इब्रानियों 7 - लाहौली बाइबिल

मलिकिसिद्क पुरोहित

¹ दि मलिकिसिद्क शालेम शहरो रज्ज़ा तोहई, दंङ परमप्रधान परमेश्वरो यहुदी पुरोहित तोहई। दोऊ मिन्दु मतलब शुह न्याय रंङ साते शासन लहज़ा रज्ज़ा दंङ शालेमो रज्ज़ाऊ मिन शुह, शांतिऊ रज्ज़ा, पवित्र शास्त्रारिंङ दोऊ बाह ओ याह, दोऊ बाह-मेमेर या दोऊ जेह्कपिमी या सिमी पाहठी छल्ले च़ेहसी माह। दू हमेशा ओ थल्जी इच्च़ा यहुदी पुरोहित शुह। झांह लेह दू परमेश्वरो योह ठ्रोह तोह। अपेहल अब्राहम रज्ज़ा तु खिलाप इच्च़ा मोह्ड़े लड़ाई द्रक्क्षा ते चुंखा अति, दोहपल मलिकिसिद्क दोरंङ साते दोहरी दंङ दोबि आशीष रेंई। दोहपल अब्राहमा बि दू लड़ाई रिंङ द्रक्शे ते छिल्ला खोकसते, दोई दोबि दू भत्ते चीज़ तु दशमांश रेंई।

² अब्राहमे मलिकिसिद्क बि लड़ाई रिंङ द्रक्शे हासी भत्ते चीज़ो दसवां हिस्सा रांई, मलिकिसिद्को मिन्दु मतलब शुह, “धर्मो राजा” शुह, दंङ शालेमो मतलब शुह, “शांति” शुह, दंङ दू “शान्तिऊ रज्ज़ा” ला शुह।

³ अतु माह बाह, माह याह, माह छा खानदान तोह, अतु माह ध्याड़ो शुरूआत तोह, दंङ माह ए जीवनो अंत तोह; पर परमेश्वरो योह ठ्रोह दू हमेशा ओ थल्जी यहुदी पुरोहित तोह।

⁴ हेंतेग दिऊ टोईच़ी ध्यान लंहि कि मलिकिसिद्क अंयों महान तोहई, अपि हेंदु पूर्वज अब्राहमे लड़ाई रिंङ द्रक्शे हासी भत्ते चीज़ा तु दसवां हिस्सा रें च़रति।

⁵ मूसा ओ कानूने दि कंड्रा कि लेवीऊ खानदानो बिचंङ अंऊ यहुदी पुरोहित बणाएक्च़ातोर दोतिंङ इस्राएलो मीहतिंङ मतलब एनोह मीहतु दोरच़ी दसवां हिस्सा लेहपच़ी जूंशी तोह। पर यहुदी पुरोहित ए दोतु एनातु मीहरे न्वारे तु ठ्रोह तोतोर छना कुचे दोरे भतेर अब्राहमो खानदानो तोईरे

⁶ पर दि मलिकिसिद्क, अंऊ लेवी ओ खानदानो माह तोहई, दोई अब्राहमो दोरच़ी दसवां हिस्सा लेहपति, हालांकि अब्राहम दू तोहई अतिंङ परमेश्वरो वाईदा खोकसा तोहई, तांला मलिकिसिद्के दोबि आशीष रांई।

⁷ ञेंहच़ी रूठे रंङ ञेंहच़ातंई कि अच़ि आशीष रंड्रा दुह आशीष लेहपच़ा बे मोह्ड़े शुहबी।

⁸ पुरोहिता तिंङ हर चीज़ो दसवां हिस्सा खोकसते, पर दोरे मीह शुहबिमी पाहठी सिए यवातेर। मलिकिसिद्क भत्ते धिरो दसवां हिस्सा लेहपच़ते, पर पवित्र शास्त्रे हेंदिंङ कंड्रा कि दुह विशवास तचेक ला श्रींङे तोह।

^9-10 हेंज़ी दि ला कुट्री तरपोंई कि लेवी ऊ खानदानो मीहतु दोरच़ी अंऊ दसवां हिस्सा लेहपच़ातेर, मलिकिसिद्क बि भत्ते चीज़ो दसवां हिस्सा रांई, दू मुक्का दू लेवी हर चीज़ो दसवां हिस्सा लेहपच़ते। हालांकि दुह मुक्का तचेक लेवी अब्राहमो खानदाना रिंङ जेह्की माह तोहई, पर दुह अब्राहमो फुकारिंङ तोहई।

मलिकिसिद्को ठ्रोह ऊई पुरोहित

¹¹ पर मूसा ओ कानूना रिंङ दि कुहषी तोह, कि यहुदी पुरोहित लेवी ऊ खानदानो शुहबी जूंस, छना कुचे पुरोहित अपिला सिद्ध बणेके मरच़ा। झांह लेह अई इच्च़ा पुरोहितो अपिमी ज़रूरत तोहई, इच्च़ा झांह ठ्रोह पुरोहित अंऊ हारूनो ठ्रोह मशत पर मलिकिसिद्को ठ्रोह तोहई।

¹² छना कुचे अंऊ मुक्का यहुदी पुरोहितो ठहरि लेहक्सा दू मुक्का कानून ला लेहक्सी जूंशी तोह।

¹³ हेनर दि गप्पा मसीहू पाहठी कुट्री लेहकी तोतोंई, अंऊ शत्‌ह गोत्रो तोहई दू गोत्रो बिचंङ ज़ि अपेहल ला अच़िया इच्च़ा यहुदी पुरोहितो ठ्रोह वेदी ऊ सेवा लहसी माहतरेर।

¹⁴ भत्ते ज़ि ञेंहच़ातंई, कि हेंदु प्रभु यीशु मसीह यहूदा खानदानो शुह मूसा ज़ि यहूदा ओ खानदानो अतुला यहुदी पुरोहित बणेक्पिमी पाहठी कांहषी माह दंङ माह अपेहला यहूदा ओ खानदानो बिचंङ अरिया यहुदी पुरोहित बणेंके शुह।

¹⁵ हेनर हेंतेग ऊई ला रूठे रंङ समझेकी तरपोंई, कि मूसा ओ कानून लेहक्सी इलजी तोह, छना कुचे हेंदु मोह्ड़े पुरोहित अंऊ हेंतेग अंज़े तोह, दू मलिकिसिद्क ठ्रोह इच्च़ा यहुदी पुरोहित तोह।

¹⁶ यीशु खास मीहू मतलब लेवीऊ खानदाना रंङ साते तालुक तहज़ा कानूनो वहज़ा ज़ि यहुदी पुरोहित माह बणेक्ति पर दू जीवनो सामर्थो दोरच़ी यहुदी पुरोहित बणेंके इलि अंऊ अपेहल ला योह्सोतो माह।

¹⁷ छना कुचे परमेश्वरे दोऊ पाहठी पवित्र शास्त्रारिंङ कुहषी ततो, “काह मलिकिसिद्को बराबर हमेशा ओ थल्जी यहुदी पुरोहित बणेंके इलिन।”

¹⁸ तुहई मूसा ओ कानून दू लेह मरति अंऊ दोतिंङ लेह जूंशी तोहई; दंङ छल्ले कमो जोगे माहशुबी रंङ साते लेहक्सा इलि।

¹⁹ झांह लेह मूसा ओ कानून अंऊ ला गप्पा सिद्ध माह लहज़ा, पर दोऊ ठाहरीरिंङ हेंदु दोर इच्च़ा मोह्ड़े उम्मीद तोह अंऊ यीशु मसीह रिंङ तोह, अंऊ दोऊ दोरच़ी हेनर परमेश्वरो कछंङ अपि तरपोंई।

²⁰ दिरंङ साते ए अंऊ मुक्का परमेश्वरे यीशु मसीह बि यहुदी पुरोहितो रूपारिंङ नियुक्त लहरी दंङ दोई इच्च़ा वाईदा लहरी।

²¹ छना कुचे लेवी ओ खानदान ता वाईदा मेह यहुदी पुरोहित बणेंके इलिर, पर यीशु कसमा रंङ साते परमेश्वरो तरफे नियुक्त लेह च़रति अच़ि दोऊ पाहठी कुहषी तोह, “गेह परमेश्वर, अंऊ दि कसम ज़ोवातग, दंङ गेह घेंङौ फेंसलो दोरच़ी पछताएपोग माह कि, काह हमेशा ओ थल्जी यहुदी पुरोहित बणेंके इलोन।”

²² झांह लेह यीशु दू शुह अंऊ इच्च़ा मोह्ड़े वाईदा ओ पूरा लहज़िमी वहज़ा तोह।

²³ देर यीशु मसीहू यहुदी पुरोहित शुहबिमी अई इच्च़ा फायदा तोह, तुहई महस पुरोहित बणेक्च़ातेर। दोतु बिचंङ ज़ि हर इच्च़ा मौत शुहचे इलि दंङ झांह लेह दोरे एनोह कम जारी तहच़ि मरतिरे।

²⁴ पर यीशु मसीह युगानुयुग बंङज़तो; झांह लेह ऊई अरिला झांह ठ्रोह यहुदी पुरोहित माह बणेक्पोतो छना दू तोह।

²⁵ दिऊ थल्जी अंऊ यीशु मसीहू दोरच़ी परमेश्वरो कछंङ अपातोर, दू दोतु पूरा-पूरा उद्धार लेह तरपोतो, छना कुचे दू दोतु थल्जी बिनती लहज़िमी हमेशा श्रींङे तोह।

²⁶ झांह ठ्रोह ए यहुदी महापुरोहित हेंदु ज़रूरत पूरा लेह तरपोतो, अंऊ पवित्र शोतो, निर्दोष शोतो, शुद्ध शोतो, पाप लहच़ाड दोतंङ शत्‌ह शोतो अतिंङ स्वर्गो दोरच़ी ला खेका लेह केहषी तोह।

²⁷ दंङ यीशु मसीहू दू यहुदी महापुरोहिता तु ठ्रोह माह अंऊ हारूनो खानदानो तोईरे, यीशु मसीह बि दि ज़रूरी माह कि रोज तुहई एनोह पाप दंङ दोऊ थल मीहतु पापो थल्जी बलिदान चढ़ाएपोतो; छना कुचे यीशु मसीह ज़ि इच्च़ा फेरा ए भत्ते मीहतु पापो थल्जी एनाबि बलिदान लेह च़रति।

²⁸ छना कुचे मूसा ओ कानून ता कमज़ोर मीहतिंङ मोह्ड़े पुरोहित नियुक्त लहज़ा; पर दू वाईदा अंऊ मूसा ओ कानूनो थल अति दोई परमेश्वरो योह बि यहुदी महापुरोहितो रूपारिंङ अंङे च़रति। अंऊ हमेशा ओ थल्जी हेंदु सिद्ध मोह्ड़े पुरोहित बणेंके इलि।