लूको 20 - लाहौली बाइबिल

यीशु अधिकारो टोईच़ी सवाल

¹ इच्च़ा ध्याड़ा अपेहल यीशु यहुदी मंदिरंङ मीहतिंङ शिक्षा ए रूठे खबर रंड्री लेहकी तोहई दंङ यहुदी शास्त्री, यहुदी मोह्ड़े पुरोहित, यहुदी सेंहणारंङ साते दोऊ कछंङ अतिरे।

² दंङ कुट्री लेहतिरे “ञेंतिंङ कंड्रु केई दिहरे कमाहरे छि अधिकारे लहतन, दंङ दुह अरी तोह अच़ि कनिंङ दिह अधिकार रांहषी ततो?”

³ यीशुज़ि दोतिंङ जुबाब रन्दो, “गेह ला केहतु दोरच़ी इच्च़ा सवाल रुहक्पोग; गीहबी कंड्रुंई।

⁴ यूहन्ना ओ बपतिस्मा अंऊच़ि तोहई? स्वर्गो दोरच़ी आ मीहतु दोहरची?”

⁵ दंङ दोरे एनातु बिचंङ शासी लेह्तिरे, “अगर हेंज़ी कुंणी सर्गो दोहरची, दंङ दोई कोतो, केहच़ी दोऊ विशवास दंङ छिले मलाहतेंई?

⁶ अगर ञेंहच़ी कुंई कि, मीहतु कुट्रिमीरंङ साते, दंङ भत्ते मीहच़ी हेन्दिंङ रघटे बहेक्पोर, छना कुचे दोच़ी हेले ञेंच़ातोर कि यूहन्ना भविष्यवक्ता तोहई।”

⁷ दिऊ थल्जी दोच़ी जुबाब रेंईर, “ञेंहच़ी माह ञेंहनी कि दुह अतु दोरच़ी तोहई।”

⁸ यीशु ज़ि जुबाब रेंहई, “गेह ला केतिंङ माह कमोग कि गेह दी कम अतु अधिकारंङ लहज़ातग।”

माजी किसान तु कथा

⁹ यीशु मीहतिंङ दिह कथा कुट्री लेहती; “इच्च़ा मीहे दाखो बगीचा लगाएती; दंङ ज़िमदारातिंङ दोऊ ठेका रें च़रति दंङ महस ध्याड़ो थल्जी परदेशंङ अच्च़ा इलि।

¹⁰ अपेहल दुह दाखो बगीचारिंङ फलो ध्याड़ा कछंङ पिचा दंङ दोई एनोह परगरा रे दोऊ फलो हिस्सा लेहप्च़िमी थल्जी ज़िमदारातु कछंङ च़रति, पर ज़िमदारा ज़ि दुह तेंङे स्ल्ज़े घुह्ड़ रंङ याहच़े च़रति।

¹¹ दंङ दुह मालिक ए यहचा अईसंङ परगरा बि दोतु कछंङ च़रति, दंङ दोच़ी दुला तेंङे दोऊ बेज़ती लेह सल्ज़े गुह्ट्र याहच़े च़रतिर।

¹² दंङ दोई तीसरा परगर च़रति, दंङ ज़िमदारा ज़ि दुह ला तेंङे हुंज़े च़रतिर।

¹³ दंङ दाखो बगीचा ओ मालिके कुहतो, गेह छि लोहग? गेह घेंङौ प्यारे योह च़रपोग, दोच़ी दोऊ ताह आदर लोहर।

¹⁴ दंङ ज़िमेदारज़ि योह खांऐ एनातु बिचंङ कुह्तोर दिए ता दिह ज़मीनो वारिस शुह। अतंई, हेंज़ी दी ला स्चे चरपोई, कि दिऊ हिस्सा हेंदु शोतो।

¹⁵ दंङ दोच़ी दुह दाखो बगीचारिंङ ज़ि हुंच़े सचे च़रतिर, झांह लेह दाखो बगीचो मालिके दोतंङ छि लोहतो?

¹⁶ दिहे कि दुह दाखो बगीचारिंङ अंज़े ज़िमदारातिंङ सच़ी च़रपोतो, दंङ बगीचारिंङ ऊईतिंङ घाह्ड़ीरिंङ रें च़रपोतो।” दिह रेड्रीरंङ, मीहच़ी कुहतो “परमेश्वरे झांह लेह माजूंस।”

¹⁷ यीशु ज़ि दोतु हखा खांऐ कुहतो, दंङ पवित्रशास्त्रा रिंङ दिह छि च़ेहसी तोह; अंऊ रघबि राजमिस्त्रीज़ि केह केहषी ताहरेर दुह ए कुंणीऊ रघ शुहचे इलि।

¹⁸ अरीला दिह रघटु टोईच़ी दपोतो, दुह छटछिट शोतो, दंङ अतु टोईच़ी दुह दपोतो, दुह पीह च़रपोतो।

कैसरा बि कर रंड्री

¹⁹ दोथरे यहुदी शास्त्री ज़ि ए यहुदी मोह्ड़े पुरोहित ज़ि दुह चुम्ज़ी लहज़ी तरेहर; छना कुचे दोरे सम्जेक्सा इलजी तोईरे कि दीह कथा दोई दोतु टोईच़ी कुह्ते, पर दोरे मीहतंङ साते बेवा इलिरे।

²⁰ दंङ दोरे यीशु हर इच्च़ा कमो टोईच़ी नज़र तातेर। दोच़ी दोऊ कछंङ एनोह खबरी च़रतिर कि दोरे धर्मो ढोंग लेह यीशु बि, दोऊ ए अंऊआ गप्पारिंङ फसाके दोबि हाकिमो गुहड़िंङ रें च़रपोर।

²¹ खबरी ज़ि यीशु बि रूहक्तोर, “हे गुरु, ञेंहच़ी ञेंच़ातंई, कि कह सच्चे शुनाह, दंङ अतु ला केई तरफदारी माह लहज़ातन; दंङ परमेश्वरो अम सच्चाई रंङ साते कंड्रातन।

²² दिऊ थल्जी दिह कंड्रु, छी ञेंहतिंङ रोम देश ओ महाराजा बि कर रंड्री हेंदु कानूनो हिसाबे रुठे शुह आ मश्‌त?”

²³ पर यीशुज़ि दोतु कपट खांई दोतंङ साते कुतोह,

²⁴ “इच्च़ा मुलतु टंगा गिऊ कछंङ हतांई, कि गेह दोबि खमोग।” दोच़ी हतिरेह, यीशुज़ि दोतंङ साते रुहक्ती, “दी छाप ए मिन अतु शुह?” दोच़ी जुबाब रेंहई, “महाराजा ओ।”

²⁵ दोई दोतंङ कुहतो, “दंङ छि महाराजाऊ तोह, दुह महाराजा बि रांई; दंङ छि परमेश्वरो तोह, दुह परमेश्वरा बि रांई।”

²⁶ दंङ यीशु ऊ दि गप्पा रेड्रा दुरेह महस हेरान शुहचे इलि। छना कुचे दोरे मीहतु तुईज़ी यीशु बि फसाके मरतिर।

यह्च़ा श्रींङी ए व्याह

²⁷ दंङ सदूकी मीहरेर अच़ि यच़ाह श्रींङमिमी टोहकठे बिशवास माह लहज़ातेर, यीशु कछंङ अंज़े दुह रुहक्च़ी लेहतिर, कुट्रातोर कि सिए दोहरचि षीङमी तोद ए माह, दोतु विचंङज़ि रेह च़ि दोऊ कछंङ अंज़े रुहकातोर,

²⁸ हे गुरु मूसाज़ि हेंदु थल्जी दिह च़ेहसी तोह; अगर अतुआ न्वा एनोह मेच़ा शुहचे ला कटु मेह सीऐ इलि ताह, दंङ दोऊ न्वा दोऊ मेच़ारंङ ब्याह लेह, एनोह न्वा थल्जी कटु पैदा लोहतो।

²⁹ झांह लेह निहज़ी न्वा तोईरे भत्ते बे मोह्ड़े न्वाज़ि ब्याह लहज़ी पर दुह कटु मेह सीए इलि।

³⁰ दंङ अई न्वाए दोई दुह मेच़मी रंङ साते ब्याह लहरी पर दुह ला कटु मेह सीए इलि।

³¹ ध्वांए अई ऊई (तिसरे) न्वाए ला लेही दंङ दुह ला सी इलि।

³² दंङ निंज़ो न्वाएज़ि दुह मेच़मी रंङ साते ब्याह लहरी दंङ दोरे भत्ते कटु मेह सी इलिर। दंङ भत्ते मुखंङ दुह थल दुह मेच़मी ला सीए इलि।

³³ दंङ हेंतेग केई कंड्रु अगर सीमी थल जीवन तोह ता, दुह मेच़मी दुह निज़ा न्वातु बिचंङ अतु मेच़ा शोतो? “छना कुंई साते ता दुह भत्ते तु मेच़ा तोहई।”

³⁴ यीशुज़ि दोतंङ कुहतो, “दिह जुगारिंङ ताह कटु ज़ि ब्याह लाहतोर।

³⁵ पर अंऊ दिऊ जोगे शोर कि सीमी दोरच़ी श्रींङी योहर, दोतु बिचंङ ब्याह माह शोतो।

³⁶ दोरे सिओर ला माह छना कुचे दोरे स्वर्गंङ स्वर्गदूतातु ठ्रोह शोर दंङ परमेश्वर ओ कटुरे शुहबिमी रंङ साते यच़ाह श्रींङे योर।

³⁷ पर दिह गप्पा कि सीए दोरे श्रींङमी, मूसाज़ि लाह छ्वाको कथारिंङ दिह कुहषी तहरे कि दुह प्रभु बि सेंहणा अब्राहमो परमेश्वर, इसहाको परमेश्वर, याकूबो परमेश्वर कुट्रा।

³⁸ परमेश्वर सीए दोतु माह शुह पर श्रीङीतु परमेश्वर शुह।”

³⁹ दंङ दिह रेड्रीरंङ यहुदी शास्त्रीतु बिचंङज़ि रेहज़ि कुईरे “हे गुरू केई ठीक कुहतन।”

⁴⁰ दंङ अतिंङ ला यच़ाह दुह रुहक्च़िमी हिम्मत माह शुई।

मसीह अतु योह शुह?

⁴¹ दंङ यीशु ज़ि दोरे रुहक्ती, “मसीह बि रज्ज़ा दाऊदो योह छिला कुट्रातोर?

⁴² रज्ज़ा दाऊद एनोह भजन संहितो कताबंङ कुट्रा; कि प्रभु ज़ि गिऊ प्रभु बि कुहतो,

⁴³ गिऊ सुचंङ हाच़ी बंङज़ु अपेहल तचेक कि गेह कांह बेरीतिंङ कांह कोंज़ो पोयंङ लेह माहकेग।

⁴⁴ रज्ज़ा दाऊदे ताह दोबि प्रभु कुट्रा; दंङ दुह दोऊ योह छना शुई?”

शास्त्री रंङ साते साबधान

⁴⁵ अपेहल भत्ते मीहरेर रेड्रातेर, दंङ यीशु एनोह चेला तिंङ कुंई,

⁴⁶ “यहुदी शास्त्रीतु विचार ए दोतु शिक्षारंङ साते खबरदार बंङज़ोंई। अंऊ लमेह-लमेह खमज़ेर लेच़ा जोज़ि रुठे चेहच़ातोर दंङ दोच़ी जूंस कि मीहच़ी बज़ारंङ दोतु इज्ज़त लोहर। दंङ यहुदी सभा घरबारंङ मोह्ड़े-मोह्ड़े ठहरि रिंङ दंङ धामंङ मोह्ड़े-मोह्ड़े रुठे ठाहरीरिंङ पेट्रातोर।

⁴⁷ दंङ दिहरे यहुदी शास्त्री मीहरे गरीब रंणीतु भत्ते टंगा-ढबाह, घरबार ज़े चरच़ातोर। दंङ मीहच़ी कंड्रिमी थल्जी महस टेम तचेक प्रार्थना लहज़ातोर। झांह ठ्रोह मीहतिंङ परमेश्वरे महस मोह्ड़े सज़ा रमतो।”