मत्ती 10 - लाहौली बाइबिल

यीशु सनी चेलारे

¹ दंङ यीशुज़ि एनोह सनी चेला तिंङ कछंङ बुलाके, दोतिंङ मीहतु दोरच़ी मांजी आत्मारे हुपिमी ए ऊई लाह पाहठी बीमारी ए कमज़ोरी ठीक लहज़िमी अधिकार रेह च़रति।

² दुह सनी प्रेरितातु मिन दिह तोहई; पहला शमौन, अतिंङ पतरस लाह कुट्री, दोऊ न्वा अन्द्रियास, जब्दीऊ योह याकूब ए यूहन्ना।

³ फिलिप्पुस ए बरतुलमे, थोमा ए चुंगी लेहपच़ा मत्ती, हलफई ऊ योह याकूब ए थद्देयास।

⁴ शमौन कनानी ए यहूदा इस्करियोति अच़ि यीशुबि च़ुमज़ि लहते।

सनी प्रेरिता तु सेवा कम

⁵ दिहरे सनी तिंङ यीशुज़ि दिह आज्ञा रेह चरच़तो, “ऊईजाति तु ए सामरी मीहतु नगरंङ था ईलांई।

⁶ पर इस्राएल देशो मीहतु कछंङ ईलांई अंऊ ञोंहषे त्रैंईतु ठ्रोह तोतोर।

⁷ दंङ ईलांई, दिह प्रचार लांई कि स्वर्गो राज पिचे अंजा।

⁸ नत्पारे ठीक लांई: सिए दोरे श्रींङमी लांई, कोढ़ीरे शुद्ध लांई, दंङ मांजी आत्मारे हुन्दुई, छना केतिङ मुफ्ता खोकसी तोह ध्वांए मुफ्ता रांई।

⁹ केनातु दोर माह ज़ंङ, माह रोपा, माह तांबा तांहई।

¹⁰ अमू थल्जी माह झोली, तांहई माह झुह्ट कुरतिरे, माह झुह्ट बूटरे, माह लठी तांहई, छना कुचे कम लहज़ाबि दोऊ बगत खोकसी जूंस।

¹¹ अंऊ ला नगरंङ ए इलाकारिंङ योंई ता पता लगाएतुंई कि अरी मीह जोगे तोह? अपेहल तचेक दुह नगरंङ ज़ि माह हुंजोंई, दोऊ दोरे बंङज़ुंई।

¹² तोंखा अंज़े दोपहल दोबि आशीष रांई।

¹³ अगर दुह घरबारो मीहरे रूठे शुईरेता केहतु आशीर्वाद दोतु कछंङ पीपोह्तो पर अगर दोरे दोऊ जोगे माह शुईरेता केहतु आशीर्वाद केहतु हखा यह्च़ा अपतो।

¹⁴ दंङ अच़िया केहतु गप्पा माह रेड्रोर ए केहतु इज्ज़त माह लोहर, दुह घरबारे ए नगरारिंङ हुंज़ा केनातु कोन्ज़ो धुह्‌ड़ ला ठुड़ेके कि च़रतुंई।

¹⁵ गेह केतिंङ हेले कुट्रातग न्याय ध्याड़ारिंङ दुह नगरो हालात सदोम ए अमोरा शहर महस दुखदायी शोतो।

अंजा खरे टेम

¹⁶ खंड्रूई गेह केतिंङ त्रैंईतु ठ्रोह शंखुतु बिचंङ चरच़ातग, झांह लेह ओमड्रो ठ्रोह चलाक ए कबूतरो ठ्रोह बुद्धिमान शुई।

¹⁷ केतिंङ खबरदार बंङज़ी जूंस; बैरीर केहतु खिलाप योर दोच़ी केहरे पंचायतंङ, कोर्टंङ च़ुमने शोर दंङ केतिंङ यहुदी सभा घरबारंङ तेंङे च़रपोर।

¹⁸ गिऊ बज़हज़ि मोह्ड़े-मोह्ड़े रज्ज़ा, हाकिमज़ि केहतु पुछताछ लोहर। केहच़ी ऊईजाति तु तुईज़ी गिऊ पाहठी गवाही रमोनी।

¹⁹ पर अपेहल दोच़ी केरे च़ुमने लोहर ता दिह चिंद थालांई कि ञेंहच़ी छना छि कुंई; छना कुचे केतिंङ छिल्ला कुट्रिमी शोतो दुह केतिंङ कंड्रे च़रपोर।

²⁰ छना कुंई साते ता कुट्रा दुह, केरे माह शुह दंङ पवित्र आत्मा शोतो।

²¹ मीहरे एनोह विशवासी न्वा रिंह्ङ तिंङ सच़िमी थल्जी विरोधितू गुहड़िंङ रेह च़रपोर, ध्वांए याह-बाहच़ि ला एनोह कटुतंङ साते लोहर। दंङ कटुरे एनोह याह-बाहतु बिरोधंङ शुहचे दोतिंङ सच़िमी थल्जी बैरीतु गुहड़िंङ रेह च़रपोर।

²² दंङ गिऊ टोहकठे विशवास लहज़िमी रंङ साते भत्ते मीहच़ी केतंङ साते बैर लोहर; पर अंऊ दुखो अनंत तचेक गिऊ टोहकठे पक्‍का विशवासरिंङ बंङज़ोतो, परमेश्वरे दुह बचाके च़रपोतो।

²³ अपेहल दोच़ी केरे इच्च़ा नगरारिंङ तंग लाहरिरे ऊई नगरारिंङ पोक्शे ईलांई। गेह केतंङ हेले कुट्रातग, केहरे अईता इस्राएलो भत्ते नगरंङ पिह्छी मशोंई, गेह मीहू योह वापिस अच़ा अपोग।

²⁴ चेला एनोह गुरु बे मोह्ड़े माह शुहबी, माह परगर एनोह मालिकाबे मोह्ड़े शुहबी।

²⁵ दिह झोबड़ी शोतो कि चेला एनोह गुरु बराबर शोतो, दंङ परगरो एनोह मालिको बराबर; अगर दोच़ी घरबारो घ्याता बि मांजी आत्माओ मुख्या, शेतान कुहषी ततोर, अगर दोच़ी गेह चुंङो मालिकारंङ साते मांजी व्यवहार लोहर दंङ दोबि लाह मांजी व्यवहार चुंङी टबरारंङ साते लाह लोहर।

अतंङ साते बेवोई?

²⁶ दिऊ थल्जी केहरे मीहतंङ था बेई; छना कुचे कि नयाय ध्याड़ारिंङ भत्ते धिर छिल्ला घटेकषी तोह दुह तुईज़ी अपतो, दंङ छिल्ला धिर ब्याके तोह दुह भत्तेतु तुईज़ी प्रगट शोतो।

²⁷ छि गेह केतिंङ हंञारारिंङ कुट्रातग दुह केहच़ी छंङीरिंङ कुंई; छि रेट्रे रेट्रातंई दुह लंङदिंङ इलजे कडूंई।

²⁸ अच़ि फुको घात लाह्तोर, पर आत्मो नुकसान लेह मरच़ि, दोतंङ साते थाबेंई पर परमेश्वरारंङ साते बेंईन अच्च़ी फुके आत्मा झुल्ला नरकंङ खत्म लेह तरच़ा।

²⁹ छि झुह्ट पेसारिंङ झुह्ट प्याहरे माह लंङसातोरा? तांला केहतु बाहऊ हिटी मेह दोतु बिचंङज़ि इच्च़ा ला धरतीऊ टोहकठे माह दह्पी।

³⁰ परमेश्वरे केहतु जहानो भत्ते धिरो पाहठी चिंद ला। देर तचेक कि दोई दिह ला ञेंहच़ा कि केहतु पुंज़ा अंयों क्राह तोह।

³¹ दिऊ थल्जी था बेंईन। केहरे परमेश्वरो थल्जी प्यारेबे बढ़के शुई।

यीशु बि स्वीकार ए अस्वीकार लहज़ी

³² अच्च़ी लाह मीहतु तुईज़ी कुट्रातोर कि दोरे गिऊ चेलार शुहर, दंङ गेह लाह दोबि घेंङौ स्वर्गीय बाहऊ तुईज़ी घेंङौ चेला मनेक्पोग।

³³ पर अच़ि मीहतु तुईज़ी गिऊ चेला शुबीरंङ साते इन्कार लोहतो, दंङ गेह लाह दोबि घेंङौ स्वर्गीय बाहऊ तुईज़ी घेंङौ चेला शुहबिमी दोरच़ी इन्कार लोहग।

यीशु अपिमी परिणाम

³⁴ दिह था सोचेक्तुंई कि गेह धरती रिंङ मीहतु बिचंङ मेल मिलाप लहज़िमी अंज़े शुगाह; गेह मीहतु बिचंङ मेल मिलाप लह्जी माशुहगा पर झगड़ा कराएच़िमी थल्जी अंज़े शुगाह।

³⁵ गेह ताह अंज़े शुगाह कि, मीहतिंङ दोतु पिता परमेश्वरे, मियोबि दोऊ याहऊ दोरच़ी दंङ बोह्ड़ीबि दोऊ युह्गो खिलाप लेह च़रपोग।

³⁶ मीहू बैरीर दोऊ एनोह घरबारो मीहरे शोर।

³⁷ अच़ि एनोह याह ए बाहबि गिहबे चंबे चेहच़ा, दुह गिऊ जोहगे माह शुह; दंङ अच़ि याह बि या मियोबि गिहबे महस दाह चेहच़ा दुह गिऊ चेला बणेक्पिमी जोगे माह।

³⁸ अरी गिऊ चेला शुहबिमी बजाए दुख सहन लहज़िमी ए सीमी लाह तेयार माह दुह गिऊ चेला बणेक्पिमी जोगे माह।

³⁹ छना कुचे अच़ि एनोह जहान दिह धरतीऊ टोईच़ी बचाएपोतो दोई दुह योहपतो; अच़ि गिऊ थल्जी एनोह जहान रमोतो दोई दुह खोकपोतो।

ईनाम

⁴⁰ अच़ि केरे ग्रहण लाह दोई गेह ग्रहण दंङ अच़िला गेह ग्रहण दोई परमेश्वरा बि अपनाच़ा।

⁴¹ अच़ि भविष्यकंड्रापी भविष्यकंड्रारे चेहके ग्रहण लाह, दोई भविष्यवक्तातु ठ्रोह ए ईनाम खोकपोतो; दंङ अच़ि धर्मी बि धर्मी चेहके ग्रहण लाह दोई धर्मी मीहू ठ्रोह ए ईनाम खोकपोतो।

⁴² अच़िला दिह कवचि दीतु बिचंङज़ि इच्च़ाबि ला गिऊ चेला चेहके दोबि सोई ती रमोतो, गेह केतंङ हेले कुट्रातग, परमेश्वर दोबि ईनाम ज़रुर रमोतो।”