लूको 17 - लाहौली बाइबिल

ठोकरो कारण बणेक्ची

¹ दंङ यीशुज़ि एनोह चेला तिंङ कुहतो, “पाप लहज़िमी परीक्षा मीहतु तुईज़ी ज़रुर अपतो, पर धिक्कार दुह मीहू टोईच़ी अतु बजहच़ि परीक्षा अपा!

² पर अच़िला गिऊ टोहकठे विशवास लहज़ा चाहे दुह कवचि ए शोतो अरीला मीह दोबि पापो अमो दोरच़ी लेन्ज़ा दोऊ विशवासो दोरच़ी थलका लोहतो, झांह ठ्रोह मीहबी परमेश्वरो सज़ा खोकसिरी बे रुठे तोह कि दोऊ मुथूरिंङ घहटो रघ छ़ुचे दोबि समुन्द्र छांङे च़रतु छना कुचे परमेश्वर दोबि दिह्बे बेह्द अंज़े सज़ा रमतो।

³ खबरदार शुहचे तोहई; अगर कांह साथी न्वाज़ि पाप लहरी ता दुह रेह्ड्रु, दंङ अगर पछताप ता माफ लोहऊ।

⁴ अगर नीरा पूरे दोई निज़ फेरा पाप लहरी, दंङ निज़े फेरा कांह कछंङ अंज़े कुड़ी, गेह पछताएचातग, दंङ दोबि माफ लेह च़रतु।”

विशवास

⁵ दंङ प्रेरित ज़ि प्रभु यीशु हखा कुहतोर, “ञेंहतु विशवास बि ऊई ला पक्‍का लोहू।”

⁶ प्रभु यीशुज़ि कुहतो, “अगर केतिंङ राईऊ सोल्तु धोंण लाह विशवास शुहचंङ, दंङ केहच़ी दिह शहतूतो बुटाबि कुंईयां कि जड़ो दोरच़ी फोंड्रा समुंद्रंङ लेहके इला, दंङ दोई केहतु भाषे लाहयंङ।”

इच्च़ा दासो कर्तव्य

⁷ “पर अगर केहतु परगर रीहरिंङ कम लहज़ा छिता त्रेंईरे रवक्च़ा चुंखा अपतो, दंङ छि केहच़ी दोबि कोहन आ, युरनाह अंज़े बगत ज़ेई बंङज़ु?

⁸ माह पर दोई दिह कोहतो कि, गिऊ बगत तेयार लोहऊ, दंङ अपेहल तचेक गेह ज़ोओग ए तुंङमोग दोपहल तचेक गिऊ सेवा टहल लोहऊ; दोऊ थल केई लाह बगत ज़ेई च़रतु।

⁹ केहच़ी केनोह परगराबि दुह कमो थल्जी धन्यवाद माह लोहनी अंऊ कम केहच़ी दोबि लहज़िमी थल्जी कुहतेन।

¹⁰ ध्यांए अपेहल केहच़ी गिऊ हुकुम मनेक्च़ातंई, दंङ केहच़ी लाह दिह कोंहई कि ञेंहरे तारीफो जोगे माह शुई। ञेंहरे ता परगर शुई अच़ि एनोह फर्ज़ पुरा लहज़ातंई।”

कोढ़ टेची सा मीहतिंङ ठीक लहज़ी

¹¹ यीशु एनोह चेला तंङ साते यरूशलेम शहरो हखा इबि अच़ा इलि, दोहपल दोरे सामरिया ए गलील इलाको दोरच़ी इबि लेहतिर।

¹² छना ए दोरे इच्च़ा नगरा रिंङ पिचातेर दोर तिंङ थोड़े अरे ऊई तार दोतिंङ सा कोढ़ीरे दोहयातोर।

¹³ दोच़ी खड़े शुहचे जोहरे हाऊष रेह दोबि कुहतो, “हे यीशु, हे मालिक, ञेंहतु टोईच़ी दया लोहऊ।”

¹⁴ यीशु ज़ि दोतु हखा खांई कुहतो, “ईलांई केनाहतिंङ यहुदी मंदिरंङ यहुदी पुरोहिता तिंङ कंड्रुंई। दंङ इलदर-इलदरे दोतु कोढ़ ठीक शुहचे इलिर।”

¹⁵ दंङ दोतु बिचंङज़ि इच्च़ा दिह खांई कि गेह ठीक शुहचे इलदग, जोहरे हाऊष रें परमेश्वरो तारीफ लहज़ा यीशु कछंङ वापिस अच़ा अति।

¹⁶ दंङ दुह यीशु कोंज़ारिंङ दह्चे दोऊ धन्यवाद लहज़ी लेहती; दुह मीह सामरी तोहई।

¹⁷ दिरंङ यीशुज़ि दोऊ हखा कुंहई, “छि भत्ते साह ठीक माह शुहतोरा, दंङ ऊई दोरे अंऊर तोतोर?”

¹⁸ छि परमेश्वरो तारीफ लहज़िमी थल्जी इच्च़ा ए गैर यहुदी अंजा?

¹⁹ दंङ यीशु ज़ि दोऊ हखा कुंहई, “अह्च़ा इला छना कुचे केई बिशवास लहतन दिऊ थल्जी काह अईन शुहचे इलोन।”

परमेश्वरो राज्यो आगमन

²⁰ अपेहल फरीसी मीहज़ी यीशु हखा रुहकातोर कि, “परमेश्वरो राज अपेहल अपतो?” दंङ यीशु ज़ि दोतिंङ जुबाब रेंई, “परमेश्वर राज प्रगट रुपंङ माह अपि,

²¹ दंङ माह मीहज़ी दिह कोहर, कि खंणुई परमेश्वरो राज्य देर्तिंङ तोह, या दोरतिंङ तोह। छना कुचे परमेश्वरो राज्य केहतु बिचंङ तोह।”

²² दंङ यीशु ज़ि चेला तु हखा कुंहई, “दोरे ध्याड़ारे लाह अपोर, अंऊर केहच़ी गेह मीहू योहऊ ध्याड़ातु बिचंङज़ि इच्च़ा ध्याड़ा बि खंड्री जुंज़ातंई पर खंड्री मरपोंई।

²³ मीहच़ी केतिंङ कोहर, ‘खांई मसीह दोरतिंङ तोह!’ या ‘खांई देर्तिंङ तोत!’ पर केहरे अच़ा थाह ईलांई, माह दोतु थल ईलांई।”

²⁴ छना बिजली सर्गो इच्च़ा कुंणीरिंङ चमकेके सर्गो अई कुंणी तचेक छंङी लाह, ध्यांए गेह मीहू योह ला घेंङौ ध्याड़ारिंङ प्रगट शोहग।

²⁵ पर तुहई ज़रूरी तोह कि गेह महस दुख उठाएपोग, दंङ दिह जुगो मीहरेर गिह्बी तुच्छ ठेहराएपोर।

²⁶ छना हेनातु बाह-मेमे नूह ओ ध्याड़ारिंङ शुहते, ध्वांए गेह मीहू योहऊ ध्याड़ारिंङ ला शोतो।

²⁷ अंऊ ध्याड़ा तचेक नूह जहाज़ओ टोहकठे माह हुंच़िरी, दुह ध्याड़ा तचेक मीहरेर ज़ोआतेर ए तुंङमातेर, दंङ दोतु बिचंङ ब्याह ला शवातेर। दंङ तिऊ प्रलय अंज़े भत्तेधिर नाश लेह केह।

²⁸ दंङ ध्वांए हेंदु बाह-मेमे अंऊ सदोम शहरारिंङ बंङज़ाते लूत ओ ध्याड़ारिंङ शुहते, कि मीहरेर ज़ोआतेर तुंङमातेर दंङ लेन देन लहज़ातेर, बुटारे पोन्ड्रातेर ए घरबारे बणाट्रातेर;

²⁹ पर अपेहल लूत सदोम शहरंङ ज़ि हुंच़ाते, दुह ध्याड़ारिंङ मेह ए गन्धक सर्गंङज़ि अच़ा अति दंङ भत्ते मीहरेर अरी शहरंङ तोईरे नाश लेह च़रति,

³⁰ गेह मीहू योहऊ अचानक यच़ाह वापिस अपिमी ध्याड़ारिंङ लाह ध्यांए शोतो।

³¹ “दुह मुका अरी लंङदिंङ तोह दंङ दोऊ समान घरबारंङ तोंङ तोह, दुह दोबि हपिमी थल्जी थाह तकसुंई; ध्वांए अरी रीहरिंङ तोह दोरे थलका थाह याहच़ु।

³² ञेंहतु बाह-मेमे लूत ओ मेच़ो हिद तांहई कि दोरंङ साते छि शुहते।

³³ अच़िला, एनोह जहानो बचाएच़िमी ततो दोई दुह योह्च़े च़रपोतो, दंङ अच़िला दुह योहच़तो दोई दुह बचाएपोतो।”

³⁴ गेह केतंङ साते कुट्रातग, दुह रातारिंङ झुह्ट मीहरे इच्च़ा पलंगो टोहकठे शोर; इच्च़ाबि रेंज़ा शोहर अई दु केह्षा योतो।

³⁵ झुह्ट मेच़ामिकु इच्च़ा साते घट्ट पिहट्री शोहर, इच्च़ा रेंज़ा शोर ऊईतु केह्षा योतो।

³⁶ (झुह्ट मीहरे रीहरिंङ शोर, इच्च़ा रेंज़ा शोहर अई केह्षा योतो)

³⁷ दिह रेड्रीरंङ साते दोच़ी यीशु हखा रुहकातोर, “हे प्रभु दिह अंऊर शोतो? यीशु ज़ि दोतिंङ कुहतो, भत्तेति पता लेहकी योतो कि झांह अंऊर शोतो छना कि भत्ते गवाह रे ठ्रोहका शुबिमीरंङ साते पता लेहकी इबि कि लाश अंऊर तोह।”