इब्रानियों 9 - लाहौली बाइबिल

संसारो तम्बू सेवा

¹ दू मुण्डो वाईदा ओ पाहठी अंऊ महसे तुहई मूसा ओ दोरच़ी इस्राएलो मीहतिंङ रांहषी तोहई, दोर परमेश्वरो अराधना लहज़िमी भत्ते कानून तोहई दंङ दोतु कछंङ अराधना ओ इच्च़ा तम्बू तोहई अंऊ मीहतु दोरच़ी बणाएषी तोहई।

² दि तम्बू घ्वांणातु च़मो दोरच़ी बणेंके तोहई। दू तम्बू बिचंङ, दोच़ी इच्च़ा पर्दा लेहच़ी च़रतिर दंङ झुह्ट कमरा बणाके च़रतिर। इच्च़ा कमरारिंङ इच्च़ा धूपदान तोहई अतु निह्ज ब्रन्ज़ेर तोईरे। दोर इच्च़ा मेज तोहई अंऊर परमेश्वरा बि चढ़ाएसी थल्जी रोटी चढ़ाएच़ातेर दि कमरा बि पवित्र ठहरि कुट्रातेर।

³ अई कमरा अंऊ परदा ओ थलेच़ि तोहई, दोबि परमपवित्र ठहरि कुट्रातेर।

⁴ दि कमरारिंङ इच्च़ा ज़ङों वेदी तोहई, अतु इस्तेमाल धूप जलाच़िमी थल्जी शवाते। दंङ दोर्तिंङ इच्च़ा बक्सा ला तोहई अंऊ तोंङ ए धकते ज़ङों ए तोहई। दू बक्सो बि वाईदा बक्सा कुट्रातेर। बक्सो अंदरेग षुमु चीज़ारे तोईरे। भत्ते बे मुण्डा इच्च़ा ज़ङों नंदे तोहई अंऊर इच्च़ा खास बगत तोहई अपि “मन्ना” कुट्रातेर। देर्तिंङ हारूनो लट्टी ला तोहई, दंङ अंकुरित लपतेर ला तोईरे, अतु टोईच़ी परमेश्वरे दू सा हुकुम च़ेहसी तहरे, अंऊ दोई मूसा बि रंदे।

⁵ दिऊ अलावा बक्सो टोईच़ी तेजोमय करूब मिंदंङ झुह्ट पखारंङ साते बणाषी तोहई, अंऊ दि गप्पो इशारा तोहई कि परमेश्वर ठहरि टोहकठे तोह। दोतु अलसी पखार बक्सा ओ तोंरिखी हिस्सा कपची तरच़ातेर अतु टोहकठे शुई पुरच़ातेर ताकि मीहतु पाप माफ शोर। कि इच्च़ा-इच्च़ा लहज़ी दोतु बखान लेह मरच़ि।

⁶ झांह ठ्रोह दोच़ी दू भत्ते चीज़ातिंङ तम्बू झुह्ट कमरा रिंङ तेयार लेह च़रतिर। दंङ यहुदी पुरोहित हर ध्याड़ा एनोह धर्मिक विधि पूरा लहज़िमी थल्जी कमरारिंङ यवातेर।

⁷ पर ऊईतु कमरारिंङ सालो इच्च़ा फेरा यवातेर, सिर्फ यहुदी महापुरोहित यवाते। दू हमेशा दू त्रैंईतु शुई शिलज़ते अंऊ बलि चढ़ाएच़ातेर। दि शुहई बि एनोह पापो माफी ओ थल्जी दंङ मीहतु पापो माफी ऊ थल्जी परमेश्वरा बि चढ़ाएच़ाते अंऊ दोच़ी अंजान रिंङ लाहतेर।

⁸ दि विधियो दोरच़ी पवित्र आत्मा हेंदिंङ दि कंड्रा कि अपेहल तचेक दि धरती रिंङ मिलापो तम्बू ए दोऊ कानूनो भाषे लहरिन ता, धोंण तचेक स्वर्गंङ परमेश्वरो परम पवित्र ठाहरीरिंङ इबिमी अम बन्द तोह।

⁹ दि भत्ते चीज़ारे दि गप्पो उदाहरण तोहई अंऊ हेंतेग मसीहू दोरच़ी पूरा शुहबी लेहकी तोह। छना कुचे दू भत्ते तग ए बलिदान अंऊ दू मीहतु दोरच़ी परमेश्वराबि चढ़ाएच़ातेर अंऊ दोतु अराधना लहज़ातेर, दू मीहतु सेहम शुद्ध लहज़िमी जोगे माह तोहई।

¹⁰ छना कुचे दोरे सिर्फ मीहतु ज़ेई ए तुंङमिमी चीज़ा तु पाहठी दंङ महसे सुज़िमी पाहठी कंड्रातेर अतु दोरच़ी मीहरे धकते च़ि संङा शुहचे यवातेर दि ज़रूरी तोहई कि दि कानूना बि दोहपल तचेक पूरा लोहर अपेहल तचेक कि परमेश्वरे मीहतंङ साते इच्च़ा खरकोई वाईदा माह लोहतो।

मसीहू शुई ओ सामर्थ

¹¹ पर हेंतेग मसीह यहुदी महापुरोहित बणेंके इलज़ा अंऊ खरकोई वाईदा ओ भत्ते रूठे हिद रंड्रा, अंऊ हेंदु दोर्तिंङ तुहई बेहच़ी तोहई। दोई स्वर्गंङ ऊई ला मोह्ड़े, सिद्ध मिलापो तम्बू रिंङ प्रवेश लहरी, अंऊ मीहतु गुह्ट्र बणेषी माह, गिऊ कुट्रीमी मतलब, अंऊ दि संसारो हिस्सा माह।

¹² यीशु मसीह परमपवित्र ठहरि छगढ़ो ए रेंज़ो शुहई रेंज़ा मेहलि, पर दू एनोह ए शुहई रेंज़ा इलि। दोई दि सिर्फ इच्च़ा ए फेरा लहरी, दंङ दिबी यह्च़ा लहज़िमी थल्जी अपेहल ला ज़रूरत माह शोतो। दोऊ दोरच़ी ए हेंदिंङ उद्धार खोकसी शुह।

¹³ पुराना कानूनो हिसाबे यहुदी पुरोहित जानवरा तु शुहई ए बलि ऊ तब (राख) मीहतु टोईच़ी पुरच़ातेर अंऊ विधि ऊ हिसाबे अशुद्ध शवाहतोर। झांह लेह दोतु फुक यह्च़ा शुद्ध शुहचे यवाह, अगर दिरिंङ शुद्ध लहज़िमी सामर्थ तोह ता,

¹⁴ दंङ सोचेक्तुंई कि मसीहू शुहई हेंदु सेहमा बि दू कमो दोरच़ी अंयों शुद्ध लोहतो अंऊ मौतो हखा शिलज़ातोर, ताकि हेनर श्रींङे परमेश्वरो सेवा लोहनि। छना कुचे अनंत आत्माओ सामर्थो दोरच़ी, मसीह ज़ि हेंदु पापो थल्जी एनाबि बलिदान लेह परमेश्वर बि भेंटो रूपारिंङ रें च़रति।

¹⁵ झांह लेह मसीह मीहतंङ साते इच्च़ा खरकोई वाईदा लहज़ा, ताकि दोरे मीहरे अंऊ परमेश्वरो तरफे बुलासी तातोर, दोरे दू अनंत आशीष खोकपोरे अतु वाईदा परमेश्वरे लहसी ततो झांह दिऊ थल्जी शुहबी तरपोतो छना कुचे मसीह दोतिंङ दू पापो सज़ाओ दोरच़ी आज़ाद लेह च़रच़िमी थल्जी सिए इलि अंऊ दोच़ी तुहई कि वाईदा ओ अधीन बंङज़ा ते लाहतेर।

¹⁶ वाईदा इच्च़ा बसियत नामो ठ्रोह तोह, बसियता रिंङ दि साबित लहच़ी जूंशी तोह कि अच़ि वाईदा लहसी तोह, दू सिए इलजी तोह।

¹⁷ दू मुक्का दू वारिसे दू भत्ते धिर खोक्शे तरपोतो अंऊ बसियता रिंङ दोबि रांहषी तोहई। छना कुचे अगर बसियत बणाएच़ा दू अईता श्रींङे तोह, दंङ दि शुहबी मरपोतो कि दोऊ दोरच़ी रांहषी बसियत लागू शोतो।

¹⁸ दि वहज़ा तोह, कि परमेश्वरो दोरच़ी रांहषी मुण्डो वाईदा पक्‍का शुहबी बे तुहई इच्च़ा बलि शुहबी ज़रूरी तोहई।

¹⁹ भत्ते बे तुहई, मूसा ओ कानूने मीहतिंङ भत्ते हुकुमो पाहठी कंङातो। दोऊ थल दोई रेंज़ा तु शुहई लेहपच़ी दंङ दोबि तिऊ अंदरेग केहच़ी च़रति। दंङ दोई दिबी कानूनो कताब ए भत्ते मीहतु टोहकठे पुरच़िमी थल्जी षेह्ई च़म ए ज़ूफा मिंदंङ इच्च़ा पौधा ओ ब्रन्ज़ इस्तेमाल लहरी।

²⁰ दंङ मूसा ज़ि मीहतु हखा कुई, “दि शुहई दू वाईदा बि शुरू लहज़ा अपि मनेक्च़िमी हुकुम परमेश्वरे केतिंङ रांहषी तते।”

²¹ दंङ दिए रीतिरंङ साते मूसा ज़ि तम्बू ए अराधना ओ भत्ते समानो टोईच़ी शुहई पुरति।

²² मूसा ओ कानूने कुट्रा कि लगभग भत्ते चीज़ातिंङ शुहई पुरच़िमी दोरच़ी शुद्ध लेह जूंशी तोह। शुई बहाके मेह, परमेश्वर मीहतिंङ दोतु पापो थल्जी माफ लेह मरपोतो।

मसीहू बलिदानो दोरच़ी पापो माफी

²³ झांह लेह संसारिक तम्बू बि दंङ दोर्तिंङ मौजूद भत्ते चीज़ा तिंङ जानवरा तु शुई दोरच़ी शुद्ध लेह पढ़ेक्पाते। दि दू चीज़ा तु नकल शुह अंऊ स्वर्गंङ तोह। पर स्वर्गंङ चीज़ा तिंङ शुद्ध लहज़िमी थल्जी जानवरतु शुई बे बढ़कर रूठे बलिदानो दोरच़ी शुद्ध लहज़िमी ज़रूरत तोहई।

²⁴ दोऊ वहज़ा ज़ि, मसीह दू पवित्र ठहरि मेहलि अतिंङ मीहच़ी बणाषी शुह, अंऊ कि परमपवित्र ठहरि ओ सिर्फ इच्च़ा नमूना तोह। पर दू स्वर्गंङ इलि अंऊर दू हेंदु फायदा ओ थल्जी परमेश्वरो तुईज़ी हाज़िर शुहबी तरपोतो।

^25-26 यहुदी महापुरोहित हर साल इच्च़ा जानवरो शुहई रैंज़ा परमपवित्र ठाहरीरिंङ यवाह। पर मसीह एनाबि घड़ी-घड़ी बलिदान लेह मेहलि अगर दोबि झांह लेह शुचंङ ता दंङ दोबि संसारो रचना ओ तुहई महस फेरा बलिदान शुहबी लेह लेह्पोतो। पर हेंतेग दि अंतिम जुगारिंङ मसीह हेंदु थल्जी एनोह बलिदानो दोरच़ी पापो शाक्ति बि हमेशा ओ थल्जी योहच़िमी थल्जी इच्च़ा फेरा भत्ते तु थल्जी प्रगट शुई।

²⁷ हर इच्च़ा मीहू इच्च़ा फेरा सि पक्‍का तोह। सिमी थल परमेश्वर हर इच्च़ा मीहू न्याय लोहतो।

²⁸ ध्वांए ठ्रोह, मसीह ला भत्ते मीहतु पाप बि एनोह टोईच़ी कुरच़ा इच्च़ा फेरा बलिदान शुहचे इलि। अपेहल दू दोबारा अपतो दू मुक्का दू पापो थल्जी बलिदान शुहबी मशत पर दोतिंङ बचाएच़िमी थल्जी अपतो अंऊ दोबि रुमज़ा तोतोर।