यहून्नो 4 - लाहौली बाइबिल

यीशु ए सामरी मेच़मी

¹ अपेहल यीशु मसीह बि दिह पता लेहती कि फरीसी मीह ज़ि थशातोर कि यीशु यूहन्ना बे महस चेलारे बणाएठ्रा दंङ दोतिंङ बपतिस्मा रंड्रा।

² पर यीशु ऐनाह ता माह पर दोऊ चेलारे मीहतिंङ बपतिस्मा रंड्रा तोईरे।

³ दंङ यीशु यहुदिया प्रदेश केट्रा गलील प्रदेशो हखा अच़ा इलि,

⁴ दंङ दोबि सामरिया प्रदेशो दोरच़ी इबी ज़रूरी तोहई, छना कुचे परमेश्वरे ला दिहे जुंज़ाते।

⁵ दंङ दुह सामरिया राज्यो सुखार शहरंङ अति, अंऊ दुह ज़मीनो कछंङ तोह अतिंङ याकूब ए एनोह योह यूसुफाबि रांहषी तरे;

⁶ दंङ याकूबे अंऊ कुंआ ख्रलजते दुह अईता ला दोर्तिंङ ए तोहई। यीशु अमरिंङ जोज़ा-जोज़ा छ्चे दुह कुंओं कछंङ ए बंङज़ा इलि! दी गप्पा नीरो टेमारिंङ शुई।

⁷ धोंणरिंङ इच्च़ा सामरी मेच़िमी ती पिंङड्री अति। यीशु ज़ि दोबि कुंई, “गिह्बी ती रोंऊ।”

⁸ छना कुचे दोऊ चेलारे नगरंङ बगत हपि इल्जी तोईरे।

⁹ दुह सामरी मेच़िमी ज़ि यीशु हखा कुंई, कांह इच्च़ा यहुदी शुनाह, दंङ गेह इच्च़ा सामरी मेच़िमी शुगाह। “केई गिऊ दोरच़ी ती छिले पेट्रातन? छना कुचे यहुदी मीह ज़ि सामरी मीहतंङ साते छले नाता माह तहच़ि।”

¹⁰ यीशु ज़ि दोबि जुबाब रेंई, “केई माह ञेंहच़ातन कि परमेश्वरे कनिंङ छि रंड्री ततो, दंङ केई माह ञेंहच़ातन कि अरी कांह दोरच़ी ती पेट्री लेहकी तोह। अगर कनिंङ पता शुंईयां ता केई गिऊ दोरच़ी दिह पेट्री तोहई दंङ गेह कनिंङ जीवनो ती रेंईयां अच़ि जीवन रंड्री।”

¹¹ मेच़िमी ज़ि दोरंङ साते कुंई, “कांह कछंङ ती पिंङड्रीमी थल्जी ता छले माह, दंङ कुंआ महस ढूहगे तोह: दंङ दुह जीवनो ती कांह कछंङ अंऊरच़ि अंजा?

¹² छि कांह ञेंहतु बाह-मेमे याकूबा बे मोह्ड़े शुनाह, अच़ि दीह कुंआ ञेंतिंङ रेंई; दंङ दोई ऐनाह ए कटु रंङ साते ए घ्वांण रंङ साते देरच़ी तुंङरी?”

¹³ यीशु ज़ि दोबि जुबाब रेंई, “अच़िला दी तिऊ दोरच़ी तुंङमतो दोबि तीस्कर अपतो।

¹⁴ पर अच़िला दुह तिऊ दोरच़ी तुंङमतो अंऊ गेह दोबि रामोग, दंङ दोबि अनंत जीवन तचेक तीस्कर माह अपतो; अंऊ ती गेह दोबि रामोग, दोऊ अंद्रेग दुह तिऊ मुर्ति शुहचे योतो अरी अनंत जीवन तचेक बहेक्एपोतो।”

¹⁵ मेच़िमी ज़ि यीशु हखा कुंई, “हे प्रभु, दुह ती गिह्बी रोंऊ कि गिह्बी अपेहल ला तीस्कर माह अपतो दंङ माह गेह धोंण ओईतार ती पिंङड्रीमी थल्जी अपोग।”

¹⁶ यीशु ज़ि दोबि कुंई, “इला, केनोह गगसा बि देहर बुलाके हता।”

¹⁷ मेच़िमी ज़ि यीशु बि जुबाब रेंई, “गेह गगसा मेह शुगाह।” यीशु ज़ि दोबि कुंई, “केई ठीक कुट्रातन, ‘कि गेह गगसा मेह शुगाह।’

¹⁸ छना कुचे केई ङा गगसा लेह चरच़ातन, दंङ दुह मीह अतु कछंङ कांह दी मुका तोतोन दुह ला कांह गगसा माह शुह; दी केई हेले कुहतन।”

¹⁹ मेच़िमी ज़ि यीशु हखा कुंई, हे प्रभु, “गीहबी च़ेहसा कि कांह भविष्यवक्ता शुनाह।

²⁰ गिऊ सामरी बाह-मेमेर दिहे गोहू टोहकठे परमेश्वरो अराधना लहज़ातेर, दंङ केहरे यहुदी मीहज़ी कुट्रातंई कि अंऊर भजन लेही जूंशी तोह दुह ठहरि यरूशलेम शहरा रिंङ तोह।”

²¹ यीशु ज़ि दोबि कुंई, “हे न्वाशा, गिऊ गप्पो टोहकठे विशवास लोहू कि दुह टेम अपि लेहकी तोह कि केहरे माह दी गोऊ टोहकठे बाहो अराधना लोहन, माह यरूशलेम शहरा रिंङ।

²² केहरे सामरी मीहरे अच़ि माञेंहच़ातन दोऊ अराधना लहज़ातन; दंङ ञेंहरे यहुदी मीहरे अपि दोऊ भजन लहज़ातंई; छना कुचे उद्धार यहूदीतु बिचंङ च़ि तोह।

²³ पर दुह टेम अपि लेहकी तोह पर अच़ा ए अंज़े तोह, अपेहल सच्चा भक्त रे पिता परमेश्वरो अराधना आत्मा ए सच्चाई रंङ साते लोहर, छना कुचे बाह एनोह थल्जी ध्यांए ठ्रोह भक्ता तिंङ पेट्रा।

²⁴ परमेश्वर आत्मा शुह, दिऊ थल्जी ज़रूरी तोह कि दोऊ अराधना लहज़ार आत्मा ए सच्चाई रंङ साते अराधना लोहर।”

²⁵ मेच़िमी ज़ि दोबि कुंई, “गेह ञेंहच़ातग कि मसीह अंऊ परमेश्वरो दोरच़ी अभिषेक तोह, अपिमी तोह; अपेहल दुह अपतो ता ञेंतिंङ भत्ते गप्पा कंज़े च़रपोतो।”

²⁶ यीशु ज़ि दोबि कुंई, “गेह अरी करंङ साते कुट्री लेहकी तोतोग, दुह ए शुगाह।”

चेला तु वापसी

²⁷ दुहए घड़ी दोऊ चेलारे अतिरे, दंङ हेरान शुहचे इलिर कि यीशु दुह मेच़िमी रंङ साते गप्पा लहज़ी लेहकी तोह; तांला अच़िला माह रुक्तिरे, “कांह छि पेट्रातन? या छिले दोरंङ साते गप्पा लहज़ातन?”

²⁸ दंङ दुह मेच़िमी एनोह घड़ा केट्रे नगरो हखा अच़ा इलि, दंङ मीहतु हखा कुट्री लेहती,

²⁹ अतंई, इच्च़ा मीह बि खंणुई, अरी भत्ते धिर अंऊ गेह लहतेग गिह्बी कंज़े च़रति। छि दीह ए ता मसीह माह शुह आ?

³⁰ दंङ दोरे नगरंङ च़ि हुंच़ा यीशु बि खंड्रिमी थल्जी दोऊ कछंङ अपि लेहतिर।

³¹ दीह बिचंङ दोऊ चेलार यीशु रंङ साते दीह बिनती लहज़ी लेहतिर, “हे गुरु, छा छी ज़ेह च़रतु।”

³² पर यीशु ज़ि दोतंङ साते कुंई, “गिऊ कछंङ ज़ेइमी थल्जी झांह ठ्रोह बगत तोह केहच़ी दुह माह ञेंहनी।”

³³ दंङ चेलाज़ि एनातु बिचङ कुंई, “छि अच़िया दोऊ थल्जी छा ज़ेइमी थल्जी हदंई आ?

³⁴ यीशु ज़ि दोतंङ साते कुंई, गिऊ बगत दुह परमेश्वरो हिटी ओ भाषे लहज़ी शुह अच़ि गेह च़रसी शुह, दंङ दुह कम पुरा लहज़िमी तोह अंऊ दोई गिह्बी रांहषी ततो।

³⁵ छि केहच़ी माह क्वातंई आ, वलज़िमी थल्जी अईता ला पी लाह तोह? खंणुई, गेह केतंङ साते कुट्रातग, केनातु टीरार अल्ज़ंई दंङ अंजा मीहतु हखा खांई। दोरे इच्च़ा रिहू फसलो ठ्रोह तोतोर अरी वलज़िमी थल्जी तेयार तोह।

³⁶ तुहई ए वल्ज़ा दोरे कम लहज़ी लेहकी तोतोर, दंङ एनातु ध्याड़ी खोक्शातोर। दंङ दोरे दिह शुहर, दोरे दुह मीहतिंङ ठ्रोहका लहज़ी लेहकी तोतोर अच़ि अनंत जीवन खोक्पोर।

³⁷ छना कुचे दिऊ टोहकठे दिह कहावत ठीक बंङज़ोतो; ‘ऐच़ा ऊई तोह दंङ वल्ज़ा ऊई।’

³⁸ गेह केतिंङ दुह रीह वलज़िमी थल्जी चरच़ातग, अतु टोईच़ी केहच़ी मेहनत माह लहतन; ऊई दोच़ी मेहनत लहसी शुह दंङ केहच़ी दुह फसल ठ्रोहका लोहनी।”

सामरी मीहतु विशवास लहज़ी

³⁹ दुह नगरो महस सामरी मीहज़ी दुह मेच़मीऊ कुट्रिमी रंङ साते यीशु टोईच़ी विशवास लहरीर; अच़ि दिह कुहते कि: दोई भत्ते धिर छिला गेह लहतेग, गिह्बी कंज़े च़रति।

⁴⁰ झांह लेह अपेहल दिहरे सामरी मीहरे यीशु ऊ कछंङ अतिर, ता दोऊ हखा बिनती लहज़ी लेहतिर कि ञेंहतु देहर बंङज़ु, दंङ दुह दोर्तिंङ झुह्ट ध्याड़ा तचेक बंङज़िरी।

⁴¹ दंङ दोऊ शिक्षाओ बजह च़ि महस मीहज़ी विशवास लहरीर।

⁴² दंङ दुह मेच़िमी रंङ कुंई, “दा ञेंहच़ी सिर्फ कांह कुट्रिमी रंङ साते दिऊ टोहकठे विशवास मा लहज़ातंई, छना कुचे हेंज़ी ऐनाह ए रेड्रातंई दंङ कि दीह ए हेले संसारो उद्धार लहज़ा शुह।”

⁴³ दंङ यीशु दुह झुह्ट ध्याड़ो थल दोरच़ी हुंच़ा गलील प्रदेशो हखा इलि।

⁴⁴ छना कुचे यीशु ज़ि ऐनाह ए गवाही रेंई कि भविष्यवक्ता बि एनोह देशंङ आदर माह खोखकसी।

⁴⁵ अपेहल यीशु गलील प्रदेशंङ अति, ता गलील प्रदेशो मीहरेर दोरंङ साते ‍‍खुशी रंङ दोईर; छना कुचे अंयों हेरानीऊ कम दोई यरूशलेम शहरंङ फसह ओ त्याहरो मुका लहसी तते, दोच़ी दुह भत्ते तंङातेर, छना कुचे दोरे ला फहस ओ त्यारा रिंङ इलजी तोईरे।

राजकर्मचारीऊ कटु बि अईन लहज़ी

⁴⁶ दंङ यीशु यह्च़ा गलील प्रदेशो काना नगरंङ अति, अंऊर दोई तिऊ दोरच़ी दाखो रस बणाएक्ते। दोर्तिंङ रज्ज़ा ओ इच्च़ा अधिकारी तोहई अतु गंङकटु कफरनहूम शहरंङ टेहची तोहई।

⁴⁷ दुह दी रेड्रा कि यीशु यहुदिया प्रदेशंङ च़ि गलील प्रदेशंङ अंज़े तोह, दोऊ कछंङ इलि दंङ दोरंङ साते बिनती लहज़ी लेहती कि जो दंङ गिऊ गंङकटु बि अईन लोहू: छना कुचे दुह सीमी तोहई।

⁴⁸ यीशु ज़ि दोबि कुंई, “अपेहल तचेक केई चिन्ह ए चमत्कार माह खमोंई, दोहपल तचेक केई गिऊ टोहकठे मसीहू शुह कुचे विशवास माह लोहन।”

⁴⁹ रज्ज़ा ओ अधिकारी यीशु हखा कुंई, “हे प्रभु, गिऊ कटुऊ सी इबिमी बे तुई जो।”

⁵⁰ यीशु ज़ि दोबि कुंई, “इला, कांह गंङकटु श्रींङी तोह।” दुह मीहे यीशु ऊ कुहषी गप्पो टोहकठे विशवास लहरी दंङ दोरच़ी अच़ा इलि।

⁵¹ दुह अमज़ि इबि ए लेहकी तोहई कि दोऊ परगर दोरंङ साते दोईरे दंङ कुट्री लेहतिर, “कांह गंङकटु श्रींङी तोह।”

⁵² दुह अधिकारी एनोह परगरतु हखा रुहक्ती, अंऊ मुका दुह ठीक शुहबी लेहकी तोहई? दोच़ी दोबि कुंई, “ऐरे निरा एक बजे दोऊ बुखार ठीक शुहचे इलि।”

⁵³ दंङ बाह ञेंहच़ा इलि कि दीह दुहए टेमा रिंङ ठीक शुहचे इलि अंऊ मुका यीशु ज़ि दोबि कुहते, “कांह गंङकटु श्रींङी बंङज़तो,” झांह लेह दोई ए दोऊ भत्ते टबरे यीशु ऊ टोहकठे विशवास लहरीर।

⁵⁴ दीह अई चिन्ह चमत्कार तोहई अंऊ यीशु ज़ि यहुदिया प्रदेशंङ च़ि वापिस अंज़े गलील प्रदेशंङ लहते।