यहून्नो 8 - लाहौली बाइबिल

कुकम लहज़ा मेच़िमी बि माफी

¹ यीशु जैतून मिन्दु गोऊ टोहकठे इलि।

² दंङ ऊईरग मुन्जे सरके दुह यहुदी मंदिरंङ इलि, दंङ महसे मीहरे दोऊ कछंङ अतिर; दुह षोड़िंङ बंङज़ा इलि दंङ दोतिंङ शिक्षा रंड्री लेहती।

³ अपेहल दुह कुट्री ए लेहकी तोहई कि यहुदी शास्त्री ए फरीसी मीहज़ी इच्च़ा मेच़िमी बि हतिर अरी कुकम लहज़ा च़ुमसते, दंङ दोच़ी दुह मेच़िमी बि भत्तेतु तुईज़ी खड़े लहरिर दंङ यीशु हखा कुंई,

⁴ “हे गुरु, दिह मेच़िमी कुकम लहचाते च़ुमसते।

⁵ मूसा ओ कानूने ञेंतिंङ आज्ञा रांहषी ततो कि झांह ठ्रोह मेच़िमी बि रघ द्रले केह सच़ी च़रतुंई; दंङ केई छि कुट्रातन कि ञेंहच़ी छि लेह जूंस?”

⁶ दोच़ी यीशु बि परखेक्च़िमी थल्जी दिह गप्पा कुईर कि दोऊ टोईच़ी दोष लगाएच़िमी थल्जी छा गप्पा खोक्पोर, पर यीशु षोड़िंङ ब्रेमज़े रंङ धरतीऊ टोईच़ी च़ेहसी लेहती।

⁷ अपेहल दोरे यीशु हखा घड़ी-घड़ी रुहक्च़ी लेहतिर, ता दोई खड़े शुहचे दोतु हखा कुंई, “केहतु बिचंङ च़ि अच़िआ अपेहला पाप लहसी माह दोई ए तुई दोबि रघ द्रले केहतो।”

⁸ दंङ यहचा ब्रेमज़े रंङ धरती रिंङ च़ेहच़ी लेहती।

⁹ पर दोरे दिह रेड्रीरंङ साते मोह्ड़े च़ि कवचि तचेक इच्च़ा-इच्च़ा लेह दिह ञेंह कि दोरे भत्ते पापी तोईरे दोरच़ी अच्च़ा इलिरे, दंङ यीशु इच्च़ा केह्षा इलि, दुह मेच़िमी रंङ साते अरी अईता तचेक दोर्तिंङ ए खड़े तोहई।

¹⁰ यीशु ज़ि खड़े शुहचे दुह मेच़िमी ऊ हखा कुंई, “हे न्वाशा, दोरे अंऊखा अच्च़ा इलिर? छि अच़िला कनिंङ सज़ा माह रेंईर आ?”

¹¹ दोई कुंई, “हे प्रभु अच़िला माह रेंईर।” यीशु ज़ि कुंई, “गेह ला कनिंङ सज़ा माह रमोग; दा चुंखा अच़ा इल दंङ दिहबे थल यह्च़ा पाप थालोहू।”

यीशु संसारो छंङी

¹² यहुदी मंदिरंङ एनोह शिक्षा यच़ाह शुरू लेह यीशु ज़ि मीहतु हखा कुंई, “गेह ए दिह संसारो छंङी शुगाह; अरीला गिऊ थले जोज़ा दुह अपेहला हंयारा रिंङ माह ज़ोतो, पर दुह छंङी बि खोक्पोतो अच़ि अनंत जीवन रंड्रा।”

¹³ फरीसी मीहज़ी दोऊ हखा कुईर; “केई केनोह गवाही केनाह ए रंड्रातन; कांह गवाही हेले माह शुह।”

¹⁴ यीशु ज़ि दोतिंङ जुबाब रेंई; “अगर गेह घेंङौ गवाही घेङे रड्रातग, तांला गिऊ गवाही ठीक शुह, छना कुचे गेह ञेंहगा कि गेह अंऊरच़ि अंज़े शुगाह दंङ अंऊखा योग? पर केहरे माह कि गेह अंऊरच़ि अंज़े शुगाह दंङ अंऊखा योग।

¹⁵ केहरे मीहतु हेसियतो हिसाबे दोतु न्याय लहज़ातन; गेह अतुला फेंसला माह लेही।

¹⁶ दंङ अगर गेह अतुआ न्याय लोहग ता गिऊ फेंसला सच्चे शोतो; छना कुचे गेह इच्च़ा माह शुगाह पर गेह पिता परमेश्वरारंङ साते तोतोग, अच़ि गेह च़रसी शुगाह।

¹⁷ दंङ मूसा ओ कानूना ला च़ेहसी तोह; कि झुह्ट मीहतु गवाही शुई ता ठीक शुहबी।

¹⁸ इच्च़ा गवाह ता गेह शुगाह, अच़ि ऐनाह ए घेंङौ पाहठी गवाही रंड्री लेहकी तोतग दंङ गिऊ पाहठी अई गवाह, गिह्बी च़रच़ा पिता परमेश्वर तोह।”

¹⁹ दोथल दोच़ी यीशु रुहक्ती, “कांह पिता परमेश्वर अंऊर तोह?” यीशु ज़ि जुबाब रेंई, “माह केहरे गिह्बी ञेंहच़ातोन माह गिऊ पिता परमेश्वर बि, अगर केहच़ी गिह्बी सेहशङ, ता पिता परमेश्वर बि सेहच़ी तोहई।”

²⁰ दिह गप्पारे यीशु ज़ि यहुदी मंदिरो ल्वाड़िंङ शिक्षा रंड्रा मुक्का भंडार घरबारंङ कुहते, दंङ अच़िला दुह माह च़ुमनिर; छना कुचे दोऊ दुख उठाएच़िमी ए सीमी टेम अंज़े माह तोहई।

एनोह पाहठी यीशु ऊई कथन

²¹ यीशु ज़ि यच़ाह दोतु हखा कुंई, “गेह अच़ा योग दोऊ थल केहरे गिह्बी पेट्री अपोंई दंङ केहरे केनातु पापो माफी मेह ए सीए योंहन; अंऊर गेह य्वातग केहरे दोर्तिंङ अपि मरपोंई।”

²² दिरंङ यहुदी सेंहणा ज़ि कुंई, “छि दोई एनाबि सचे च़रपोतो आ, अच़ि कुट्रा, ‘कि अंऊर गेह योग दोर्तिंङ केहरे अपि मरपोंन?’ ”

²³ यीशु ज़ि दोतंङ साते कुंई, “केहरे दिह संसारा रिंङ जेह्की शुई पर गेह स्वर्गंङ च़ि अंज़े शुगाह; केहरे संसारो शुई गेह संसारो माह शुगाह।

²⁴ दिऊ थल्जी गेह केतंङ साते कुहतेग, केहरे सीओन।”

²⁵ यहुदी सेंहणा ज़ि दोऊ हखा कुंई, “कांह अरी शुनाह?” यीशु ज़ि दोतु हखा कुंई, “अपेहल बे गेह शिक्षा रंड्री शुरू लहसी तातग, गेह दुह ए शुगाह अंऊ गेह केहतु हखा शुरूआत बेहच़ी कुट्रा लहज़ातोग।

²⁶ गिह्बी केहतु न्याय लहज़िमी थल्जी महसे धिर कुट्रिमी तोह, पर गिह्बी च़रच़ा दुह सच्चा शुह, दंङ छिला धिर गेह दोऊ दोरच़ी रेड्रातग, दुहए गेह संसारो मीहतिंङ कुट्रातग।”

²⁷ दोरे अईता तचेक माह समझेक्तिर कि यीशु पिता परमेश्वरो पाहठी गप्पा लहज़ी लेहकी तोह।

²⁸ दोथर यीशु ज़ि कुंई, “अपेहल केहरे गेह मीहू योह बि रंगीरिंङ चढ़ाएपोंई, दंङ केतिंङ पता लेहकी योतो कि गेह दुह ए शुगाह, दंङ गेह घेंङौ दोरच़ी छले माह लहज़ातग, गेह दुहए कुट्रातग अंऊ पिता परमेश्वरे गिह्बी सिखाएच़ा।

²⁹ दंङ गिह्बी च़रच़ा गेरंङ साते तोह; दोई गेह इच्च़ा माकेऊ छना कुचे गेह हमेशा दुहए कम लहज़ातग, अंऊच़ि दुह खुश शवाह।”

³⁰ महसे मीह ज़ि अंऊ दोच़ी यीशु बि दिह गप्पारे कुट्री थाशातेर, दोऊ टोहकठे विशवास लहरिर।

सच्चाई केतिंङ आज़ाद लोहतो

³¹ दंङ यीशु ज़ि दोरे यहुदी मीहतु हखा अच़ि यीशु ऊ टोहकठे विशवास लहतेर, कुंई, “अगर केहरे गिऊ शिक्षा रेड्राते दुह मनेक्च़ातन, ता हेले केहरे गिऊ चेलार शोन।

³² केहरे सच्चाई ञेंहपोन दंङ सच्चाई केतिंङ आज़ाद लोहतो।”

³³ दोच़ी यीशु बि जुबाब रेंईर, “ञेंहरे ता अब्राहमो खानदानो शुई, दंङ अतुला गुलाम माह शुई दंङ केई छिला कुट्रातन कि केहरे आज़ाद शुहचे योंई?”

³⁴ यीशु ज़ि दोतिंङ जुबाब रेंई, “गेह केतंङ साते हेले कुट्रातग कि अच़िला पाप लाह दुह पापो गुलाम शुह।

³⁵ दंङ गुलाम हमेशा चुंङ माह बंङज़ी, योह हमेशा बंङज़ी।

³⁶ अगर गेह परमेश्वरो योह केतिंङ आज़ाद लोहग ता केहरे हेले ए आज़ाद शुहचे योंई।

³⁷ गेह ञेंहगा कि केहरे अब्राहमो खानदानो शुई; तांला केहच़ी गिऊ शिक्षा माह मनेक्पोन, दिऊ थल्जी केहरे गिह्बी सच़िमी तातंई।

³⁸ गेह केतंङ दोरे गप्पा कुट्रातग अंऊ गेह खांहषी तातग, अपेहल गेह घेंङौ बाह रंङ साते तोईग दंङ केहच़ी दुह लहज़ातंई अंऊ केहच़ी बाह ऊ दोरच़ी रेड्री तातंई।”

³⁹ दोच़ी यीशु बि जुबाब रेंईर, “ञेंहतु बाह मेमे ता अब्राहम शुह।” यीशु ज़ि दोतंङ साते कुंई, “अगर केहरे अब्राहमो खानदानो शुहचंङ ता, अब्राहमो ठ्रोह कम लंहीयां।

⁴⁰ पर दा केहरे गिह्बी सच़िमी तातंई छना कुचे गेह केतिंङ दुह सच्चाई कंङातग अंऊ गेह परमेश्वरो दोरच़ी थाशातेग, झांह ठ्रोह ता अब्राहमे ला माह लहते।

⁴¹ केहरे केनातु बाहो ठ्रोह कम लहज़ातन।” दोच़ी दोबि कुईर, “ञेंहरे कुकमो दोरच़ी जेह्के माह शुई, ञेंहतु सिर्फ इच्च़ा ए बाह तोह दंङ दुह परमेश्वर शुह।”

⁴² यीशु ज़ि दोतंङ साते कुंई, “अगर परमेश्वर केहतु बाह शुहचंङ ता केहच़ी गेरंङ साते दाह लंहीयां; छना कुचे गेह परमेश्वरो दोरच़ी अंज़े शुगाह; गेह घेंङा ए अंज़े माह शुगाह, पर दोइए च़रसी शुगाह।

⁴³ अंऊ गेह कुट्रातग केहच़ी छिले माह समझेक्च़ातंई? झांह लेह कि केहरे गिऊ शिक्षा माह मनेक्च़ातंई दंङ केहच़ी सहन लाह लहज़ी मरपातंई।

⁴⁴ केहरे केनातु बाह शेतानो दोरच़ी शुईं, दंङ केनातु बाहो हिटी लेह तातंई। दुह त तुहई बे हत्त्यारा शुह दंङ सच्चाई टोहकठे चसा मरति, छना कुचे सच्चाई दोऊ अन्द्रेग माह; अपेहल दोई हप्सी कुट्रा ता एनोह चाल चलनो हिसाबे कुट्रा; छना कुचे दुह हप्साड़ शुह दंङ हप्सिऊ बाह शुह।

⁴⁵ पर गेह हेले कुट्रातग, दिऊ थल्जी केहरे गिऊ टोहकठे विशवास माह लहज़ातंई।

⁴⁶ केहतु बिचंङ च़ि अरी गिऊ टोहकठे पाप लहज़िमी अरोप लगाएच़ा? दंङ अगर गेह हेले कुट्रातग, ता केहच़ी गिऊ टोहकठे विशवास माह लहज़ातन।

⁴⁷ अरीला परमेश्वरारंङ साते नाता तहच़ा, दोई परमेश्वरो गप्पारे रेड्री; दंङ केहरे दिऊ थल्जी माह रेड्रातोन छना कुचे केहरे परमेश्वरारंङ साते नाता माह तहच़ातोर।”

यीशु अब्राहम

⁴⁸ दिह रेड्रीरंङ साते यहुदी मीह ज़ि यीशु रंङ साते कुंई, “ञेंहरे दिह ठीक कुट्रातेन कि कांह सामरी शुनाह, कांह अंद्रेग मांजी आत्मा तोह?”

⁴⁹ यीशु ज़ि जुबाब रेंई, “गिऊ अंद्रेग मांजी आत्मा माह; पर गेह घेंङौ पिता परमेश्वरो आदर लोहवातग दंङ केहरे गिऊ निरादर लोहवातन।

⁵⁰ पर गेह घेंङौ तारीफ माह जुंज़ातग। पर इच्च़ा तोह अच़ि जुंज़ा कि गिऊ तारीफ शुबी जूंस, दंङ दुह, दुहए शुह अच़ि न्याय ला लाह।

⁵¹ गेह केतंङ हेले कुट्रातग, कि अगर अच़िया मीहे गिऊ शिक्षा मनेकपोतो ता दुह अनंत काल तचेक माह सीओतो।”

⁵² यहुदी सेंहणा ज़ि यीशु हखा कुईर, “दा ञेंहच़ी ञेंह केहतन कि कांह अंद्रेग मांजी आत्मा तोह; अब्राहम सीए इलजी तोह, दंङ भविष्यवक्तार ला सीए इलजी तोतोर; दंङ केई कुट्रातन कि ‘अगर अच़िया गिऊ शिक्षा मनेकपोतो ता दुह अनंत काल तचेक माह सीओतो।’

⁵³ ञेंहतु बाह मेमे अब्राहम ता सीए इलजी तोह, छि कांह दोबि ला मोह्ड़े शुनाह? दंङ भविष्यवक्तार ला सीए इलजी तोतोर, केई केनाबि छि चेहच़ातन?”

⁵⁴ यीशु ज़ि जुबाब रेंई, “अगर गेह घेहें घेंङौ तारीफ लोहग ता गिऊ तारीफ छले माह शुह, पर अच़ि गिऊ तारीफ लहज़ा दुह गिऊ पिता परमेश्वर शुह, दंङ केहच़ी कुट्रातन कि दुह केहतु परमेश्वर शुह।

⁵⁵ दंङ केहच़ी ता दुह माह ञेंहनी; पर गेह दोबि सेहका; अगर गेह दीह कोहग कि गेह दोबि माह सेहका, ता गेह केहतु ठ्रोह हप्साड़ शुहचे योग; पर गेह दोबि सेहका दंङ दोऊ आज्ञा मनेक्च़ातेग।

⁵⁶ केहतु बाह मेमे अब्राहम गिऊ ध्याड़ा खंड्रिमी थल्जी मगन तोहई; दंङ दोई तंङतो दंङ खुश शुई।”

⁵⁷ यहुदी मीहज़ी यीशु ऊ हखा कुंई, “कांह उम्र ता निंज़ो सा सालो लाह माह, तांला केई अब्राहम तंङातेना?”

⁵⁸ यीशु ज़ि दोतंङ साते कुंई, “गेह केतंङ साते हेले कुट्रातग कि गेह अब्राहमो जेहकपिमी बे तुहई शुगाह।”

⁵⁹ दिह गप्पारे रेड्रा दोच़ी यीशु बि सच़िमी थल्जी रघ उठाएतिर, पर यीशु ट्रेपा यहुदी मंदिरंङ च़ि हुंच़ा इलि।