इब्रानियों 3 - लाहौली बाइबिल

यीशु मूसा बे मोह्ड़े

¹ झांह लेह, हे गिऊ प्यारे साथी विशवासी रे, केरे अंऊ स्वर्गा रिंङ दोरंङ साते शामिल शुहबिमी थल्जी बुलासी शुईं, मसीह यीशु टोईच़ी ध्यान रांही! दुह हेंदु थल्जी परमेश्वरो रूठे खबरो प्रेरित यहुदी महापुरोहित शुह।

² छना मूसा परमेश्वरो टबरातु बिचंङ भत्ते मीहतु सेवा लहज़िमी विशवासो जोगे तोहई। ध्वांए ठ्रोह यीशु ला परमेश्वरो थल्जी विशवासो जोगे तोहई, अच़ि दोबि दि कम लहज़िमी थल्जी अंङषी तते।

³ छना ठ्रोह चुम बणाएच़ा मालिका बि चुंङ ज़ि महस आदर खोकसी। ध्वांए ठ्रोह यीशु मूसा ओ बराबरी रिंङ महस आदरो जोगे तोह।

⁴ छना कुचे हर इच्च़ा घरबार अच़िया माह अच़िया ता बणाएच़ा शुहबी, पर अच़ि भत्ते धिर बणाच़ी शुह दू परमेश्वर शुह।

⁵ मूसा ता परमेश्वरो भत्ते घरबारो मीहतु सेवा लहज़िमी थल्जी विशवासो जोगे बंङज़िरी, अंऊ कम मूसा ए लहरी, दू सिर्फ दू गप्पातु सच्चा उदाहरण तोहई अंऊ परमेश्वरे तुंखा ओ थल्जी कोहतो।

⁶ पर मसीह योह रूपारिंङ एनोह टबरातु थल्जी विशवासो जोगे तोह दंङ दू टबर हेनर शुई, अगर हेनर हेंदु उम्मीद रिंङ हिम्मत ए घमण्ड लहज़ी जारी तोहनि ता, दंङ हेनर परमेश्वरो मीहरे शुहनि।

अविश्वासो थल्जी चेतावनी

⁷ झांह लेह छना परमेश्वरे एनोह पवित्र आत्माओ दोरच़ी कुहषी ततो, “अगर तोग केहच़ी परमेश्वरो सग रेड्रोंई,

⁸ दंङ दोऊ हुकुम मनेक्च़िमी दोरच़ी इन्कार थालंही, छना कि केहतु बाह-मेमेज़ि लाहतेर, अंऊ दोच़ी (सुनसान ठाहरीरिंङ) मरूस्थला रिंङ परीक्षा ओ मुक्का परमेश्वरो खिलाप विद्रोह लहरिर।”

⁹ दोर्तिंङ केहतु बाह-मेमेज़ि झुह्ट निज़ साल तचेक, गिऊ मोह्ड़े कम खंई ते ला चुनौती रें गिह्बी परखेक्तिर।

¹⁰ झांह लेह गेह दू टेमो मीहतंङ साते रोषेक्च़ा तोतोग, दंङ कुई, दोच़ी गिह्बी अस्वीकार लेह च़रतिर दंङ गेह छि लहच़िमी आज्ञा रांहषी तातग, दोबि लहज़िमी रंङ साते इंकार लोहवातेर।

¹¹ दंङ गेह रोषेक्च़ा ते कसम लहरिगा, कि दोरे, “दू ज़मीनारिंङ अंऊर गेह दोतिंङ नह्च़ी रंदेग दोर्तिंङ अपि माह जूंस।”

¹² हे गिऊ प्यारे साथी विशवासी रे, चोकस बंङज़ुंई, कि केहतु बिचंङ झांह ऊई ठ्रोह मदम ए अविश्वासी सेहम शुहबी माह जूंस, अंऊ श्रींङे परमेश्वरा बि ऊई तार रेन्ज़ा शोतो।

¹³ पर अपेहल तचेक हेनर दुह मुक्का ओ ध्याड़ा, अपि पवित्र शास्त्रा रिंङ “तोग कि ध्याड़ा” कुट्री तरपोंई, केहतु तुईज़ी तोह, हर ध्याड़ा इदि-अईदि बि याहब रम्मा लंहि, झांह शुहबी मेस केहतु बिचंङ अरिला पापो बहकावा रिंङ अंज़े ढीठ शुहचे योंई।

¹⁴ अगर हेनर हेंदु तुहई कि विशवासा बि थल मुक्का तचेक पक्‍का बणाके तोहनि, दंङ हेनर मसीहू सहभागी शुहचे योंई।

¹⁵ छना कि पवित्र शास्त्रारिंङ च़ेहसी तोह, “अगर तोग केहच़ी परमेश्वरो सग रेड्रातंई, दंङ दोऊ हुकुम मनेक्च़िमी दोरच़ी इन्कार थालंही, छना कि परीक्षा ओ मुक्का परमेश्वरो खिलाप विद्रोह लाहतेर।”

¹⁶ अरि तोईरे दोरे, अंऊ दोच़ी दोतु सग रेड्री ते ला दोतिंङ उकसाएक्तेर? दोरे इस्राएलो मीहरे तोईरे अंऊ दोतु मूसा ज़ि अगुवाई लहच़ी मिस्त्रो धकते हखा रैंज़ा हंदे।

¹⁷ झुह्ट निंज़ो साल तचेक परमेश्वर पक्‍का रूपारिंङ दोतंङ साते रोषेक्च़ा तोहई अंऊ दोच़ी पाप लहरिर, दंङ अंऊ दोरे (सुनसान ठहरि) मरूस्थला रिंङ सिऐ इलिर।

¹⁸ अपेहल परमेश्वरे पक्‍का रूपारिंङ घोषणा लहरी, कि अपेहल ला दू धरती रिंङ माह अपोंई अंऊर गेह दोतिंङ नह्च़ी रंड्रातग, दंङ दू पक्‍का रूपारिंङ दू मीहतु पाहठी कुट्रा अंऊ दोच़ी दोऊ भाषे माह लहरिर।

¹⁹ झांह लेह ञेंहच़ी खंड्रातंई कि दोरे एनोह अविश्वासो लहच़ी अपि मरतिरे।