मत्ती 17 - लाहौली बाइबिल

यीशु रूपान्तर

¹ त्रुई ध्याड़ो थल यीशुज़ि पतरस, याकूब ए दोऊ न्वा यूहन्ना बि ऐनाहरंङ साते इच्च़ा रंङी गोह टोईच़ी रेन्ज़ा हति।

² दंङ अपेहल दोरे एकांत रिंङ तोईरे दुह षुम चेलाज़ि यीशु रूप लेहक्सी तंङरी, दोऊ मोद एकेऊ ठ्रोह चमकेक्ते दंङ खमज़े छंङीऊ ठ्रोह छंङी शुहचे इलदे।

³ दंङ मूसा ए एलियाह भविष्यवक्ता दोरंङ साते गप्पा लहज़ी तंङफातेर।

⁴ दिरंङ पतरसे यीशु रंङ साते कुतोह, “हे प्रभु हेंदु देहर बंङज़ी रुठे शुह। अगर कांह हिटी तोह ता गेह देहर षुमु तम्बू बणाएपोग; इच्च़ा कांह थल्जी, इच्च़ा मूसाऊ थल्जी, इच्च़ा एलियाह भविष्यवक्ताओ थल्जी।”

⁵ पतरस अईता कुट्री ए लेहकी तोहई इच्च़ा छंङसे डुह दोतु टोईच़ी अच्च़ा अति, दुह डुए दोरे कपची च़रति दंङ दोतु हखा डुह बिचंङज़ि परमेश्वरे कुंहई, “दिह गिऊ प्यारे योह शुह अतंङ साते गेह राजी तोतोग; दिऊ रेड्रुंई।”

⁶ चेलारे दिह रेड्रीरंङ मोह्तु भारे दह्चे इलिरे दंङ महसे बेई इलिरे।

⁷ यीशुज़ि कछंङ इलजे दोतिंङ धका रेह कुहतो, “अहच़ुंई थबेंई।”

⁸ दंङ दोच़ी एनातु टिरारे उठाके खंयातोर दंङ यीशुबि छोड़के एनातंङ साते ऊई अरीला माह खंणी।

⁹ अपेहल दोरे गोहू दोरच़ी तक्सातेर दोहथर यीशुज़ि आज्ञा रहंदे, “अपेहल तचेक कि गेह मीहू योह सिमी दोरच़ी षिङे माह योग दोहथर तचेक केहच़ी छिला तंङातंई अतंङ साते ला थकुंई।”

¹⁰ दिरंङ दोऊ चेलाज़ि दुह रूह्कातोर, “दंङ यहुदी शास्त्रीज़ि दिह छारिंङ कुट्रातोर कि एलियाह भविष्यवक्ता मसीह बे तुई अपि ज़रूरी तोह?”

¹¹ यीशुज़ि जवाब रेंई, “एलियाह भविष्यवक्ता ज़रुर अपतो, दंङ भत्ते धिर ठीक लोहतो।

¹² पर गेह केतंङ कुट्रातग कि एलियाह भविष्यवक्ताज़ि तुहई अंज़े तोहई पर मीहच़ी दुह माह सेहच़ातेर; दंङ मीहज़ी एनोह मर्ज़ी लेह दुह लहज़ातोर छना दोच़ी जुन्ज़ातेर।” ध्वांए गेह मीहू योह ला दोतु गुहड़च़ि दुख उठाएपोतो।

¹³ दंङ चेलाज़ि चेहकातोर कि यीशुज़ि दोतंङ यूहन्ना बपतिस्मा रंड्राढो पाहठी कुट्रा।

माजी आत्मा ग्रस्त कटु बि ठीक लहज़ी

¹⁴ अपेहल दोरे भीड़ो कछंङ अतिरे इच्च़ा मीह दोतु कछंङ अंजा, दंङ पुष्टू भारे अंज़े कुट्री लेहती।

¹⁵ “हे प्रभु। गिऊ कटु टोईच़ी दया लोह। छना कुचे दोबि मिर्गी अपा दंङ दोबि महस बरदो शवाह, दंङ घड़ी, घड़ी तीरिंङ दह्चे य्वाह।”

¹⁶ “गेह दुह कांह चेला तु कछंङ शिल्देग पर दोच़ी दुह ठीक लेह माहरतिरे।”

¹⁷ यीशुज़ि जवाब रेंई, “हे अबिश्वासी ए ज़िद्दि मीहरे गेह अपेहल तचेक केतंङ साते बंङज़ोग दंङ अपेहल तचेक गेह केहतु अबिश्वासबि सेहन लोहग? दुह योह बि गिऊ कछंङ हतांई।”

¹⁸ दंङ यीशुज़ि मांजी आत्माबि रेहच़ा दंङ दुह दोऊ दोहरची हुंज़ा इलि, दंङ दुह कटु दोहथर ए ठीक शुहचे इलि।

¹⁹ दंङ चेलाज़ि एकातंङ यीशु कछंङ अंज़े कुह्तोर, “ञेंहच़ी दुह छिले हुंपी मरतेनि?”

²⁰ यीशुज़ि दोतिंङ कुहतो, “केनातु विशवासो कमी ऊ बजाहज़ि, छना कुचे गेह केतंङ हेले कुट्रातग अगर केहतु विशवास राईऊ सोल्तु बराबर ला शुई ता दिह गोह बि कुचे तरपोंई, देरच़ी तुहरचे दोहर अच्च़ा इला, दंङ दुह अच्च़ा योतो; दंङ छिल्ला गप्पा केहतु थल्जी मुशकिल माह शोतो।”

²¹ (पर दिह जाति प्रार्थना ए ब्रत मेह महुंज़ी)

एनोह सिमी बारे यीशु यह्च़ा भविष्यबाणी

²² अपेहल यीशु ए दोऊ चेलारे गलील प्रदेशंङ तोईरे दंङ यीशुज़ि चेला तु हखा कुहतो, “गेह मीहू योह बि गिऊ बेरीतु गुहड़िंङ धोखा रंङ साते च़ुमज़ि लोहर,

²³ दोच़ी गेह सच़ी च़रपोर, दंङ गेह षुमु ध्याड़ो थल यह्च़ा श्रींङे योग।” दिरंङ दोरे महस उदास शुईरे।

मंदिरो कर

²⁴ अपेहल यीशु ए दोऊ चेलारे कफरनहूम नगरंङ पिहचातेर दंङ यहुदी मंदिरो थल्जी चुंगी लेहपच़ाज़ि पतरसो कछंङ अंज़े रूह्कातोर, “छि कांह गुरु ज़ि मंदिरो चुंगी माह रंड्राआ?”

²⁵ दोई कुहतो, “वेई रंड्रा।” अपेहल दुह चुंखा अंजा यीशुज़ि दोऊ रूहक्च़िमी बे तुहई दोहरंङ कुहतो, “हे शमौन पतरस केई छि सोचेक्च़ातन? धरतीऊ रज्ज़ाज़ि चुंगी अतु दोरच़ी लेहपच़ातोर? एनातु कटुतु दोहरची ऊईतु दोरच़ी?”

²⁶ पतरसे दोबि कुहतो, “ऊईतु दोरच़ी” यीशुज़ि दोबि कुहतो, “दंङ कटुरे बचेके इलिरे।

²⁷ तांला दिऊ थल्जी कि हेंज़ी दोतिंङ ठोकर मराहई केई झीलो कछंङ इलजे जाल केहऊ दंङ अंऊ मह्छ़ तुहई हुंज़तो दुह लेहप्तु दोऊ आह अल्ज़े कनिंङ इच्च़ा सिक्का खोकसोतो, दुए गिऊ ए केनोह तरफे दोतिंङ रेह च़रतु।”