इब्रानियों 2 - लाहौली बाइबिल

महान उद्धार

¹ झांह लेह हेंदिंङ अंऊ खबर खोकसते, दोऊ टोईच़ी रूठे रंङ ध्यान रंड्री जूंशी तोह। झांह शुहबी मेस कि हेनर सच्चाई ओ दोरच़ी भटकेगी योंई।

² परमेश्वरे स्वर्गदूता तु वहज़ा ज़ि कानून रांहषी तते, दोबि हेले साबित लहज़ी च़रति। दंङ अच़िला दुह कानूनो भाषे माह लहज़ाते, दोबि दोऊ हिसाबे सज़ा खोकसोतो।

³ झांह लेह अगर हेनर दि महान उद्धारो अनदेखी लोहनि ता दंङ पक्‍का रूपारिंङ हेंदिंङ ला सज़ा खोकसोतो। प्रभु ज़ि ऐनाह तुहई ए दि उद्धारो पाहठी कंङाते, दंङ अंऊ दोच़ी प्रभु दोरच़ी रेड्री तरेर, दुह मीहतु वहज़ा ज़ि हेंदु थल्जी दि साबित शुचि इलि।

⁴ दंङ परमेश्वर चिन्ह ए अद्धभुत कमो, महस पाहठी चमत्कारो दंङ पवित्र आत्माओ दोरच़ी मीहतिंङ वरदान रंड्रा दि खबरा बि ठीक ध्वांए साबित लहरी, छना दोई जुंज़ाते।

हेंदु उद्धार लहज़ा

⁵ परमेश्वरे दू अंजा संसारो अतु चर्चा हेंज़ी लेह लेहकी तोतोंई, स्वर्गदूतातु अधीन माह लहरी, बल्कि प्रभु यीशु अधीन लहरी।

⁶ पवित्रशास्त्र रिंङ दि च़ेहसी तोह, कि, “मीह छि शुह, कि कांह परमेश्वर दोऊ चिंद लहज़ातन? मीहरे छि शुरे कि काह, दोतु चिंद लहज़ातन या दोतु देखभाल लहज़ातन? दू मीह बे बढ़कर ऊई छल्ले माहतोर।

⁷ केई दोबि स्वर्गदूता बे कम जूंशी बणाएकातन; केई दोबि इच्च़ा रज्ज़ा ओ ठ्रोह महिमा ए आदर रांहषी तातन। दंङ दोबि एनोह गुह्ट्रो कमो टोईच़ी अधिकार रांहषी तातन।

⁸ केई दोबि भत्ते धिरो टोईच़ी अधिकार रांहषी तातन।” झांह लेह अपेहल परमेश्वरे भत्ते धिर मीहू अधीन लेह च़रति, दंङ दोई छल्ले माह छोड़क्ति, अंऊ मीहू अधीन तोहई। पर हेंज़ी खंड्री तरच़ातंई कि हेंतेग तचेक ला भत्ते धिर मीहू अधीन माह।

⁹ पर हेले दि तोह कि थोड़े टेमो थल्जी, यीशु दर्जा स्वर्गदूता बे थोड़े कम शुई। ताकि परमेश्वरो मोह्ड़े दाह रंङ साते यीशु भत्ते मीहतु थल्जी सिए योतो। दंङ छना यीशु ज़ि दुख उठाएती ए सिए इलि, परमेश्वरे दोबि महिमा ए आदर रांई।

¹⁰ परमेश्वरे दि भत्ते चीज़ारे बणाएति दंङ भत्ते चीज़ारे एनोह थल्जी सोटेगी ततो। झांह लेह, कि महस मीहतिंङ एनोह महिमा रिंङ शामिल लोहतो, परमेश्वरे दि फेंसला लेहपति कि दिए हेले शोतो कि प्रभु यीशु दुख उठाके सिद्ध शुहचे योतो अंऊ चरित्रा रिंङ परिपूर्ण तोह छना कुचे यीशु ए तोह अंऊ दोतिंङ उद्धारो हखा रैंज़ा शिलज़ा।

¹¹ छना कुचे अंऊ मीहतिंङ दोतु पापो दोरच़ी शुद्ध लहज़ा, दंङ अंऊ मीहरे दोतु पापो दोरच़ी शुद्ध लेह चरच़ि, दू भत्ते तु इच्च़ा ए बाह तोह; झांह लेह यीशु बि दोतिंङ एनोह युंङ रिंङ बणाएच़िमी थल्जी षेह्द माह अपा।

¹² दिऊ पाहठी मसीह ए परमेश्वर रंङ साते झांह कुट्रा कि “अंऊ रूठे कम केई गिऊ थल्जी लहसी तातन, दू गेह घेंङौ मीहतिंङ कमोग।, अपेहल दोरे कांह अराधना लहज़िमी थल्जी ठ्रोहका शोर, दोहपल गेह कांह महिमा लोहग।”

¹³ दोई यह्च़ा कुट्रा, “गेह दोऊ टोईच़ी विशवास लहज़ातग।” दंङ दोई दि ला कुट्रा।, “देर्तिंङ गेह दू मीहतंङ साते तोतोग अंऊ दोतिंङ परमेश्वरे गिह्बी रांहषी ततो, दोरे कटुतु ठ्रोह तोतोर।”

¹⁴ छना कुचे अपि परमेश्वरे कटुरे कुह्चे बुलाएक्तो, दोतु इच्च़ा मीहू फुक तोहई। यीशु एनाह ए हेंदु ठ्रोह मीहू रूप धारण लहरी ताकि दोऊ मौतो दोरच़ी मौतो टोईच़ी अधिकार तहच़ा शेताना बि नाश लोहतो।

¹⁵ झांह लेह प्रभु यीशु ज़ि दू मीहतु उद्धार लहरी अंऊ सिमी बेह्द च़ि शुहचे एनोह भत्ते जीवन परगरा तु बिताएच़ी लेहकी तोईरे।

¹⁶ छना कुचे दि साफ तोह कि दुह स्वर्गदूता तु मदत लहज़िमी थल्जी मशत, पर अब्राहमो खानदाना ओ मदत लहज़िमी थल्जी अंज़े शुह।

¹⁷ झांह लेह यीशु थल्जी दि जूंशी तोहई, कि हेंदु ठ्रोह भत्ते गप्पा रिंङ बणेंके योतो, ताकि दुह परमेश्वरो तुईज़ी हेंदु दयालु ए विशवासो जोगे यहुदी महापुरोहित बणेक्पोतो। दोहपल दोई झांह ठ्रोह बलिदान चढ़ाके तरपोतो, अंऊ दोरच़ी मीहतु पाप श्ताह शुचि इबि।

¹⁸ छना कुचे यीशु परीक्षा शुई दंङ दोई एनेह मुसीबत सहन लहरी। झांह लेह विशवास दोरे दुह मीहतु मदत लोहर, अंऊ परीक्षा रिंङ तोतोर।