यहूदा 1 - लाहौली बाइबिल

विशवासो थल्जी संघर्ष

¹ गेह, यहूदा, अंऊ यीशु मसीहू इच्च़ा सेवक ए याकूबो कवचि न्वा शुगाह, केतिंङ दि डाक चेहच़ातग, अंऊ दोतिंङ परमेश्वरे एनोह टोईच़ी विशवास लहज़िमी थल्जी बुलासी ततो। हेंदु परमेश्वर बाह केतंङ साते दाह लहज़ा दंङ केतिंङ यीशु मसीह रिंङ बचाके तहज़ा।

² गेह प्रार्थना लहज़ातग कि परमेश्वर केतिंङ दया, शांति ए दाह महसे रंङ खोकसा लोहतो।

हप्साड़ शिक्षक

³ हे गिऊ प्यारे साथी विशवासी रे, हालांकि गेह केतिंङ परमेश्वरो पाहठी छा चेहच़ातग, अंऊ दोरिंङ हेनर भत्तेर सहभागी तोतोंई गेह दि दबाब महसूस लहज़ातग कि केतिंङ उत्साहित लहज़िमी थल्जी च़ेओग कि हेले ओ शिक्षा ओ थल्जी संघर्ष लंहि। परमेश्वरे एनोह मीहतिंङ दि हेले इच्च़ा फेरा हमेशा ओ थल्जी रें चरच़तो अंऊ अपेहल ला माह लेहक्सतो।

⁴ गेह केतिंङ चेहच़ातग, छना कुचे रें मीहरे अंऊ यीशु मसीहू टोईच़ी विशवास लहज़िमी दिखावा लहज़ातोर, दोरे केहतु बिचंङ शामिल शुहचे इलोर। दोच़ी परमेश्वरो आदर माह लहज़ातोर दंङ दोच़ी गलत शिक्षा रंड्रातोर कि परमेश्वर एनोह मोह्ड़े दाह ओ दोरच़ी हेंदु पाप माफ लेह च़रच़ा, झांह लेह हेनर मदम जीवन श्रींङमातंई। दोच़ी यीशु मसीह बि ग्रहण माह लहज़ातोर, अंऊ हेंदु इच्च़ा मालिक ए हेंदु प्रभु तोह। महस तुहई, पवित्रशास्त्रे कुट्रा, “कि परमेश्वर झांह ठ्रोह मीहतिंङ सज़ा रमतो।”

⁵ हालांकि केरे भत्ते गप्पा इच्च़ा फेरा ञेंई चरच़ातंई, तांला गेह केतिंङ दि गप्पा हिद दिलाएच़ातग, कि परमेश्वरे इस्राएली तिंङ गुलामी दोरच़ी आज़ाद लहरी दंङ दोतिंङ मिस्त्र देशो धकतेखा हति, पर थले दोई दुह भत्ते तिंङ सचे च़रति, अंऊ दोच़ी सुनसान ठहरि दोऊ टोईच़ी भरोसा माह लहरिर।

⁶ हिद लंहि कि प्रभु ज़ि स्वर्गदूता तिंङ छना ठ्रोह सज़ा रांई, अंऊ दोच़ी एनोह ज़िम्मेवारी रूठे रंङ निभाएतिर माह, बल्कि दोच़ी एनोह ठहरि छोड़ेकी केहरी। प्रभु ज़ि दि स्वर्गदूता तिंङ हंयार ठहरि केहषी ततो, झांह ठ्रोह षंङणी रें छ़ुह्च़ी ततो अपि अच़िला थाक्शे मरपोतो, ताकि मोह्ड़े ध्याड़ा रिंङ दोतु अनंत जीवनो न्याय शुहबी तरपोतो।

⁷ दि इस्राएली मीहरे ए स्वर्गदूता ठ्रोह, दुह मीहतंङ ला हिद तंही अंऊ सदोम ए अमोरा शहरो ए दोतु कछंङ इलाकंङ बंङज़ातेर कि दोतंङ साते छि शुहते। दोरे मीहरे कुकम लहज़ाड़ शुहचे इलिर दंङ हर पाहठी ऊ कुकम दोतु अंदरेग अच़ा अति। झांह लेह परमेश्वरे दोतिंङ मेहू दोरच़ी नाश लेह च़रति। दोतंङ साते छि शुई दुह हप्सी शिक्षा रंड्रा दोतु थल्जी इच्च़ा चेतावनी बणेंके इलि कि दोतिंङ ला अनंत मेहरिंङ सज़ा रमोर।

⁸ ध्वांए ठ्रोह, दि अधर्मी मीहरे दावा लहज़ातोर कि परमेश्वरे दोतिंङ दर्शना रिंङ कंङातो कि दोरे एनोह हिसाबे श्रींङी एनोह फुक भ्रष्ट लेह तरपोर, दोतिंङ अपिला एनोह टोईच़ी अधिकार लहज़िमी ज़रूरत माह दंङ दोरे महिमामय स्वर्गदूता तु पाहठी मदम कुट्रातोर।

⁹ देर तचेक कि मुख्या स्वर्गदूत मीकाइले ला ध्वांए माह लहरी छना दि हप्सी शिक्षा रंड्रा दोच़ी लहज़ातोर। अपेहल शेताने मीकाईल स्वर्गदूता रंङ साते दि पाहठी झगड़ा लहरी कि दोतु बिचंङ अंऊ भविष्यवक्ता मूसा ओ फुक पथेक्च़िमी अधिकार तोह, तांला दोई शेतान रंङ साते मदम गप्पा माह कुई दंङ माह ए दोऊ टोईच़ी दोष लगाएती। बल्कि दोई सिर्फ धोंण ए कुई, “प्रभु कनिंङ रैहच़तो।”

¹⁰ पर दि मीहरे दुह गप्पातु खिलाप कुट्रातोर, अंऊ दोतिंङ दोरे माह समझेक्च़ातोर, दंङ अंऊ गप्पारे दोच़ी समझेक्च़ातोर। दंङ दुह गप्पा तिंङ मुर्खा तु लहज़ातोर, दंङ दि पापो कम लहज़िमी दोरच़ी दोरे एनाबि नाश लेह चरच़ातोर।

¹¹ दोतु टोईच़ी हाय! कि दोच़ी आदमो योह कैनो ठ्रोह मदम व्यवहार लहरिर, अच़ि एनोह न्वा सचे च़रति। दोच़ी जल्दबाज़ी रिंङ दुह ए गलती लहरिर अंऊ बिलामे ऊई मीहतिंङ पापो हखा शिल्ज़िमी मुक्का लहरी ताकि ढबाह खोक्शे तरपोतो। छना मूसा ओ खिलाप विरोध लहज़ा कोहर वंशो नाश शुहचे इलि, ध्वांए ठ्रोह दिरे मीहरे ला नाश शुहचे योर छना कुचे दोरे ला प्रभु खिलाप विद्रोह लहज़ातोर।

¹² छना समुंद्र ब्याके चटान नावो थल्जी खतरनाक शवाह ध्वांए ठ्रोह दिरे मीहरे केहतु संगति ए धामो थल्जी खतरनाक तोतोर। चाहे दोरे दि धामा रिंङ षेह्द अपिमी जोगे कम लहज़ातोर, पर दोरे एनोह षेह्द अपिमी जोगे कमो वहज़ा ज़ि छिल्ला बेह्द ए षेह्द महसूस माह लहज़ातोर। दोरे दुह पोहाल तु ठ्रोह तोतोर अंऊ सिर्फ एनोह देख-भाल लहज़ातोर; दोच़ी ऊईतु मदत माह लहज़ातोर। दोरे दुह डुह ठ्रोह तोतोर अंऊ दोबि लन्न ज़ि करची ज़मीनारिंङ संदाण मेह करचे रैंज़ा शिलज़ा। दोच़ी वाईदा महस लहज़ातोर, पर रंड्रातोर छल्ले माह। दोरे फसलो मुक्का ओ बुटो ठ्रोह तोतोर अतु टोईच़ी छल्ले फल माह‍ शवाह दंङ अंऊ दोतिंङ फोंज़े चरच़ि, मतलब दोरे पूरे तरीकरिङ सिए इलजी तोतोर।

¹³ छना समुंद्रो प्रचंड छ्वली झखंजी षुफ हुंच़ा, ध्वांए दिरे मीहरे षेह्द अपिमी जोगे कम लहज़ातोर। दोरे रेह करज़े तु ठ्रोह तोतोर अंऊ इच्च़ा ए अमरिंङ माह जोज़ातोर, दोच़ी ठीक अम माह खंड्रातोर। प्रभु दोतु थल्जी इच्च़ा ठहरि केट्रा अंऊ पूरे ठ्रोह हंयार तोह अंऊर दोतिंङ हमेशा ओ थल्जी बंङज़ी लेह्पोतो।

¹⁴ हनोके ला अंऊ आदम बे निह्ज पीढ़ी रिंङ जेह्की तोहई, दि मीहतु पाहठी भविष्य वाणी लहसी तते, कि “खंई, प्रभु पक्‍का रूपा रिंङ एनोह महसे पवित्र स्वर्गदूता तंङ साते अपतो,

¹⁵ भत्ते मीहतु न्याय लहज़िमी थल्जी, दुह भत्ते मदम कमो थल्जी दोतु टोईच़ी दोष लगाएच़िमी थल्जी अंऊ दोच़ी परमेश्वरो खिलाप लहसी तातोर, दंङ दुह भत्ते मदम गप्पो थल्जी अंऊ दोच़ी दोऊ खिलाप कुहषी तातोर।”

¹⁶ दिरे मीहरे हमेशा परमेश्वरो खिलाप कुट्रातोर दंङ ऊई मीहतु अंदरेग गलती पेट्रातोर। अंऊ दोतु सेहमे लहज़ी जुंज़ा। दोरे एनोह पाहठी घमण्डा रंङ साते दावा लहज़ातोर दंङ एनोह फायदा ओ थल्जी ऊई मीहतु चापलूसी लहज़ातोर।

¹⁷ पर हे गिऊ प्यारे साथी विशवासी रे, केहच़ी दुह गप्पा हिद तंही; अंऊ हेंदु प्रभु यीशु मसीहू प्रेरित महस तुहई कुहषी तातोर।

¹⁸ दोच़ी केहतु हखा कुट्रातेर, कि “अन्तिम ध्याड़ारिंङ, झांह ठ्रोह मीहरे शोर अंऊ प्रभु ए दोऊ मीहतु मज़ाक उड़ाएपोर। दिरे दुह मीहरे शुरे अंऊ दोतु ज़िंदगी रिंङ दोतु मदम कमो हिटीऊ वशारिङ तोह।”

¹⁹ दिरे ए दुह मीहरे शुहरे अंऊ केतिंङ इच्च़ा झुह्ट शुहबी माह रंड्रातोर। दोरे एनोह हिटी ओ हिसाबे व्यवहार लहज़ातोर, दंङ दोतिंङ पवित्र आत्मा माह।

²⁰ पर हे गिऊ प्यारे साथी विशवासी रे, केतिंङ इदि-अई दिऊ मदत लेह जूंशी तोह ताकि दुह पवित्र सच्चाई रिंङ अंऊ दोऊ टोईच़ी केहच़ी विशवास लहज़ातंई, इदि-अईदि बि बढाके तरपोंई। केतिंङ पवित्र आत्मो सामर्थो दोरच़ी मार्गदर्शन खोक्शे प्रार्थना लेह जूंशी तोह।

²¹ केनातु थल्जी परमेश्वरो दाह महसूस लोहवा लंहि। अपेहल कि केरे हेंदु प्रभु यीशु मसीहू दि उम्मीदा रंङ साते इंतज़ार लहज़ातंई कि केतिंङ अनंत जीवन खोकसोतो। दोई झांह पक्‍का ए लोहतो छना कुचे दोई केतंङ साते दाह लहज़ा।

²² दुह मीहतु थल्जी दया कंड्रेई, अंऊ दि गप्पो थल्जी अंजान तोतोर कि दोच़ी छि विशवास लहज़ातोर।

²³ रें ऊई मीहरे अंऊ दोच़ी केहच़ी ञेंहच़ातंई, दोरे नरको हखा यवातोर। दोतिंङ दुह अनंत मेहू दोरच़ी युरनाह बचाके च़रतुंई। दंङ ऊईतु थल्जी दया कंड्रेई पर खबरदार बंङज़ुंई, दोतु ठ्रोह पाप थालंही। देर तचेक कि दुह खमज़ेतंङ साते ला नफरत लंहि अंऊ दोर्तिंङ दोच़ी एनोह पापमय कमो दोरच़ी दाग लगाएकातेर।

परमेश्वरो स्तुति

^24-25 इच्च़ा परमेश्वर ए तोह अंऊ केतिंङ दह्पिमी दोरच़ी बचाएपोतो, दंङ केतिंङ निर्दोष ए खुश लोहतो, अपेहल दोई केतिंङ एनोह महिमा ओ थल्जी एनोह तुईज़ी खड़े लहज़ा। दोई हेंदिंङ हेंदु प्रभु यीशु मसीहू दोरच़ी बचाके चरच़तो। महिमा, गौरव, सामर्थ ए अधिकार टेमो शुरूआत बेहच़ी दोऊ तोईरे, हेंतेग ला दोऊ तोतोर, दंङ हमेशा ओ थल्जी दोऊ ए गुह्ट्र बंङज़ोर। अमीन।