यहून्नो 11 - लाहौली बाइबिल

लाज़र ओ सी

¹ बैतनिय्याह नगरंङ लाज़र मिंदंङ इच्च़ा मीह बीमार तोहई। मरियम ए मार्था दोऊ रिहंङ तोईरे।

² दीह दुहए मरियम तोहई अच़ि थोड़े टेमो थल प्रभुऊ कोन्ज़ा रिंङ मंङे ईत्र चाए एनोह क्राहज़ि साफ लाहते, दोऊ ए न्वा लाज़र टेहची तोहई।

³ दंङ झुल्ला रिहङरेचि यीशु बि उजाब चरच़ातेर, कि “हे प्रभु, खंणुई, अतंङ साते केईं दाह लहज़ातन दुह टेहची तोह।”

⁴ दिह रेड्राते यीशु ज़ि कुई, “दिह बीमारीऊ अंत सी माह शुह, पर दिह परमेश्वरो महिमा थल्जी शोतो, कि दोऊ दोरच़ी गेह परमेश्वरो योहू महिमा शोतो।”

⁵ दंङ यीशु मार्था, दोऊ न्वाशक मरियम ए लाज़र रंङ साते दा लहज़ाते।

⁶ पर अपेहल यीशु ज़ि थाहशतो कि लाज़र टेहची तोह ता दुह अंऊ ठाहरीरिंङ तोहई दोर्तिंङ झुह्ट ध्याड़ा ऊई बंङज़ा इलि।

⁷ झुह्ट ध्याड़ो थल दोई एनोह चेला तिंङ कुंई, “कि जोईन हेनर यच़ाह यहुदिया प्रदेशो हखा योंही।”

⁸ चेलाज़ि दोऊ हखा कुहतोर, “हे गुरु, अईता ता यहुदी सेंहणार कांह टोईच़ी रघ द्रले बहेचिमी तोईरे, दंङ छि यच़ाह कांह दोर्तिंङ ए य्वातना?

⁹ यीशु ज़ि जुबाब रेंई, छि ध्याड़ारिंङ सनी घंटा मशुहबिया? अरीया नीरा जोरीताह ठोकर माह ज़ोतो, छना कुचे दोई संसारो छंङी मतलब एके खंड्री।

¹⁰ पर अरीया राता रिंङ ज़ोज़ोतो ठोकर खोक्पोतो, छना कुचे दोऊ अंद्रेग छले छंङी माह।”

¹¹ दिह गप्पारे कुट्रिमी थल यीशु ज़ि दोतु हखा कुंई, “हेंदु मित्र लाज़र इमरिंङ अच्च़ा इलज़ा पर गेह दोबि चेहक्पी लेही य्वातोग।”

¹² दंङ चेलाज़ि दोऊ हखा कुईर, “हे प्रभु, अगर दुह सिर्फ इमरिंङ तोह ता अईन शुहचे योतो।”

¹³ यीशु ज़ि ता दोऊ सीमी पाहठी कुहते: पर दोच़ी चेकातोर कि दोई इमरिंङ इबिमी पाहठी कुहतो।

¹⁴ दंङ यीशु ज़ि दोतंङ साते साफ कुह्चे च़रति, “लाज़र सीए इलज़ा।

¹⁵ दंङ गेह केहतु फायदा ओ थल्जी खुश तोतोग कि गेह दोर्तिंङ माह तोईग दिऊ थल्जी कि केहच़ी विशवास लांही। पर अतंई हेनर दोऊ कछंङ योंई।”

¹⁶ दोथर थोमा ज़ि अतिंङ दिदुमुस ला कुट्री, एनोह साथी चेला तिंङ कुहतो, “अतंई हेनर ला दोरंङ साते सीह्मी थल्जी योंई।”

यीशु यह्च़ा श्रींङी ए जीवन

¹⁷ अपेहल यीशु बैतनिय्याह नगरंङ पिचा ता यीशु बि पता लेहती कि लाज़र बि सीए पी ध्याड़ा शुहचे इलज़ा।

¹⁸ बैतनिय्याह नगर यरूशलेम शहरो कछंङ लगभग षुमु किलो मीटर ओईतार तोहई

¹⁹ दंङ महस यहुदी मीहरे मार्था ए मरियमो कछंङ दोतु न्वाओ पाहठी याहब रंड्री (मोद कंड्री) अंज़े तोईरे।

²⁰ छना ए मार्था बि यीशु ऊ अपिमी पाहठी पता लेहती, दुह दोरंङ साते दोईमी थल्जी अच़ा इलि, पर मरियम चुंङ ए बंङज़िरी।

²¹ मार्था ज़ि यीशु बि कुंई, “हे प्रभु, अगर कांह देर्तिंङ शुहचंङ ता गिऊ न्वा माह सीए तोहई।

²² दंङ गेह अईता ला ञेंहच़ातग, कि छिला धिर केई परमेश्वरो दोरच़ी पेट्रोन, परमेश्वरे कनिंङ रमोतो।”

²³ यीशु ज़ि दोबि कुंई, कांह न्वा यच़ाह षीङे योतो।

²⁴ मार्था ज़ि दोबि कुहतो, “गेह ञेंहगा कि न्याय ध्याड़ारिंङ अपेहल भत्ते श्रींङे योर दुह ला यच़ाह षीङे योतो।”

²⁵ यीशु ज़ि दोबि कुंई, “गेह दुह शुगाह अच़ि सीए मीहतिंङ यच़ाह जीवन रंड्रातग। अच़िला गिऊ टोहकठे विशवास लहज़ा दुह अगर सीए ला योतो तांला श्रींङे बंङज़ोतो।

²⁶ दंङ अरीला गिऊ टोहकठे विशवास लेह षीङे बंङज़ा दुह अनंत काल तचेक माह सीओतो। मार्था, छि केई दिह गप्पो टोहकठे विशवास लहज़ातन।”

²⁷ मार्था ज़ि दोबि कुंई, “वेई, हे प्रभु, गेह विशवास लह्ताग कि परमेश्वरो योह मसीह अरी दिह संसारारंङ अपिमी तोहई दुह कांह ए शुनाह।”

लाज़र बि यच़ाह षीङमी लहज़ी

²⁸ दिह कुचे मार्था अच़ा इलि, दंङ एनोह न्वाशक मरियम बि बुलाके सूले कुंई, “गुरु दिह ए शुह, दंङ कनिंङ बुलाए च़ि लेहकी तोह।”

²⁹ दुह रेड्री रंङ साते दोहपले दोऊ कछंङ अति।

³⁰ यीशु अईता नगरंङ च़ि धह्कते ए तोहई, दुह, दुहए ठहरि रिंङ तोहई अंऊर मार्था दोरंङ साते दोईते।

³¹ दंङ दोरे यहुदी मीहरे अरी मरियम रंङ साते दोऊ चुंङ तोईरे, दंङ दोबि याहऊ रंड्री लेहकी तोईरे। दोच़ी खंणीर कि मरियम दोथरे खड़े शुहचे धह्तेका इलि, दोरे दिह सोचेक्च़ा दोऊ थले-थले इलिर कि शयद दुह क्रपिमी थल्जी कब्रो हखा इबि लेहकी तोह।

³² अपेहल मरियम दोर्तिंङ पिचाते अंऊर यीशु तोहई, ता दोबि खंड्री रंङ साते, दोऊ कोन्ज़ारिङ दह्चे इलि दंङ कुंई, “हे प्रभु! अगर कांह देर्तिंङ शुहचंङ ता गिऊ न्वा माह सीए तोहई।”

³³ अपेहल यीशु ज़ि दोबि दोरंङ साते अंज़े यहुदी मीहतिंङ क्रपि तंङतो, दुह महसे दुखी शुहचे इलि दंङ महस दुख रंङ साते दोतु हखा रुहक्ती,

³⁴ “कि केहच़ी दुह अंऊर पथेक्सी तातंई?” दोच़ी यीशु हखा कुईर, “हे प्रभु, जो दंङ खंणु।”

³⁵ यीशु क्रप्चा इलि।

³⁶ दंङ यहुदी मीहरे कुट्री लेहतिर, खांई दोई दोरंङ साते अंयों दाह लहज़ाते।

³⁷ पर दोतु बिचंङ च़ि रेइची कुईर, “दिह ता दुह काणे मीहबी अईन लहतो दोई लाज़र बि सीमी दोरच़ी बचाके तरच़ी तोहई।”

लाजरो यह्च़ा श्रींङी शुहबी

³⁸ यीशु महसे दुखी शुहचे कब्रो हखा अति, दुह इच्च़ा गुफा तोहई, दंङ इच्च़ा मोह्ड़े रघ पितंङ रिंङ केहषी तोहई।

³⁹ यीशु ज़ि कुंई, “रघ थलका लांही।” दुह सीऊ दो रिहंङ मार्था कुट्री लेहती, “हे प्रभु, दोऊ दोरच़ी बास अपि लेहकी तोह, छना कुचे दोबि सीए दा पी ध्याड़ा शुहचे इलज़ा।”

⁴⁰ यीशु ज़ि दोऊ हखा कुंई, “छि गेह करंङ साते माह कुहतेगा कि अगर केई विशवास लहरीनता परमेश्वरो महिमा खमोंन।”

⁴¹ दंङ दोच़ी दुह रघ थलका लहरिर, यीशु ज़ि स्वर्गो हखा खांई कुंई, “हे पिता परमेश्वर, गेह कांह धन्यवाद लहज़ातग कि केई गिऊ प्रार्थना रेड्री चरच़ातन।

⁴² दंङ गेह ञेंहच़ातेग, कि केई गिऊ प्रार्थना हमेशा रेड्रातन, पर अंऊ मीहतु भीड़ कछंङ खड़े तोह, दोतु बजह च़ि गेह जोरे कुहतेग, कि दोरे विशवास लोहर कि केई गेह च़रसी शुनाह।”

⁴³ दिह कुचे थल दोई जोहरे हाऊष रें कुंई, “हे लाज़र, हुंज़ा अता।”

⁴⁴ अरी सीए इल्जी तोहई, दुह कफनङज़ि ठुड़ू कोन्ज़ा छुहसा हुन्ज़ा अति, दोऊ मोद यद्ची छ़ुह्च़ी तोहई! यीशु ज़ि दोतंङ कुहतो, दोबि इबी रेंई।

यीशु विरोधङ योजना

⁴⁵ दंङ अरी यहुदी मीहरे मरियम रंङ साते अंज़े तोईरे, अपेहल दोच़ी यीशु ऊ दिह कम खंणीर, दोतु बिचंङ च़ि महसे मीह ज़ि दोऊ टोहकठे विशवास लहरिर।

⁴⁶ पर दोतु बिचंङ च़ि अंयों शुदाह मीहज़ी फरीसी मीहतु कछंङ इलजे यीशु कमो पाहठी समाचार रेंईर।

⁴⁷ दिरंङ यहुदी मोह्ड़े पुरोहित ज़ि ए फरीसी मीहज़ी यहुदी सभा ओ मीहतिंङ ठ्रोहका लहरिर दंङ कुईर, “ञेंहच़ी छि लोहनी? दिह मीहे ता महसे चिन्ह चमत्कार कंड्री लेहकी तोह।

⁴⁸ अगर ञेंहच़ी दोबि ध्यांए छोड़ेके च़रपोंई, ता दंङ हर इच्च़ा दोबि मसीह कुचे दोऊ टोहकठे विशवास लोहर, दंङ रोमी मीहरे अंज़े ञेंहतु मन्दिरो ठहरि ए जातिऊ मीहतु टोहकठे अधिकार लेह केयोर।”

⁴⁹ दंङ यहुदी सभा ओ बिचंङ च़ि काईफा मिंदंङ इच्च़ा मीह अरी दुह सालो यहुदी महापुरोहित तोहई, दोतंङ कुहतो, “केहच़ी छिला माह ञेंहनी;

⁵⁰ दंङ माह दिह ञेंहच़ातोंई, कि केहतु थल्जी दिह रुठे तोह कि मीहतु थल्जी इच्च़ा मीह सिओतो, दंङ भत्ते इस्राएल देशो मीहरे नाश माह शोर।”

⁵¹ दि गप्पा दोई एनोह दोरच़ी माह कुहते, पर दुह सालो यहुदी महापुरोहितो हिसाबे, दोई दिह भविष्यवाणी लहरी कि यीशु भत्ते यहुदी जातिऊ मीहतु थल्जी सीओतो;

⁵² पर सिर्फ दोतु ए थल्जी मशत। दुह परमेश्वरो ऊई कटुतु थल्जी ला सीओतो अरी दिह संसार रिंङ देखा नोखा शुहचे इल्जी तोतोर, कि दोतिंङ ठ्रोहका लोहतो।

⁵³ दुहए ध्याड़ा बे यहुदी सेंहणार दोबि सच़िमी थल्जी स्कीम लहज़ी लेहतिर।

⁵⁴ दिऊ थल्जी यीशु ज़ि यहुदी मीहतु बिचंङ खुलम खुला जोज़ी ब्याड़ा लेह केह। दोर्तिंङ च़ि दुह सुनसान ठहरि रिंङ एनोह चेला तंङ साते एप्रेम मिंदंङ इच्च़ा इलाकंङ बंङज़ी लेहती।

⁵⁵ यहुदी मीहतु फसह त्याहरो टेम पिचे अंज़े तोहई, दंङ महसे मीहरे फसह ओ त्यारा बे तुई यरूशलेम शहरो हखा इलिर कि यहुदी मंदिरंङ एनातु रिति रिवाज़ो हिसाबे शुद्धी लोहर।

⁵⁶ दंङ दोहर यीशु बि पेट्री लेहतिर दंङ यहुदी मंदिरंङ खड़े शुहचे एनातु बिचंङ कुट्री लेहतिर, केहच़ी छि सोचेक्च़ातंई, छि दुह त्यारा रिंङ माह अपतो?

⁵⁷ दंङ यहुदी मोह्ड़े पुरोहित ज़ि ए फरीसी मीहज़ि ला हुकुम रांहषी तरेर, कि अगर अतिंङ ला दोऊ पाहठी पता लेहती कि दुह अंऊर तोह, ता खबर लांही कि दोबि गिरफ्तार लोहनी।