लूको 21 - लाहौली बाइबिल

कंगाल रंणीऊ दान

¹ अपेहल यीशु यहुदी मंदिरंङ तोहई, दोहपल दोई साहुकारातिंङ दानपात्रंङ दान केहट्री तंङातो।

² दंङ दोई इच्च़ा कंगाल गरीब रंणी मेच़िमी अति दंङ दोई दानपात्रो अंद्रेग त्रामो झुह्ट टंगा केहच़ी केहरी। (अतु लस महस थोड़े तोहई)

³ दंङ यीशु ज़ि कुंई, “गेह केतंङ साते हेले कुट्रातग दि रंणी मेच़िमी दिह भत्त्ते बे बढ़कर दान चड़ाएकतो।

⁴ छना कुचे भत्ते ज़ि एनोह महसे दोरच़ी थोड़े रंदोर दंङ दिह गरीब रंणी मेच़िमी एनोह भत्ते कमाई परमेश्वरो थल्जी रें चरच़तो।”

मंदिरो बिनाशो बारे भविष्यबाणी

⁵ रेह मीहरे यहुदी मंदिरो पाहठी कुट्री लेहकी तोईरे कि दिह छि ठ्रोह सलठे रघटे ए भेंटो चीज़र सज़ासी तोह, दंङ यीशु ज़ि कुहतो।

⁶ दुह ध्याड़ारे अपोर, “अपेहल दिह भत्ते अंऊ केहच़ी खंड्रातंई दोतु बिचंङज़ि देर रघटु टोईच़ी रघला माह केषोतो अंऊ माह ठ्रव्लषा योतो।”

मुसीबत ए क्लेश

⁷ चेलाज़ि यीशु हखा रुहकातोर, “हे गुरू दिह भत्ते अपेहल शोतो?” दंङ दिह गप्पारे पूरे शुहबिमी शुई ताह छि निशानी शोतो?

⁸ यीशु ज़ि कुहतो, “खबरदार तोहई कि केरे भरमासी मेस, महस मीहच़ी गिऊ अधिकारो दावा लहच़ी अपोर दंङ कोहर, गेह मसीह शुगाह, दंङ दोतु थले था ईलांई।

⁹ अपेहल केहच़ी लड़ाई, ए लड़ाई तु गप्पा थक्पोंई, दंङ था बेंईन, छना कुचे दिह शुहबी ज़रूरी शुह, दंङ दुह टेमा रिंङ संसारो अंत माह शोतो।”

¹⁰ “दंङ यीशु ज़ि कुंई, इच्च़ा जातिऊ मीहरे ऊई जातिऊ मीहतु खिलाप शोर दंङ इच्च़ा देश ऊई देशो खिलाप शोर,

¹¹ दंङ अकाल शोतो ए भुयंल अपोतो ए महामारी शोतो, दंङ सर्गंङच़ि भयानक गप्पारे ए निशानी तंङफोर।”

¹² पर दिह गप्पा बे तुहई दोच़ी गिऊ मिन्दु बजाहच़ि केतिंङ चुमोर, बरदो रमोर ए यहुदी सभा घरबारंङ रेंज़ा शोर, जेलंङ केओर, दंङ रज्ज़ातु ए हाकिमो तुईज़ी शोर।

¹³ पर दिह केहतु थल्जी गवाही रंड्रीमी मौका शोतो।

¹⁴ दिऊ थल्जी केहरे जुबाब रंड्रीमी थल्जी तुईबे केनातु सेहमरिंङ चिंद थालांई।

¹⁵ छना कुचे गेह केतिंङ झांह ठ्रोह गप्पा ए समझ रमोर कि केहतु भत्ते बैरीर केहतु सामना लेह मरपोर।

¹⁶ केहतु याह बाहरे, न्वारे, टबरारे ए साथिरे लाह केतिंङ च़ुमज़ि लोहर; देहर तचेक कि केहतु बिचंङज़ि रेहईतिंङ सच़ी लाह लोहर।

¹⁷ दंङ गिऊ टोहकठे विशवास लहज़िमी रंङ साते भत्ते मीहच़ी केतंङ साते बैर लोहर।

¹⁸ पर केहतु पुंज़ो इच्च़ा क्राह लाह हुंपी मरपोर।

¹⁹ “केन्दु ज़कसिमी बजाहज़ि केहच़ी केनातु जहानो बचाके तोहई।”

यरूशलेमो बिनाशो भविष्यबाणी

²⁰ “अपेहल केहच़ी यरूशलेम शहराबि सेनिकातु दोरच़ी घेरेकसी तंङमोन, दंङ ञेंहऐ केहई कि दोऊ अंत कछंङ तोह।”

²¹ दंङ अंऊ मीहरे यहुदा प्रदेशंङ तोर दोरे बचेक्पिमी थल्जी गोह टोहकठे अच़ा ईलांई; दंङ अरी यरूशलेम शहरो अंद्रेग तोतोंई धह्तेका हुंज़ा अतंई; दंङ अरी नगरारिंङ तोहतोंई दोरे दोहर था ईलांई।

²² छना कुचे दिहरे बदला लेहप्च़िमी झांह ठ्रोह ध्याड़ारे शोर, अपेहल पवित्र शास्त्रारिंङ च़ेहसी भत्ते गप्पारे पूरे शोर।

²³ दुह ध्याड़ारिंङ अंऊ खोकटुंङ शोतो दंङ अंऊ पानू रंड्रा शोतो, दोतु टोईच़ी धिक्कार! छना कुचे देशंङ मोह्ड़े झगड़ा शोतो दंङ दोतु टोईच़ी मोह्ड़े बरदो अपोतो।

²⁴ दोतिंङ तलवार रंङ साते सचे च़रपोर दंङ महसे देशो मीहतु बिचंङ केदीतु ठ्रोह छ़ुचे रेंज़ा शोर; अपेहल तचेक ऊई जातितु ध्याड़ा पूरे मशोतो, दोहपल तचेक यरूशलेम शहर ऊई जातितु दोरच़ी बर्बाद शोतो।

मीहू योहू यह्च़ा आगमन

²⁵ “एकेरिंङ ए लचंङरिंङ दंङ कर रिंङ निशानी तंङफोर; दंङ धरती रिंङ भत्ते जाति मीहतु टोईच़ी बरदो अपतो। छना कुचे दोरे समुंद्रो छ्वली ए तिऊ चालज़ि बेऐ योर।

²⁶ धरती रिंङ अंजा मुसीबतो पाहठी सोचेक्सा मीहतु सेहम बेवा योर। दंङ सर्गो मोह्ड़े शक्ति त्रुलज़ा योर।

²⁷ दंङ दोरे मीहरे गेह मीहू योह बि सामर्थ ए मोह्ड़े महिमारंङ बद्ड़ातु टोईच़ी अपि तंङमोर।

²⁸ अपेहल दिहरे गप्पारे शुहबी लेहपोर, दंङ हिम्मत रंङ साते खड़े शुहचे; अंजा मुसीबता बि रुमज़ा तोहई, छना कुचे केहतु छुटकारा कछंङ शोतो।”

अंजीरो बुटो उदाहरण

²⁹ यीशु ज़ि दोतंङ इच्च़ा कथा ला कुंई; “अंजीरो बुह्ट ए ऊई बुटाहरे खांई।

³⁰ अपेहल दुह बुटातिंङ कोपंले हुन्ज़ी, दंङ केतिंङ पता लेहकी इबि कि ष्रेल अपिमी तोह।

³¹ झांह अपेहल केहच़ी दी गप्पा रेह शुहबी खमोंई दंङ ञेंहई च़रतेंई कि परमेश्वरो राज कछंङ तोह।”

³² गेह केतंङ साते हेले कुट्रातग, अपेहल तचेक दिहरे गप्पा पूरा माह शोहर दोहथर तचेक दिह पीढ़ीऊ अंत बिल्कुल मशोतो।

³³ सर्ग ए धरती योह्सा योतो, दंङ गिऊ गप्पारे अपेहल योह्सोतो माह।

चेहकी बंङज़ु

³⁴ “दिऊ थल्जी खबरदार तोहई, झांह शुहबी माह जूंस कि केहतु सेहम मस्त ए मतवाला, दंङ दिह ज़िन्दगीऊ चिंदे सुस्त शुहचे योतो। दंङ दुह ध्याड़ा फन्दा ओ ठ्रोह अचानक केहतु तुईज़ी अपतो।

³⁵ छना कुचे दुह भत्ते धरती रिंङ बंङज़ातु टोईच़ी झांह ए ठ्रोह अच़ा अपतो।

³⁶ दिऊ थल्जी चेहके तोहई दंङ हमेशा प्रार्थना लोहवा लांई कि केरे दिह अंजा मुसीबतो दोरच़ी बचेक्पी गेह मीहू योहू तुईज़ी खड़े शुहबिमी जोहगे शुई।”

³⁷ दंङ यीशु नीरा यहुदी मंदिरंङ शिक्षा रंड्राते, रातारिंङ इलजे जैतून मिन्दु गोह रिंङ बंङज़ते;

³⁸ दंङ मुंजे सरके भत्ते मीहरेर दोबि रेड्रीमी थल्जी यहुदी मंदिरंङ दोऊ कछंङ अपा लाहतेर।