मत्ती 24 - लाहौली बाइबिल

मंदिरो बिनाशो बारे भविष्यबाणी

¹ अपेहल यीशु यहुदी मंदिरंङ ज़ि इबि लेहकी तोहई, दंङ दोऊ चेलारे दोबि मंदिरो बणाषी कंड्रिमी थल्जी दोऊ कछंङ अतिरे।

² दोई दोतंङ कुड़ी, “केहच़ी दिह भत्ते खंड्रातंई माह। गेह केतंङ हेले कुट्रातग देर इच्च़ा रघटु टोईच़ी रगला माकेश्रोतो अंऊ माह ठ्रव्लषा योतो।”

मुसीबत ए क्लेश

³ अपेहल यीशु जैतून मिंदंङ गोह टोहकठे तोहई, दंङ चेलाज़ि एकांत दोऊ कछंङ अंज़े दोबि कुह्तोर, “ञेंतिंङ कंड्रु कि दि गप्पारे अपेहल शोर? कांह अपिमी ए संसारो अंत ओ छि निशानी शोतो?”

⁴ यीशुज़ि दोतिंङ जुबाब रेंई, “खबरदार तोहई अच़िया केरे भरमासी माजूंस,

⁵ छना कुचे महस मीहच़ी गिऊ अधिकारो दावा लहच़ी अपोर दंङ कोहर, गेह मसीह शुगाह दंङ महस मीहतिंङ धोखा रमोंर।

⁶ अपेहल केहच़ी लड़ाई, दंङ लड़ाई तु गप्पा थक्पोंई दंङ बेंईन थाह, छना कुंई साते ता दी शुहबी ज़रूरी शुह, दंङ दुह टेमारिंङ संसारो अंत मा शोतो।

⁷ छना कुचे इच्च़ा जाति मीहरे ऊईजातिऊ मीहतु खिलाप शोर दंङ इच्च़ा देश ऊई देशो खिलाप शोर, दंङ अकाल शोतो ए भुयंल अपोतो।

⁸ दिह भत्ते गप्पारे तकलीफो शुरूआत शोतो।

⁹ दंङ दोरे मीहरे अंऊ केहतु बिरोध लाहतोर बरदो रंड्रीमी थल्जी केरे च़ुमयतो केरे सचे केओर, दंङ गिऊ टोहकठे बिशवास लहज़िमी रंङ साते भत्ते जातिऊ मीहच़ी केतंङ साते बैर लोहर।

¹⁰ दंङ महसज़ि गिऊ टोहकठे बिशवास लेह ब्याड़ा लेह केओर दंङ इदि अईदीबी च़ुमज़ि लोहर, दंङ एनातु बिचंङ बैर तोहर।

¹¹ महस हप्सी भविष्यकंड्रारे अच़ा अपोर, दंङ महस मीहतिंङ धोखा रमोर।

¹² दंङ अधर्म बढेकपरिंङ साते एनातु बिचंङ दाह योह्सा योतो।

¹³ पर अंऊ जीवनो अंत तचेक गिऊ टोहकठे पक्‍का विशवासरिंङ बंङज़ोतो, परमेश्वरे दुह बचाके च़रपोतो।

¹⁴ दंङ परमेश्वरो राज्यो पाहठी दिह रूठे खबर भत्ते संसारारंङ प्रचार शोतो कि भत्ते देशो जाति ज़ि दिबी ग्रहण लहज़िमी मोका खोकसोतो। दोहथल संसारो अंत अपतो।

महासंकटो शुरूआत

¹⁵ दिऊ थल्जी अपेहल केहच़ी दुह उजाड़के अशुद्ध चीज़ो अतु पाहठी दानियेल भविष्यवक्ताए कुहषी तहरे, पवित्र ठाहरीरिंङ खड़े शुहचे खमोंई (अच़ि पढ़ेकपोंई, दोच़ी समझेक्पोंई।)

¹⁶ दंङ अंऊ मीहरे यहुदिया प्रदेशंङ तोर दोरे बचेक्पिमी थल्जी गोह टोहकठे अच़ा ईलांई।

¹⁷ दंङ अंऊ लंङदिंङ तोह दुरेह एनोह समानो थल्जी थाह याहच़ु;

¹⁸ दंङ अरी रीहरिंङ तोहतोंई, दोरे एनातु खमज़े हपि था ईलांई।

¹⁹ दुह ध्याड़ारिंङ अंऊ खोकटुंङ शोतो दंङ अंऊ पानू रंड्रा शोतो, दोतु टोईच़ी हाय-हाय!

²⁰ प्रार्थना लोहवा लोंहई कि केतिंङ सोहईरिंङ या अरामो ध्याड़ारिंङ पोकफी माजूंस।

²¹ छना कुचे दोहथल धिठ्रोह भारी मुसीबत (कलेश) अपतो, छना ठ्रोह संसारो शुहरूबे तोग ता शुहचे माह ए दिबे थल अपेहला शोतो।

²² अगर दोरे ध्याड़ारे घटाशी माशुहचंङ दंङ इच्च़ा ला जीव बचेकी माह शुंईयां, पर शत्‌ह लहसी दोतु बजाहज़ि दुह ध्याड़ारे घटेक्पोर।

²³ दुह टेमारिंङ अच़िया केतंङ साते कोतो, ‘खंणु, मसीह देहर तोह। छिता दोहर तोह ता विशवास था लांही।’

²⁴ छना कुचे ता हप्साड़ भबिष्यद्वाक्ता ए हप्साड़ मसीह खड़े शुहचे योतो, दंङ मोह्ड़े निशानी ए अद्धभुत कम कमोर अगर शुहचे इलि साते ता अंङषी दुरेह ला बहकाएकि च़रपोर।

²⁵ खंणु, गेह तुहई केतिंङ भत्ते धिर कुचे केहषी तातग।

²⁶ दिऊ थल्जी अगर दोच़ी केतंङ कुड़िर, खांई दुह सुनसान ठाहरीरिंङ तोह दंङ धकतेखा, हुंज़ा था ईलांई; खांई दुह कोठरिऊ अंद्रेग तोह, दंङ विशवास थलांई।

²⁷ छना बिजली पूर्व दिशाज़ि हुंज़े पशिचम दिशा तचेक चमकेपी, ध्वांए गेह मीहू योह अपिला शोतो।

²⁸ अंऊर शाऊल लोथडारे शोर दोरे गवाह रे ठ्रोहका शोर।

मीहू योहो यह्च़ा अपि

²⁹ दुह मुक्को क्लेशो थल एके हंयार शुहचे योतो, दंङ लहज़ा प्रागे लाह अच्च़ा योतो, कररे सरगंङज़ि दह्चे योर दंङ सर्गो मोह्ड़े शक्ति त्रुलज़ा योर।

³⁰ दंङ गेह मीहू योहऊ निशानी सर्गंङ तंङफोतो धरतीऊ भत्ते खानदानी मीहच़ी एनातु काह रटेकपोहर; दंङ गेह मीहू योह बि मोह्ड़े सामर्थ ए ठाटबाठरंङ सर्गो बदडातु टोईच़ी अपि तंङफोर।

³¹ दोई तुरहीऊ जोहरे सगतंङ साते एनोह दूतारे च़रपोतो, दंङ दोरे धरतीऊ कुंणी-कुंणी ऊ गिऊ अंङषी मीहतिंङ ठ्रोहका लोहर।

अंजीरो बुटो कथा

³² अंजीरो बुटो दोरच़ी दी कथा सिखेक्तुंई, अपेहल दोऊ ब्रन्ज़ रेह न्खी शुहबी दंङ लप हुची चुक्सोर; दंङ केतिंङ पता लेहकी य्वात कि फल रंड्रीमी ध्याड़ा पिचे इलज़ा।

³³ झांह अपेहल केहच़ी भत्ते गप्पा रेह शुहबी खमोंई दंङ ञेंहनी च़रतेनि कि गेह मीहू योह अबिमी तोह देर तचेक कि अच़ा ए अंजा।

³⁴ गेह केतंङ साते हेले कुट्रातग, अपेहल तचेक दिहरे गप्पा पूरा माह शोहर दोहथर तचेक दिह पीढ़ीऊ अंत मशुह।

³⁵ सर्ग ए धरती योह्सा योतो, दंङ गिऊ गप्पारे अपेहल योह्सोतो माह।

चेहकी बंगजू

³⁶ पर गिऊ अई फेरा अपिमी पाहठी सही टेम अच़िला माह ञेंहऊ, माह स्वर्गदूताज़ि, माह गेह योह बि, सिर्फ बाहबि दुह ध्याड़ाओ पाहठी पता तोह।

³⁷ छना नूह ओ ध्याड़ारिंङ तोईरे, ध्वांए मीहू योहऊ अपिला शोतो।

³⁸ छना कुचे छना तिऊ प्रलय ओ तुहई कि ध्याड़ाङ अंऊ ध्याड़ा तचेक नूह जहाज़ंङ मचहढेकाते, दोतिंङ तचेक मीहच़ी ज़ोआतेर तुंङमातेर, दोतु विचंङ ब्याहरे शवातेर।

³⁹ दंङ तिऊ प्रलय ओ अंज़े दोरे रेंज़ा माहशिली दोहथल तचेक, दोतिंङ छले शुहंङसी माहदी; ध्वांए गेह मीहू योहऊ अपिला शोतो।

⁴⁰ दुह मुक्का झुह्ट गंङमी रीहरिंङ खड़े शोर, इच्च़ाबि लेहपच़े ऊईतु केह्षा योतो।

⁴¹ झुह्ट मेच़ामिकु घट्ट पिहट्री शोर, इच्च़ा लेहपशे ऊईतु केह्षा योतो।

⁴² दिऊ थल्जी केहच़ी चेहकी तोईनी, छना कुचे केहच़ी माह ञेंहई कि केहतु प्रभु अपेहल अपतो।

⁴³ पर दिह ञेंए केहई कि अगर घरबारो घ्राहकाबि पता शुई कि चोहर अपेहल अपिमी तोह, दंङ दुह चेहके बंङज़ोतो दंङ एनोह घरबारंङ चोरी शुहबी माहरेंईगा।

⁴⁴ दिऊ थल्जी केरे लाह त्याहर तोंई, छना कुचे अंऊ घड़ीऊ पाहठी केहच़ी सोचेक्सी मा, दुहए घड़ी गेह मीहू योह अच्च़ा अपोग।

विशवास जोगे दास ए माज़ी दास

⁴⁵ दिऊ थल्जी इच्च़ा वफादार, समझदार परगर दुह शुबी, अतिंङ दोऊ मालिके दोबि एनोह ऊई चुंङो परगरातु ध्यान तहच़ि ए दोतिंङ बगत रंड्रीमी ज़िम्मेवारी रेह तरच़ी।

⁴⁶ धन्य शुह दुह परगर अतिंङ दोऊ मालिक अंज़े ध्यांए लेह तंङफोतो।

⁴⁷ गेह केतंङ हेले कुट्रातग दोई दुह एनोह भत्ते धिरो अधिकारी लोहतो।

⁴⁸ पर अगर दुह मांजी परगरे चेहपोतो कि गिऊ मालिको अपिमी अईता ध्याड़ा तोह।

⁴⁹ दंङ एनोह साथी परगरातिंङ तेंङपोतो, दंङ तुंङज़ातंङ जोओतो तुंङमोतो।

⁵⁰ दंङ दुह परगरो मालिक झांह ठ्रोह ध्याड़ारिंङ वापिस अपोतो, अपेहल दुह दोऊ थल्जी रुमज़ा मशोतो, दंङ झांह ठ्रोह घड़ी अतु पाहठी दोई माह ञेंहतु।

⁵¹ दंङ दोई दोबि महस मोह्ड़े सज़ा रमोतो दंङ दोऊ हिस्सा कपटी मीहतंङ साते ठहराएपोतो; दोहर क्रपिए छ्वा रुहक्च़ी शोतो।”