इब्रानियों 11 - लाहौली बाइबिल

विशवासो उदाहरण

¹ विशवास दि गप्पो टोईच़ी भरोसा लहज़ी शुह कि हेंदिंङ पक्‍का रूपारिंङ दू ए खोकसोतो अतु हेंज़ी उम्मीद लहज़ातंई दंङ दि उम्मीद लहज़ी कि अंऊ चीज़ारे हेंज़ी खंड्री मरच़ातंई दू हेले रिंङ तोह।

² हेंदु बाह-मेमेतु झांह ठ्रोह विशवास तोहई। सिर्फ दिए वहज़ा ज़ि परमेश्वर दोतंङ साते खुश तोहई।

³ विशवासो दोरच़ी ए ञेंहच़ी ञेंच़ातंई, कि भत्ते संसारो रचना परमेश्वरो बचनो दोरच़ी शुहचे शुह। झांह लेह हेंज़ी छिल्ला खंड्रातंई दू चीज़ो दोरच़ी बणेषी शुह अतिंङ खंड्री मरपोंई।

⁴ विशवासो दोरच़ी ए हाबिले एनोह मोह्ड़े न्वा कैन बे रूठे बलिदान चढ़ाएक्ते; दंङ दोऊ बलिदानो दोरच़ी परमेश्वरे स्वीकार लहरी कि हाबिल इच्च़ा धर्मी मीह तोहई। छना कुचे परमेश्वर हाबिलो बलिदानो दोरच़ी खुश तोहई। हालांकि हाबिल सिए इलजी तोह, तांला हेनर परमेश्वरो टोईच़ी विशवास लहज़िमी पाहठी दोरंङ सिखेक्च़ातंई।

⁵ विशवासो दोरच़ी ए हनोक मिन्दु इच्च़ा मीह स्वर्गंङ श्रींङी ए उठाइगी रेंज़ा शिली, दंङ दुह सिए माह अतिंङ ला दोऊ सिए फुक माह खोकसिरी; छना कुचे विशवासो दोरच़ी परमेश्वरे दोबि स्वर्गंङ उठाके च़रति, दंङ स्वर्गंङ शिल्ज़िमी तुहई दोऊ पाहठी पवित्रशास्त्रारिंङ कुहषी तोह, कि हनोके परमेश्वरा बि खुश लाहते।

⁶ सिर्फ परमेश्वरो टोईच़ी विशवास लहज़िमी रंङ साते ए हेनर दोबि खुश लेह तरपोंई। छना कुचे परमेश्वरो कछंङ अंजा दोबि विशवास लहच़ी जूंशी तोह, कि दू तोह; दंङ दोरे अंऊ दोबि सच्चाई रंङ साते पेट्रातोर, दू दोतिंङ दोऊ ईनाम रंड्रा।

⁷ विशवासो दोरच़ी ए नूह बि इच्च़ा हढ डढो पाहठी परमेश्वरो दोरच़ी चेतावनी खोकसिरी अंऊ दोई अपेहल खांहषी माह तोई, तांला दोई चेतावनी खोक्शे परमेश्वरो हुकुमो भाषे लहरी, दंङ एनोह टबरातु बचावो थल्जी जहाज़ बणाएति, दंङ नूहो विशवास लहज़िमी तुहई, ऊई मीहरे अंऊ दोच़ी विशवास माह लहरिर, दोतिंङ दोषी ठहराएतिर दंङ दोरे डुमज़े सिए इलिर। नूह परमेश्वरो नज़रारिंङ धर्मी बणेंके इलि, छना कुचे दोई परमेश्वरो टोईच़ी विशवास लाहते।

⁸ विशवास लहज़िमी रंङ साते ए अब्राहमा बि इच्च़ा ठहरि रिंङ इबिमी थल्जी बुलाएकते, दंङ दू परमेश्वरो हुकुम मनेक्च़ा इच्च़ा झांह ठ्रोह ठहरि अच़ा इलि, अंऊर परमेश्वर दोबि दोऊ हिस्सा ओ ज़मीन रंड्रीमी तते, दंङ दोई दि माह ञेंहच़ाते कि दू अंऊखा इबि तहरे; तांला हुंच़ा इलि।

⁹ परमेश्वरे अंऊ ज़मीनो वाईदा लहसी तहरे, अब्राहम दू ठाहरीरिंङ इच्च़ा परदेशी ओ ठ्रोह तम्बू रिंङ बंङज़ाते। दोरंङ साते, दोऊ योह इसहाक ए पोत्र याकूब, अतिंङ परमेश्वरो दोरच़ी दू ए वाईदा खोकसा तोहई, दोरे ला तम्बू रिंङ बंङज़ातोर।

¹⁰ छना कुचे दू स्वर्गंङ इच्च़ा झांह ठ्रोह शहरंङ बंङज़िमी थल्जी रुमज़ा तोहई, अंऊ हमेशा बणेंके बंङज़ोतो, दंङ अतु रचना लहज़ा ए बणाएच़ा परमेश्वर शुह।

¹¹ विशवासो दोरच़ी ए अब्राहमो मेच़ा सारा ज़ि यंङषी ते खोकटुंङ शुहबिमी सामर्थ खोकसिरी; छना कुचे दोबि पूरा भरोसा तोहई कि परमेश्वरे दू ए लोहतो अतु दोई वाईदा लहसी ततो।

¹² अपेहल अब्राहम महस यांङदे शुहचे इलि दू सिमी तोहई, दोहपल दोऊ सर्गो कर तु बराबर ए समुंद्रो किनारा ओ शिरतु बराबर अनगिनत वंश पैदा शुई।

¹³ दि भत्ते मीहरे अच़ि परमेश्वरो टोईच़ी विशवास लहरी, दू चीज़ खोक्शे मेह सिए इलिर अतु वाईदा परमेश्वरे लहसी ततो। पर दोच़ी दि गप्पा तिंङ तुंखा अंजा टेमारिंङ शुहबिमी तंङरिर दंङ खुश शुचि इलिर। समझेकी इलिर कि परमेश्वर अंजा टेमारिंङ छि लोहतो। दोच़ी दि गप्पा ला ञेंई च़रतिर कि हेनर दि धरती ऊ टोईच़ी परदेशी ए पराया शुंई।

¹⁴ दि दू मीहतु पाहठी कंड्रा अंऊ दोच़ी कुट्रातोर कि दोरे दि संसारारंङ परदेशी शुरे। दोच़ी कंड्रातोर कि इच्च़ा झांह ठ्रोह देश खोकच़िमी उम्मीद लहज़ी लेहकी तोतोर अंऊ दोतु शोतो।

¹⁵ अगर दोरे दू देशो पाहठी सोचेक्च़ातोर अंऊर च़ि दोरे अंज़े शुरे दंङ दोरे दोरच़ी वापिस इबिमी मौका तोहई।

¹⁶ पर सच्चाई दि तोह कि दोरे इच्च़ा खास देशो उम्मीद लहज़ातेर, अंऊ स्वर्गंङ तोह। झांह लेह परमेश्वर दू मीहतु परमेश्वर शुहबिमी थल्जी खुश तोहई, छना कुचे दोई दोतु थल्जी इच्च़ा शहर तेयार लहसी ततो।

^17-19 अपेहल परमेश्वरे अब्राहमा बि परखेक्ति, दंङ विशवासा रंङ साते अब्राहम, इसहाका बि बलिदान लेह तेयार शुहचे इलि। इसहाक अब्राहमो इच्च़ा ए योह तोहई। परमेश्वरे दू योह पाहठी अब्राहमा रंङ साते वाईदा लहसी तहरे कि, “दि इसहाको दोरच़ी ए कांह खानदानो गिनती शोतो।” अब्राहमा बि पूरा भरोसा तोहई कि, कि परमेश्वर सिए दोतिंङ श्रींङमी लेह तरच़ा। दंङ झांह ठ्रोह अब्राहमा बि इसहाक सिए दोतु बिचंङ ज़ि यह्च़ा खोकसिरी।

²⁰ विशवासो दोरच़ी ए इसहाके एनोह झुह्ट योह याकूब ए एसाव बि वाईदा लहसी आशीष तु पाहठी आशीष रांई।

²¹ विशवासो दोरच़ी ए याकूबे सिमी मुक्का यूसुफो झुल्ला योह तु बिचंङ इच्च़ा-इच्च़ा बि आशीष रांई, दंङ एनोह लट्टी ओ सहारा लेहपच़े दोई परमेश्वरो अराधना लहरी।

²² विशवासो दोरच़ी ए यूसुफा ज़ि, अपेहल दू सिमी ए तोहई, दंङ इस्राएली मीहतंङ साते मिस्त्रो दोरच़ी हुंच़िमी गप्पा लहरी, देर तचेक कि दोई दोतिंङ हुकुम ला रांई कि। “अपेहल केरे मिस्त्र देशो दोरच़ी योंई, दंङ गिऊ सिमी थल गिऊ रूहस्तेर केनारंङ साते कनान देशो हखा रैंज़ा शिलांई।”

²³ पर मिस्त्र देशो रज्ज़ा ज़ि दि हुकुम रांई कि जेह्कपिमी मुक्का ए भत्तेर इस्राएली गंङ कटुतिंङ सचे च़रतुंई, दोहपल ला विशवास दोरच़ी ए मूसा ऊ याह-बाह ज़ि, दोबि, पैदा शुहचे थल षुमु लाह तचेक व्याके तरिर; छना कुचे दोच़ी खंईर कि दि खास कटु तोह, दंङ दोरे रज्ज़ा ओ विरोध लहज़िमी रंङ साते माह बैईरे।

²⁴ मिस्त्र देशो रज्ज़ा ओ मियोई मूसा ओ पालन-पोषण लाहते अपेहल मूसा मोह्ड़े शुहचे इलि, दंङ विशवासो दोरच़ी ए दोई दि माह जुंज़ाते कि मीहच़ी दोबि राजकुमारी ओ योह कोहर।

²⁵ दि दिऊ थल्जी शुई कि मूसा ज़ि थोड़े टेम पापो सुखो खुशी लेहप्च़िमी वहज़ा परमेश्वरो मीहतंङ साते दुख उठाती रूठे चेहती।

²⁶ मूसा ज़ि ञेंच़ाते कि मिस्त्र देशो खज़ाना ओ तुलना ओ बे मसीह बि दुख उठाती महस रूठे तोह, छना कुचे झांह लहज़िमी रंङ साते परमेश्वर दोबि स्वर्गो दोरच़ी ईनाम रमतो।

²⁷ विशवासो दोरच़ी रज्ज़ा ओ रोहष रंङ साते माह बेवा ते मूसा ज़ि मिस्त्र देश छोड़ेकी च़रति, छना कुचे दोई ञेंई च़रते कि दि झांह तोहई कि छना दोई परमेश्वरा बि तंङाते अंऊ तंङफिमी माह तोहई।

²⁸ विशवासो दोरच़ी ए मूसा ज़ि इस्राएली मीहतिंङ हुकुम रांई, कि दोरे पेतंङो डेऊढी रिंङ शुहई पुरच़ि ते फसह ओ त्याहरो रस्म पूरा लोहर, ताकि मुण्डो कटु नाश लहज़ा दूत, इस्राएलो मुण्डो कटु बि छल्ले लेह मरपोतो।

²⁹ विशवासो दोरच़ी ए इस्राएली मीहरे षेह्ई समुंद्रो नुरेच़ि झांह ठ्रोह अच़ा इलिरे, छना कि करचे धरतीऊ टोईच़ी जोज़ातेर; पर अपेहल मिस्त्र देशो सेना ध्वांए ठ्रोह इबि लेहतिर ता समुंद्रो ती तुहई कि ठ्रोह बहेच़ी लेहती दंङ दोतिंङ बहाके रैंज़ा शिली।

³⁰ छना कुचे इस्राएलो मीहच़ी परमेश्वरो टोईच़ी विशवास लहरिर, दिऊ थल्जी विशवासो दोरच़ी ए दोरे निह्ज ध्याड़ा रिंङ ए यरीहो भिती फेरे चक्कर लगाके च़रतिर, दंङ भिती दहचे इलि।

³¹ विशवासो दोरच़ी ए राहब कुकम लच़ाहढ मेच़िमी परमेश्वरो हुकुमो भाषे माह लहज़ाड़ा तंङ साते नाश माह शुई; छना कुचे दोई दू इस्राएली भेदी तिंङ शरण रांहषी तते अंऊ यरीहो शहरो भेद लेहपच़ी अंज़े तोईरे।

³² गिह्बी ऊई छल्ले कुट्रीमी ज़रूरत माह। अगर गेह झांह ठ्रोह मीहतु पाहठी कुट्री शुरू लोहग अपि गिदोन, बाराक, शमूएल ए दंङ नवी तु, दंङ गिऊ दोर टेम माह केषोतो।

³³ दोच़ी विशवासो दोरच़ी ए राज्य द्रक्शे; रूठे कम लहरिर; दंङ वाईदा ओ चीज़ारे खोकतिर, शेर ला दोतिंङ ज़े मरति।

³⁴ मेह ला दोतिंङ रोह्चे मरति, दंङ तलवारो धार ला दोतिंङ सच़ी मरति। इच्च़ा फेरा कमज़ोर शुहबी रंङ साते दोतिंङ यह्च़ा ताकतवर बणाके च़रतिर; लड़ाई रिंङ वीर हुंच़ा इलिरे; दंङ दोच़ी एनोह बैरीतु सेना पोकफी लहज़ी च़रतिर।

³⁵ रें मेच़िमी च़ि ऐनातु सिए मीहतिंङ यह्च़ा श्रींङे खोकतिर; अंयों ता घाह ज़ताह-ज़ताह सिए इलिर; पर दोरे आज़ाद शुहबिमी दोरच़ी इंकार लहज़ातेर छना कुचे दोरे एनोह विशवास छोडे़क्च़ी माह जुंज़ातेर। दोच़ी ञेंहच़ातोर कि दोरे सिए यह्च़ा‌‍ श्रींङे योर दोहपल दोरे परमेश्वरा रंङ साते हमेशा ओ थल्जी श्रींङे योर।

³⁶ रेह मीहतिंङ मज़ाक ए कोड़ा तु सामना लहज़ी लेहती पर रें तिंङ षंङणी रें छ़ुह्च़ी बन्दी घरबारंङ केहच़ी च़रतिर।

^37-38 दोतु बिचंङ रें विशवासी मीहतु टोईच़ी रघटु द्रले रैंईरे। दंङ रेहतिंङ आरारंङ साते फ्रक्शे झुह्ट टुकड़ा लेह च़रतिर, दोतिंङ तलवारे रें सच़ी च़रतिर। दोरे गरीब तोईरे, दंङ दोतंङ साते अत्याचार ए मदम बर्ताब लेह च़रतिर। दोरे त्रैंई ए छगढ़ो खल चोकसा ते देखा-नोखा, बणारिंङ ए गोह टोईच़ी, दंङ गुफारिंङ, दंङ धरतीऊ दोंङों बिचंङ भटकेपि लेहतिर।

³⁹ दि मदम संसार दि विशवासी तु जोगे माह तोहई विशवासो दोरच़ी दि भत्ते तु पाहठी परमेश्वर दोतंङ साते खुश तोह, तांला दोच़ी दू खोक्शे मरतिर अंऊ दू रंड्रीमी वाईदा परमेश्वरे दोतंङ साते लाहते।

⁴⁰ छना कुचे परमेश्वरो कछंङ सिर्फ दोतु थल्जी ए मशत, पर हेंदु थल्जी ला इच्च़ा रूठे योजना तोह। परमेश्वरे जुंज़ाते कि दोरे हेंदंङ साते ए सिद्ध बणाएषी जुंज़ा।