इब्रानियों 8 - लाहौली बाइबिल

यीशु हेंदु मोह्ड़े पुरोहित

¹ हेंतेग अंऊ गप्पा ञेंहच़ी कुट्रातंई, दोतु बिचंङ भत्ते बे मोह्ड़े सच्चाई दि तोह, कि ञेंहतु कछंङ झांह ठ्रोह यहुदी महापुरोहित तोह, अंऊ हेंतेग ला स्वर्गंङ परमप्रधान परमेश्वरो सिहासन सुचंङ हासी बंङज़ा इलजी तोह,

² हेंदु मोह्ड़े पुरोहित स्वर्गंङ महस पवित्र ठहरि ए दू सच्चा तम्बू सेवक तोह, अपि अच़िया मीहच़ी मशत, पर प्रभुज़ि खड़े लहसी शुह।

³ छना कुचे हर इच्च़ा यहुदी महापुरोहित बि भेंट चढ़ाएच़िमी थल्जी दंङ पापो माफी ओ थल्जी बलिदान चढ़ाएच़िमी थल्जी अंङषी शुहबी, झांह लेह ज़रूरी तोह कि, कि हेंदु यहुदी पुरोहितो दोर ला छा चढ़ाईच़िमी थल्जी शुहबी जूंस।

⁴ दंङ अगर मसीह धरतीऊ टोईच़ी शुचंङ ता अपेहल ला यहुदी पुरोहित माह शुंईयां, छना कुचे मूसा ओ कानूनो हिसाबे भेंट चढ़ाएच़िमी थल्जी, तुहई बेहच़ी पुरोहित मौजूद तोतोर।

⁵ दोरे अंऊ पुरोहिता तु रूपा रिंङ कम लहज़ातोर, दोरे हेले रिंङ अंऊ स्वर्गा रिंङ छिल्ला तोह सिर्फ दोऊ इच्च़ा नकल ए इच्च़ा सिलमोग तोह। दि दुह ए शुह अंऊ मूसा रंङ साते तोहई। छना कुचे अपेहल मूसा मिलापो तम्बू बणाएषी थल्जी तेयार शुहबी लेहकी तोहई, दू मुक्का परमेश्वरे दोबि दि चेतावनी रांई, “खंणु, अंऊ नमूना कनिंङ गोहू टोईच़ी कंङातोर, दोऊ हिसाबे भत्ते धिर बणातु।”

⁶ पर अंऊ पुरोहितो कम यीशु मसीह बि खोकसिरी, दुह, दू कम बे महस मोह्ड़े तोह अंऊ ऊई पुरोहिता तिंङ रांहषी तोहई। छना कुचे दुह, दू ए शुह अंऊ मोह्ड़े वाईदा ओ हिसाबे, परमेश्वरो तुईज़ी हेंदु थल्जी इच्च़ा मोह्ड़े वाईदा ओ बिचवाई लहज़ी लेहकी तोह।

खरकोई वाईदा

⁷ छना कुचे अगर दू मुण्डो वाईदा निर्दोष शुचंङ ता, दंङ अई वाईदा ओ ज़रूरत शुहबी ए माह तोहई।

⁸ पर परमेश्वर मीहतु टोईच़ी दोष लगाके कुट्रा, “प्रभु ज़ि कुट्रा, खंई, दू ध्याड़ा अपि लेहकी तोह, कि गेह इस्राएलो मीहतंङ साते, दंङ यहूदा ओ मीहतंङ साते, इच्च़ा खरकोई वाईदा स्थापित लोहग।”

⁹ दि वाईदा ध्वांए माह शोतो छना गेह घेंङौ बाह-मेमेतंङ साते दू मुक्का लाहतेर, अपेहल गेह दोतु गुह्ट्र च़ुमने मिस्त्र देशो दोरच़ी हुंच़िमी थल्जी दोतु अगुवाई लाहतेग। प्रभु ज़ि कुट्रा, दोरे गिऊ वाईदा रिंङ टिकेगी मरतिर, दंङ गेह दोतु चिंद लहज़ी छोड़ेके च़रतिग,

¹⁰ यह्च़ा प्रभु ज़ि कुट्रा, कि अंऊ खरकोई वाईदा दू मुक्का अपेहल गेह अपोग दोहपल इस्राएलो मीहतंङ साते लोहग। दू दि तोह कि, गेह दोतिंङ घेंङौ कानूनो पाहठी सोच़ेक्सी लोहग, दंङ दोरे दोबि एनोह सेहम तोहर अतु दोच़ी अराधना लोहर।

¹¹ दंङ हर इच्च़ा एनोह देश वासी बि दंङ एनोह नातातिंङ दि शिक्षा रंड्रीमी छल्ले ज़रूरत माह, कि “काह प्रभु बि सेहच़ी च़रतु।” छना कुचे कवचि बे मोह्ड़े तचेक दोरे भत्तेरे स्वीकार लेह च़रपोर कि गेह दोतु परमेश्वर शुगाह।

¹² छना कुचे गेह दोतु पाप माफ लेह च़रपोग, “दंङ दोतु पाप यह्च़ा हिद माह लहग।”

¹³ परमेश्वरे दिबी इच्च़ा खरकोई वाईदा कुहषी ततो, झांह लेह दोई मुण्डो वाईदा बि पुराना लेह च़रति। दंङ छिल्ला युई तोह दंङ घाषेक्सी तोह दू नाश शुहबिमी थल्जी तेयार तोह।