याकूब 2 - लाहौली बाइबिल

पक्षपातो खिलाफ चेतावनी

¹ हे गिऊ प्यारे साथी विशवासी रे, केरे हेंदु महिमामय प्रभु यीशु मसीहू चेला शुई, झांह लेह केतिंङ पक्षपात शुहबी माह जूंस।

² माना अगर इच्च़ा गंङमी ज़ङों छल्ला ए रूठे खमज़ेर लेह्की केहतु कलीसिया रिंङ अपतो, दंङ इच्च़ा गरीब ला क्रीचटे खमज़ेर लेहच़ा अपतो।

³ दंङ केरे दुह रूठे खमज़ेर लेहसी दोबि महस आदर रंड्रा कुंई, “काह देर्तिंङ रूठे ठाहरीरिंङ बंङज़ु,” दंङ दुह गरीबो हखा कुंई, “काह देर खड़े बंङज़ु” या गिऊ “कोन्ज़ो कछंङ बंङज़ु।”

⁴ दंङ छि केहच़ी देर भेद भाव माह लांईया? केरे मदम विचाररंङ साते फेंसला लहज़ा माह शुंईयां?

⁵ हे गिऊ प्यारे साथी विशवासी रे रेड्रुंई। छि परमेश्वरे दि संसारो गरीबातिंङ अंङे चरच़तो कि दोरे विशवासरिंङ साहुकार, दंङ दुह राज्यऊ अधिकारी शोर, अतु वाईदा परमेश्वरे दोतंङ साते लहसी ततो, अंऊ दोहरंङ साते दाह लहज़ा तोर?

⁶ पर केहच़ी दुह गरीबो अपमान लहरिन, केहच़ी ञेंच़ातंई कि दि साहुकार मीहरे अंऊ केहतु टोईच़ी अत्याचार लहज़ा तोर। दोरे ए शुहर अंऊ केतिंङ ज़बरदस्ती कोर्टंङ शिलज़ा तोर।

⁷ दोरे दुह ए शुरे अंऊ यीशु मसीहू मोह्ड़े मिंदंङ मांजी गप्पा कुट्रातोर, अतंङ साते केहच़ी संबध तहज़ातंई।

⁸ अगर केरे पवित्रशास्त्रो दि बचनो हिसाबे, “कि केई केनोह पड़ोसीरंङ साते केनोह बराबर दाह लोहू” दंङ हेले पवित्रशास्त्रो भत्ते बे खास कानून मनेक्च़ा ते रूठे लहज़ातंई।

⁹ पर अगर केहच़ी पक्षपात लहज़ा तंई ता पाप लहज़ा तंई; दंङ नियम ए कानून केतिंङ अपराधी ठहराच़ातोर।

¹⁰ छना कुचे अच़िला भत्ते कानूनो भाषे लहज़ा तांला इच्च़ा ए हुकुम भाषे माह लहज़ा दंङ दुह भत्ते गप्पारिंङ दोषी ठहरेपोतो।

¹¹ झांह लेह कि परमेश्वरे दि कुई “कुकम था लंहि” दोई ए दी ला कुहषी तोह, “केई हत्या था लोह” झांह लेह अगर केई कुकम माह लहरी पर हत्या लहरी तांला काह कानूनो उल्लंघन लहज़ातन।

¹² दुह मीहतु ठ्रोह कुंई दंङ व्यवहार लंहि, अतु फेंसला नियम कानूनो ठ्रोह शोतो अंऊ हेंदिंङ आज़ाद लेह च़रच़ा।

¹³ छना कुचे अच़ि दया माह लहरी, दोऊ फेंसला दाह मेह शोतो; पर अरिला ऊईतु टोहकठे दया लोहतो, दंङ परमेश्वर ला दोऊ टोहकठे दया लोहतो अपेहल दोई न्याय लोहतो।

विशवास ए कर्म

¹⁴ हे गिऊ प्यारे साथी विशवासी रे, अगर अच़िया कुई ताकि गिह्बी यीशु मसीहू टोहकठे विशवास तोह पर दोई ऊईतु थल्जी रूठे कम माह लहज़ा, दंङ दिरंङ छि फायदा? छि झांह ठ्रोह विशवास अपेहल दोऊ उद्धार लेह तरपोतो आ? माह! बिल्कुल माह

¹⁵ अगर अरिया विशवासी न्वा ए रिहंङ बि खमज़े तु ज़रूरत शुई ता, दंङ दोतिंङ हर ध्याड़ा बगतो ज़रूरत शुई ता,

¹⁶ दंङ केहतु बिचंङ अरिया दोबि कोहतो, “परमेश्वर केतिंङ आशीष रमतो, केरे च़हषी बंङज़ेंई दंङ कहषी बंङज़ुंई,” पर अंऊ चीज़ारे फुको थल्जी रूठे तोह अगर केरे दोतिंङ माह रमोनि, दंङ दुह शब्दा तु छि फायदा तोह? छल्ले माह।

¹⁷ ध्वांए ए विशवासी ला, अगर रूठे कम रंङ साते माह शोतो ता बेकार तोह।

¹⁸ अगर अच़िया झांह कुट्रा कि, “कनिंङ विशवास तोह, दंङ गेह रूठे कम लहज़ातग।” पर गेह कुट्रतग कि केई केनोह विशवास गिह्बी रूठे कम मेह साबित लोह; दंङ गेह घेंङौ विशवास घेंङौ कमो दोरच़ी कनिंङ साबित लोहग।

¹⁹ कनिंङ विशवास तोह कि इच्च़ा ए परमेश्वर तोह; केई रूठे लहज़ातन; मांजी आत्माज़ि ला झांह ठ्रोह विशवास लहज़ातोर, दंङ डकेक्पा तोर।

²⁰ पर हे निक्कमे मीहरे, केई दि ला माहञेंच़ातन, कि रूठे कम मेह विशवास ध्यांए तोह?

²¹ अपेहल हेंदु पूर्वज अब्राहमे एनोह योह इसहाक बि बेदीऊ टोईच़ी चढ़ाएक्ते दंङ दोई छि रूठे कम लाहते दोऊ दोरच़ी ए दुह परमेश्वर ओ तुहई ज़ि धर्मी शुहचे इलि।

²² केई खंई च़रतिन कि विशवासो दोरच़ी दोऊ कमरंङ साते मिलेकी रूठे लेह च़रति दोऊ विशवास दोऊ कमो दोरच़ी सिद्ध शुहचे इलि,

²³ दंङ पवित्रशास्त्रो दि बचन पूरा शुहचे इलि कि; “अब्राहमे परमेश्वरो टोहकठे विशवास लहरी, दंङ दोऊ विशवासो थल्जी परमेश्वरे दोबि इच्च़ा धर्मी मीहू रूपा रि ग्रहण लहरी, दंङ दुह परमेश्वरो मित्र शुई।”

²⁴ केहच़ी तंङातंई कि मीह सिर्फ विशवासारंङ साते ए मशत, पर एनोह रूठे कमो दोरच़ी ला धर्मी मीहू रूपारिंङ ग्रहण शोतो।

²⁵ ध्वांए ए राहब मिन्दु मेच़िमी कुकम लहज़ा तोहई, अपेहल दोई दूतारिङ एनोह चुंङ तहरि, दंङ ऊई अमरिंङ ज़ि च़चे च़रति, दंङ दुह एनोह ला एनोह रूठे कमो थल्जी इच्च़ा धर्मी मीहू रूपारिंङ ग्रहण शुई।

²⁶ छना फुक सग मेह सिए दोतु ठ्रोह तोह, ध्वांए ए विशवास या धर्म ओ कम मेह बेकार तोह।