मरकुसो 13 - लाहौली बाइबिल

मंदिरो बिनाशो बारे भविष्यवाणी

¹ यीशुज़ि यहुदी मंदिरंङ ज़ि हुंच़िरी, दंङ दोऊ चेला तु बिचंङज़ि इदि दोहरंङ साते कुतोह, “गुरू ज़ि खंणु दि चुम छ़ुह्च़ी घाहटे सलठे ए मोह्ड़े-मोह्ड़े रघटे तु रंङ साते बणाएठ्री तोह।”

² यीशुज़ि दोहरंङ साते कुतोह, “छि केहच़ी दी मोह्ड़े-मोह्ड़े भवन खंड्रातंईयाँ; देर रकटु टोईच़ी रगला माह केषोतो अंऊ माह ठ्रव्लषा योतो।”

मुसीबत ए क्लेश

³ अपेहल यीशु जैतून मिंदंङ गोह टोहकठे बंङज़ा तोहई। अंऊच़ि मंदिर तुईज़ी तंङफाते। दोहर पतरस, याकूब, यूहन्ना दंङ अन्द्रियास यीशु रंङ साते तोईरे। दंङ दोच़ी यीशु हखा रुहक्ती लेहतिर,

⁴ “अंऊ गप्पा केई मंदिरो पाहठी कंहषी तातन, दोरे भत्ते गप्पा अपेहल शोतो? ञेंहच़ी छना ञेंओनि दि शुहबिमी तोह? छि गिऊ छा निशान तोह आ?”

⁵ यीशु दोहरंङ साते कुट्री लेहकी तोहई, “खबरदार तोहई कि केरे अच़िया धोखा रंड्री माह जूंस।

⁶ महस मीहच़ी गिऊ अधिकारो दावा लहच़ी अपोर दंङ कोहर, ‘गेह मसीह शुगाह’ दंङ महस मीहतिंङ धोखा रमोंर।

⁷ अपेहल केहच़ी लड़ाई, दंङ लड़ाई तु गप्पा थक्पोंई, दंङ था बेओनि; छना कुंई साते ता दी शुहबी ज़रूरी शुह, दंङ दुह ध्याड़ा रिंङ संसारो अंत माह शोतो।

⁸ छना कुचे इच्च़ा जातिऊ मीहरे ऊई जातिऊ मीहतु खिलाप शोर दंङ इच्च़ा देश ऊई देशो जातिऊ खिलाप शोर अंऊ ला ठाहरीरिंङ भुयोंल शोतो, दंङ अकाल शोतो। दिह ता दुखो शुरुवात शुह। दिह घटना मेच़मीऊ मुंडो टेहषी ठ्रोह शोतो अंऊ मुक्का दोबि कटु जेहकपिमी टेहषी श्वात।”

⁹ “केतिंङ खबरदार बंङज़ी जूंस; बैरीर केहतु खिलाप योर दोच़ी केरे पंचायतंङ, कोर्टंङ च़ुमने शोर दंङ केतिंङ यहुदी सभा घरबारंङ तेंङे च़रपोर। गिऊ बज़हज़ि मोह्ड़े-मोह्ड़े रज्ज़ा ए, हाकिम केहतु पुछताछ लोहर। केहच़ी दोतु तुईज़ी गिऊ पाहठी गवाही रमोनी।

¹⁰ दंङ संसारो अंत शुहबिमी बे तुई दिह ज़रूरी तोह कि धरतीऊ भत्ते जाति मीहतु बिचंङ गिऊ रूठे खबर सुनाईचि जूंस।”

¹¹ अपेहल केतिंङ कोर्टंङ शोर दंङ केहच़ी मुंडा ए चिंद थाह लंहि कि छि कोहनि दंङ केतिंङ दुह ध्याड़ा छि ए कमोर दुह ए केचिह कोनी; छना कुंई साते ता कुट्रा दुह, केरे मा शुह दंङ पवित्र आत्मा शोतो।

¹² मीहरे एनोह विशवासी न्वा रिंह्ङ तिंङ सच़िमी थल्जी विरोधीतु गुहड़िंङ रें च़रपोर, ध्वांए याह-बाह च़ि ला एनोह कटुतंङ साते लोहर। दंङ कटुरे एनोह याह-बाहतु बिरोधंङ शुहचे दोतिंङ सच़िमी थल्जी बैरीतु गुहड़िंङ रें च़रपोर।

¹³ दंङ गिऊ टोहकठे विशवास लहज़िमी रंङ साते भत्ते मीहच़ी केतंङ साते बैर लोहर; पर अंऊ दुखो अनंत तचेक गिऊ टोहकठे पक्‍का विशवासरिंङ बंङज़ोतो, परमेश्वरे दुह बचाके च़रपोतो।

महासंकट काल

¹⁴ “पढ़ेक्चा दोच़ी शुङे च़रतुंई। झांह ठ्रोह ध्याड़ा अपतो इच्च़ा महस मदम मीह अंज़े दि मंदिरो भत्ते बे शुद्ध ठहरि अशुद्ध लेह च़रपोतो। अंऊर दोबि शुबी माह जूंस दंङ अंऊ मीहरे यहूदा प्रदेशंङ तोर दोरे बचेक्पिमी थल्जी गोह टोहकठे अच़ा ईलांई।

¹⁵ अंऊ दोरे लंङदिंङ शोर, दोरे छा छी लेहपच़ी मी थल्जी योंखा था तक्सुई ए तोंखा थे लांई,

¹⁶ दंङ अंऊ रिह रिंङ तो दुरेह एनोह खम्ज़ो थल्जी चुंखा था याहच़ु।

¹⁷ दुह ध्याड़ारिंङ अंऊ खोकटुंङ शोतो दंङ अंऊ पानू रंड्रा शोतो, दोतु टोईच़ी हाय-हाय।

^18-19 दुह मुक्का झांह ठ्रोह मुसीबत शोतो छना धरतीऊ शुरूआत बेहच़ी तोग तचेक शुहचे माह शोतो, माह ए दिबे थल अपेहला शोतो। झांह लेह केहच़ी प्रभु हखा प्रार्थना लोहवा लोंहई कि दुह ध्याड़ा सोहई ऊ ध्याड़ा शुहबी मेस। माह ता मीहतिंङ सोहईरिंङ चुंङ केहट्रा इबि खरे शुहचे योतो।”

²⁰ दंङ प्रभुज़ि दुह ध्याड़ारे मा घटाएसी माह शुचंङ, ता इच्च़ा ला जाह्‌न माह बचेक्पी माह तोहई; पर दुह शत्‌ह लहसी दोतु बजाहज़ि अरी दोई शत्‌ह लहसी ततो, दुह ध्याड़ारिंङ घटाची शुह।

²¹ दुह ध्याड़ा रिंङ अच़िया केतंङ साते कोतो, “खंणु, मसीह देहर तो,” या “खंणु, दोहर तो,” ता विशवास था लोहुनी।

²² छना कुचे ता हप्साड़ भबिष्यद्वाक्ता ए हप्साड़ मसीह खड़े शुहचे योतो, दंङ निशानी ए अद्धभुत कम कमोर अगर शुहचे इलि साते ता अंङषी दुरेह ला बहकाएकि च़रपोर।

²³ दंङ केचिह खबरदार बंङज़ोंई; खंणु, गेह केतिंङ भत्ते गप्पा तुइए कंज़े केहतग।

मीहू योह यह्च़ा अपि

²⁴ “दंङ दुह दुख मुसीबतो थल झांह शोतोह कि, ऐके रोह्की शुहचे योतो, दंङ लचंङ रातारिंङ छंङी लेह बंद लेह च़रपोतो।

²⁵ दंङ सर्गंङ ज़ि करज़े ला दक्पी चुक्सोर, दंङ सर्गो मोह्ड़े शक्ति त्रुलज़ा योर।”

²⁶ “दंङ मीहरे गेह मीहू योह बि मोढ़े सामर्थरंङ साते ए महिमा रंङ साते डू विचंङ अपि तंङफोर।

²⁷ दंङ गेह घेंङौ स्वर्गदूतार च़रपोग, कि दोच़ी धरतीऊ कुंणी-कुंणी ऊ गिऊ अंङषी मीहतिंङ ठ्रोहका लोहर अंऊ दोच़ी गिऊ टोहकठे विशवास लहज़ातोर।”

अंजीरो बुटो उदाहरण

²⁸ अंजीरो बुटो दोरच़ी दी उप्हाम सिकेक्सू, अपेहल दोऊ ब्रन्ज़ रेह न्खी शुहबी दंङ लप हुची चुक्सोर; दंङ केतिंङ पता लेहकी यवात कि फल रंड्रीमी ध्याड़ा पिचे इलज़ा।

²⁹ झांह अपेहल केहच़ी दी गप्पा रेह शुहबी खमोंई दंङ ञेंहनी च़रतेनि कि गेह मीहू योह अबिमी तोह देर तचेक कि अच़ा ए अंजा।

³⁰ गेह केतंङ साते हेले कुट्रातग, अपेहल तचेक दिहरे गप्पा पूरा शुहचे योतो धोंण तचेक दि पिढी ऊ मीहरे योहसोर माह।

³¹ सर्ग ए धरती योह्सा योतो, दंङ गिऊ गप्पारे अपेहल योह्सोतो माह।

चेहकी बंङज़ु

³² “पर गिऊ अई फेरा अपिमी पाहठी सही टेम अच़िला माह ञेंई, माह स्वर्गदूताज़ि, माह गेह योह बि, सिर्फ बाहबि दुह ध्याड़ाओ पाहठी पता तोह।

³³ रेड्रुंई, चेहकी ए प्रार्थना लोहा लोहु; छना कुंई साते ता केहच़ी माञेंनी कि दुह टेम अपेहल अपतो।

³⁴ दीह दुह मीहू दशो ठ्रोह शुह, अंऊ परदेश इबिमी मुका एनोह घरबार केट्रा इलि, दंङ एनोह नोकर तिंङ अधिकार रेंहई; दंङ भत्ते तिंङ दोतु कम कम्बतो, दंङ द्वारो रखवाली लहज़ा दोबि चेहकी बंङज़ी मी आज्ञा रमतो।

³⁵ दंङ यीशुज़ि एनोह चेला तु हखा कुंई: छना कुचे ता केहच़ी माञेंनी कि चूंङो मालिक अपेहल अपतो ञोंकले या अधा रातारिंङ या कुकड़ो बाशेक्पिमी टेमारिंङ या मुंजे सरके। दिऊ थल्जी केहच़ी चेहकी तोईनी।

³⁶ झांह शुबी मेस कि दुह अचानक अंज़े दंङ केतिंङ इमरिंङ खमतो।

³⁷ दंङ अंऊ गेह केतंङ साते कुट्रातग, दुह भत्तेतंङ साते कुट्रातग; कि गिऊ अपिमी थल्जी तेयार तोहई।”