यहून्नो 12 - लाहौली बाइबिल

बैतनिय्याह नगरंङ यीशु ऊ आदर

¹ दोथर यीशु फसह त्यारबे त्रुई ध्याड़ा तुहई बैतनिय्याह नगरंङ अति, अंऊर दोई लाज़र बि सीमी दोरच़ी श्रींङे लहते।

² दोर्तिंङ दोच़ी यीशु ऊ थल्जी धाम तेयार लहरिर, दंङ मार्था यीशु ऊ आदर लहच़िमी थल्जी सेवा लहज़ी लेहकी तोहई, लाज़र ला यीशु रंङ साते बगत ज़जातु बिचंङ च़ि इच्च़ा तोहई।

³ दंङ मरियमे अधा लीटर जटामसिऊ महस शुद्ध रुठे मंङे इत्र रेंज़ा हति दंङ यीशु कोंज़ारिंङ थोरच़ी च़रति, दंङ एनोह क्राहज़ि दोऊ कोन्ज़ारे साफ लहरिर, दंङ दुह इत्रो बासे भत्त्ते घरबारंङ रूह्ठे बास अपि लेहती।

⁴ पर यीशु ऊ चेला तु बिचंङ च़ि करियोत नगरो यहूदा मिन्दु इच्च़ा चेला तोहई अरी यीशु बि च़ुमज़ि लहज़िमी तहरे, कुट्री लेहती,

⁵ “दिह इत्र षुमु राह मुलतु टंगा (इच्च़ा सालो ध्याड़ी) लंह्ङे गरीबा तिंङ छिले मराहई?”

⁶ दोई दिह गप्पा दिऊ थल्जी माह कुहते कि दोबि गरीबा तु चिंद तोहई, पर दिऊ थल्जी कि दुह चोर तोहई दंङ दोऊ कछंङ दोतु ढबाहो बटुआ शवाते, दंङ दोऊ अंद्रेग छिला केट्रातेर, दुह दोई हुंच़े चरच़ाते।

⁷ यीशु ज़ि कुंई, “दोई टेम बे तुईए ए गिऊ पथेक्च़िमी तेयारी ऊ थल्जी लहज़ी लेहकी तोह।

⁸ छना कुचे गरीब ता केतंङ साते हमेशा श्‌वातोर पर गेह केतंङ साते हमेशा माह बंङज़ोग।”

लाज़र बि सच़िमी फेंसला

⁹ अपेहल मीह ज़ि रेड्रीर कि यीशु दोर्तिंङ तोहई दोथर मीहतु इच्च़ा मोह्ड़े भीड़ दोर्तिंङ अति। दोरे सिर्फ यीशु बि ए मशत पर लाज़र बि ला खंड्रिमी थल्जी अंज़े तोईरे, अतिंङ दोई सीमी दोरच़ी श्रींङी लहते।

¹⁰ दंङ यहुदी मोह्ड़े पुरोहित ज़ि लाज़र बि सच़िमी स्कीम लहरिर।

¹¹ छना कुचे दोऊ बजह च़ि महस मीहरेर यहुदी सेंहणातु गप्पा माह मनेक्च़ा ते यीशु टोहकठे विशवास लहज़ातेर।

यीशु ऊ यरूशलेम शहरंङ विजय प्रवेश

¹² अहई ध्याड़ा रिंङ महस मीह च़ि अरी फहस त्यारा रिंङ अंज़े तोईरे, थाहशातोर कि यीशु यरूशलेम शहरो ह्खा अपि लेह्की तोह।

¹³ दोच़ी खजूरो ब्रन्ज़ेर लेन्ज़ा दोरंङ साते दोहई इलिर, दंङ हाऊष रंड्री लेहतिर, “होशना! धन्य शुह इस्राएलो रज्ज़ा, अरी प्रभुऊ अधिकारंङ साते अपा।”

¹⁴ अपेहल यीशु बि इच्च़ा करेटु खोकसिरी, छना ए दुह यरूशलेम शहरंङ अति दुह दोऊ टोहकठे बंङज़ा इलि, छना पवित्र शास्त्रा रिंङ च़ेहसी तोह ध्वांए शुही,

¹⁵ “हे यरूशलेम शहरो मीहरे, था बेंईन, खंणुई केहतु रज्ज़ा करेटु टोहकठे बंङज़ा अपि लेह्की तोह।”

¹⁶ यीशु ऊ चेलार दिह गप्पारे तुहई माशुहङतेर; पर अपेहल यीशु ऊ महिमा दोतु प्रगट शुहते, ता दोतिंङ हिद अति कि छिला धिर यीशु रंङ साते शुहते दुह बिल्कुल ध्वांए तोहई छना पवित्र शास्त्रा रिंङ च़ेहसी तोहई।

¹⁷ दंङ मीहरे अरी दुह मुका दोरंङ साते तोईरे दिह गवाही रंड्री लेहतिर, कि दोई लाज़र बि सिमी दोरच़ी श्रींङी लहतो।

¹⁸ दिऊ थल्जी महसे मीहरे यीशु रंङ साते दोहई अतिर, छना कुचे दोच़ी दिह चमत्कारो पाहठी थाशातेर।

¹⁹ दोथर फरीसी मीह ज़ि एनातु बिचंङ कुईर, “सोचेक्तुई, ञेंहच़ी छले लेह मरपोंई; खंणुई, भत्ते संसारो मीहरे दोऊ थले शुहचे इल्दोर।”

यूनानी मीहतु यीशु बि पेट्री

²⁰ दोर्तिंङ थोड़े अरे यहुदी मीहरे तोईरे अरी फसह त्याहरो मुका अराधना लहज़िमी थल्जी अंज़े तोईरे।

²¹ दोरे गलील प्रदेशो बैतसैदा इलाकंङ बंङज़ा फिलिप्पुस ओ कछंङ अंज़े दोरंङ साते बिनती लहज़ी लेहतिर, श्रीमान, “ञेंहरे यीशु रंङ साते दोहई तातंई।”

²² फिलिप्पुसे अंज़े अन्द्रियासो ह्खा कुंई, दंङ अन्द्रियास ए फिलिप्पुस ए यीशु रंङ साते कुईर।

²³ दिरंङ यीशु ज़ि दोतु हखा कुंई, “दुह टेम अच़ा अंजा कि गेह मीहू योहू महिमा शोतो।

²⁴ गेह केतंङ साते हेले कुट्रातग, अपेहल तचेक छ्वाऊ सोल धरती रिंङ इलजे सीए मेहवा, दुह इच्च़ा केहषी पर अपेहल सीए य्वा, ता महस फल हपा।

²⁵ अच़ि एनोह जहानो दिह धरतीऊ टोईच़ी बचाएपोतो दुह दोई ञेंई केओतो दंङ अच़ि दीह संसारारंङ एनोह जहानो परवाह मलोह्तो दोई अनंत जीवनो थल्जी दोऊ रक्षा लोहतो।

²⁶ अगर अच़िया गिऊ सेवा लोहतो, ता दोरे गिऊ चेलार बणेक्तुंई; दंङ अंऊर गेह बंङज़ोग दोर्तिंङ गिऊ सेवा लहज़ा ला शोतो; अगर अच़िया गिऊ सेवा लोहतो, ता पिता परमेश्वरे दोऊ आदर लोहतो।

एनोह सिमी पाहठी भविष्यवाणी

²⁷ दा गेह महसे परेशान तोतोग। दिऊ थल्जी दा गेह छि लोहग? ‘हे पिता परमेश्वरा गिह्बी दिह दुखो घड़ी ऊ दोरच़ी बचाएतु?’ पर गेह संसारारंङ दिऊ थल्जी अंज़े शुगाह कि कष्ट उठाएपोग।

²⁸ हे पिता परमेश्वर प्रगट लोह कि कांह अंयों महिमा ओ जोगे तोतोन।” दंङ सर्गंङ ज़ि दिह आकाशवाणी शुई, गेह कंङातग कि गेह अंयों महिमा ओ जोगे तोतोग दंङ गेह दिह्बी यह्च़ा प्रगट लोहग।

²⁹ दंङ अरी मीहरे खड़े शुहचे सग रेड्री लेह्की तोईरे, दोच़ी कुंई, “कि दिह बदड़ो गढ़गढ़ शुह, ऊईज़ि कुहतोर, कि अरीया स्वर्ग दूते दोऊ हखा छा कुहतो।”

³⁰ दिरंङ यीशु ज़ि कुंई, “दिह सग केहतु फायदा ओ थल्जी तोहई शब्द गिऊ थल्जी मशत्त गिऊ थल्जी मशत।

³¹ दा दिह टेम शुह अपेहल परमेश्वर संसारो मीहतु न्याय लोहतो, दंङ दा यीशु दिह संसारो मुख्या शेतानो शक्ति बि खत्म लोहतो।

³² दंङ अपेहल गेह धरतीऊ टोहकठे च़ि खेका लोहर ता भत्ते मीहतिंङ घेंङौ कछंङ हपोग।”

³³ झांह कुचे दोई दिह गप्पा प्रगट लहरी कि दुह छना सिमी तोहई।

³⁴ दिरंङ मीहज़ी दोऊ हखा कुईर, ञेंहच़ी पवित्र शास्त्रा रिंङ दिह पढ़ेक्सी शुई, कि मसीह हमेशा श्रींङे बंङज़ोतो, दंङ केई छिले कुट्रातन कि मीहू योह बि रंगी रिंङ चढ़ाऐसी ज़रूरी तोह? दी मीहू योह अरी शुह?

³⁵ यीशु ज़ि दोतु हखा कुंई, “कि छंङी केहतु बिचंङ थोड़े ध्याड़ो शुह, अपेहल तचेक केतंङ साते छंङी तोह जोआ लांही; झांह शुबी मेस कि हंयार केतिंङ कपची च़रपोतो; अरी हंयारा रिंङ जोज़ा दोई माह ञेंहच़ा कि अंऊखा इपि लेहकी तोतोग।

³⁶ अपेहल तचेक छंङी केतंङ साते तोह, छंङीऊ टोहकठे विशवास लांही कि केहरे छंङीऊ कटुरे शोंई।” दिह गप्पारे कुचे यीशु अच़ा इलि दंङ दोतु दोरच़ी ब्याके बंङज़िरी।

भविष्यवाणी ऊ पुरा शुहबी

³⁷ यीशु ज़ि दोतु तुईज़ी धोंण चिन्ह चमत्कार लहते, तांला दोच़ी दोऊ टोहकठे विशवास माह लहरिर;

³⁸ दिह दिऊ थल्जी शुई कि यशायाह भविष्यवक्ता ज़ि छि कुहते दुह हेले शुहचे योतो; हे प्रभु, अच़िला ञेंहतु समाचारो टोहकठे विशवास माह लहरिर, दंङ अच़िला माह समझेक्च़ातोर कि दिह कांह पराक्रमी सामर्थ शुह।

³⁹ दिह बजह च़ि दोरे विशवास लेह मरतिर, छना कुचे यशायाह भविष्यवक्ता ज़ि दिह ला कुहते;

⁴⁰ “परमेश्वरे दोतु टिरार काणे लेह च़रति, कि दोरे खांई मरपोर, दंङ दोतु दिमाग बंद लेह च़रति कि दोरे समझेकी मरपोर। माह ता दोरे गिऊ हखा किरच़ा इबि तोईर दंङ गेह दोतिंङ ठीक लेह चरच़ि तोहई।”

⁴¹ यशायाह ज़ि दिह गप्पारे दिऊ थल्जी कुई, कि दोई यीशु ऊ भविष्य ऊ महिमा तंङरी, दंङ दोई दोऊ पाहठी गप्पा लहरी।

⁴² तांला यहुदी सेंहणातु बिचंङ च़ि महसे ज़ि दोऊ टोहकठे विशवास लहरिर पर फरिसी मीहतु बजह च़ि बिचंङ मह्सेज विशवास लहरीर, पर फरीसीतु वह्ज च़ि दोरे भत्तेतु तुईज़ी दोबि माह मनेक्च़ातेर दिह बेह्द चेहके कि दोतिंङ यहुदी सभा घरबारंङ च़ि धह्कते हुंच़े च़रपोर।

⁴³ छना कुचे मीहतु तारीफ दोतिंङ परमेश्वरो तारीफ बे रूठे अपाते।

छंङीरिंङ जोज़ी

⁴⁴ यीशु ज़ि मीहतिंङ जोर रें कुंई, “अच़ि गिऊ टोहकठे विशवास लहज़ा, दोई गिऊ टोहकठे मशत्त पर गिह्बी च़रच़ा परमेश्वरो टोहकठे विशवास लहज़ा।

⁴⁵ दंङ अच़िला गिह्बी खंड्रा दोई गिह्बी च़रच़ा परमेश्वर बि खंड्रा,

⁴⁶ गेह संसारारंङ छंङी शुहचे अंज़े शुगाह, कि अच़िला गिऊ टोहकठे विशवास लोहतो दुह हंयारा रिंङ माह बंङज़ोतो।

⁴⁷ अगर अच़िया गिऊ गप्पा रेड्राते माह मनेक्च़ा, ता गेह दोबि दोषी माह ठेहराएपोग, छना कुचे गेह संसारो मीहतिंङ दोषी ठेहराएच़ी अंज़े माह शुगाह पर संसारो मीहतिंङ बचाएच़िमी थल्जी अंज़े शुगाह।

⁴⁸ अच़ि गेह तुच्छ चेहच़ा दंङ गिऊ गप्पार ग्रहण माह लहज़ा दोबि दोषी ठेहराएच़ा इच्च़ा तोह; मतलब अंऊ बचन गेह कुहषी तातग, दोई अंतिम ध्याड़ा रिंङ दोबि दोषी ठहराएपोतो।

⁴⁹ छना कुचे गेह घेंङौ अधिकारंङ छले गप्पा माह लहज़ातग, पर पिता परमेश्वरे अच़ि गेह च़रसी शुगाह दोई ए गिह्बी हुकुम रांहषी ततो कि छि-छि कोहग दंङ छना-छना कोहग?

⁵⁰ दंङ गेह ञेंहच़ातग, कि दोऊ आज्ञा ओ हिसाबे जोज़ी अनंत जीवन रंड्रा, दिऊ थल्जी छि गेह कुट्रातग, दुह छना पिता परमेश्वरे गिऊ हखा कुहतो ध्वांए कुट्रातग।”