मत्ती 7 - लाहौली बाइबिल

ऊईतु टोईच़ी दोष मा लगाएच़ी

¹ यीशु ज़ि दिला लाह कुहषी लोह, “दोष था लगाएतुंई; दंङ परमेश्वरे ला केहतु टोईच़ी दोष माह लगाएकपोतो।

² छना कुचे केहच़ी छना ऊईतु टोईच़ी दोष लगाएपोंई, ध्वांए परमेश्वर ला कांह टोहकठे दोष लगाएपोतो; दंङ परमेश्वर ला केतंङ साते ध्वांए व्यावहार लोहतो छना केहच़ी ऊईतिंङ साते लोहन।

³ केई छिले केनोह पड़ोसीतु कवचि-कवचि गलती खंड्रातन, दंङ केनोह मोह्ड़े-मोह्ड़े गलती माह खंड्रातन?

⁴ अगर कांह केनोहे अंद्रेग महस मोह्ड़े पाप तोह ता कनिंङ केनाह बे कवचि पापी मीहू मदत लहज़िमी कोशिश लेह माह जूंस?

⁵ हे मांजी सेहमो मीह हेगा केनोह मोह्ड़े पापारे सुधारेतुंई दोऊ थल ए केई केनोह पड़ोसीऊ कवचि पापारे सुधारेक्च़िमी थल्जी मदत लेह तरपोन।

⁶ झांह ठ्रोह मीहतिंङ परमेश्वरो पाहठी था कंड्रुंई अच़ि दिह रेड्री माह जुंज़ातोर। अगर केहच़ी झांह ठ्रोह लहज़ातंई ता, दिह झांह तोह छना कि पवित्र चीज़र खुह्ई तु तुईज़ी छ़ंङज़ी या सुअरातु तुईज़ी मुतिकरे छ़ंङज़ी अंऊ दोच़ी कोंज़ो पोयंङ दाड़ेके चरच़ि दंङ फुचंरिंङ केहतु टोईच़ी हमला लोहर।

पेट्रोंई ता केतिंङ खोकसोतो

⁷ केहच़ी छि जुंज़ातंई दुह परमेश्वरो दोरच़ी पेट्रोंई दंङ दोई केतिंङ रमोतो: पेपोंई खोकसोतो; ठकठकसोंईता, केहतु थल्जी अलसोतो।

⁸ छना कुचे अच़िला पेट्री दोह्बी, दोबि खोकसा; अच्च़ी खमतो दोबि खोकसोतो; अच्च़ी ठकठकसा दोऊ थल्जी अलसोतो।

⁹ केहतु बिचंङ ज़ि अच़िला मीहे एनोह कटुबि रघ माह रमोतो अगर दोई दोऊ दोरच़ी रोटी पेड़ीता।

¹⁰ ध्यांए अच़िला मीहे एनोह कटुबि, मह्छ़ पेड़ीता बिषज़ड़े ओमड्रा माह रमोतो।

¹¹ अगर केरे मांजी शुहचे केन्दु कटुतिंङ रूठे धिरारे रंड्री ञेंहच़ातंई दंङ केहतु स्वर्गो बाह परमेश्वरे एनोह पेट्रातिंङ रूठे धिरारे छिले माह रमोतो?

¹² दिऊ थल्जी केहच़ी मीहतु दोरच़ी केन्दु थल्जी छना लह्जी जुंज़ातंई, केहच़ी ला दोतंङ साते ध्वांए लंहि, छना कुचे मूसाऊ कानून ए भविष्यवक्ताओ लेखो मतलब दिह तोह।

संगड़े ए खुले अम

¹³ परमेश्वरो राज्यरिंङ इबिमी अम महस संगड़े तोह, पर बिनाशो हखा शिलज़ा अम बेले ए योह्च़े तोह; दंङ महस मीहरे तोतोर अच़ि दोर्तिंङ योर।

¹⁴ छना कुचे संगड़े तोह दुह पितंङ, खरे तोह दुह अम अच़ि अनंत जीवनो हखा रेंज़ा शिल्ज़ी, दंङ थोडे़ मीहरे तोतोर अच़ि दुह खोक्पोर।

छना बुट ध्वांए ए फल

¹⁵ हप्सी भविष्य कंड्रातु दोरच़ी बचेके बंङज़ुंई, अरी त्रैंई ओ रूपंङ अपाहतोर पर तोंङज़ि फ्रक्च़ा भेड़ियातु ठ्रोह तोतोर।

¹⁶ दोतु कमो दोरच़ी केहच़ी दोरे सेह्के च़रपोंई छि मीहच़ी छ्वाक्तु दोरच़ी अंगूर, ए ऊंट कटारो दोरच़ी अंजीर थकच़ातोर?

¹⁷ ध्वांए हर इच्च़ा रूठे बुटेह रूठे फल हपि दंङ मांजी बुटेह मांजी फल हपि।

¹⁸ रूठे बुटेह मांजी फल माह हपि माह मांजी बुटेह रूठे फल ह्न्जे तरच़ी।

¹⁹ अंऊसंङ बुटेह रूठे फल म्हफद दुह ट्रिके मेहरिंङ केचे चरच़ि, हप्सी भविष्यवक्तातिंङ ला ध्यांए ठ्रोह सज़ा खोकसोतो।

²⁰ झांह लेह दोतु कमो दोरच़ी केहच़ी दोरे सेहच़ी च़रपोंई।

²¹ अच़ि गेरंङ हे प्रभु, हे प्रभु कुट्रा दोतु बिचंङ ज़ि हर इच्च़ा स्वर्गो राज्यरिंङ तोंखा मेहबोतो पर दुहए अपतो अच़ि गिऊ स्वर्गीय बाहऊ हिटी टोईच़ी जोआ।

²² न्याय ओ ध्याड़ारिंङ महस मीहच़ी गिह्बी कोर, ‘हे प्रभु, हे प्रभु, छि ञेंहच़ी कांह मिन्ज़ी मांजी आत्मारे महुंज़ा तेंईयां, दंङ कांह मिन्ज़ी हेरानी कम्मारे मलेहतंईया?’

²³ दोहथल गेह दोतंङ साफ कुचे च़रपोग, गेह केरे अपेहल लाह ञेंहगा। हे कुकम लहज़ार, गिऊ दोरच़ी अहच़ा ईलांई।

बुद्धिमान ए मुर्ख मीहरे

²⁴ दिऊ थल्जी अच़िला गिऊ गप्पा रेड्राते मनेक्च़ा, दोरे दुह बुद्धिमान मीहू ठ्रोह तोतोर अच़ि एनोह घरबारो मुयांद चट्टानो टोहकठे केहषी तोह।

²⁵ संदाण अति ए डड़ अति, आंधी अति दुह घरबारंङ टकरेकति तांला दुह माह यहदधी, छना कुचे दोऊ मुयांद चट्टानो टोईच़ी केहषी तोह।

²⁶ पर अच़ि गिऊ दिह गप्पारे माह रेड्रा दोऊ टोईच़ी मजोआ दुह झांह ठ्रोह मुर्ख मीहू ठ्रोह शोतो अच़ि एनोह घरबार शिरोहो टोईच़ी बणाएच़ा।

²⁷ संदा अति आंधी अति दंङ दुह घरबारंङ साते टकराके दुह घरबारो सत्यानाश शुहचे इलि।”

²⁸ अपेहल यीशु दिह गप्पारे कुचे योहसिरी साते मीहतु। भीड़ दोऊ धर्मिक शिक्षा रंङ हेरान शुईरेह।

²⁹ छना कुचे दुह दोतिंङ यहुदी शास्त्री ठ्रोह माह पर अधिकारितु ठ्रोह धर्मिक शिक्षा रंड्राते।