यहून्नो 17 - लाहौली बाइबिल

यीशु ऊ एनोह थल्जी प्रार्थना

¹ दीह गप्पार एनोह चेला तंङ साते कुट्रिमी थल, यीशु ज़ि स्वर्गो हखा खांई दंङ कुई, “हे पिता परमेश्वर, दुह टेम पिचे अंजा कि केनोह योहू महिमा लोहू कि योह ला कांह महिमा लोहतो,

² छना कुचे केई दोबि भत्ते मीहतु टोहकठे राज लहज़िमी अधिकार रांहषी तातन, कि दोई दोतिंङ अनंत जीवन रमतो, अतिंङ केई दोऊ हवाले लहसी तातन।

³ दंङ अनंत जीवन दीह शुह कि मीहरे कनिंङ सेहपोर, मतलब सिर्फ इच्च़ा सच्चा परमेश्वरा बि, दंङ दोरे गिह्बी सेहपोर, मतलब यीशु मसीह बि, अरी केई च़रसी शुह।

⁴ अंऊ कम केई गिह्बी लहज़िमी थल्जी रेंईना, दुह पूरा लेह गेह संसारा रिंङ कांह महिमा लहतग।

⁵ दंङ हेंतेग, हे पिता परमेश्वर, केई केनोह तुईज़ी गिऊ महिमा लोहू, दुए महिमा अंऊ करंङ साते बंङज़ा दोहपल संसारो शुरुवात बे तुई गिऊ कछंङ तोहई।”

यीशु ऊ एनोह चेला तु थल्जी प्रार्थना

⁶ केई अंऊ मीहरे संसारो दोरच़ी अंङे गिह्बी रेंईन, दोतु बिचंङ गेह कांह मिन कांहषी तातग। दोरे कांह तोईर, केई दोरे गिह्बी रेंईन दंङ दोच़ी कांह शिक्षा मनेक्तिर।

⁷ दा दोरे ञेंहच़ातोर कि छिला धिर केई गिह्बी रांहषी तातन, दुह भत्ते कांह दोरच़ी शुह।

⁸ अंऊ खबर केई गिह्बी रेंईन, दुह गेह दोतिंङ रेह च़रतिग। दोच़ी दुह ग्रहण लेह हेले दिह ञेंए केईर कि गेह कांह दोरच़ी अंज़े शुगाह दंङ दोच़ी दिह विशवास लहरिर कि केई ए गेह च़रसी शुगाह।

⁹ गेह दोतु थल्जी प्रार्थना लहज़ातग, अरी कांह तोतोर दंङ अरी केई गिह्बी रांहषी तातन। पर दोतु थल्जी माह, अरी संसारारंङ साते नाता तहच़ातोर।

¹⁰ दंङ गिऊ तोह दुह भत्ते कांह शुह; दंङ कांह तोह दुह गिऊ शुह; दंङ दिऊ दोरच़ी गिऊ महिमा प्रगट शुई।

¹¹ दा गेह संसारा रिंङ माह बंङज़ोग, गेह कांह कछंङ अपातग। पर गिऊ चेलारे अईता ला संसारा रिंङ तोतोर; हे पवित्र पिता परमेश्वरा, केनोह सामर्थो दोरच़ी केई दोतिंङ सोठेके तौऊ, अंऊ दोरे केई गिह्बी रांहषी तातन कि दोरे इच्च़ा शुबी जूंस छना ञेंहरे तोतोन।

¹² अपेहल गेह दोतंङ साते तोईग, गेह दोतंङ कांह दुह मिन्ज़ी, अंऊ केई गिह्बी रांहषी तातन दोतु रक्षा लहरिग, गेह दोतु रखवाली लहरिग दंङ दोतु बिचंङ च़ि अरीला नाश माह शुईरे, सिर्फ दोऊ अलावा अतु योंहषी पक्‍का ए तोहई, दिऊ थल्जी कि छि पवित्रशास्त्रा रिंङ च़ेहसी तोह दुह पूरा शुबी जूंस।

¹³ पर धह गेह कांह कछंङ अपतग, दंङ दिह गप्पार गेह संसारा रिंङ बंङज़ा कुट्रातग, कि दोतिंङ गिऊ खुशी पुरा खोकसी।

¹⁴ गेह कांह बचन दोतु कछंङ पिचे च़रतग, दंङ संसारो मीह ज़ि दोतंङ साते बैर लहरिर, छना कुचे, छना गेह दिह संसारो माह शुगाह, ध्वांए दोरे ला दिह संसारो माह शोहर।

¹⁵ गेह दीह बिनती माह लहज़ातग कि केई दोतिंङ संसारारंङ च़ि रेंज़ा शिल, पर दिह कि केई दोतिंङ शेतानो दोरच़ी बचाके तौऊ।

¹⁶ छना गेह दीह संसारो मा शुगाह ध्वांए दोहरेला दीह संसारो मा शुहर।

¹⁷ कांह बचन सच्चाई शुह। दिऊ थल्जी दोतिंङ सच्चाई रिंङ केनोह थल्जी शत्‌ह लोहू

¹⁸ छना केई गिह्बी दीह संसारारंङ चर्तिना, ध्वांए गेह दोतिंङ ला दीह संसारारंङ च़रतिगा।

¹⁹ दंङ दोतु फायदा ओ थल्जी गेह घेंङा बि पवित्र लहज़ातग कि दोरे ला सच्चाई ऊ दोरच़ी पवित्र लेह जूंस।

यीशु ऊ एनोह भत्ते विशवासीतु थल्जी प्रार्थना

²⁰ गेह सिर्फ घेंङौ चेला तु थल्जी ए प्रार्थना माह लहज़ातग, पर दोतु थल्जी ला अरी दितु शिक्षा ओ बजह च़ि गिऊ टोहकठे विशवास लोहर,

²¹ कि दोरे भत्तेर इच्च़ा शुहबी जूंस; छना हे पिता परमेश्वर कांह गेरंङ तोतोन, दंङ गेह करंङ, ध्वांए दोरे ला हेन्दंङ शोहर, दिऊ थल्जी कि संसारो मीहरे विशवास लोहर कि केई ए गेह च़रसी शुगाह।

²² दंङ दुह महिमा अंऊ केई गिह्बी रेंईना, गेह दुह दोतिंङ रेह च़रतग कि दोरे इच्च़ा शुबी जूंस छना ञेंहरे तोतोन।

²³ गेह दोतंङ दंङ कांह गेरंङ तोतोन कि दोरे पवित्र शुहचे इच्च़ा शुहबी जूंस, दंङ संसारो मीहरे ञेंहपोर कि केई ए गेह चरच़ि शुगाह, दंङ छना केई गेरंङ साते दाह लहरिन, ध्वांए दोतंङ साते ला लहरिन।

²⁴ हे पिता परमेश्वर, गेह जुंज़ातग कि अरी केई गिह्बी रांहषी तातन, अंऊर गेह तोतोग दोर्तिंङ दोरेला गेरंङ साते शुबी जूंस, कि दोरे गिऊ दुह महिमा खमोर अंऊ केई गिह्बी रांहषी तातन, छना कुचे केई संसारो शुरुवातो तुईबे गेरंङ साते दाह लहरिन।

²⁵ हे धर्मिक पिता परमेश्वर, संसारो मीहज़ी गेह माह ञेंहरे, पर गेह कांह ञेंहच़ातग दंङ दिह चेलाज़ि ला ञेंह केहतोर कि केईंए गेह च़रसी शुगाह।

²⁶ गेह कनिंङ दोतु टोईच़ी प्रगट लहतग दंङ लोहवा लोहग कि अंऊ दाह कनिंङ गेरंङ साते तोहई, कि दुह दोतंङ शुबी जूंस दंङ गेह दोतंङ बंङज़ोग।