इब्रानियों 13 - लाहौली बाइबिल

ग्रहणो जोगे सेवक

¹ केनातु बिचंङ रिंङ-न्वारे तु दाह लोहवा लंहि।

² पखला मीहतिंङ ला पौहना तु आदर कंड्री हिद तंही, अंऊ पौहना ए ज़रूरतमंद मुसाफिर तोतोर, छना कुचे दिऊ दोरच़ी अंयों मीहच़ी स्वर्गदूतातु आदर-सत्कार लहरिर।

³ कैदीतु झांह ठ्रोह हाल-चाल रूहक्पा लंहि, कि झांह ञेंहनि कि केरे ला दोतंङ साते कैद रिंङ तोतोंई। अंऊ मीहरे दुखी शवाहतोर, दोतु ला दि समझेके हाल-चाल रूहक्पा लंहि, कि केरे ला दोतु दुखारिंङ शामिल तोतोंई।

⁴ ब्याह भत्ते मीहच़ी आदरो गप्पा समझेक्सी जूंस, दंङ दि नातारिंङ मेच़ा-गगसा इदि-अई दिऊ थल्जी वफादार शुहबी जूंस। छना कुचे परमेश्वर, कुकम लहज़ा, ए ऊई मेच़िमी तंङ नाज़ायज़ नाता तहज़ा दोतु न्याय लोहतो।

⁵ केरे केनातु जीवन बि टंगा-ढबाहो लालचो दोरच़ी शत्‌ह तंही अंऊ केहतु दोर तोह दोरंङ ए खुश बंङज़ुंई। छना कुचे परमेश्वरे एनेह कुहषी ततो, “गेह कनिंङ अपेहला माह छोड़ेकपोग, दंङ कनिंङ अपेहला माह छोड़ेक्पोग।”

⁶ झांह लेह हेंज़ी विशवासा रंङ साते कुट्रातंई, “प्रभु, गिऊ मदत लहज़ा; गेह माह बेओग; गिह्बी छल्ले बेह्द माह षोह्दो कि अच़िला मीह गेरंङ साते छि लेह तरपोतो।”

⁷ अंऊ केहतु अगुवा तोईरे, दंङ अच़ि केतिंङ परमेश्वरो बचन सुनाच़ी तातोर, दोतिंङ हिद तंही; दंङ ध्याना रंङ साते दोतु जीवन खंई, कि छना दोच़ी एनोह जीवन‍‍ श्रींङमातोर, दंङ सिमी मुक्का तचेक परमेश्वरो विशवासा रिंङ पक्‍का बणेंके बंङज़िरे। झांह लेह हेंदिंङ ला परमेश्वरो टोईच़ी ध्वांए ठ्रोह विशवास लहज़ी लेह्पोतो छना दोच़ी लहसी तरेर।

⁸ यीशु मसीह मुतंङ ए तोग ए युगानयुग इच्च़ा ठ्रोह तोह, दू अपेहल ला माह लेहक्सतो।

⁹ छना कुचे यीशु मसीह अपेहल ला माह लेहक्सा, झांह लेह केतिंङ दि भत्ते खरकोई ए शत्‌ह-शत्‌ह शिक्षाओ भाषे लहज़ी जूंशी तोह अंऊ केतिंङ गलत अमरिंङ रैंज़ा शिलज़ा। छना कुचे केहतु सेहमो थल्जी दि रूठे तोह कि परमेश्वरो मोह्ड़े दाह ओ दोरच़ी पक्‍का शुहचे इलेंई, माह कि दू कानून मनेक्च़िमी रंङ साते अंऊ ज़ेइमी पाहठी तोह, ज़ेइमी-तुंङमिमी रिति रिवाज़ो अतु ला भला माह शुई।

¹⁰ अंऊ यहुदी पुरोहित यहुदी रिति-रिवाज़ो हिसाबे परमेश्वरो सेवा लहज़ातोर, दोतिंङ यीशु दोरच़ी लहसी बलिदानो दोरच़ी छल्ले फायदा माह खोकसा। पर हेंदिंङ फायदा खोकसा।

¹¹ तुहई कि वाईदा ओ हिसाबे यहुदी महापुरोहित हर साल अंऊ त्रैंई, घ्वांण तु शुहई इस्राएली मीहतु पापो थल्जी परम पवित्र ठाहरीरिंङ शिलज़ते।

¹² झांह लेह, यीशु ज़ि ला मीहतिंङ एनोह ए शुहई ओ दोरच़ी पवित्र लहज़िमी थल्जी यरूशलेम शहरो धकते दुख सहन लहरी दंङ सिए इलि।

¹³ झांह लेह अतंई हेंज़ी यहुदी कानून छोड़ेके यीशु टोईच़ी विशवास लोहनि दंङ तम्बू धकतेखा योंई अंऊर मीहरे तोतोर, छना दोच़ी निन्दा सहन लहरिर ध्वांए हेंज़ी ला निन्दा सहन लोहनि।

¹⁴ छना कुचे दि संसारारंङ हेंदु हमेशा ओ थल्जी बंङज़िमी घरबार माह, पर हेनर दू स्वर्गो घरबारो खोजारिंङ तोतोंई, अंऊ हमेशा ओ थल्जी तोह।

¹⁵ झांह लेह हेनर यीशु दोरच़ी हेंदु आहच़ि परमेश्वरो स्तुति ए अराधना लोहवा लोहनि। अंऊ परमेश्वरो थल्जी हेंदु बलिदान शुह।

¹⁶ केरे भलाई लहच़ी ए इदि-अई दिऊ मदत लहज़िमी थल्जी तेयार बंङज़ुंई, छना कुचे परमेश्वर झांह ठ्रोह बलिदाना रंङ साते खुश शवाह।

¹⁷ केनातु अगुवा तु मनेक्तुंई; दंङ दोतु अधीन बंङज़ेंई, दोरे केहतु टोईच़ी नज़र केहषी तातोर ताकि केरे भटकेगी माह जूंस। छना कुचे दोतिंङ एनोह सेवा ओ लेखा परमेश्वरा बि रंड्री पढ़ेक्पोतो; केरे दोऊ मनेक्तुंई, ताकि दू दि कम खुशी रंङ साते लोहतो, छना कुचे दुखी शुहचे सेवकाई लहज़िमी छल्ले फायदा माह।

प्रार्थना ओ निवेदन

¹⁸ ञेंहतु थल्जी प्रार्थना लोहवा लंहि, छना कुचे ञेंतिंङ भरोसा तोह कि ञेंहतु अन्तरात्मा साफ तोह; दंङ ञेंहच़ी छिला कम लहज़ातंई दू भत्ते कमरिंङ परमेश्वरो आदर लेह जुंज़ातंई।

¹⁹ प्रार्थना लहज़िमी थल्जी गेह केतिंङ ऊई ला याहब रमोग, ताकि गेह युरनाह यह्च़ा केहतु कछंङ अपि तरपोग।

आशीर्वाद

^20-21 शांति रंड्रा परमेश्वरे, हेंदु प्रभु यीशु बि सिए दोतंङ बिचंङ ज़ि यह्च़ा श्रींङमी लेह च़रति, केतिंङ दू भत्ते चीज़ातंङ साते भरपूर लोहतो अतु केतिंङ दोऊ हिटी पूरे लहज़िमी ज़रूरत तोह। यीशु मसीहू सामर्थो दोरच़ी दू केतिंङ दू भत्ते धिर उत्पन्न लोहतो अंऊ दोबि खुश लहज़ा। यीशु मोह्ड़े वाईदा रंङ साते त्रैंईतु मोह्ड़े रखवाला बणेंके इलज़ा, अंऊ त्रैंईतु तु झुण्डो टोईच़ी दोऊ शुहई दोरच़ी हमेशा ओ थल्जी वाईदा ओ स्थापना ओ छाप लगाएसी तोह। दोऊ महिमा हमेशा तचेक शुहवा लोहतो। अमीन।

²² हे गिऊ प्यारे साथी विशवासी रे, गेह केतंङ साते बिनती लहज़ातग, कि दि डाको उजाबा बि धीरज़ारंङ साते रेड्रुंई, अंऊ केतिंङ याहब रंड्रीमी थल्जी च़ेहसी शुह गेह केतिंङ दि डाकरिंङ महस गप्पा च़ेहसी माहतग।

²³ केतिंङ दि हिद शोतो कि, हेंदु विशवासी न्वा तीमुथियुस कैदो दोरच़ी रिहा शुहचे इलज़ा, दंङ अगर दू युरनाह अच़ा अति, दंङ गेह दोरंङ साते केहतु कछंङ दोहई अपोग।

²⁴ केनातु भत्ते अगुवा ए परमेश्वरो मीहतिंङ गिऊ नमस्कार कुंई। इतालिया देशो विशवासी रे केतिंङ नमस्कार कुट्रातोर।

²⁵ गेह प्रार्थना लहज़ातग कि, परमेश्वरो मोह्ड़े दाह केतंङ साते शुहवा लोहतो। अमीन।