मत्ती 27 - लाहौली बाइबिल

पिलातुसो तुईज़ी यीशु

¹ मुंजे सरके भत्ते यहुदी मोह्ड़े पुरोहित ए मीहतु यहुदी सेंहणाज़ि यीशुबि सच़िमी सलाह लाहतेर।

² दोच़ी दुह छुचातोर दंङ शिल्ज़े पिलातुस हाकिमो गुहड़िंङ रेंऐ चेहच़ातोर।

यहूदा ओ आत्महत्या

³ अपेहल दोऊ च़ुमज़ि लहज़ा यहूदा ए दिह ञेंहतिंङ कि दुह हत्याऊ थल्जी दोषी ठहराके केहतोर दंङ दुह पछताहछा दंङ दुह निंज़ो सा टन्गा मुलतु सिक्का कुरच़ा यहुदी मोह्ड़े पुरोहिते मीहतु यहुदी सेंहणाऊ कछंङ इलज़ा

⁴ दंङ कुहतो, “गेह इच्च़ा निर्दोष मीहबी सच़िमी थल्जी च़ुमज़ि लेह पाप लाहतग।” दोच़ी कुह्तोर, “ञेंतिंङ दिह पाहठी छले परवाह माह, कांह केनेह दिऊ थल्जी ज़िमेवारी शुनाह।”

⁵ अपेहल दुह मुलूतु सिक्कारे यहुदी मंदिरो ल्वाड़ीरिंङ छ़ंङज़ा यहचा इलि, दंङ धह्तेका इलजे एनाबि फांसी लगाके च़रति।

⁶ यहुदी मोह्ड़े पुरोहिते दुह सिक्कारे लेहपच़े कुहतो, “हेंदु कानूनो हिसाबे दिह ढबाह बि मंदिरो भन्डारंङ केहट्रिमी जोगे माह, छना कुचे दिह इच्च़ा मीहबी सच़िमी थल्जी रांहषी लस शुह।”

⁷ दिऊ थल्जी दोच़ी सलाह लेह परदेशीतिंङ पथेक्च़िमी थल्जी कुम्हारो रीह च़ुमने चरच़ातोर।

⁸ दिऊ वजाहज़ि दुह रीह तोग तचेक शुहईऊ रीह कुहषी।

⁹ दंङ दुह वचन अरी यिर्मयाह भविष्यवक्ता ज़ि कुह्ते पूरे शुई; “दोच़ी दुह निंज़ो सा सिक्कारे यानि दुह लस अंऊ इस्राएली मीहरे दोबि रंड्रीमी थल्जी सेहमत शुहतेर।

¹⁰ दंङ छना प्रभुज़ि आज्ञा रांहषी तहरे ध्वांए दोच़ी दिऊ इस्तेमाल कुम्हारो रीहऊ थल्जी लहते।”

पिलातुसो सवाल

¹¹ अपेहल यीशु हाकिमो तुईज़ी खड़े तोहई दंङ हाकिमे दोबि रूहकाते, “छि काह यहुदी तु रज्ज़ा शुनाह?” यीशुज़ि दोबि जुबाब रेंहई, “वेई! केई केनेह कुट्रातन।”

¹² अपेहल यहुदी मोह्ड़े पुरोहिता ज़ि ए यहुदी सेंहणारे दोऊ टोईच़ी दोष लगाएच़ी लेहकी तोईरे, दंङ दोई छले जुबाब माहरांई।

¹³ दिरंङ पिलातुसे कुहतो, “छि केई माहरेड्रातना दोच़ी कांह खिलाप अंयों गवाही रंड्रातोर?”

¹⁴ पर दोई दोबि इच्च़ा ला गप्पो जुबाब माह रेंई; देहर तचेक कि हाकिमा बि लाह हेरानी शुई

सच़िमी आज्ञा

¹⁵ हर साल पिलातुस दुह यहुदी त्याहरो रिंङ इच्च़ा केदी बि अतु मांग मीहज़ी लहज़ातेर, दोतु थल्जी रिहा लहज़ा चरच़ाते।

¹⁶ दुह मुक्को दोतु दोहर यीशु ए बरअब्बा मिन्दु इच्च़ा केदी तोहई,

¹⁷ दंङ दोरे ठ्रोहका शुईरे ताह पिलातुसे दोतंङ कुहतो, “केहच़ी अच़ि जुंज़ातंई कि गेह केहतु थल्जी छोड़ेकपोग? बरअब्बाबि आ यीशुबि अरी मसीह कहलाच़ा?”

¹⁸ छना कुंई साते ता दोई ञेंहच़ाते कि दोच़ी दुह धोखारंङ चुम्ज़ी शुह।

¹⁹ अपेहल न्याय ओ गद्दीऊ टोईच़ी बंङज़ा तोहई दंङ दोऊ मेच़े दोबि कुहषी तहरे, “केई दुह धर्मीऊ मामलारिंङ गुह्ट्र थकेऊ, छना कुचे ऐरे रातारिंङ गिह्बी मंङडुंङ गेह वजाहज़ि दुख उठाएकातग।”

²⁰ यहुदी मोह्ड़े पुरोहितरे ए यहुदी सेंहणाज़ि मीहतिंङ दी कुट्रिमी थल्जी जोर रेह कि बरअब्बा बि पेट्रुंई दंङ यीशु सच़ी लांई।

²¹ हाकिमे रूहकातो, “दिकुतु बिचंङ अरी जुंज़ातंई कि गेह केहतु थल्जी छोड़ेकपोग?” दोच़ी कुह्तोर, “बरअब्बा बि।”

²² पिलातुसे दोरे यह्च़ा रुहक्ती, “दंङ यीशु अरी मसीह कहलाच़ा, छि लोहग?” भत्तेज़ि दोबि कुह्तोर, “दुह क्रूसो टोईच़ी चढ़ाएतु।”

²³ हाकिमे दोतंङ साते कुतोह, “छिले, दी छी मांजी कम लहसी शुह?” दंङ दोच़ी महसे हाऊष रेह कुतोह, “दोबि क्रूसो टोईच़ी केहच़ी सच़ी च़रतिन।”

²⁴ पिलातुसे खमतो कि छल्ले बणेक्पिमी माह बल्कि छल्ला वैहसीऐ लेहकी तोह, दंङ दोई दिह लेहपच़े भीड़ो तुईज़ी एनोह गुहड़ चिह्आतो दंङ कुहतो, “गेह दिह धर्मीऊ शुहईज़ि निर्दोष शुगाह; केहच़ी ञेंई।”

²⁵ भत्ते मीहच़ी जुबाब रान्दोहर, “दिऊ शुहई ओ इलज़ाम ञेंहतु टोईच़ी ए ञेंहतु कटुतु टोईच़ी शोतो।”

²⁶ दिरंङ दोई बरअब्बाबि दोतु थल्जी रिहा लेह केहतो, दंङ यीशुज़ि रोमी सेनिकातु गुहड़िंङ कोड़े चढ़ाएच़िमी ए क्रूसो टोईच़ी केचिमी ए सच़िमी थल्जी दोतु हखा रेह च़रति।

सिपाही तु दोरच़ी यीशु अपमान

²⁷ दंङ हाकिमो सिपाहीज़ि यीशु किलारिंङ शिल्ज़े भत्ते सैनिकरे दोऊ फेरे ठ्रोहका लाहरिरे,

²⁸ दंङ दोऊ खमज़े युहप्चे दोबि शेह्ई रंगो बाणा लगाकातोर,

²⁹ दंङ छ्वाक्तु ताज लचे दोऊ पुंज़ो टोईच़ी केरिरे, दंङ दोऊ सुचंङ गुहड़िंङ छिते लठी रेंऐ दोऊ तुईज़ी घुवञारे टेकेहके दोऊ ठटा लहज़ी लेहतिरे दंङ कुह्तोर, “हे यहुदी तु राजा नमस्कार।”

³⁰ दंङ दोच़ि दोऊ टोईच़ी थू लाहतेर; दंङ दुहए छिते लठी लेहपच़े दोऊ पुन्ज़ंङ भाहाच़ी लेहतिरे।

³¹ अंऊ मुका दोरे दोऊ ठटा लेह योहसते दंङ दोऊ दोहरची बागा युहप्चे दोऊ ए खमज़े लगाकातोर, दंङ क्रूसो टोईच़ी चड़ाची मी थल्जी रेंज़ा शिलिरे।

यीशु क्रूसो टोईच़ी केट्री

³² धह्कते इलदर दोतिंङ शमौन कुचे इच्च़ा कुरेनी मीह दोहयते। दंङ सेनिकज़ि दोबि ज़बरदस्ती यीशु ऊ क्रूस दोऊ दोरच़ी कुरच़े लहरिर।

³³ दुह ठारिंङ अरी गुलगुता यानि खोपड़ीऊ अकारो ठ्रोह ठहरि पिचे।

³⁴ दोच़ी पित चवाह्सी दाखो रस दोबि तुंङमिमी रहंदेर, पर दुह चखेके दुह तुंङमी माहतरे।

³⁵ दंङ दोच़ी दुह क्रूसंङ चढ़ाके दोऊ खमज़े फाए चरच़ातेर,

³⁶ दंङ दोहर वंहङज़ा पहरा रंड्री लेहतिरे।

³⁷ दंङ क्रूसो तोरिंङ बक्शे इच्च़ा तकती लगाएतिर, दंङ दोऊ टोहकठे दि च़ेहसी तोहई, “दिह यहुदी मीहतु रज्ज़ा यीशु शुह।”

³⁸ दंङ दोहरंङ साते झुह्ट डाकू रेह इच्च़ा सुचंङ हासी इच्च़ा फुचंङ हासी क्रूसो टोईच़ी केरिरे।

³⁹ दंङ अमरिंङ जोज़ा मीहज़ी पुंज़ा त्रुलज़ा-त्रुलज़ा दोऊ बेज़ती लहज़ी लेहतिर,

⁴⁰ “वाह! मंदिर ठ्वालज़ि दुह दंङ षुमु ध्याड़ा रिंङ बणेकठ्रा दुह! क्रूसो टोईच़ी ज़ि तकसाते एनाबि बचाके च़रतु।”

⁴¹ दिह पाहठी सेंहणा ए यहुदी मोह्ड़े पुरोहितरे ए यहुदी शास्त्री ला ठट्टा लेह कुट्रातेर,

⁴² “दिह ऊईरे बचाकते दंङ एनाबि बचाएसी मरच़ा। दिह ताह इस्राएलो रज्ज़ा शुह, दाह क्रूसंङ ज़ि तकसा अति ताह ञेंहच़ी दोऊ टोईच़ी विशवास लोहई।

⁴³ दोई परमेश्वरो टोईच़ी विशवास लहसी तहरे अगर दोई दिह जुंज़ा, दाह दिह छुड़ातु, छना कुचे दिह कुहषी तहरे, गेह परमेश्वरो योह शुगाह।”

⁴⁴ ध्यांए अंऊ दोहरंङ साते क्रूसो टोईच़ी तोईरे, दोरे ला दोऊ बुराई लहज़ी लेहकी तोईरे।

यीशु एनोह प्राण रंड्री

⁴⁵ नीरा शुहतर भत्ते देशंङ हंयार शुहचे इलि, दंङ दुह षुमु पहरङ (लगभग 3 बजे) तचेक तोहई।

⁴⁶ नीरो 3 बजे यीशु ज़ि जोरे हाऊषेके कुहतो, “एली, एली लमा शबक्तनी?” मतलब हे गिऊ परमेश्वर, “हे गिऊ परमेश्वर केई गेह छिले केहच़ी केहतन?”

⁴⁷ अंऊ कछंङ खड़े तोहई, दोतु बिचंङ ज़ि रेहह ज़ि दी रेड्रा कुट्री लेहकी तोईरे, “रेड्रुंई, दोई ता एलियाह भविष्यवक्ताबि सर्गंङज़ि एनोह मदतो थल्जी बुलाएच़ी लेहकी तो।”

⁴⁸ दोतु बिचंङज़ि इच्चे मीह ए ज़रका रेह सपंज़ दाखो सुर्ज़ि रसो अंद्रेग ठुमज़े, दंङ लठी रिंङ दोहर केट्रे दोबि रेंई दंङ

⁴⁹ ऊईज़ि कुह्तोर, “रूहम्ज़ु, खमोंई कि एलियाह भविष्यवक्ता दोबि क्रूसो दोहरची बचाएच़ी अपा मापा।”

⁵⁰ दंङ यीशुज़ि मोह्ड़े हाऊष रेह एनोह प्राण रें च़रति।

⁵¹ दंङ खांई मंदिरो दुह पर्दा अंऊ भत्ते मीहतिंङ परमेश्वरो तुईज़ी इबिमी रंङ साते रोकेक्चते, तोरिंङ ज़ि योंङ तचेक ट्रलशा झुह्ट खन्नी शुहचे इलि; धरती तुहरचे इलि, चट्टानरे, गोह रे दरकेक इलिरे,

⁵² कब्रारारे युह्प्सा इलिरे, दंङ सिए इलजी महस पवित्र मीहरे षिङे इलिरे,

⁵³ दंङ श्रींङमीरंङ कब्ररज़ि हुंज़े पवित्र नगरारिंङ इलजी मीहतिंङ तंङाषातेर।

⁵⁴ दंङ सुबेदारे अरी दोहरंङ पहरा रंड्रा तेर थूञलऐ छिल्ला शुहते दुह खंऐ महसे वैऐ इलिरे दंङ कुह्तोर, दिह “हेले दी मीह, परमेश्वरो योह यीशु तोहई।”

⁵⁵ महस मेच़िमी रे अरी गलीलंङज़ि यीशु सेवा लहज़ा दोहरंङ अन्देर, ओहईज़ि दिह खंड्रातेर।

⁵⁶ दोऊ बिचंङ ज़ि मगदल शहरो मरियम, कवचि याकूब दंङ योसेस ओ याह मरियम ए जब्दीऊ याह तोहई।

यीशु बि पथेक्च़ी

⁵⁷ ञोंकल कि ध्याड़ा शुहत यूसुफ मिन्ज़ी अरीमतिया ऊ इच्च़ा साहुकार मीह, अरी एने यीशु चेला तोहई दोहर अंजा।

⁵⁸ दोई पिलातुस कछंङ इलजे यीशु लाश पेच़ातो। दिह रेड्रीरंङ पिलातुसे दोबि लाश रेंई केह।

⁵⁹ यूसुफ ए लाश एनोह कछंङ लेहपच़े केह, दोबि मलमलो चादरो बिचंङ ज़िल्ज़ी लहरी,

⁶⁰ दंङ दुह लाशा बि दोई कब्ररंङ केहतो, अंऊ दोई एनोह थल्जी चट्टानंङ हूँसी तहरे, दंङ कब्रओ पितंङ ज़ि इच्च़ा मोह्ड़े रघ केहच़ी अच्च़ा इलि।

⁶¹ मगदल शहरो मरियम ए अई मरियम दोहर कब्रो तुईज़ी बंङज़ा तोईरे।

कब्रङ पहरा

⁶² ऊई ध्याड़ा अंऊ अरामो ध्याड़ा तोहई, यहुदी मोह्ड़े पुरोहितरे ए फोअरे फरीसी मीहरे पिलातुस ओ कछंङ अंज़े कुह्तोर।

⁶³ “हे महाराजा, ञेंतिंङ पता तोह कि दुह भरमाएच़ा दोई अपेहल दुह श्रींङी तोहई, कुहते, कि गिऊ सीमी षुमु ध्याड़ो थल गेह यच़ाह श्रींङे योग।

⁶⁴ दिऊ थल्जी आज्ञा रंऊ कि षुमु ध्याड़ा तचेक सेनिकाज़ि कब्रओ पहरेदारी लाहसी जूंस, अगर कांह झांह माह लोहन ता दोऊ चेलार अंज़े दोऊ फुक रैंज़ा शोर दंङ मीहतिंङ कुड़ी लेहतिर कि, कि दुह सीह दोतु विचंङ ज़ि श्रींङे इलज़ा।”

⁶⁵ पिलातुसे दोबि कुहतो, केहतु दोहर सैनिकरे तोतोर दंङ ईलांई, “केनातु दोरच़ी अंयों ला शुबी तरपोतो धोंण कब्रो रखवाली लांई”

⁶⁶ दंङ दुह पहरेदारातु साते अच्च़ा इलि, दंङ रघटु टोईच़ी मोहर लगाके दोऊ रखवाली लेह लेहतिर।