मत्ती 1 - लाहौली बाइबिल

यीशु खानदान

¹ दिह यीशु मसीहू बाह-मेमेतु मिन्दु पाहठी अंऊ रज्ज़ा दाऊदो खानदानो तोहई दंङ रज्ज़ा दाऊद अब्राहमो खानदानो तोहई।

² अब्राहमो योह इसहाक, इसहाको योह याकूब, याकूबो योह यहूदा ए दोऊ न्वारे तोईरे।

³ यहूदा ए तमारो योह फिरिस ए जोरह, फिरिसो योह हिस्रोन, दंङ हिस्रोनो योह एराम तोहई।

⁴ एरामो योह अम्मीनादाब, अम्मीनादाबो योह नहशोन, दंङ नहशोनो योह सलमोन तोहई।

⁵ सलमोन ए राहाबो योह बोअज़, बोअज़ ए रुतो योह ओबेद, दंङ ओबेदो योह यिशै,

⁶ दंङ यिशैऊ योह रज्ज़ा दाऊद तोहई। दंङ दाऊदो योह सुलेमान अंऊ दुह मेच़मीऊ दोरच़ी जेह्कते अरी तुहई उरिय्याहो मेच़ा तोहई,

⁷ सुलेमानो योह रहबाम, रहबामो योह अबिय्याह, दंङ अबिय्याहो योह आसाफ तोहई।

⁸ आसाफ ओ योह यहोशाफात, यहोशापातो योह योराम, दंङ योरामो पोद्र उज्जियाह,

⁹ उज्जियाह योह योताम, योतामो योह अहाज, दंङ आहाजो योह हिजकिय्याह तोहई।

¹⁰ हिजकिय्याह ओ योह मनशिशह, मनशिशहो योह आमोन, दंङ आमोनो योह योशिय्याह;

¹¹ इस्राएली मीहतु बेबीलोन देशो कैदी शुहबिमी तुहई योशिय्याह, यकुन्याह ए दोऊ न्वातु मेमे बणेक्ति।

¹² कैदी शुहचे बेबीलोनो हखा शिल्ज़िमी थल यकुन्याहो दोरच़ी शालतिएल जेह्कते, दंङ शालतिएलो योह जरूब्बाबिल,

¹³ जरूब्बाबिलो योह अबीहुद, अबीहुदो योह इल्याकिम, दंङ इल्याकिमो योह अजोर तोहई।

¹⁴ अजोरो योह सदोक तोहई, सदोको योह अखीम, अखीमो योह एलीहुद,

¹⁵ एलीहुदो योह इलियाजार, इलियाजारो योह मत्तान, दंङ मत्तानो योह याकूब तोहई।

¹⁶ याकूबो योह यूसुफ, अंऊ मरियमो गगसा तोहई, दंङ मरियमो दोरच़ी यीशु जेह्कते अतिंङ मसीह ला कुट्रातोरे।

¹⁷ झांह ठ्रोह अब्राहमो दोरच़ी दाऊद तचेक सपि पीढ़ी शुहते, दंङ दाऊदो दोरच़ी बेबीलोन हखा कैदी शुहचे पिपिरङ साते सपि पीढ़ी, दंङ कैदी शुहचे बेबीलोनो हखा इबिमी मुक्का मसीह तचेक सपि पीढ़ी शुतेह।

यीशु ऊ जन्म

¹⁸ दिह भत्ते गप्पा यीशु जेहकपिमी तुहई शुई। यीशु मसीहू जन्म झांह ठ्रोह शुई, कि अपेहल दोऊ याह मरियमो मंगवाली यूसुफारंङ साते शुहत्ते, दंङ दोतु ब्याह शुहबीमें तुहई ए मरियम पवित्र आत्मो दोरच़ी खोकटुंङ शुहचे इलि।

¹⁹ दंङ दोऊ मंगेतर यूसुफ इच्च़ा धर्मी मीह तोहई, दंङ दोबि भत्तेतु तुईज़ी बदनाम लहज़ी मिन्ज़ाते, झांह लेह दोई ट्रेप्पा मरियमबि केह्चे केट्रिमी थल्जी सोचेक्ती। (छना कुचे दुह ब्याह बे तुईए खोकटुंङ तोहई अंऊ कानूनो खिलाप तोहई।)

²⁰ अपेहल दुह दिह गप्पो पाहठी सोचेकच़ी लेहकी तोहई, दंङ प्रभु स्वर्गदूते दोऊ मंङडुंङ अंज़े कुतेह, “हे रज्ज़ा दाऊदो खानदानो यूसुफ, काह मरियमरंङ साते ब्याह लहज़िमी थल्जी थाबेऊ, छना कुचे अरी दोऊ खोकटुंङ तोद, दुह पवित्र आत्मो सामर्थो दोरच़ी शुह।”

²¹ दोई योह जेह्फोतो दंङ केई दोऊ मिन यीशु केऊ, छना कुचे दोई एनोह मीहतु दोतु पापो दोरच़ी बचाएपोतो।

²² दिह भत्ते दिऊ थल्जी शुई कि अंऊ बचन प्रभुज़ि यशायाह भविष्यवक्ताओ दोरच़ी यीशु जेहकपिमी पाहठी कुतेह, दुह पूरा शोतो:

²³ “खंणुई, इच्च़ा ब्याह माह लहसी खोकटुंङ शोतो दंङ इच्च़ा गंङकटु जेह्पोतो, दंङ दोऊ मिन ‘इम्मानुएल’ शोतो अतु मतलब शुह, परमेश्वर हेन्दंङ साते तोह।”

²⁴ दंङ यूसुफ ईमरिंङ ज़ि चेहके प्रभु स्वर्गदूतो गप्पा मनेके दोई मरियमरंङ साते ब्याह लेह च़रति दंङ एनोह चुंङ रेंज़ा हति;

²⁵ अपेहल तचेक मरियमे योह माह जेह्कते दोपहल तचेक यूसुफो मरियमरंङ साते छले ब्याऊ संबध माह तोहई; यूसुफे कटु मिन यीशु केहते।