दोई एनोह चेला तंङ साते कुतोह, “देहर बंङज़ा तोहई, अपेहल तचेक गेह प्रार्थना लोहग।”

³³ दंङ यीशुज़ि पतरस याकूब दंङ यूहन्ना बि ऐनाहरंङ साते थोड़े अरे तुंखा लेन्ज़ा शिली। दंङ यीशु महस ए दुखी शुबि लेहती।

³⁴ दंङ दोई कुतोह, “गिऊ सेहम महसे दुखी तोह, देहर तचेक कि गेह सिमी तोतोग। केरे देहर नच़ोंई दंङ चेहकी बंङज़ोंई।”

³⁵ दंङ यीशु थोड़े अरे तुंखा इलि दंङ दोहर धरतीऊ टोईच़ी कोंङे शुहचे प्रार्थना लहज़ी लेहती कि, “हे बाह, दि दुखो घड़ी गिऊ तुईज़ी ऐखा लेह च़रतु,

³⁶ छना कुचे केई भत्ते धिर लेह तरपोन। दि दुखो घड़ी गिऊ तुईज़ी ऐखा लेह च़रतु। तांला गेह छना जुंज़ातेग ध्वांए मा शुह, दंङ केई छी जुंज़ातन ध्वांए ए शुह।”

³⁷ दंङ यीशु वापिस अति दंङ दोतिंङ इम लहज़ी तंङरी दंङ दोई शमौन पतरस रंङ साते कुंई, “हे पतरस का इम लहज़ातन आ? का छी इच्च़ा घड़ी ला चेहकी मर्चातना?

³⁸ चेहकी ए प्रार्थना लहज़ा लोहनी कि केहच़ी परीक्षा रिंङ पड़ेक्ची मेहस। कनु सेहम ता तेयार तोत, पर शरीर कमज़ोर तोह।”

³⁹ दंङ यीशु यहचा अच़ा इलि दंङ ध्वांए प्रार्थना लहच़ी लेहती छना तुहई लहच़ी लेहकी तोहई।

⁴⁰ दंङ यीशु यहचा वापिस अति ता दोई दोतिंङ इमरिंङ खंणी, छना कुंई साते ता दोतिंङ महसे इम अपि लेहकी तोहई, दंङ दोच़ी माञेंचतेर कि दोबि छी जुबाब रमोंई।

⁴¹ दंङ षुमु फेरा यीशु चेला तु कछंङ वापिस अति दंङ दोतंङ साते कुंई, “छि केहरे यहचा इमरिंङ अच़ा इलिन आ? बस! खड़े शुई! रेड्रुंई, दुह घड़ी पिचे इलि कि अपेहल अच़िया गेह मीहू योह, पापी तु गुहड़ रिंङ च़ुमसा योतो।

⁴² अहच़ुंई, तुंखा जोनी! खंणु गिह्बी च़ुम्ज़ाड़ कछंङ पिचे इलि।”

यीशु बि धोखा रंङ साते चुम्ज़ी

⁴³ यीशु ज़ि झांह कुट्री लेहकी तोहई ध्वांए यहूदा अंऊ अंङषी दोतु बिचंङ इच्च़ा तोहई, दोहर अति दोहरंङ साते इच्च़ा मोह्ड़े भीड़ तोहई अतु दोहर तलवार ए लठी तोईरे। दुह भीड़ यहुदी मोह्ड़े पुरोहित, यहुदी शास्त्री, दंङ सेंहणा मीहच़ी चरच़ातेर यीशुबि च़ुमज़िमी थल्जी।

⁴⁴ यहूदाज़ि अंऊ दोई दोतु मदत लाहते यीशुबि च़ुमज़िमी थल्जी तुहई ए भीड़ साते कुहषी तहरे, “अतिंङ गेह ग्वाक्षोग दुह ए यीशु शोतो। दोबि चुम्ने खबरदार रंङ साते लेन्ज़ा शिलांई।”

⁴⁵ दंङ यहूदा दोहपले यीशु कछंङ अति दंङ कुट्री लेहती, “गुरु ज़ि!” दंङ दोबि ग्वाक्षे नमस्कार लहरी।

⁴⁶ दंङ दोबि च़ुमने गिरफ्तार लेह च़रतिर।

⁴⁷ दि खंड्रा इच्च़ा चेलाज़ि एनोह तलवार हुंच़े दंङ यहुदी महापुरोहितो दासो रेहट्रा ट्रिकी च़रति।

⁴⁸ यीशुज़ि दोतंङ साते कुंई, “छि केहच़ी गेह डाकू चेहके गिह्बी च़ुमज़िमी थल्जी तलवार लठी रेह कुरच़ा अन्जी तोतोंई?

⁴⁹ गेह ता यहुदी मंदिरंङ हर ध्याड़ा केतंङ साते बंङज़ा उपदेश (धर्मिक शिक्षा) रड्रा लहज़ातेग, दंङ दुह मुका केहच़ी गेह मा चुमरीह: दंङ दी दिऊ थल शुई कि पवित्रशास्त्रो गप्पा पुरे शोतो।”

⁵⁰ दंङ भत्ते चेलारे यीशुबि केहट्रा दोहरची पोक्शे इलिर।

⁵¹ इच्च़ा जवान एनोह नंङटे फुकारिंङ चादर चोकसा यीशु थले अच़ा इलि; दंङ मीह ज़ि दुह च़ुमरी।

⁵² दंङ दुह चादर केट्रा नंङटे पोक्शे इलि।

महासभाओ तुईज़ी यीशु

⁵³ दंङ दोच़ी यीशुज़ि यहुदी महापुरोहित ओ चुंङ लेन्ज़ा शीलिरेह; दंङ भत्ते यहुदी मोह्ड़े पुरोहितरे, सेंहणा, यहुदी शास्त्री दोऊ दोहर ठ्रोहका शुहचे इलि।

⁵⁴ पतरस ऊईतारे-ऊईतारे दोऊ थल-थल यहुदी महापुरोहित ओ चुंङो अंद्रेग अच़ा इलि, दंङ सेनिका रंङ साते मेह ट्रोडी लेहती।

⁵⁵ यहुदी मोह्ड़े पुरोहित ए भत्ते यहुदी सभाओ मीहरे चेहच़ातेर कि अच़िया यीशु विरोधारिंङ गवाही रेंई आ, झांह लेह रंङ साते यीशुबि सच़िमी सज़ा खोकसा योतो। दंङ दोतिंङ छिल्ला सुराग माह खोकसिरी।

⁵⁶ महसे मीहरे यीशु पाहठी गवाही रंड्री लेहकी तोईरे, दंङ दोतु गवाही इच्च़ा ठ्रोह माह तोईरे।

⁵⁷ दोहर थल मिन्हारेह मीहज़ी दोऊ विरोधङ दी हप्सी गवाही रेहईंरेह,

⁵⁸ ञेंहच़ी दिबी दी कुट्री थाश्ते, “गेह दी मीहतु बणाएष्री मंदिर ठ्रोहआलबी लोहग, दंङ षुमु ध्याड़ो थल ऊई बणापोग, अंऊ मीहतु बनेक्षी मा शोतो।”

⁵⁹ दि गप्पो थल्जी ला दोतु गवाही इदि-ऊईदि रंङ साते मिलेहकी ठ्रोह माह तोहई।

⁶⁰ दंङ यहुदी महापुरोहिते सभाओ बिचंङ खड़े शुहचे यीशु रुहक्ती, “केई छि ला जुबाब मा रंड्रातन? दिहरे मीहरे कनु बिरोधंङ छी गवाही रंड्रातोर?”

⁶¹ दंङ यीशु चुपे बंङज़िरी। दोई छल्ले जवाब माह रें। दंङ यहुदी महापुरोहिते यह्च़ा रुहक्ती लेहती, “छि का मसीह शुनाह अंऊ धन्य परमेश्वरो योह शुह?”

⁶² यीशुज़ि कुहतो, “गेह शुगाह; दंङ केहच़ी खमोंई कि गेह मीहू योह, सर्वशक्तिमान परमेश्वरो सुचंङ हासी बंङज़ा राज लोहग, दंङ सर्गंङज़ि डुह बिचंङ अपोग।”

⁶³ यीशुज़ि गप्पा थक्शे यहुदी महापुरोहिते रोषेक्च़ा एनोह चोगा ठ्रावल्ज़े च़रति दंङ कुंई, “ञेंतिंङ अतुला गवाही ओ ज़रूरत माह।

⁶⁴ केहच़ी दी परमेश्वरो पाहठी मदम थसिना। केहतु छी राय तोत?” दोच़ी भत्ते ज़ि कुइरे दी सच़िमी जोगे शुह।

⁶⁵ दंङ रें च़ि मोहदी थू लहज़ी लेहती, दंङ दोऊ टिरारिंङ पट्टी छ़ुहचे दोबि डुमशु रंड्री लेहतिर दंङ दोऊ ठट्टा लेह कुट्री लेहतिर, “अगर का भविष्यवक्ता शुनाह ता कंड्रु, कनिंङ अच़ि घाह केहतो!” दंङ यहूदीतु मोह्ड़े पुरोहित ओ सेनिकज़ि दोबि चह्टे केट्री लेहतिर।

पतरसो इन्कार लहज़ी

⁶⁶ अंऊ मुका पतरस योंङ ल्वाड़िंङ तोहई, ता दोहर यहुदी महापुरोहित दासियों विचङ ज़ि इच्च़ा दोहर अति,

⁶⁷ दंङ पतरस बि दोहर मेह ट्रोड्री तंङरी सता दुह कुट्री लेहती, “का ला ता दुह नासरतो यीशु रंङ साते तोइना।”

⁶⁸ दंङ पतरस कुट्री लेहती, “केई छि कुट्रातन? गेह ता दोबि सेहका ए माह। दंङ दुह डेऊढी रिंङ अति दंङ कुकुड़ इच्च़ा फेरा बांग रेंहई रें।

⁶⁹ दंङ दुह दासी दोबि खांई दोर खड़े मीहतिंङ यह्च़ा कुट्री लेहती कि, दीह मीह यीशु चेला तु बिचंङ ज़ि इच्च़ा शुह।”

⁷⁰ दंङ दुह यहचा मुकरेके इलि। थोड़े ध्याड़ो थल दोच़ी अंऊ कछंङ तोईरे यहचा पतरसङ साते कुंई, कनु बोली ता गलील मीहतु ठ्रोह तोह। “कांह पक्‍का यीशु साथीतु बिचंङज़ि इच्च़ा शुनाह।”

⁷¹ दंङ पतरस कसम ज़े लेहकी तोहई, “गेह दुह मीहबी बिल्कुल माह सेका, अतु पाहठी केई कुट्रातन। अगर गेह हप्सी कोहग ता परमेश्वरे गिह्बी सज़ा रमतो।”

⁷² दंङ यहचा कुकड़ हाऊष रें। पतरसबि बि दुह गप्पा अंऊ यीशु ज़ि दोहरंङ साते कुतेह हिद अति; “कुकड़ो झुह्ट फेरा बांग रंड्री मी तुई केई षुमु फेरा गिऊ इन्कार लोहुन।” दंङ दुह दी गप्पा हिद लहजे क्रपि लेहकी तोहई।