मत्ती 15 - लाहौली बाइबिल

परम्परा भाषे लहज़िमी सवाल

¹ दंङ यरूशलेम शहरो थोड़े अरे फरीसी मीहरे ए यहुदी शास्त्री यीशु कछंङ अंज़े कुट्री लेह्तिरे।

² “कांह चेलारे तुईकी रीति रिवाज़ छिले माहमनेक्च़ातोर, कि गुहड़ च़ि मेह रोटी ज्वातोर?”

³ दोई दोतिंङ जुबाब रेंई कि, “केहच़ी लाह केनातु प्रथा ओ थल्जी परमेश्वरो आज्ञा माह मनेक्च़ातंई।

⁴ छना कुचे परमेश्वर कुहते कि केनातु याह बाहो इज्ज़त लोहुई; अच़िला एनोह याह बाह बि मांजी कोहतो दुह सच़ी च़रपोर।

⁵ पर केहच़ी कुट्रातंई कि अच़िया एनोह बाहबि छिता याह बि कुड़ी कि अंऊ ला केतिंङ गिऊ दोरच़ी फायदा खोकसोतो दुह परमेश्वर तग रें केहशी तातग।

⁶ दंङ दोई एनोह बाहऊ आदर थलोह झांह लेह केहच़ी केन्दु रीतिरिवाज़ो बजाहज़ि परमेश्वरो कुहषी वचन माह लहतंई।

⁷ हे कपटी मीहरे यशायाह भविष्यवक्ताज़ि केहतु थल्जी ठीक भविष्यवाणी लहसी तह्तो।

⁸ दिहरे मीहरे एनोह आहच़ि गिऊ आदर लहच़ातोर पर सेहमे गिऊ दोरच़ी महस ऊई तार तोतोर।

⁹ दोच़ी गिऊ अराधना दिखावो थल्जी लाहतोर दंङ मीहतु बणाएष्री नियमो टोहकठे ज़ोज़तोर ए दोतिंङ सिखाएच़ातोर।”

अशुद्ध लहज़ा गप्पारे

¹⁰ दंङ यीशुज़ि दुह भत्ते दि एनोह कछंङ बुलाके कुट्री लेहती, “गिऊ गप्पार रेड्रा दुह समझेकतेनि

¹¹ छि आहऊ अंद्रेग यवा, दोई मीह अशुद्ध मलेहई पर छि आहरिंङज़ि हुंज़ा दोई अशुद्ध लेहई।”

¹² दंङ चेलाज़ि अंज़े दोबि कुह्तोर, “छि केई ञेंहना कि फरीसी मीहज़ी दीह बचन रेड्रीमी रंङ साते ठोकर खोकशातोर?”

¹³ दोई जुबाब रंदे कि, “दुह हर बुट अंऊ गिऊ स्वर्गीय पिता परमेश्वरे लगासी माह फोंह्षा योतो।

¹⁴ दोतिंङ इबी रांई; दोरे हंञारो अम कंड्रारे शुहरे अगर इच्च़ा काणे अई काणे बि अम कंड्रीता झुल्ला दह्चे इबि।”

¹⁵ दिह रेड्रीरंङ पतरसे दोबि कुहतो, “दिह कथा ञेंतिंङ समझाएतु।”

¹⁶ दोई कुहतो, “छि केरे धोंण अंजान तोतोंई आ?

¹⁷ केहच़ी ञेंहईयां कि छिल्ला आहरिंङ यवा दुह खोकटुंङ इबी दंङ फुको दोरच़ी धह्कते हखा हुंच़ा इबी।

¹⁸ पर छिल्ला अंङषी हुंज़ा, दुह सेहमरिंङ ज़ि हुंज़ा दोई मीह अशुद्ध लेह चरच़ि।

¹⁹ छना कुचे मदम विचार, हत्या ऊई मेच़मीऊ थल्जी लालच, कुकम, चोरी, हप्सी गवाही ए मांजी कुट्री सेहमंङ ज़ि ए हुंज़ी।

²⁰ दोच़ी मीह अशुद्ध लेह चरच़ि पर गुह्ट्र महची ए बगत ज़ेइमी मीह अशुद्ध मलेहई।”

कनानी जातिऊ मेच़मीऊ विशवास

²¹ यीशु गलील प्रदेशंङज़ि हुंज़ा सोर ए सीदोन प्रदेशंङ अच्च़ा इलि।

²² दंङ खांई दुह इलाका ज़ि इच्च़ा कनानी मेच़िमी हुंच़िरी, दंङ हाऊष रेह कुट्री लेहती; “हे प्रभु दाऊदो योह, गिऊ टोईच़ी दाह लोहऊ गिऊ मिओबि मांजी आत्मा महसे तंग लह्जी लेहकी तोह।”

²³ पर दोई दोबि छल्ले जुबाब माहरंड्री दंङ दोऊ चेलाज़ि अंज़े दोहरंङ बिनती लेह कुड़िर “दिह्बी इबी रंऊ; छना कुचे दीह हेंदु थले हाऊषेकपा अपि लेहकी तोह।”

²⁴ दोई जुबाब रंड्री, “कि इस्राएलो खानदानो योंहषी त्रैंई छोड़ेके गेह अतु ला कछंङ च़रसी माशुहगा।”

²⁵ पर दुह अति दंङ दोबि प्रणाम लेह कुट्री लेहती; “हे प्रभु, गिऊ साथी लोहऊ।”

²⁶ दोई जुबाब रेंई, “रोटी शिल्ज़े खुह्ई तु तुईज़ी केहट्री ठीक मशुहबी।

²⁷ दोई कुहतो, हेले कुट्रातन प्रभु, पर खुहई ज़ि ला दुह ज़ेई अंऊ दोतु मालिकातु मेजंङज़ि दह्पी।”

²⁸ दिरंङ यीशु ज़ि दोबि जुबाब रेंई, “हे मेच़िमी कांह विशवास मोह्ड़े तोह। छना केई जुन्ज़ातन कांह थल्जी ध्वांए शोतो” दंङ दोऊ मिओ दोहथर ठीक शुहचे इलि।

महस टेहषी दोतिंङ ठीक लहज़ी

²⁹ यीशु दोहर गलीलो झीलो कछंङ अंज़े गोह हखा इलजे दोहर बंङज़िरी।

³⁰ दंङ भीड़ो टोईच़ी भीड़ दोऊ कछंङ अति। दोच़ी एनातंङ साते लट्टे कणे झल्ले, टुंडेऐ ऊहई लाह मह्सेतिंङ दोऊ कछंङ ह्न्जे दोऊ कोंज़ारिंङ केह्चे केईरे, दंङ दोई दोरे भत्ते ठीक लहरी।

³¹ अपेहल मीहच़ी तंङातोर कि झल्लेचि कुट्रातोर टुंडेरे ठीक शुहतोर, लटटेरे जोज़ातोर काणे च़ि खमातोर ताह ठट् शुहचे इस्राएलो परमेश्वरो तारीफ लाहतेर।

पि हज़ार मीहतिंङ खिलाच़ी

³² यीशुज़ि एनोह चेला तिंङ बुलाके दोतंङ साते कुतोह, “गिह्बी दी भीड़ो टोईच़ी दाह अपा; छना कुचे दिहरे षुहमरक पुरे गेरंङ साते तोहई, दंङ दोतु कछंङ ज़ेइमी ला छले मद। गेह दोतिंङ योंए यह्च़ी माह जुंज़ातग अमरिंङ छ्चे केह्षा इलजी मेस।”

³³ चेलाज़ि दोबि कुह्तोर, “हेन्दिंङ दिह कणङ अंऊर च़ि धोंण रोटी खोकसोतो, कि दिहरे भत्ते मीहतिंङ कह्फी तरपोंई?”

³⁴ यीशुज़ि दोतिंङ रुहक्ती, “केहतु दोहर अंयों रोटी तोह?” दोच़ी कुतोह, “निहज़ी, फोआ कवचि माहच्चरे।”

³⁵ दंङ यीशुज़ि मीहतिंङ षोड़िंङ बंङज़िमी आज्ञा रेंहई।

³⁶ दंङ निज़ी रोटी ए मह्छ़ लेहपच़े धन्यवाद लेह खन्नी लोहआ एनोह चेला तु हखा रमाह लहरी दंङ चेलाज़ि मीहतु हखा।

³⁷ झांह लेह भत्ते ज़ेह ते कहशी इलि दंङ चेलाज़ि न्वाहषी निज़ी टोकरीरे बिंङे उठाएतिर।

³⁸ ज़ज़ाहरे मेच़िमी रे ए कटुरे छोड़के पी हज़ार गंङमीहरे तोईरे।

³⁹ दंङ दुह भीड़ यहचे थल किशतीऊ टोईच़ी बंङज़ा मगदन देशो कुंणीङ अंजा।