इब्रानियों 4 - लाहौली बाइबिल

परमेश्वरो मीहतु आराम

¹ झांह लेह, अपेहल नहच़िमी ठाहरीरिंङ इबिमी वाईदा हेंतेग ला तोह, दंङ हेंदिंङ महस खबरदार बंङज़ी जूंशी तोह; कि केहतु बिचंङ अतिंङ ला दू नह्च़िमी ठाहरीरिंङ इबिमी मौका केट्री माह जूंस।

² छना कुचे हेंज़ी यीशु मसीहू पाहठी रूठे खबर थाह्सी तातंई। पर दोच़ी दिऊ टोहकठे विशवास माह लहरिर। झांह लेह, दू खबर दोतु थल्जी शुहके तोहई।

³ झांह लेह ञेंरे मीहरे अंऊ दू गप्पो टोईच़ी विशवास लहज़ातंई अंऊ परमेश्वरे कुहषी ततो, दू नहच़िमी ठाहरीरिंङ प्रवेश लोहनि। दंङ ऊईतु पाहठी, परमेश्वरे कुहतो, “गेह घेंङौ रोह्षा रिंङ कसम लहरिग, कि दोरे गिऊ नहच़िमी ठहरि इबि मरपोर।” हालांकि दि संसारो रचना लहज़िमी मुक्का बे तेयार शुहसी तोहई।

⁴ छना कुचे निह्ज़ी ध्याड़ो पाहठी पवित्र शास्त्रा रिंङ दि च़ेहसी तोह, कि “परमेश्वरे निह्ज ध्याड़ा एनोह कम योह्च़े आराम लाहते।”

⁵ दंङ हेनर पवित्र शास्त्रारिंङ दि ला पड़ेक्च़ातंई कि दोई थले कुहते, “दोरे गिऊ नहच़िमी ठहरि अपि मरपोर।”

⁶ पर मीहतिंङ दुह आरामो ठहरि रिंङ इबिमी मोक्का विशवास ला तोह। इस्राएलो दोरे मीहरे, अंऊ दोतु बिचंङ मुण्डारिंङ रूठे खबरो घोषणा लाहतेन, दोरे इबिमी थल्जी असफल शुहचे इलिर छना कुचे दोच़ी परमेश्वरो भाषे माह लहरिर। पर मीहतिंङ दू नहच़िमी ठाहरीरिंङ इबिमी मौका हेंतेग ला तोह।

⁷ झांह लेह परमेश्वरे एनोह नहच़िमी ठाहरीरिंङ अपिमी थल्जी अई इच्च़ा टेम रांई, दंङ दू टेम हेंतेग तोह। हेंदु बाह-मेमेतु विरोधो महस साल थल, दोई रज्ज़ा दाऊदो दोरच़ी दि बचनो घोषणा लेई लहरी, अंऊ तुहई बेहच़ी कुहषी तोहई: “अगर तोग केरे परमेश्वरो सग रेड्रातंई, ता दोबि रेड्रीमी दोरच़ी इंकार थालंही।”

⁸ ञेंहच़ी दि ला ञेंहच़ातंई कि परमेश्वरे अंऊ नहच़िमी ठहरि ओ वाईदा लहसी ततो, दू कनान देश माह शुह, अंऊर इबिमी थल्जी यहोशू ज़ि हेंदु बाह-मेमेतु अगुवाई लहरी। छना कुचे अगर दि कनान देश शुचंङ ता परमेश्वर अई इच्च़ा आरामो ध्याड़ो पाहठी गप्पा माह लंहीयां।

⁹ दिऊ थल्जी परमेश्वरो मीहतु थल्जी हेंतेग ला इच्च़ा ठहरि तेयार तोह, अंऊर दोरे रूठे रंङ रुमज़ा बंङज़ातोर। दोरे ध्वांए ठ्रोह नह्च़ोर छना परमेश्वरे निह्ज ध्याड़ो थल आराम लाहते।

¹⁰ परमेश्वरे एनोह कम योह्च़े थल नह्सते। दंङ दि दू भत्ते तु थल्जी ला झांह तोह अंऊ परमेश्वरो कछंङ नह्च़ी यवातोर। दोरे एनोह कम योह्च़े थल नह्च़ोर।

¹¹ झांह लेह हेनर दू नहच़िमी ठहरि इबिमी थल्जी महस मेहनत लोहनि, अंऊ ला मीहबी दू मीहतु उदाहरणो नकल लहज़ी माह जूंस अंऊ दोच़ी परमेश्वरो भाषे लहज़िमी रंङ साते इन्कार लेह च़रति। दोहपल हेनर दू नहच़िमी ठाहरीरिंङ इबि तरपोंई।

¹² छना कुचे परमेश्वरो वचन श्रींङे, असरदार दंङ अंऊ ला झुह्ट धारी तलवार बेहच़ी ला तेज तोह। दोई जहानो ए आत्माओ गांठ-गांठ ए, जोड़-जोड़ शत्‌ह लहच़ी, आर-पार तिरच़ा; दंङ सेहमो भावना ए विचार ओ जांच लहज़ा।

¹³ दंङ संसारो अंऊ ला चीज़ परमेश्वरो दोरच़ी ब्याके माह, पर छिल्ला हेंज़ी हेंदु जीवनो दोरच़ी लहसी तातंई, हेंदिंङ दोबि भत्ते कमो हिसाब रंड्री लेह्पोतो। दोऊ तुईज़ी भत्ते चीज़ारे अलसी ए प्रगट तोह।

हेंदु मोह्ड़े महा पुरोहित

¹⁴ यीशु अंऊ स्वर्गो हखा इलज़ा, दू परमेश्वरो योह शुह। दू हेंदु भत्ते तु यहुदी महापुरोहित शुह। झांह लेह अतंई हेनर दू विशवासा बि छोड़ेके पक्‍का रंङ साते बंङज़ोंई अपि हेंज़ी भत्ते तु तुईज़ी स्वीकार लाहतंई।

¹⁵ दि यहुदी महापुरोहित, अंऊ यीशु मसीह तोह, हेंदु हर इच्च़ा कमज़ोरी ञेंहच़ा। यीशु ज़ि हेंदु ठ्रोह भत्ते पाहठी परीक्षा ओ सामना लहरी, पर दोई छल्ले पाप माह लहरी।

¹⁶ झांह लेह अतंई, हेनर मोह्ड़े याहबारंङ साते परमेश्वरो कछंङ अपोंई, अंऊ मोह्ड़े दाह रंङ साते पिंङषा तोह, दोहपल परमेश्वर हेंदिंङ दया ए मोह्ड़े दाह कंबोतो, दंङ अपेहल हेंदिंङ ज़रूरत शोतो दोहपल हेंदु मदत लोहतो।