इब्रानियों 5 - लाहौली बाइबिल

¹ हर इच्च़ा यहुदी महापुरोहित इस्राएलो मीहतु बिचंङ अंङड्री। दंङ मीहतु थल्जी परमेश्वरो सेवा लहज़िमी थल्जी अंङड्री ताकि दुह भेंट चढ़ाएच़ा लोहतो दंङ मीहतु पापो थल्जी बलि चढ़ाएपा लोहतो।

² छना कुचे दू एनाह ला कमज़ोरी ओ अधीन तोह, दिऊ थल्जी दू माह ता समझदार दोतंङ साते दंङ माह ए भटकेगी दोतंङ साते नरमीरंङ साते व्यवहार लेह तरच़ा।

³ दंङ छना दु एनाह ए कमज़ोर तोह, दोऊ थल्जी दि जूंशी तोह माह दुह सिर्फ मीहतु पापो थल्जी पर एनोह ला पापो थल्जी बलि चढ़ाएपोतो।

⁴ अरिला मीह एनेह मोह्ड़े पुरोहित शुहबिमी आदर लेहपच़ी मरच़ि। छना ठ्रोह परमेश्वरे तुहई हारूना बि मोह्ड़े पुरोहितो रूपा रिंङ बुलाकाते ए अंङे च़रते, ध्वांए ठ्रोह दोई मोह्ड़े पुरोहित बुलाचा ए अंङे च़रच़ा।

⁵ ध्वांए ठ्रोह, मसीह ज़ि ला यहुदी महापुरोहित बणाके एनोह आदर लहज़िमी फेंसला माह लहरी। बल्कि, परमेश्वरे मसीहू ओ हखा दि कुट्रा ते दोऊ आदर लहरी, कि “काह गिऊ योह शुनाह; तोग गेह घोषणा लहज़ातग कि गेह कांह ए बाह शुगाह।”

⁶ दिए तरीका रंङ ऊई ठहरि परमेश्वरे दोबि यह्च़ा कुई, “काह ध्वांए ठ्रोह तोन छना मलिकिसिद्क अब्राहमो टेमो इच्च़ा यहुदी पुरोहित ए रज्ज़ा तोहई, हमेशा ओ थल्जी यहुदी पुरोहित बंङज़ोतो।”

⁷ यीशु ज़ि दि धरती ऊ ज़िंदगी रिंङ अंऊ दोबि मौतो दोरच़ी बचाएके तरच़ाते, जोरे हाऊष रें मिक्ति बहाके, परमेश्वरो हखा प्रार्थना ए बिनती लहरी छना कुचे दुह नह्की ए समर्पित तोहई, परमेश्वरे दोऊ प्रार्थना रेड्रीरी।

⁸ हालांकि यीशु परमेश्वरो योह तोहई, तांला दोई एनोह दुखो दोरच़ी परमेश्वरो भाषे लहज़ी सीखेति।

^9-10 परमेश्वरे मलिकिसिद्को ठ्रोह दोबि यहुदी महापुरोहित ओ आदर रांही, दोबि सिद्ध बणाएति दंङ दू भत्ते मीहतु थल्जी उद्धारो शुरूआत बणेंके इलि अंऊ दोऊ हुकुमो भाषे लहज़ातेर।

विशवासो दोरच़ी भटकेक्च़िमी नतीज़ा

¹¹ दिऊ पाहठी कंड्रिमी थल्जी महस धिर तोह पर दोतु पाहठी रूठे रंङ साते कंड्री खरे तोह। छना कुचे केरे परमेश्वरो बचनो पाहठी सिखेसी थल्जी सुस्त शुहचे इलजी तोतोंई।

¹² केरे महस टेम बेहच़ी विशवास लहज़ातंई। दंङ विशवास तचेक केतिंङ सिखाच़िमी जोगे शुचि इबि जूंशी तोहई। दिऊ बजाए, केतिंङ विशवास ला अतुआ ज़रूरत तोह अंऊ केतिंङ परमेश्वरो बचनो ओ पाहठी शिक्षा यह्च़ा कंङमोतो। केरे ता झांह शुचि तोंई, ञेंईनि कि कटुरे शुई। ड्हका बगत ज़ेईमी बजाए, केहच़ी अईता ला पानु जुंज़ातंई।

¹³ अंऊ मीहरे पानु तुंङज़ाड़ तोतोर दोरे दू कटुतु ठ्रोह तोतोर अंऊ हेलेरिंङ परमेश्वरो नज़रारिंङ हेले जीवन श्रींङमी पाहठी माह ञेंहच़ातोर।

¹⁴ ढकाह बगत दोतु थल्जी शुह अंऊ विशवासारिंङ पक्‍का तोतोर, दंङ परमेश्वरो नज़रारिंङ सही जीवन‍‍‍ श्रींङमातोर दंङ शिक्षा ओ दोरच़ी सिखेक्च़ा इलांई कि छि रूठे तोह दंङ छि मदम तोह।