याकूब 1 - लाहौली बाइबिल

अभिवादन

¹ गेह याकूब अंऊ परमेश्वर ए प्रभु यीशु मसीहऊ दास शुगाह, इस्राएलो अंऊ सनी गोत्र अंऊ संसारो शत्‌ह-शत्‌ह ठहरि बंङज़ा तोरे केतिंङ दि डाक चेहच़ातग केतिंङ भत्तेतिंङ गिऊ नमस्ते।

विशवास ए बुद्धिमानी

² हे गिऊ प्यारे साथी विशवासी रे, अपेहल केहतु टोहकठे महसे पाहठी मुसीबत अपतो, दोहपल दिबी महसे खुशी ओ गप्पा समझेक्तुंई।

³ छना कुचे केहच़ी ञेंहच़ातंई कि केहतु विशवास परखेक्सा योतो, दोहपल केहतु धीरज़ बणेक्पोतो।

⁴ केतिंङ हर इच्च़ा मुसीबत रिंङ धीरज़ रंङ साते बंङज़ी सिखेक्सी जूंशी तोह, ताकि केरे आत्मिक जीवन रिंङ सिद्ध शुहचे योंई, दंङ केतिंङ अंऊ ला रूठे गुणो कमी माह शोतो।

⁵ अगर केहतु बिचंङ अतिंङ बुद्धि ऊ कमी तोह, दंङ परमेश्वरो दोरच़ी पेट्रोंई, अच़ि बिना गलती मेह भत्ते तिंङ भरपूरी रंङ साते रंड्रा, दंङ परमेश्वरे केतिंङ ला रमतो।

⁶ पर विशवास रंङ साते पेट्रोंई, दंङ दि शक थालंही, छना कुचे शक लहज़ा दुह समुंद्रो छ्व्ली ठ्रोह लेहसा लहज़ी अंऊ लंदंङ साते बहेक्सी ए त्रुसेक्पि।

⁷ झांह ठ्रोह मीह दि था समझेक्तेंई, कि गिह्बी प्रभु दोरच़ी छा खोकसोतो,

⁸ दुह मीह झुह्ट सेहमारंङ तोह, दंङ एनोह भत्ते गप्पारिंङ चंचल तोह।

गरीबी ए अमीरी

⁹ दोरे विशवासीरे अंऊ गरीब तोतोर दोतिंङ खुश शुहबी जूंस छना कुचे दोरे परमेश्वरो थल्जी खास तोतोर।

¹⁰ दोरे विशवासी अंऊ साहुकार तोतोर दोतिंङ खुश शुहबी जूंस कि परमेश्वरे दोतिंङ नम्र लहसी ततो, छना कुचे दुह ए टंगा-ढबाह श्रांङों ऊड्रंतु ठ्रोह योह्सा योतो।

¹¹ ऐके ज़िरसा ए महस ठ्रोत लेहके यवाह दंङ श्रांङ कारपि लेह केट्रा, दंङ दोऊ उड़ द्चिह य्वात, दंङ दोऊ सलटे अच़ा यवात; ध्वांए साहुकार ला एनोह कमो दोरच़ी योह्सा योतो।

परख ए प्रलोभन

¹² धन्य शुह दुह मीह, अंऊ परीक्षारिंङ खड़े बंङज़ा, अपेहल दुह परीक्षा दोरच़ी पार शुहचे यवाह दंङ दोबि इच्च़ा ईनाम खोकसोतो। अंऊ अनंत जीवनो दुह मुकुट तोह अपि रंड्रीमी वाईदा परमेश्वरे एनोह दाह लहज़ा तंङ साते लहसी ततो।

¹³ अपेहल ला अतुआ परीक्षा शोतो, दंङ दोई दि कुट्री माह जूंस, कि गिऊ परीक्षा परमेश्वरो दोरच़ी शवाह; छना कुचे मदम गप्पा रिंङ परमेश्वरो छल्ले लेना-देना माह दंङ माह ए दोई एनेह अरिया परीक्षा रिंङ केह्चे तरच़ी।

¹⁴ मीहरे एनोह ए मदम हिटी रंङ साते गलत लेह जुंज़ातोर, दंङ परीक्षारिंङ फसेक्पातोर।

¹⁵ दिऊ थल अपेहल दोरे पाप लहच़िमी कल्पना लहज़ातोर, दंङ दिरिंङ पाप पैदा शवाह दंङ अपेहल पाप बड़ेंके यवाह दंङ थल मुखंङ दुह हमेशा ओ थल्जी सिए यवात।

¹⁶ हे गिऊ प्यारे साथी विशवासी रे, धोखा थाज़ई।

¹⁷ छना कुचे हर इच्च़ा रूठे वरदान दंङ हर इच्च़ा रूठे दान परमेश्वरो दोरच़ी खोकसा, अच़ि सर्गंङ भत्ते छंङी तिंङ बणाएक्तो। परमेश्वर हमेशा इच्च़ा ठ्रोह तोह दंङ दुह सिलमो ठ्रोह लेहक्सा माह।

¹⁸ दोई एनोह ए हिटीरंङ साते हेंदिंङ हेले बचनो दोरच़ी खरकोई जीवन रांहषी ततो, दोई दि झांह लेह लहरी ताकि ञेंरे विशवासी हर दुह चीज़ो खास हिस्सा शोंई, अंऊ दोऊ दोरच़ी बणाषी शुह।

रेड्री ए लज़िह

¹⁹ हे गिऊ प्यारे साथी विशवासी रे, दि गप्पा केहच़ी ञेंई च़रतुंई; हर इच्च़ा मीह रेड्रीमी थल्जी तेयार दंङ कुट्री ए रोहष सूले शुहबी जूंस।

²⁰ छना कुचे अपेहल ला अच़िया मीह रोहष लोहतो, दंङ दुह भलाई गप्पा लेह मरपोतो, अतंङ परमेश्वर खुश शुहबी।

²¹ झांह लेह भत्ते मांजी ए बैर भाव शत्‌ह लेह च़रतेंई, दुह परमेश्वरो बचन नम्रतारंङ साते ग्रहण लेह च़रतेंई, अंऊ सेहमरिंङ केहषी तोह दंङ अच़ि केहतु प्राणो उद्धार लेह च़रच़ा।

²² सिर्फ परमेश्वरो बचनो रेड्रा केतिंङ धोखा थारांई; केतिंङ दुह लेह जुंशी तोह अंऊ परमेश्वरे कुट्रा।

²³ छना कुचे अरिला बचन रेड्रा शोतो, दंङ दोऊ भाषे लहज़ा माह शोतो, दंङ दुह, दुह मीहू बराबर तोह अंऊ एनोह असली मोह्द अर्शिरिंङ खंड्रा।

²⁴ दुह ऐनाबि खंड्रा अच़ा य्वात, दंङ दोथर ए पेहषा य्वात कि दुह छना ठ्रोह तोहई।

²⁵ दुह मीह अंऊ परमेश्वरो सिद्ध कानूनो ध्याना रंङ साते अध्धयन लहज़ा अच़ि मीहतिंङ पापो दोरच़ी मुक्त लहज़ा, दोई एनोह कमरिंङ झांह लेह आशीष खोकपोतो कि रेड्राते माह पेहषा, पर ध्वांए ए कम लहज़ा।

²⁶ अगर अच़िया एनाबि भक्त समझेक्च़ा, पर मांजी गप्पा कुट्रिमी थल्जी एनोह लेह रिंङ काबू माह तहज़ा दंङ दुह एनाबि धोखा रंड्रा, दंङ दोऊ भक्ति बेकार तोह।

²⁷ हेंदु बाह परमेश्वरो कछंङ रूठे ए निर्मल भक्ति दि तोह, कि याह मेह बाह मेह ए रंणीतु झगड़ारिंङ दोतु सुधि लेहप्तुंई, दंङ केनातिंङ संसारो दोरच़ी निष्कलंक तंही।