याकूब 5 - लाहौली बाइबिल

साहुकारातिङ चेतावनी

¹ हे अविशवासी साहुकारे रेड्रुंई, केरे केनातु अंजा क्लेशो टोहकठे हाऊष-हाऊष रंड्रा क्रापोंई।

² केहतु ढबाह नाश शुहचे इलजी तोह, दंङ केहतु खमज़ेर ओमड्रा ज़ि ज़े चरच़ातोर।

³ केहतु ज़ंङ ए मुल तिंङ जंग लेहके इलज़ा; दंङ दुह जंग न्यायो मुक्का केहतु खिलाप गवाही रमतो, दंङ केहतु फुका बि मेहू ठ्रोह रोह्चे च़रपोतो। केहच़ी अन्तिम जुगारिंङ ढबाह ठ्रोहका लाहतंई।

⁴ खंई, अंऊ मज़दूरा ज़ि केहतु रिहऊ फसल वलज़ातेर, दोतु दुह मज़दूरी अंऊ केहच़ी धोखा रिंङ केनातु कछंङ तहसी तातंई, दोरे मज़दूर केहतु खिलाप परमेश्वरो तुईज़ी हाऊष रंड्री लेह्की तोतोर, दंङ फसल ट्रिकट्रा तु क्रपि सेनाओ प्रभु ज़ि थाक्शे चरच़तो।

⁵ दंङ केरे धरतीऊ टोहकठे भोग-विलासरिंङ लेहकी बंङज़ुंई दंङ मोह्ड़े सुख भोगेकतंई; केरे सिर्फ केनातु ऐश-आरामो थल्जी श्रींङमातंई, दंङ झांह लेह, केहच़ी केनाज़ि परमेश्वरो दोरच़ी रंड्रा भयानक सज़ाओ थल्जी तेयार लेह चरच़ातंई।

⁶ केहच़ी धर्मी बि दोषी ठहराइगी ते सच़ी च़रतिन; दंङ दोई केहतु छल्ले विरोध माह लहरी।

दुखारिङ धीरज तच़ी

⁷ झांह लेह हे गिऊ प्यारे विशवासी साथी रे, प्रभु अपिमी तचेक ज़हके तंही। छना ज़मीनदार धरतीऊ रूठे फसलो उम्मीद तहच़ा मुण्डो ए थल मुक्को संदाण शुहबी तचेक धीरज़ा रंङ ज़हके तहच़ा।

⁸ झांह लेह केहच़ी ला ज़हके तंही; दंङ केनातु उम्मीद छोडे़क्तेंई थाह, छना कुचे प्रभु युरनाह अपिमी तोह।

⁹ हे गिऊ प्यारे विशवासी साथी रे, इदि-अई दिऊ टोहकठे केनातु परेशानी रें दोष था लगाएतुंई, ताकि केरे दोषी माह शोंई; खंई न्याय लहज़ा दुह अपिमी थल्जी तेयार तोह।

¹⁰ हे प्यारे साथी विशवासी रे, अंऊ भविष्यवक्ताज़ि प्रभु मिन्दु साते गप्पा लहरी, दोतिंङ दुख उठाएच़िमी धीरज़ रंङ साते बणेक्च़िमी आदर्श बणेक्तेंई।

¹¹ खंई, दुखा रिंङ धीरज़ा रंङ ज़हके दोतिंङ धन्य कुट्री, केहच़ी अय्यूब मिन्दु इच्च़ा मीहबी धीरज़ ज़हकिमी पाहठी थाक्शी तातंई, दंङ केहच़ी दि ला ञेंहच़ातंई कि परमेश्वरे थल मुक्का दोऊ छना ठ्रोह मदत लहरी। अंऊ दिरंङ प्रभु महस दाह ए कृपा प्रगट शवाह।

¹² पर हे गिऊ प्यारे साथी विशवासी रे, भत्ते बे ज़रूरी दि तोह कि, कसम थाजेंई, माह स्वर्गो, माह धरतीऊ, माह ऊई चीज़ो पर केहतु गप्पा वोई ऊ वोई ए ना ऊ ना शुहबी जूंस, ताकि केरे परमेश्वरो दोरच़ी दोषी मशोंई।

प्रार्थनाऊ शाक्ति

¹³ अगर केहतु बिचंङ अरिया दुखी तोह ता दोई प्रार्थना लोहु; अगर खुश तोह ता, दोई स्तुतिऊ भजन कुंई।

¹⁴ अगर केहतु बिचंङ अरिया मरीज़ तोह, दंङ कलीसिया ओ सेंहणा मीहरे बुलाएक्तेंई, दंङ दोई प्रभु मिंदंङ साते दोऊ टोहकठे तेल चाए ते दोऊ थल्जी प्रार्थना लोहतो।

¹⁵ दंङ विशवासो प्रार्थना ओ दोरच़ी मरीज़ बचेकी योतो दंङ प्रभु दोबि ठीक लेह च़रपोतो; अगर दोई पाप ला लहसी शुई ता प्रभु दोबि माफ लेह च़रपोतो।

¹⁶ झांह लेह केरे केनातु बिचंङ इदि, अईदिऊ तुईज़ी केनातु-केनातु पाप मनेके च़रतुंई, दंङ इदि-अईदिऊ थल्जी प्रार्थना लंहि, अंऊ दिरंङ केरे आईन शुहचे योंई; धर्मी मीहू प्रार्थना सामर्थी शुहबी दंङ दोऊ अद्धभुत नतीज़ा खोकसी।

¹⁷ एलियाह भविष्यवक्ता लाह हेंदु बराबर दुख-सुख भोगी मीह तोहई; दंङ दोई क्रपचि-क्रपचि प्रार्थना लहरी; कि संदाण शुहबी मेस; दंङ साढ़े षुमु साल तचेक धरतीरिंङ संदाण मा अति।

¹⁸ दंङ दोई प्रार्थना लहरी, दंङ सर्गंङ च़ि संदाण शुई, दंङ धरती फलवन्त शुहचे इलि।

¹⁹ हे गिऊ प्यारे साथी विशवासी रे, अगर केहतु बिचंङ अरिया विशवासी सच्चाई ऊ अमरिंङ च़ि भटकेगी इलि ता, दंङ अच़िया दुह सच्चाई ऊ अमरिंङ वापिस हपतो,

²⁰ दंङ केहच़ी दि ञेंई च़रतुंई, कि अच़िया भटकेगी दुह पापी बि सच्चाई ऊ अमरिंङ वापिस हप्तो, दंङ दोई दुह पापी जहान मौतो दोरच़ी बचाएच़ा, दंङ परमेश्वर दोऊ हर पाप माफ लेह च़रच़ा।