मत्ती 25 - लाहौली बाइबिल

सा कुंवारी तु कथा

¹ दंङ यीशुज़ि एनोह चेला तु हखा कुहतो, अपेहल गेह मीहू योह वापिस अपोग, दोहपल स्वर्र्गो राज दुह सा ब्याह माह लहसी मेच़मीतु ठ्रोह शोतो अरी मशाल कुरच़ा ब्याहू रंङ दोहई दोऊ ब्याहू दोर्तिंङ इलिरे।

² दोतु बिचंङज़ि ङा बेवकूफ, ङा समझकार तोईरे।

³ माह ञेंहच़ा ज़ि (बेबकुफाज़ि) मशाल ताह कुरतिरे, पर एनातंङ साते ज्यादा तेल माहशिलिरे;

⁴ पर ञेंहच़ा दोच़ी मशाल रंङ कुपिऊ अंद्रेग तेल ला पिंङे शिलिरे।

⁵ अपेहल ब्याऊ अपिमी झाड़ा शुईता दोरे भत्ते डूलेकचि लेहतिरे दंङ ईमरिंङ अच्च़ा इलिरे।

⁶ अध्धा राता रिंङ हल्ला शुई; खांई ब्याऊ अपि लेहकी तोह दंङ दोहरंङ दोहई जोंई।

⁷ दंङ दोरे भत्ते कुंवारिरे एनातु मशाल ठीक लहज़ी लहरिरे।

⁸ दंङ मुर्ख दोच़ी समझदारातु हखा कुह्तोर, केन्दु तेल ओ दोरच़ी फोआ ञेंतिंङ ला रांई, छना कुचे ञेंहतु मशाल सि लेहकी तोह।

⁹ दंङ ञेंहच़ा दोच़ी जुबाब रेंईर, दिह केहतु ए ञेंहतु थल्जी पुरे मशोतो; रूठे शोतो केहच़ी केन्दु थल्जी लंङज़ा दोतु दोहरची केनातु थल्जी च़ुमने रेंज़ा हतांई।

¹⁰ अपेहल दोरे च़ुमज़ि य्वातेर दंङ ब्याऊ पिचे इलि, दंङ अरी त्याहर तोईरे, दोरे दोरंङ साते ब्याऊ घरबारंङ अच्च़ा इलिरे दंङ पितंङ बन्द शुहचे इलि।

¹¹ दिऊ थल ऊई ब्याह माहलहसी मेच़मीरे वापिस अंज़े क्रप्चे कुट्री लेहतिरे, “हे मालिक, हे मालिक ञेंहतु थल्जी पितंङ अलतु।”

¹² दोई जुबाब रेंई, गेह केतंङ हेले कुट्रातग, गेह केरे मसेहखा।

¹³ दिऊ थल्जी चेहके तोंई, छना कुंई साते ता केहच़ी गिऊ वापिस अपिमी ध्याड़ा माह ञेंहई, माह दुह टेम अपेहल अपतो।

ढबाह तु कथा

¹⁴ दंङ यीशुज़ि अई इच्च़ा उदाहरण रेह कुहतो, अपेहल गेह यह्च़ा वापिस अपोग, दोहपल स्वर्गो राज झांह ठ्रोह शोतो: इच्च़ा मीह यात्राओ थल्जी इबि लेहकी तोहई। इलज़ा दोहपल दोई एनोह परगरातिंङ बुलाके एनोह टंगा-ढबाहो दोरच़ी फोअरे दोतिंङ रेह च़रति दंङ कुहतो कि अपेहल गेह अच़ा योग दिह ढबाहो दोरच़ी खर्च लांई दंङ महस ढबाह कमाएतेन।

¹⁵ दोई इच्च़ाबि ङा तोड़ा मतलब राह सालो कमाईओ बराबर तोहई, अई दोबि झुह्ट तोड़ा अंऊ झुह्ट निह्ज सालो कमाईओ बराबर तोहई तीसरा दोबि इच्च़ा तोड़ा अंऊ निह्ज सालो कमाई बराबर तोहई।

¹⁶ दंङ अतिंङ ङा तोड़ा खोकसिरी दोई दोथरे इलजे दोतु लेन-देन लेह ऊहई ङा तोड़ा कमाकतो।

¹⁷ ध्यांए अच़ि झुह्ट खोक्शते दोईला झुह्ट ऊहई कमाकतो।

¹⁸ पर अच़ि इच्च़ा खोक्शते, दोई षोड़िंङ ख्रलजतो दंङ एनोह मालिको (मालिको) ढबाह प्याके केहतो।

¹⁹ महस ध्याड़ो थल दुह परगरातु मालिका अंज़े दोतिंङ दिह पता लगाएच़िमी थल्जी ठ्रोहका लहतो कि दोच़ी दोऊ ढबाह रंङ साते छि लहतो।

²⁰ अतिंङ ङा ज़ांऊ सिक्का खोक्शते, दोई ङा तोड़ा ऊहई हुंज़े कुड़ी, हे मालिका, केई गिह्बी ङा तोड़ा रन्देन, खंणु गेह ङा तोड़ा ऊहई कमाकातग।

²¹ दोऊ मालिका ज़ि दोबि कुहतो, धन्य शुनाह हे रूठे ए विशवासो जोगे परगरा कांह थोड़ेरिंङ टंगा ढबाह सोठेक्च़िमी थल्जी विशवास जोगे बंङज़िन; गेह कनिंङ महस धिरो अधिकारी लेह केओग। केनोह मालिको खुशीरिंङ शामिल शुह।

²² दंङ अच़ि झुह्ट तोड़ा खोकसी तहरे दोईला अंज़े कुहतो, हे मालिका, केई गिह्बी झुह्ट तोड़ा रन्देन, खंणु गेह झुह्ट ऊहई तोड़ारे कमाकातग।

²³ दोऊ मालिके दोबि कुहतो, धन्य, हे रूठे ए विशवासो जोगे परगरा कांह थोड़े अरे ढबाह सोठेक्च़िमी थल्जी विशवासो जोगे बंङज़िन; गेह कनिंङ मह्सधिरातु अधिकारी बंणाएपोग केनोह मालिको खुशीरिंङ शामिल शुह।

²⁴ दंङ अच़ि इच्च़ा ज़ङों सिक्का खोकसी तहरे, दोई अंज़े कुहतो, हे मालिका, गेह कांह ञेंए केहतेग कि कांह इच्च़ा कठोर मीह शुनाह; केई ऊई मीहतु लहसी कमो दोरच़ी फायदा कमाएच़िमी उम्मीद लोहन।

²⁵ झांह लेह गेह बेवा इलिग कि अगर गेह कांह ढबाह योंहई च़रपोग ता केई गिह्बी सज़ा रमोंन। दिऊ थल्जी कांह ज़ङों सिक्का धरती रिंङ पथेके च़रतिगा रेड्रु अंऊ कांह तोह दुह दि तोह।

²⁶ दोऊ मालिका ज़ि दोबि जुबाब रेंई, हे मांजी ए निक्कमे परगरा अगर केई ञेंच़ातन कि गेह ऊई मीहतु लहसी कमो दोरच़ी फायदा कमाएच़िमी उम्मीद लेहई।

²⁷ दंङ कनिंङ जूंशी तोहई कि गिऊ ढबाह सुनारातिंङ रंयंङ; दंङ गेह अंज़े घेंङौ ढबाह ब्याजारंङ साते लेहपतिगा।

²⁸ दंङ मालिका ऊई परगरतु हखा कुंई, “दिऊ थल्जी दुह ज़ांओ सिक्का दोऊ दोरच़ी लेहपच़े च़रतुंई, दंङ अतु दोहर सा तोड़ारि, तोतोर दोबि रेह च़रतुंई।”

²⁹ छना कुचे अतु कछंङ तोह, दोबि ऊई ला महस खोकसोतो, दंङ अतु दोहर थोड़े तोह, दोऊ दुह थोड़े ला योह्सा योतो, अंऊ दोऊ कछंङ तोहई।

³⁰ दिह निक्कमे परगराबि हंञारारंङ केह्चे केहई, दोहर क्रपिए छ्वा रुहक्च़ी शोतो।

न्यायो ध्याड़ा

³¹ अपेहल गेह मीहू योह यच़ाह अपोग, दंङ गेह घेंङौ महिमारंङ साते अपोग दंङ भत्ते स्वर्गदूतारे घेंङौ साते हपोग। दोहपल गेह भत्ते मीहतु न्याय लहच़िमी थल्जी घेंङौ महिमो सिहासनो टोईच़ी बंङज़ोग।

³² दंङ गेह भत्ते जातिरे घेंङौ तुईज़ी ठ्रोहका लोहग; दंङ छना पोहाले त्रैंई तिंङ ए छ्गाडारे शता लेहई ध्वांए गेह दोरे इपि अईदिरंङ शता लोहग।

³³ दंङ गेह धर्मी मीहतिंङ घेंङौ सुचंङ हाच़ी ए अधर्मी मीहतिंङ घेंङौ फुचंङ हाच़ी खड़े लोहग।

³⁴ दंङ गेह रज्ज़ा घेंङौ सुचंङ हासी दोतंङ कोहग, हे गिऊ स्वर्गीय बाहऊ धन्य मीहरे, अतंई, दुह राज्यो हकदार शुहचे ईलांई, अंऊ संसारो शुरुआतबे केहतु थल्जी त्याहर लहसी तोह।

³⁵ छना कुचे गेह योंई तोईगा, दंङ केहच़ी गिह्बी ज़ेइमी रंदेंई; गिह्बी तीस्कार तोहई दंङ केहच़ी गिह्बी ती रांई; गेह परदेशी तोईगा, केहच़ी गेह केन्दु घरबारंङ शाहधेखातंई;

³⁶ गेह नंङटे तोईगा, दंङ केहच़ी गिह्बी लेहच़िमी थल्जी खमज़े रंदेंई; गेह टेहची तोईगा, दंङ केहच़ी गिऊ गांणी केहतंई, गेह जेलंङ तोईगा, दंङ केरे गेरंङ दोहई अंदेंई।

³⁷ दंङ धर्मीज़ि दोबि जुबाब रमोर “हे प्रभु, ञेंहच़ी कांह अपेहल योंए तंङातेंई दंङ खिलाकातेंई? या तीस्कार शुहबे ती पिलाकातेंई?

³⁸ ञेंहच़ी परदेशी तंङातेंई दंङ हेंदु चुंङ ह्न्देंई? या नंङटे तंङे खमज़े रंदेंई?

³⁹ ञेंहच़ी अपेहल कांह टेहची ए जेलारिंङ तंङातेंई दंङ करंङ साते दोहई हन्देई?”

⁴⁰ दंङ गेह रज्ज़ा दोतिंङ जुबाब रमोग, “गेह केतंङ हेले कुट्रातग केहच़ी गिऊ दिह कवचि वे कवचि चेलारंङ साते लाह, दुह गेरंङ लाह।

⁴¹ दंङ दोई फुचंङ हासी दोतंङ कोतो हे शापित मीहरे, गिऊ तुईज़ी हिसाब मेह मेहरिंङ अच्च़ा ईलांई अंऊ शेतान ए दोऊ मांजी आत्मातु थल्जी परमेश्वरे त्याहर लहसी शुह।

⁴² छना कुचे गेह योंए तोईग दंङ केहच़ी गिह्बी ज़ेइमी माहरांई; गिह्बी तीस्कार तोहई, दंङ केहच़ी गिह्बी ती माहरेंई;

⁴³ गेह परदेशी तोईगा, दंङ केहच़ी गेह केन्दु घरबारंङ माहशिली; गेह नंङटे तोईगा, दंङ केहच़ी गिह्बी खम लहच़िमी मराहणी; गेह बन्दीग्रहरिंङ तोईगा, केहच़ी गिऊ गांणी माहकेहरि।

⁴⁴ दंङ दोच़ी जुबाब रमोर, हे प्रभु ञेंहच़ी कांह अपेहल योंई, या तीस्कारतिंङ या परदेशी नंङटे, टेची छिता बन्दीग्रह तंङातेंई, दंङ कांह सेवा टहल मलाहतेंई?

⁴⁵ दंङ गेह दोतिंङ जुबाब रमोग, गेह केतंङ हेले कुट्रातग केहच़ी दिह कवचि वे कवचि बिचंङ अरीआ इच्च़ारंङ साते माह लहतंई, दुह गेरंङ साथीला माह लाहतंई।

⁴⁶ दंङ दोरे अंऊ फुचंङ हासी तोतोर अनंत सज़ा खोक्पोर पर धर्मी मीहरे अनंत जीवनंङ योर।”